Ruuta 1
1
Elimelek da yaakəy anə hanyin ŋga Mo'ab
1.1-22
Yi ŋga Elimelek də Mo'ab
1Ma saa'itə nji mala guŋwanyin a ɗa ŋwaŋuunatii, kə ɗii maɗəfən an hanyin ka shaŋ. Tə'i əndə Bayitilaama an hanyin ŋga Yahuda. Ma cə da minaakəy da manjevənaakəy uuji ŋguyirən bəra'i, kə gi cə aanə hanyin ŋga Mo'ab ka banen. 2Ma əndəkəy, Elimelek nə ləməkəy, Na'omi nə ləm ŋga minaakəy. Mahəlon da Kiliyon nə manjevənatii. Əndə Efəratə də Bayitilaama an hanyin ŋga Yahuda nə cə. Makə mbu'i tii aanə hanyin ŋga Mo'ab, kə ndzaa tii asəkə əndə'i vəran davə. 3Ma Elimelek ŋgurii Na'omi, kə mbu'i saa'yaakəy, kə əntəgi cə, ca bwase ka ki da manjevənatə bəra'i. 4Kə fə'i uuji ŋguyiriitə bəra'i makki Mo'ab. Orəpa nə ləm ŋga rəŋwə, əndə'i əs Rutə nə ləmətə. Kə ndzaa tii davə ka ɗan fəzə pu'u. 5Ma daba'əkəy ha'ə, i Mahəlon da Kiliyon a məətəgi natii əs, Na'omi a ənəgi daanətə yadə ŋgurii da manjevənatə bəra'i.
Dzən ŋga i Na'omi da Rutə aa Bayitilaama
6Makə fii Na'omi o'i kə buurətə Yaawe ənjaakəy, kə vii cə ka tii zəma, wata təya maɗətə da maɗaɗiinatə an hanyin ŋga Mo'ab, təya ənə aanə hanyinatə. 7Kə maɗətə tii pat ka hatə nji tii da maɗaɗiinatə bəra'i, təya ŋgərə rəgwa ŋga ənəgin aanə hanyin ŋga Yahuda. 8Ma tii agi dzən, wata əŋki Na'omi ka maɗaɗiinatə: «Taa wu pat, wa kya ənəgərə aasii aaɓii məcə! Wa Yaawe a ɗa kon ŋga'əən makə sənə ɗii un ka ənjənə məətəgi da ka nyi əs. 9Wa Yaawe a vii kon ndzaan ka maka ma'yan, ca vii ka taa wu pat kuvatə.» Wata kya gaapətə tə tii kaa təya təkəgi. Makkiitə a ŋgəre ka uuratii, təya tuu. 10Əŋki tii ka ki: «Poshə ka ɗan ha'ə! Ka dzən niin atsaku aagi ənjaaku.»
11Əŋki Na'omi ka tii: «Ənəm səgon, manjevənaaki! Ka ɗa mi nuun ka shin atsakya? Ma nuun ka nəhən ma'ə nyi ka pon bahə uupa manjeviitə na ŋgərə tuun kwa? 12Ənəm səgon manjevənaaki, ənəm səgon kə uugi nyi iirən, poshə nyi bahə ŋgərə ŋgurə ma'ə. Taa kə bii nyi ka nəki kaa nya guŋu da ŋgurə ənshin, nya uupa manjevən ma'ə, 13aa ka naanagin nuun ka fəɗə ŋguyirən kona gəra tə tii təya gərə zəku'i kwa? Aa'a'ə poshə ka ɗan ha'ə manjevənaaki. Maɓətəsəkaaki pale ka non, acii kə bwase Yaawe ka nyi daanəki.»
14Wata makkiitə a ənə ka ŋgəre ka uuratii, təya tuu. Ma daba'əkəy, Orəpa a dzə, kya gapətə tə sərəhwatii, amma ma Rutə, kə ənəgi ki aɓiitə. 15Na'omi a ba ka ki: tsaamuu, kə ənyi ŋuzhi kuŋu əjimaaku aagi ənjatə da əntaŋfənyinatə. Nə'u tə ŋuzhi kuŋu əjimaaku! 16Amma Rutə a ba ka ki: «gaha ciŋ ka ban ka nyi palən nya bwase ka hə.
Hatə gi hə aadəvə pat, ka dzən nə nyi aadəvə.
Hatə nii kwa baa pat, ka baan nə nyi davə.
Ma ənjaaku, ənjaaki ndzaa nə tii.
Ma Əntaŋfwaaku, Əntaŋfwaaki ndzaanəkəy.
17Hatə nii kwa əntə, nyi maa davə nii kya əntə.
Ənja ŋgəɗəgi tə nyi davə.
Wa Yaawe a dzalə tə nyi də maɗuun dzalən, maɗa kə bwase nyi ka hə.
Acii poshə uushə ca təke kaaŋwə maɗaam wa.»
18Makə fii Na'omi waɓəətsa, wata kya bwase ka ban ka Rutə dzən satə.
19Wata təya palə kyakya'ə bəra'i kura'ə aa Bayitilaama. Mbu'unatii aadəvə, kə hunne ka ənjə vəranəkəy. Makkin a ləgwa, əŋki tii: «Ya saŋ Na'omi ətsə tanyi nii?»
20Kya jikə ka tii: «gona 'wa tə nyi Na'omi (mitə moɗasəkə) ma'ə, 'wam tə nyi Mara, (mitə maɓətəsəka) acii kə kavə Əndə Baawəɗa tə nyi aagi maɗuun ŋgəra'wa. 21Da məghərəvənaaki dzəggi nyi gan, amma Yaawe a ənyapaagi də nyi ciin zaɓə, yadə taa mi. Aa ŋga mi ɗii nə 'wan tə nyi Na'omi ma'ə, makə kə ɗii Əndə Baawəɗa ka nyi bwaya bwayaan, ca kagərə tə nyi aagi ŋgəra'wa?»
22Də ha'ə ənyagi i Na'omi da maɗanatə Rutə, mitə Mo'ab, an hanyin ŋga Mo'ab. Saa'i ŋga slən cifan ŋga matsakətsakə aləkəmaarə mbu'i tii aa Bayitilaama.
Айни замон обунашуда:
Ruuta 1: Ruth BGD
Лаҳзаҳои махсус
Паҳн кунед
Нусха
Want to have your highlights saved across all your devices? Sign up or sign in
All rights reserved