Mikolo ye'ndumwa 4
4
Petero na Yowani bátongana era muhondo se'Karubanda
1Ábere Petero na Yowani banáchiri báhubanganyisa ebandu, unao-unao ebakuhanyi, ne'mukulu-kulu we'balanzi be'luhu lwa Ongo ala'uma ne'Basandukayo* bera kubapamukira'ko. 2Abu balume bábaa bàsibukire busese bushi esi ndumwa ebiri sa Yesu sábaa sénjire sákangirisa kwa Yesu omwókire, ne'kulosa kwa kasi ebafu boshi nabo bakánômoka. 3Bushi no'ku, bera kubasimba na bábauma mwa buroko kuikirira emishangya-shangya, bushi lwábaa lwera luolo-olo. 4Si banene mwa ba bábaa bômvirisa Petero na Yowani bera kwêmerera Yesu. Emuanjo we'bemeresi era kuikira ku bandu bangaíka ku byumbi bitano.
5Ábere mwe'i mishangya, ebakulu-kulu be'Bayuta, ne'bashamuka ala'uma ne'bakangirisi be'Mwaso*, boshi bera kubuanana mwa musi we'Yerusalemu. 6Ba bábaa bàli mwo'lu lubuanano bu babano: Anasi, iwábaa mukulu-kulu we'bakuhanyi*, na Kayafa, na Yowani, na Alesanduro ala'uma na banji bandu bo'mwa ngumo yo'yu mukulu-kulu we'bakuhanyi*. 7Ábere bera bemánzaa Petero na Yowani era muhondo sabo, bera kubabusa mbu: «Oyu mundu, mwàmulamise ku buashi buchiye, nesi kwe'sina lya nde?»
8Petero bushi ábaa ákoresibwa ne'Muchima Mubuya-buya, era kubǎkula mbu: «E mu bakulu-kulu be'Bayuta nenyu mu bashamuka mǔmvaa: 9Lwarero mwera mwátutonganya bushi ne'mabuya ma twàkorere ono mundu wabáa chirema. Kanji mwátubusa mu njira ichiye mu twàmulamise. 10Rero muboshi, ala'uma ne'Baisiraeli boshi, chechine chi mwiraa mwámenyerera: Ono mundu wèmenze era muhondo senyu anáhaalukire, ebuashi bwe'sina lya Yesu Kirisito we'Nasareti bu bwatúmire álama. No'yu Yesu, análi ola mwàmanyikaa kwa musalaba, si Ongo era kumwomola kutenga mwa bafu. 11Kanji oyu Yesu i'noyu, i'eMaanjiko Mabuya-buya màtechire era luulu sai mbu:
«‹Ekoi lya mwabo mu baimbi mwálangulaa,
li'lyáhubire koi lye'mutoloke mwa kuimbira'ko.›#4:11 Somaa Saburi 118:22.
12Bushi no'ku, ebununusi bùtangaboneka kurengera ku unji mundu. Bushi muno butala mutáli linji esina lisibya lya lìngalamya ebandu kureka esina lya Yesu lyeine.»
13Ebashamuka boshi bômvire bacha, bera kusanwa busese bushi ne'kulola kwa Petero na Yowani báchitetera busira buba, no'ku báchichingaa mbu esi ndumwa, banáli bandu mwa banji, kanji bàtanasomire. Bera kwire bámenyerera kwa kasi bábaa bátula na Yesu. 14Si kanji mwa kulola kwo'la mundu walámisibwaa eménze ala'uma na Petero na Yowani, bera kwire bánaina cha bàngachihuba kuteta. 15Abu bakulu-kulu kukwera kubabura mbu bàulukaa tanga mwa lubuanano, nabo bera kwishiba báya nama. 16Bera kutangirisa bábusanya mbu: «Kute tuíraa bano bandu? Bushi besha Yerusalemu boshi banêshi kanangana kwa búbairaa echisomerano cha chábaa. Netu tùtangaereresa twálaira mbu chìtabaa. 17Si mwa kuhonda oyu mwasi àtaendekeraa áhandabana mwa bandu, tùbananulaa ematwi kwa bàtachiereresaa báhambala era luulu sa Yesu.»
18Chasinda, bera kwâmaala Petero na Yowani. Bera kubachichika mbu: «Bushi mùtachiereresaa mwáteta nesi mwákangirisa ebandu era luulu so'yu Yesu!» 19Si Petero na Yowani bera kubǎkula mbu: «Chiye chi chikomire era muhondo sa Ongo: Ekubàtunda mwabo, nesi ekutunda Ongo? Cho! Mubeine mutétaa! 20Tubano, ekusirira kwa mwasi twàchûmviraa ne'kuchilorera'ko, chìtangaalikana chiro na hicha.»
21Ebakulu-kulu bômvire bacha, bera kuhuba kukaliira Petero na Yowani busese. Si bushi báinaa cha bàngemangira'ko chasiya babáchinjibuse, kanji bushi ebandu boshi bábaa bátonga Ongo kulola kwe'chi chisomerano bera kubalikula. 22Oyu mulume wálamisibwaa kwa chisomerano, ábaa era wa myaka inene ku mane.
Ebemeresi béma Ongo mwa malibuko
23Mango Petero na Yowani bábaa bera bàboolwaa, bera kuya era balikabo bábaa bàli. Bera kubabalikisisa emyasi yoshi era ebakulu-kulu be'bakuhanyi ala'uma ne'bashamuka báburaa'bo. 24Ebemeresi bômvire kwe'i myasi, boshi bera kuuma emurenge béma Ongo na muchima muuma mbu: «Enawetu, woyo u'wábumbaa enguba, ne'butala, ne'nyanja, na byoshi bya bitúla mubi. 25Kanji Enawetu, u'wéresaa hokulu wetu Tauti eMuchima Mubuya-buya wao mango átetaa mbu:
«‹Chi chénjire chátuma ebandu be'sinji mbaa báreta elwayo?
Na chi chìngatuma ebandu báya lwango mwa myasi era batáale?
26Ebami be'sinji mbaa báchibikaa ala'uma,
ebakulu-kulu nabo, bera kuya lwango lwa kulaira Enawetu,
ne'kuláira ola yeine álondolaa.›#4:25-26 Somaa Saburi 2:1-2.
27Kubinali, Heroti na Pondiyo Pilato ne'Baisiraeli ala'uma ne'bandu be'sinji mbaa babúananaa mwo'no musi bushi na kuya lwango lwa kulaira Yesu, i'muanda wao mubuya-buya ola wálondolaa kuba Kirisito*. 28Mwo'lu, ebandu báiraa bya weine wábaa wakúnganyise mira bíbe mwa buashi bwao. 29Rero Enawetu, abu bandu, weine u'ulólaa kwa bátulibusa. Si tubano tu baanda bao, utwéresaa emisi ye'kuhubanganya emwasi wao busira buba, 30ulóse ne'buashi bwao chasiya twínde twálamya ebalwala ne'kunde twáira binji bisomerano kwa buashi bwe'sina lye'muanda wao Mubuya-buya Yesu.»
31Ábere ebemeresi bamála kwéma, echisiki cha bábaa bàli'mo kuna kulingitana. Boshi bera kubona ebuashi bwe'Muchima Mubuya-buya, na bátangirisa báhubanganya eChinwa cha Ongo busira buba.
Ebemeresi báhangira ebindu byabo
32Ebemeresi boshi bábaa béte muchima muuma na mianyisa iuma. Kutali chiro na muuma mubo ola wéndee wáteta mbu byete bináli byai yeine. Si ebi bindu byoshi, byánabaa byabo. 33Endumwa sa Yesu nasi, emyasi ye'kuchilorera kwa Enawetu Yesu ômwokaa kutenga mwa bafu i'sábaa sénjire sánahambalira ebandu na buashi bunene. Ongo nai, era kunde ánabâhanyira boshi busese. 34Mwa bemeresi mutábaa chiro na muuma ola wéndee wáchifisa kandu, bushi ba bábaa béte emahwa nesi emanyumba, béndee bámausa, ne'kureta ebuteya bwa méndee máfa 35era muhondo se'ndumwa. Obu buteya, endumwa nasi sera kunde sábuabira ebandu kukulikana ne'bulae bwa chira muuma.
36Rero, mwa bemeresi mwábaa mutúla mundu muuma wo'mwa chirongo che'balawi mbu i'Yosefu mwesha kwa chisimba che'Chipuro, ola endumwa sa sulaa esina lya Baranaba, kukuteta mbu ola wénde wásesa ebandu emichima. 37Oyu Yosefu era kuusa ehwa lyai, ne'buteya bwa lyáfaa era kureta'bo era muhondo se'ndumwa.
Айни замон обунашуда:
Mikolo ye'ndumwa 4: tbt
Лаҳзаҳои махсус
Паҳн кунед
Нусха
Want to have your highlights saved across all your devices? Sign up or sign in
© 2017 Wycliffe Bible Translators, Inc.