Apostoloin ruavot 14
14
Puavil da Varnava Ikonies
1Ikonies Puavil da Varnava mugaže mendih jevreilöin sinagougah i paistih muga, ga suuri joukko jevreilöi da gretsieläzii rubei uskomah. 2No net jevreit, kudamat ei uskottu, yllytettih toizih rahvahih kuulujii da kiättih heijän mielii uskovellii vastah. 3Puavil da Varnava sendäh vägihätken pyzyttih sit linnas. Hyö julgieh paistih Ižändäs. Ižändy andoi heile vägie luadie tunnusruadoloi da kummii da sil ozutti, gu heijän sanat Hänen hyvyöh näh ollah tovet.
4Linnan rahvas jagavuttih kahteh joukkoh: yhtet oldih jevreilöin, toizet apostoloin puolel. 5Jevreit da muu linnan rahvas omien piämiehienke tahtottih mennä apostoloih käzin da kivittiä heidy. 6No ku apostolat tiijustettih se, hyö pajettih Likaonien muah. Sie Listran da Derben linnois da niilöis ymbäri 7hyö saneltih jevangeliedu.
Puavil da Varnava Listras
8Listras oli mies, kudaman jallat oldih väittömät. Häi oli rambu roindua myö, nikonzu ei kävellyh. 9Mies istui da kuundeli Puavilan paginua. Puavil kačahtih häneh i nägi, miehel oli usko, gu häi voibi piästä tervehekse. 10Puavil kovah sanoi hänele: «Nouze jalloilleh!» Mies hyppäi pystyi da lähti astumah.
11Ku rahvas nähtih, midä luadii Puavil, hyö ruvettih kirgumah Likaonien kielel: «Jumalat ristikanzan nävös heityttih meijän luo!» 12Varnavua hyö sanottih Zevsakse, a Puavilua Germesakse, ku heis kahtes Puavil oli se, kudai pagizi. 13Linnan ulgopuolel oli Zevsan pyhäkodi. Sen pyhäkoin pappi toi häkkilöi da venkat veriän luo, ku yhtes rahvahanke andua net tulluzile žertvakse.
14No konzu apostolat Varnava da Puavil kuultih tämä, hyö revitettih soba ryndähil da juostih pihale rahvahan keskeh iänenke: 15«Miehet, mikse työ nenga ruatto? Myögi olemmo ristikanzat, juuri moizet kui työ. Myö sanelemmo teile jevangeliedu, ku työ kiändyzittö nenis tyhjis jumalois elävän Jumalan puoleh, kudai on luadinuh taivahan, muan, meren dai kai, midä niilöis on. 16Mennyzien polvien aigua Häi andoi kaikile muan rahvahile astuo omii dorogoi myö, 17hos heittelemättäh juohatteli ičes omil hyvil ruadoloil: Häi andau teile vetty taivahaspäi da vil՚l՚an omal aijal, Häi syöttäy teidy kylläl da täyttäy teijän sydämet ilol.» 18Nämil sanoil hyö odva pieteltih rahvastu žertvan annandas heile.
19No Antiohies da Ikoniespäi tuli jevreidy, kudamat kiännettih rahvas omah puoleh. Hyö kivitettih Puavilua da ribaitettih linnan seinän tuakse, ku smietittih händy kuolluokse. 20Konzu opastujat kerävyttih Puavilas ymbäri, häi nouzi jalloilleh da meni järilleh linnah. Tossupiänny hyö Varnavanke lähtiettih siepäi Derbeh.
Puavil da Varnava tullah järilleh Siirien Antiohieh
21Derbes Puavil da Varnava saneltih jevangeliedu i äijii luajittih opastujikse. Sit hyö tuldih järilleh Listrah, Ikonieh da Antiohieh#14:21 Pisidien Antiohieh., 22lujendettih opastujien sydämii da kehitettih heidy pyzymäh uskos. Hyö sanottih: «Jumalan valdukundah matkates meil pidäy mennä äijis ahtistuksis läbi.» 23Joga uskojien kanzukunnale hyö vallittih vahnimat, molittihes da pyhitettih i sit jätettih heidy kaikkii Ižändän käzih, Hänen, kudamah hyö nygöi uskottih.
24Sit Puavil da Varnava mendih Pisidien muan läbi i tuldih Pamfilieh. 25Hyö saneltih Jumalan sanua Perges da sit jatkettih matkua Attalieh. 26Siepäi hyö vetty myö mendih järilleh Antiohieh#14:26 Siirien Antiohieh., kus heidy oli annettu Jumalan armole da työtty ruadamah sidä ruaduo, kudaman hyö nygöi loppiettih. 27Antiohieh tulduu hyö kerättih uskojien kanzukundu da saneltih heile, mittumii suurii ruadoloi Jumal luadii heijän kauti, i kui Häi Jumalua tundemattomile rahvahile avai uksen uskoh. 28Hyö oldih sie vägikodvan opastujienke.
Айни замон обунашуда:
Apostoloin ruavot 14: LIVVI
Лаҳзаҳои махсус
Паҳн кунед
Нусха
Want to have your highlights saved across all your devices? Sign up or sign in
(c) Biblienkiännändyinstituuttu, Helsinki 2003