Matiye 12
12
Yiezu àá lé ńvũùnín sí bòo
Mar 2.23-28; Lik 6.1-5
1Ɛ́ hɔ́pe wihĩ́ sɔ hũn, ɛ́ ɓɛ́ Zuifuɓɛ ńvũùnín sí dɔ̀ zɔn, ɛ́ Yiezu ɛ́ zɔn ɛ́ mún dɔ̀ ɛ̀ cánkɛ. Ɛ́ piè kɛ̀ránzɛ̀ɓɛ̀ ɛ́ hɔ́ hĩni ɛ́ ɓé, ɛ́ ɓɛ́ khie ɛ́ hɔ̀ dínlɔ́ lɛ bɔn dɛ̃̀ ɲúuhɛ̃ ɛ̀ khè ɛ̀ pũ̀mɛ ɓɛ́ níhĩ́ hũn ɛ̀ lɛ̀. 2Ɛ́ ɓɛ́ Farizĩɛɓɛ ɛ́ mɔn hɔ̀ ɛ́ ɓɛ́ khie ɛ́ bie àá Yiezu ɛ́ nɛ làa: «Húi, kɔ̀ kɛ̀ránzɛ̀ɓɛ̀ ɛ́ hɔ̀ bòo lɛ yáà wé lé ńvũùnín sí zɔǹ ɛ̀ wé.» 3Ɛ́ Yiezu ɛ́ zɔn kɔ̃́niɛ ɓɛ̀ nɛ làa: «Mí bìe ɛ́ yí kɛ̀rán hɔ́ bòo lɛ á Daviide ɛ́ hàarí wɔ́ pɛ̃̀hṹ lɛ ɛ́ hɔ́ hĩni dàa hàarí ɛ́ ɔ̀pe àá ɓɛ́lɛ ɛ́ hàarí bɔ̀ɓán àá ɔ́ ɛ̀ ɓé? 4À hàarí yòó zɔn lè Dɔfĩn zũ-bɛhɔ́, àpe àá ɓán ńkɔhĩ́; ɛ́ zɔn khuie hɔ̀ búrú lɛ bɔ̀sí ɛ́ lɛ́ Dɔfĩn ɛ́ lɛ̀, hɔ́rɔsí kɛ́ hɔ́ kè làndɛ́ ɛ́ lò den nɛ ɓɛ yí fɔ́ɓán ɛ̀ ɓɛ̀ lɛ̀ hɔ̀ búrú sɔ wɛ̀. Dɔfĩn khɛ̃́ndàariè ɓɛ́ dòonún ɛ́ temu dɛ̀ hɔ̀ ɛ́ wóò lɛ̀. 5Yée kɛ́ mí iè bìe ɛ́ yí kɛ̀rán ɔ́ Moyiize làndɛ́ vɛ̃hṹ hũn kɛ́ lé ńvũùnín sí zɔǹ, ɛ̀ ɓɛ̀ Dɔfĩn khɛ̃́ndàariè ɛ́ wóò zɔ tɛ́ hɔ́ tɔnlɔ́ lè Dɔfĩn zũ-bɛhɔ́ hũn? Ɛ́ ɓɛ́ iè pe ɛ́ wóò yáakɛ hɔ̀ ńvũùnín sí làndɛ́ kɛ̀amu hɔ́rɔsí kɛ́ ɓɛ́ lò yí bìe lɛ ɛ́ wé khe Dɔfĩn híɛhɔ́ wɛ̀. 6Ɛ́ ń den nin bie lɛ́ miɛ ǹ nɛ ape lɛ ɛ́ wi hũ̀nún ɛ́ pɔ le Dɔfĩn zũ-bɛhɔ́! 7Ɛ́ Dɔfĩn ɛ́ bie mí bienù vɛ̃hṹ hũn ɛ́ nɛ làa: “Lɛ ɛ̀ mì wóo mi ɓán miinɛ̀ ɛ́ ń wɛ ɛ́ pɔ́ ɓɛ bìlaàsiè lɛ wóò ɓé ɛ̀ wé àá miyiɛ́ ɛ̀ lɛ́ mi ǹ.” Kɛ́ mí hṹn dũ lepe bienù sɔ sí ɲún, ɛ́ mí hṹn yá ɓén bie nɛ ɓɛpe nìnbirìe lɛ ɛ́ yí wé hɔ́ bɔ̀koohɔ́ dɔ̀, ɛ́ wɔ́ khɔn wɛ̀. 8Iè hɔ̀ lɛ, ɛ́ ńpee nìnbírɔ Zuú ɛ́ iè lè ńvũùnín sí Ɲunsɔ.»
À nùún dɔ̀ lɛ núnú lɛ̀ wiɛnírɔ́
Mar 3.1-6; Lik 6.6-11
9Ɛ́ Yiezu khie lɔ́ yán ɛ́ khie van zɔn ɓɛ́ ńkóoɓánlɔ̀n zũnù dɔ̀ hũn. 10Ɛ̀ nùún dɔ̀ lɛ núnú lɛ̀ ɛ́ hṹn zɔn wi yán. Ɛ́ ɓɛ́ Farizĩɛɓɛ lɛ wi yán ɛ́ hṹn bòo lɛ ɛ́ ɓɛ bènin ɛ̀ dàá bie nɛ Yiezu wɔ́ khɔn ɛ̀ cɛ̀. Ɛ́ ɓɛ́ zɔn ɔ̀ diènin nɛ làa: «Kìe làndɛ́ wṹn lɔ̀n, ɛ́ nìnbírɔ sũ̀n dɛ̀ dɔrɔ ɛ́ wiɛní ńvũùnín sí zɔǹ?» 11Ɛ́ Yiezu ɛ́ zɔn kɔ̃́niɛ ɓɛ̀ nɛ làa: «Mìpe mì tĩ́ihṹ kɛ́ á dɔ̀ ɛ́ iè pirɔ wìcóoní á dàa, kɛ́ á pirɔ sɔ ɛ́ kùerɛ zɔn kṹun lɛ ni lè ńvũùnín sí zɔǹ, ɛ́ ɓàasɔ ɛ́ wìe yá vɛ́ leń ɔ́ ɛ́ lé yán? 12Ɛ́ nìnbírɔ ɛ́ den bòo tṹ pirɔ lò! Ɛ́ hɔ́ iè bòo lɛ te mí yiè ɛ̀ kè wóo wé bòo lɛ sãa lè ńvũùnín sí zɔn.» 13Ɛ̀ Yiezu ɛ́ khie bie lɛ́ á nùún sɔ ǹ nɛ làa: «Niiní kɔ́ núnú líení.» Á niiniɛ lè ɛ́ líeniɛ ɛ́ lé yòó wan ɛ́ dɛ̃̀ sãa kɛ̀a le sí kɛ́. 14Ɛ́ ɓɛ́ Farizĩɛɓɛ ɛ́ zɔn lɔ́ ɛ́ van lɔ́ lè ɛ́ hɔ̀ bòo lɛ ɛ́ ɓɛ wé ɛ̀ dàá lɛ́ Yiezu ɛ̀ ɓɛ̀ ɓé ɛ̀ cɛ̀.
À tɔnkɛrɔ lɛ ɛ́ Dɔfĩn ɛ́ munɛ bòo
15Ɛ́ Yiezu dũnɛ hɔ̀ bòo lɛ ɓɛ́ Farizĩɛɓɛ ɛ́ cɛ̀ ɛ́ ɓɛ wé, á zɔn lɔ́ yán. Ɛ́ nìnbí-kuì ɛ́ khie bɔ̀ piè máahṹ, á wiɛniɛ ɓɛ̀ dɔriè ɓɛ́kùi. 16Kɛ́ á den wóò bie hièní ɛ̀ lɛ́ ɓà ǹ nɛ ɓɛ bí lɛ́ nɛ nìnbirìe dɔ̀ ɛ̀ dũń mí wɛ̀. 17Bòo lɛ ɛ́ wé à Dɔfĩn bɔ̀háanírɔ Ezayi bòo lɛ á bie ɛ̀ dàá ɲunù ɛ̀ tí. À hàarí bie nɛ Dɔfĩn ɛ́ nɛ làa:
18 «Àpe lɛ iè niǹ tɔntɛ́ lɛ ɛ́ ń munɛ,
À iè ɔ̀pe ɛ́ ń wɛ, à iè ɔ̀pe bòo hũn ɛ́ ń dàa ɛ́ ń wɛ niǹte.
Ń ɓén síɛní niǹ Mɛkɛ̃ni pànkɛ́ piè lɔ̀n,
Á ɛ́ bie hɔ bòo lɛ ɛ́ cã̀aní bòo ɛ́ lɛ́ hɔ́ dàa míkùi nìɛ ǹ.
19 À yá ɓén fi àá nìnbírɔ, à yá ɓén wũamɛkɛ wɛ̀.
Ɛ̀ nìnbírɔ ɛ́ yá ɓén ɲí piè ɲunù hɔ̀ fɔ́hĩ́ hũn wɛ̀.
20 À yá ɓén háa lé kã́anú lɛ ɛ́ háa cɔ́ wɛ̀.
À yá ɓén ɓé lé pɛ̃̀ntĩní lɛ ɛ́ hí cɔ́ wɛ̀.
Ɛ́ sí iè pe á ɓén wé kɛ̀amu fúu kɛ́ yí bòo lɛ ɛ́ hɔ́ cã̀anírɔ́ van yú hɔ́ pànkɛ́ hɔ̀ bòo míkùi lɔ̀n.
21 Ɛ́ ɓɛ́ nìnbirìe ɓɛ́kùi ɛ́ ɓén mìí ɓɛ́ tĩɛ̀ ɛ́ bè piè lɔ̀n.»
Yiezu ɛ́ pànkɛ́ wi pɔ Situanɛ
Mar 3.22-30; Lik 11.14-23
22Ɛ́ nìɛ dɔ̀ ɛ́ van dàa nùún dɔ̀ lɛ ɛ́ ɓɛ́ ńɲíkĩ́nìɛ ɛ́ wi nin, lɛ lɛ́ ɛ́ piè yìe muiɛ à lò yí dɛ̀ yáà bie ɛ́ dàa ɓen yú Yiezu. Ɛ́ Yiezu wiɛniɛ ɔ̀ nùún sɔ, á yú bie à lò ɛ́ yiè loo bòo. 23Ɛ́ ɓɛ́ nìzã̀amáa ɛ́ hɔ́ hɛ̀ yòokɛa lɔ̀n ɛ́ ɓɛ́ bie nɛ làa: «Àpe nùún lɛ ɛ́ sũǹ yí-e pe Daviide Zuú?» 24Ɛ́ hɔ́ lɛ ɛ́ ɓɛ́ Farizĩɛɓɛ ɛ́ ɲɛ́ hɔ́, ɛ́ ɓɛ́ nɛ: «Àpe nùún sɔ lɛ ɛ́ iè Bɛlizebuule lɛ iè ɓɛ̀ ńɲíkĩ́nìɛ bɛ́zuú pànkɛ́ á dàa ɓɛ̀ ńɲíkĩ́nìɛ ɛ̀ ɲɛ.» 25Kɛ́ Yiezu den dũ peɓɛ̀ hũn bòo, á zɔn bie lɛ́ ɓà ǹ ɛ́ nɛ làa: «Kɛ́ bɛ́záanú dɔ̀ nìɛ ɛ́ hĩ́nà ɛ́ hɔ̀ hĩɛ̀ tɛ́ ɓán hũn, ɛ́ lépe bɛ́záanú sɔ ɛ́ yaa lò. Ɛ̀ kɛ́ lóo dɔ̀ nìɛ tàá zũnù nìɛ ɛ́ hĩ́nà ɛ́ hɔ̀ hĩɛ̀ tɛ́ ɓán hũn, ɛ̀ peɓɛ̀ lóo tàá ɓà zũnù sɔ ɛ́ yí dɛ̀ yá bĩní wé yán lò. 26Kɛ́ Sitũanɛ ɛ́ ɓen Sitũanɛ ɛ̀ ɲɛ, à iè wie ɛ́ fi àá míte lò. Ɛ́ piè bɛ́záanú ɛ́ yí dɛ̀ yá bĩní wé yán lò. 27Kɛ́ ńpe ɛ́ ɓen iè ɔ̀ Bɛlizebuule pànkɛ́ ɛ́ ń dàa ɛ́ ɓɛ̀ ńɲíkĩ́nìɛ ɛ̀ ɲɛ, ɛ̀ mìpe mì nìɛ ɛ́ iè wieni pànkɛ́ ɛ́ ɓɛ́ dàa wóò ɲɛ ɓɛ? Ɛ́ sí iè hɔ̀pe ɛ́ ɓɛ́pe mì nìɛ dàa te mi lìe ɛ́ ɓén yìrí lè. 28Kɛ́ lé ɓen iè Mɛkɛ̃n-Sãanu ɛ́ ń dàa ɛ́ ɓɛ̀ ńɲíkĩ́nìɛ ɛ̀ ɲɛ, ɛ̀ Dɔfĩn bɛ́záanú ɛ́ iè pe wo ɓen dɛ̃un miɛ vɔ́.
29Nìnbírɔ ɛ́ yí dɛ̀ yá vɛ́ zɔ nìnbírɔ lɛ pànkɛ́ wi zũnù ɛ́ zɔ khui piè tĩ̀ɛ kɛ́ á yí cɛ ɓàasɔ vé wɛ̀. À ɓen can ɔ̀ vɔ́, á den ɛ́ khíi khui piè zũnù tĩ̀ɛ lò. 30Ɛ́ nìnbírɔ kɛ́ á mí àá mi, à iè wìe ɛ́ pɛ̃́ niǹ bòo; àlɛ kɛ́ á yá nìn sĩiní ɛ̀ kè páaní bè ɓɛ̀ nìnbirìe Dɔfĩn wṹn lɔ̀n ɛ́ iè wìe ɛ́ ɓɛ̀ vĩ́iní. 31Ɛ́ sí iè hɔ̀pe ɛ́ ń dàa niǹ khɛ́ hɔ́ lɛ́ miɛ ǹ nɛ ɓɛ nìnbirìe bòo lɛ ɛ́ ɓɛ́ wóò dàá tòokɛ Dɔfĩn míkùi ɛ́ Dɔfĩn ɛ́ ɓén dé sɛ́wɛ́rí ɛ̀ lɛ́ nin. Kɛ́ nìnbírɔ ɛ́ tòo Mɛkɛ̃n-Sãanu, ɛ̀ pehɔ̀ sɛ́wɛ́rí ɛ́ mí wɛ̀. 32Ɛ̀ nìnbírɔ kɛ́ á khɛ́ khɔn ɛ́ lɛ́ ńpe nìnbírɔ Zuú ǹ, ɛ́ pehɔ̀ sɛ́wɛ́rí ɛ́ dɛ̀ ɓén dé ɛ́ lɛ́ à ǹ. Kɛ́ álɛ ɛ́ khɛ́ khɔn ɛ́ lɛ́ lé Mɛkɛ̃n-Sãanu ǹ, ɛ̀ pehɔ̀ sɛ́wɛ́rí ɛ́ mí hɔ́pe zoòni wihĩ́ sɔ lɛ hũn, ɛ̀ pehɔ̀ sɛ́wɛ́rí ɛ́ lò yí dɛ̀ yá yí hɔ́pe yírí wihĩ́ lɛ váa ɓen hũn wɛ̀.»
Lik 6.43-45
33Ɛ́ mí wóò bie nɛ le vɛ̃̀hṹ ɛ́ ɓen sãa, ɛ̀ pelè bie ɛ́ ɓiɛ̀ sãa, tàá mì wóo bie nɛ le vɛ̃̀hṹ ɛ́ ɓen yí sãa, ɛ̀ pelè biè ɛ́ ɓiɛ̀ yí sãa wɛ̀. Iè hɔ̀ lɛ ɛ́ lé vɛ̃̀hṹ wóò dũń àá pelè biè. 34Ńkĩnlɛ̀a nìɛ! Mí wiɛ dàa dɛ̀ bɔ̀tente ɛ́ wóo bie kɛ́ mípe kùusɔ ɛ́ den iè ɓɛ̀ nìkoohɛ̃? Hɔ̀ bòo lɛ zɔn tú lé tĩì iè pe ɛ́ lé ɲunù ɛ́ wóò bie lò. 35À nìcã̀anírɔ ɛ́ iè hɔ̀ bɔ̀tente lɛ zɔn wi piè tĩì hũn á wóò leń líení hɔ́ yíe, à nìkoohɔ́ ɛ́ iè hɔ̀ bɔ̀koohɔ́ lɛ zɔn wi piè tĩì hũn á wóò leń líení hɔ́ yíe. 36Ɛ́ nín bie hɔ lɛ́ miɛ ǹ nɛ hɔ lìe lènlɔ́ zɔǹ, ɛ̀ hɔ̀ ben-khɛà lɛ ɛ́ ɓɛ́ nìnbirìe ɛ́ biekɛa míkùi ɛ́ ɓɛ́ ɓén munkɛ bòo hɔ̀ Dɔfĩn híɛhɔ́. 37Ɛ́ hɔ́ iè kɔ̀ biehĩ́ lɔ̀n ɛ́ ɓɛ́ ɓén dìń ɛ́ dàá lè kɔ̀ lìe ɛ̀ dàá dũń kɛ́ kɔ́ ɛ́ cã̀aní tàá kɛ́ kɔ́ yá cã̀aní.
Bòo lɛ ɛ́ Yiezu dàa pɛ̃́ nɛ mí yá wé yéréké bòo dɔ̀
Mar 8.11-12; Lik 11.29-32
38Ɛ́ ɓɛ́ làndɛ́ kɛ̀ránliè àá ɓɛ́ Farizĩɛɓɛ nìɛ ɓɛ̀ yìɛní dɔ̀ ɛ́ zɔn bie lɛ́ Yiezu ǹ ɛ́ nɛ làa: «Kɛ̀ránlɔ, ké wɛ nɛ kɔ wé yéréké bòo dɔ̀ lɛ zɛ̃́ní kɛ́ kɔ́ lɔ́ àá Dɔfĩn viì ɛ̀ kè mi.» 39Ɛ́ Yiezu ɛ́ zɔn bie lɛ́ ɓà ǹ nɛ làa: «Ɓɛ̀pe zoòni nìɛ sɔ lɛ iè ɓɛ̀ nìkoohɛ̃ ɛ̀ ɓɛ̀ lò ɲúuhɛ̃ ɛ́ yá cã̀aní àá Dɔfĩn ɛ́ den nɛ yéréké bòo lɛ ɛ́ Dɔfĩn pànkɛ́ ɛ̀ zɛ̃́ní iè pe ɛ́ ɓɛ́ wɛ ɛ́ ɓɛ mi. Kɛ́ yéréké bòo dɔ̀ lɛ mii wé lɛ́ ɓà ǹ ɛ́ mí wɛ̀; kɛ́ hɔ́ ɓen yí-e pe Dɔfĩn bɔ̀háanírɔ Zonaasi bòo lɛ hàarí wɔ́ à ǹ ɛ́ ɓen bòo mí. 40Kɛ̀a bòo lɛ ápe Zonaasi ɛ́ dàa wɔ́ wihĩ́ bɔ̀nbɔ̀ tĩ àá sṹnúhṹn bɔ̀nbɔ̀ tĩ à cɔ bɛhɔ́ vùkì hũn, ɛ́ ńpe nìnbírɔ Zuú ɛ́ ɓiɛ̀ ɓén wé wihĩ́ bɔ̀nbɔ̀ tĩ àá sṹnúhṹn bɔ̀nbɔ̀ tĩ lè sṹsùnù hũn. 41Ɛ́ hɔ́ lìe lènlɔ́ zɔn, ɛ̀ hɔ̀ Niniive lóo nìɛ ɛ́ ɓén síɛ hĩ́ní ɛ́ bie nɛ hɔpe zoòni lɛ nìɛ ɛ́ wɔ́ khɔn iè hɔ̀ lɛ ɛ́ ɓɛ́pe Niniive nìɛ ɛ́ hàarí ɲɛ́ á Zonaasi bòo lɛ á buie, ɛ́ ɓɛ́ zɛ̀niɛ ɓɛ́ tĩɛ̀ ɛ̀ ɓɛ̀ fùɛrɛ̀sí ɓɛ́ bɔ̀koohɛ̃ wénlɔ́ ǹ. Ɛ́ kɛ̀a sáalɛ, ápe lɛ ɛ́ wi hũ̀nún ɛ́ den ɛ́ pɔ á Zonaasi. 42Hɔ̀ lìe lènlɔ́ zɔn, ɛ̀ Sabaa cɛ̃̀mɛ̀nɛ́ bɛ́hãá ɛ́ ɓén síɛ hĩ́ní ɛ́ dĩ̀ń à ɛ́ bie nɛ ɓɛpe zoòni nìɛ sɔ lɛ ɛ́ wɔ́ khɔn iè hɔ̀ lɛ ápe hàarí van lɔ́ àá lé sṹsùnù vuò lɛ ɛ́ ni ni hũn ɛ́ dàa ɓɛrɛ ɲɛ́ á Salomɔn bɔ̀dũmunù biehĩ́; ápe lɛ wi hũ̀nún ɛ́ den pɔ a Salomɔn.»
À ńɲíkĩ́rɔ ńvɛ khũ̀á ɓenlɔ́ á nìnbírɔ hũn bòo
Lik 11.24-26
43Ɛ́ Yiezu ɛ́ zɔn bie ɛ́ nɛ làa: «Ńɲíkĩ́rɔ ɛ́ ɓen ɛ́ lɔ́ nìnbírɔ ǹ, à wóò vɛ bè hɔ̀ vuò lɛ hɔn ǹ ɛ̀ cɛ̀ lè ńvũùnín viì. Kɛ́ á ɓen ɛ́ cɛ̀ tan, 44à bie nɛ: “Nin khũ̀á vɛ niǹ zũnù lɛ ɛ́ ń lɔ́ hũn.” À khũ̀á ɓen ɛ̀ ɓen yí lé zũnù sɔ kɛ́ nìnbírɔ ɛ́ mí yán wɛ̀; kɛ́ lé tàa ɛ́ wookɛa sãa sãa. 45À khíi khũ̀á vɛ fé ɓán ńkɔhĩ́ hùuɲu ɛ́ lɛ mɛnkɛ̃nɲiì ɛ́ wi pɔ a, ɛ̀ ɓɛ̀ páaní ɓen zɔ le zũnù sɔ ɛ̀ zɔ kansí yán. Ɛ̀ ɓàasɔ bòo lɛ á dàa hṹn dɛ̃̀ ɛ́ bĩní ɛ́ wóokɛ kɛ̃́nkɛ̃́nlɔ́. Ɛ́ sí iè pe bòo lɛ ɛ́ ɓén wé ɓɛ́pe zoòni nìkoohɛ̃ sɔ lɛ ǹ.»
Yiezu ɓà nín àá ɓà zɛ̀ɓɛ̀ bòo
Mar 3.31-35; Lik 8.19-21
46Ɛ́ hɔ́ lɛ ɛ́ Yiezu ɛ́ khɛ́ àá ɓɛ́ nìzã̀amáa, ɛ́ ɓà nín àá ɓà zɛ̀ɓɛ̀ ɛ́ van ɓɛrɛ dɛ̃̀ hɔ̀ yíe ɛ̀ ɓɛ̀ wɛ ɛ́ ɓɛ bie àá ɔ́. 47Ɛ́ nìnbírɔ dɔ̀ ɛ́ zɔn bie lɛ́ á ǹ nɛ làa: «Mì nín àá mì zɛ̀ɓɛ̀ ɛ́ lɔ́ dɛ̃̀ hɔ̀ yíe ɛ́ wɛ nɛ ɓɛ bie àá kɔ.» 48Ɛ́ Yiezu ɛ́ zɔn bie lɛ́ ɓàasɔ ǹ nɛ: «Kìe nín ɛ́ iè wie ɛ̀ kìe zɛ̀ɓɛ̀ ɛ́ iè ɓɛ̀ bɛ́sɔ?» 49À khie mí kɛ̀ránzɛ̀ɓɛ̀ ɛ̀ zɛ̃́ní àá mí núnú à zɔn nɛ: «Lɛ iè kìe nín ɛ̀ lɛ iè kìe zɛ̀ɓɛ̀. 50Iè hɔ̀ lɛ ɛ́ nìnbírɔ yée nìnbírɔ lɛ ɛ́ kìe Yàá lɛ wi hɔ hóohũn tĩì bòo ɛ̀ wé, ɛ̀ ɓàasɔ ɛ́ temu iè kiè zuú, à iè kìe hãá, à iè kìe nín.»
Айни замон обунашуда:
Matiye 12: bwj
Лаҳзаҳои махсус
Паҳн кунед
Нусха
Want to have your highlights saved across all your devices? Sign up or sign in
© 2023 L’Association Nationale pour la Traduction de la Bible et l’Alphabétisation