Matie Welipiɛ
Welipiɛ
Matie sɔɔnyɔ yɔ 'awɔ? -A "ne 'se -tia Matie 'na "kukoweli -yi, -mɔ, sɛne 'wa lɛ -lɔ -gbɔ 'ɔɔ 'kɛle- lɛ 'Denaade ne. Matie 'ye 'wa la me 'lelee -lɔ Levi, Alefe yowli (Malke 2.14; Luke 5.27). Gɛlenya 'kogbɔ "sɔ 'glɛme 'na -bholo yɔ -me 'lelee -lɔ. Wlomɛnya -wa 'kamalea Izlayɛleyua 'na -lɛpo 'ye 'ɔ sa 'awɔ -lɔ. -Mɔ, Zufonya 'na dɛku, -ɔ sa Wlomɛnya 'na -lɛpo -wɛ, 'nyinyonolinonyɔ "yitɔ yɔ -lɔ. "Ɛ soɔ 'na 'nyɔkpɔ -wɛ, gble 'wa -gblo -lɔ. "Naa-, 'ɔ 'kwɛle Izlayɛleyua 'na -gblenya zɛ. -Mɔ, 'ɛ kɛ Zezu yɔ, 'ɔ 'pɔ- Matie 'na nyɛzedle. Zezu lɔ- -se 'ɔ "kɛ -lɛposalibhɔ -wɛ 'yi 'tale-, -se 'ɔ "kɛ 'ɔnɛɛ gɛlenyɔ "zo.
'Denaade ne "me, Matie sloa -lɔ -anye -gbɔ Zezu Kli, Izlayɛleyua 'na -Klɔgbɔnyɔ, "ne 'Fuɔnyɔ yɔ -lɔ, "ne 'ɔ 'bhale -lɔ Davide 'na -gligbɛ "ku. 'Ɔnɛɛ za Lagɔ -plele 'awɔ -lɔ bhlɛme 'na "guɔkwɔmenya weli kɔ -gbɔ Izlayɛleyua 'na 'Fuɔnyɔ yi 'ce -zlewɛ yi.
-Sɔɔdɛku Matie ci- lɛ 'ɔnɛɛ 'Denaade "ku ne, 'ɔ -bhulɛ Zezu 'ɔ 'to 'ɔ 'to 'wɔ 'na "kukoweli "ne Zezu 'nabhɛ 'na 'gwɛleweli (Matie 1–2). 'Ɔɔ -sloa -lɔ -anye -see Zaa Batise 'nyɛ- Zezu batɛme "ne -see Sata 'bea- Zezu "me (Matie 3.1–4.11). "Ne 'ɔɔ -tua 'lelee -lɔ -anye Zezu 'na zɛzɛ -ye 'ɔ 'pɔ 'awɔ -wɛ 'ylime "ne Zezu 'na weli -ye 'ɔ -bhulɛle 'awɔ Galiledu "me -wɛ (Matie 4.12–18.35). 'Denaade 'na 'wlizɔbhiɛledɛ "me, 'ye 'ɔ -tua -lɔ -anye -see Zezu -me Zeluzalɛme -mee 'ɔnɛɛ -gblenya 'lɔbhɔlo- klowa "klo "ne 'ɔ yi gluzɔ 'wlo -wɛ 'ylime (Matie 19.1–28.15). 'Ɛyi -wɛ 'ple- lɛ "bhuɔ ne, Zezu -nyɛ 'ɔnɛɛ gɛlenya "bhaa yi -lɔ Galile 'na tlo 'vli "ku sibhɔle- (Matie 28.16-20).
"Ɛ 'Denaade ne "me, 'ye Matie -bhulɛle -lɔ -anye -see Zezu sloa 'awɔ -li -nyɛ 'Kamalezikpɛ "me 'na weli. Matie bhulɛ "bhle weli -cibhi 'umgbu.
1. Zezu -sloa 'ɔnɛɛ gɛlenya zikpɛ "ku 'na weli 'ɛ -nyɛ 'Kamalezikpɛ "me 'na weli "bhaa -se 'ɔ "koa -see Lagɔ 'yɔbhɔ -wɛ "me 'noa- 'tee (Matie 5–7).
2. Zezu -sloa 'ɔnɛɛ gɛlenya -kogbɔ "sɔ -see 'wa "kɛ -glɔnya 'yliku 'Kamalezikpɛ "me 'na weli bhulɛ -wɛ (Matie 10.5-42).
3. Zezu 'pɔ- 'Kamalezikpɛ "me 'na nunɛ (Matie 13).
4. Zezu -bhulɛ 'nyinyonoli 'na weli "ne -see Lagɔ 'tale- 'yi nyɛzedle -kɛle -ylime (18).
5. Zezu -bhulɛ zikpɛ 'na "kubhiɛ -weli "ne -see 'ɔ "kɛ 'nyakpa 'klekle gbo bhlele- -wɛ (Matie 24.1-25).
-See 'wa "zo- "ne 'wa 'gbli- Zezu gbo 'wlime "ne 'wa 'lɔbhɔ- "ne 'ɔ "ku- -wɛ, Matie -bhulɛ -me 'lelee 'ɛnɛɛ weli (Matie 26.1-5). 'Bebhiɛlelilɛ -ye Zezu -nyɛ 'ɔnɛɛ gɛlenya "bhaa 'wa -li -wɛ, Matie -bhulɛ -me 'ɛnɛɛ weli (Matie 26.17-30). Zezu -me Zɛsemani 'na laabhueyi "me 'bhubhɔ -ka, Matie -bhulɛ -me 'lelee 'ɛnɛɛ weli (Matie 26.36-46). Matie nɛɛ: Zuda -no -lɔ ylo "ne 'ɔ yu -lɔ 'nyakpa kɔ plele- (Matie 26.14-16). Matie nɛɛ: Simɔ Piɛle -sɛ Zezu 'na lo -gbɔ 'ɔ "no -yi (Matie 26.31-35).
Matie nɛɛ 'wa sa- Zezu "ne 'wa -bhlelo gbo (Matie 27.1-2,11-44). 'Ɔ -bhulɛ -me 'lelee Zuda 'na "kukoweli (Matie 27.3-10). Matie -bhulɛ -me 'lelee -see Zezu 'na 'kwiɛ -ylɛle -wɛ 'na weli (Matie 27.45-64).
'Ɛnɛɛ 'wlisɛledɛ, Matie nɛɛ Zezu "ku- "ne 'ɔ 'wlo- gluzɔ (Matie 28.1-15). "Ne 'ɔnɛɛ gɛlenya "bhaa 'wa 'sibhɔle- "ku, "ne 'ɔ yua -lɔ 'lebhe -gbɔ 'wa me -se 'wa "kɛ Lagɔ 'na 'Denaade -glɔnya -sɛle (Matie 28.16-20).
Айни замон обунашуда:
Matie Welipiɛ: btg
Лаҳзаҳои махсус
Паҳн кунед
Нусха
Want to have your highlights saved across all your devices? Sign up or sign in
© 2024 (Active), Wycliffe Bible Translators, Inc. All rights reserved.