Yowani 11
11
Ekufa kwa Lasaro
1-2Mwa musi we'Betaniya mwábaa mutúla banyere babiri. Muuma mubo iwábaa Mariya, ne'unji iwábaa Marata na mushishawabo iwábaa Lasaro. Oyu Mariya, iwâkaa Enawetu emarashi kwa bihando, chasinda era kumahangula ne'mviri sai.
Rero oyu mushishawabo, era kulaka. 3Bushi no'ku, abu baliwabo babiri bera kwire bátuma mundu muuma mbu àyaa kubura Yesu kwa mwira wai àlakire.
4Mango Yesu ômvaa bacha, era kuteta mbu: «Obu bulwala bwai, butá bwa kumwita, si bwàmuikirire chasiya Ongo áye ngulu, nanyi nyi Mwana wai nyíye ngulu kurengera'bo.»
5Oyu Lasaro na'bu baliwabo babiri, Yesu ábaa atúla àbasimire ngachi. 6Si chiro bacha, mango ômvaa kwa Lasaro àlakire, era kuhuba kumala sinji suku ebiri era ábaa àli. 7Chasinda, era kubura ebanafunzi* bai mbu: «Tuyáa eYuteya kanji.»
8Nabo mbu: «Mukangirisi, si mwe'sine suku sine'sine mwe'Bayuta be'yi babáa báhonda kukuumanga emakoi! Rero, kanji yi wáhonda kuya?»
9Yesu era kubǎkula mbu: «Emureerere atúsa saa ekumi nê'biri. Rero, akaba emundu àngaba áenda emushi, àtangasitala bushi aséne kwa bulangare bo'muno butala. 10Si akaba àngaba áenda ebutufu, énde ásitala bushi énde ába àtachiri mwa bulangare.»
11Mango Yesu ábaa era àmalaa kuteta ei myasi, era kuhuba kubura ebanafunzi* bai mbu: «Mwira wetu Lasaro àonjire, si náya kumususa.»
12Nabo mbu: «Enawetu, akaba kuonjira ku anáonjire, kasi angálama.» 13Bátetaa bacha bushi beke báchichingaa mbu Yesu áteta mbu Lasaro kuonjira ku àonjire, no'ku ábaa áteta mbu Lasaro àfire mira.
14Yesu kukwera kubabura changanama mbu: «Lasaro àfire mira. 15Rero, nàmoire bushi nenyu, bushi mango àtowaa emuchima, nabáa ndáli'o. Byàbere bacha, chasiya munyêmerere mwa michima yenyu. Mwiree mwáira túye era àli!»
16Tomasi, ola básulaa esina mbu i'Maaha, era kwire ábura banafunzi* balikabo mbu: «Muíraa tuénde, netu túye kufira ala'uma na Enawetu!»
Yesu iwénde wâna ekalamo
17Mango Yesu áikaa mwa musi we'Betaniya, era kubuana Lasaro amála suku ene mwa shinda. 18Kutengera eBetaniya kuika eYerusalemu, byánabaa nga bilometere bihatu oshâo. 19Bushi no'ku, Bayuta banene bera kuika ala mwabo Marata na Mariya, báye kubasesa emichima, bushi ne'lufu lo'yu mushishawabo. 20Mango Marata ômvaa emwasi kwa Yesu àbahire, era kuya kumuhuukasa. Si Mariya, yeke era kushiba mwa nyumba.
21Marata álolire ku Yesu, era kwire ámubura mbu: «Enawetu! Akaba ùngabere anola, mushishawetu àtangafire! 22Si chiro bacha, anabe mwe'chine chihangi, nyìshi kwa choshi cha ungéma Ongo, angánakweresa'chi.»
23Yesu nai mbu: «Mushishawenyu ômwoka!»
24Marata nai mbu: «Nyìshi kwa àkômwoka mango ebafu boshi bàkômwoka kwa lusuku lwe'businda.»
25Yesu era kwire ámubura mbu: «Nyono, nyi nénde nômwola ebafu! Kanji nyi nénde nêresa ebandu ekalamo! Ola wànyêmerere mwa muchima wai kuika ànábone ekalamo, chiro angaba mbu àfire. 26Kanji chira mundu woshi ola uchíri muuma-uma anányemerere mwa muchima wai, atákafe chiro na hicha. Ei myasi, wèmerere'i?»
27Marata nai mbu: «Nechi Enawetu! Nemérere kwa woyo u'Kirisito*, kanji u'Mwana wa Ongo, ola bátetaa kwa akábaha mwa butala.»
28Ábere Marata era àmalaa kuteta ei myasi, era kuchiuma áya kwâmaala mulumuna wai Mariya. Chasinda, era kumubura mwa byooo mbu: «eMukangirisi era àli kuno, àkwâmaere.»
29Mariya ômvire bacha, unao-unao kuna kubanzukala, áye era Yesu ábaa àli. 30Mwe'bi bihangi, Yesu ábaa àtasa kwêngirira mwa musi, si ábaa àchiri ala Marata ámubuanaa mango áyaa kumuhuukasa. 31eBayuta ba bábaa bàli mwa nyumba ala'uma na Mariya kwa kumusesa emuchima, mango bálolaa kwa ábanzukala na áchiuma era butala, bera kumukulikira. Báiraa bacha, bushi báchichingaa mbu áya kulirira kwa shinda.
32Mariya era kuika ala Yesu ábaa àli. Mwa kunamulóla'ko, kuna kuya kuchihunda mwa bihando byai. Nai era kumubura mbu: «Enawetu! Akaba ùngabere anola, mushishawetu àtangafire!»
33Mango Yesu álolaa kwa Mariya ala'uma na'bu Bayuta bábaa bàmwêrekesise boshi bálira, echifufu chera kumusimba. Era kusibuka busese. 34Era kubusa mbu: «Ngai u'mwàmutabiraa?» Nabo mbu: «Enawetu! Bàhaa ulóle.»
35Yesu muna malira. 36Bushi no'ku, abu Bayuta bera kutangirisa báteta mbu: «Alibwe! Musene kwa abáa àmusimire ngachi!»
37Si bauma mubo, beke bera kutangirisa báteta mbu: «Ono mundu, si asíbulaa emeho me'muuta! Rero, chi chatúmaa átangika elufu lwa Lasaro!»
Yesu ômwola Lasaro
38Yesu echifufu chera kumusimba kanji, era kusibuka busese na áya kwa shinda. Ei shinda, lwábaa lukunda, no'kwa chiso chalo kwábaa kuhukirwe ekoi linene.
39Yesu era kwire áteta mbu: «Mukulaa eri koi.» Marata, mwali wabo Lasaro era kumwǎkula mbu: «Enawetu! Si suku ene sine àmala mwa shinda, kubeya ku'era ábeya!» 40Yesu nai mbu: «Ndakúburaa kwa ukêmerera mwa muchima wao, ungálola kwa buashi bwa Ongo?»
41Chasinda, bera kwire bákula lye'koi. Yesu era kutumbikisa kwa nguba na áteta mbu: «Tata, nákutonga bushi wànyǔmvire mira. 42Nyinéshi kanangana kwa wénde wányumva esuku soshi. Si nàtechire bacha bushi na bano bandu bànyisungwire, chasiya běmerere mwa michima yabo kwa woyo u'wánanyitumaa.»
43Ábere era àmalaa kuteta ei myasi, era kuteta na murenge munene mbu: «Lasaro! Tèngaa omola!»
44Unao-unao, wali Lasaro kuna kutenga mwe'ra shinda. Ebihando ne'maboko mai, byábaa bichiri bìminyirwe mwa mirembe era béndee bámina mwe'bafu. Ne'buso bwai, nabo bwábaa buchíri bùhukirwe ne'luchimba.
Yesu kukwera kubura abu bandu mbu: «Mumúboolaa esi njimba, mumureke áende.»
Elwango lwe'kwîta Yesu
(Mat 26:1-5; Mar 14:1-2; Luk 22:1-2)
45Bayuta banene mwa'ba bábahaa ala mwa Mariya, mango bálolaa kwa myasi era Yesu áiraa, bera kwire bámwemerera mwa michima yabo. 46Si bauma mubo, beke bera kuya kubura eBafarisayo* bya Yesu áiraa. 47Bushi no'ku, ebakulu-kulu be'bakuhanyi*, ne'Bafarisayo*, bera kubuanyanya eKarubanda ke'Bayuta*. Bera kutangirisa bábusanya mbu: «Betu! Kute twíree twáira? Si ono mundu énjire áira bisomerano binene! 48Rero, akaba tungamureka àendekere kunde áira bacha, ebandu boshi bangámwemerera mwa michima yabo. Na mwo'lu, eBaroma bangáika kutuhandulira luno Luhu lwa Ongo*, banálinde básikya ne'lubaa lwetu!»
49Mwa'ku Karubanda*, mwábaa mùli mundu muuma mbu i'Kayafa. Oyu Kayafa, iwábaa mukulu-kulu we'bakuhanyi* mwo'yu mwaka. Era kubura bálikabo mbu: «Mwabo, mutéte cha mwìshi! 50Mùteshi kwa ebandu boshi be'lubaa lwetu wa kusika, kùngaba kukulu mundu muuma áfe bushi nabo!» 51Oyu mwasi, Kayafa átateta'o kwa kuhonda kwai yeine. Si átetaa'o mu'njira ya kureba, bushi iwábaa mukulu-kulu we'bakuhanyi* mwo'yu mwaka. No'bu burebi, bwábaa bùtechire kwa Yesu angáfa bushi ne'lubaa lwe'Bayuta. 52Kanji atáfe bushi no'lu lubaa lweine oshâo, si bushi ne'banji bana ba Ongo ba báhandabanyire mwa binji bio, àbuanyanye'bo, bábe mwa buuma.
53Rero kutengera olu lusuku, abu bakulu-kulu be'Bayuta, bera kwire báisha elwango lwe'kwîta Yesu. 54Bushi no'ku, Yesu aténdee áchisungula changanama mwa Bayuta. Era kutenga aola na áya mu'musi muuma ola bénde bérika mbu Efuraimu. Oyu musi, ábaa atúla ofu ne'buyeye*. Era kubera'mo ala'uma ne'banafunzi* bai.
55Elusuku lukulu lwe'Pasaka* ye'Bayuta lwábaa lwáhonda kuika. Bushi no'ku, bandu banene bera kutangirisa bátenganga mwa misi yabo, bérukiranga eYerusalemu bábe eri bachíkomise* era muhondo olu lusuku lukulu luíke.
56Mango bábaa bera bàli mwa Luhu lwa Ongo*, bera kutangirisa báhonda Yesu. Bera kubusanya mbu: «Kute musene? Eri atánaike kwo'luno lusuku lukulu?»
57Ebakulu-kulu be'bakuhanyi*, ne'Bafarisayo* bábaa bàbwirire ebandu mira kwa akaba kuli ola ùngamenya ala Yesu àli, abáhaa kubabura báye kumusimba.
Айни замон обунашуда:
Yowani 11: tbt
Лаҳзаҳои махсус
Паҳн кунед
Нусха
Want to have your highlights saved across all your devices? Sign up or sign in
© 2017 Wycliffe Bible Translators, Inc.