Bɔ̀werà 11
11
Piɛre ɛ́ hɔ̀ bòo lɛ ɛ́ wɔ́ á ǹ ɛ̀ munkɛ ɓɛ Zerizalɛɛmu ńdɛsĩ̀riè híɛhɔ́
1Ɛ́ ɓɛ́ tɔnkɛriè àá ɓɛ́ ńdɛsĩ̀riè lɛ hàarí wi hɔ Zudee pɛ̃̀hɛ̃ hũn ɛ́ ɲɛ́ ɛ̀ ɓɛ̀ nɛ ɓɛ nìnbirìe lɛ yí ɓɛ́ Zuifuɓɛ ɛ́ ɓiɛ̀ tɛ̀ lè Dɔfĩn bienù bòo. 2Ɛ́ hɔ́ lɛ ɛ́ Piɛre ɛ́ khũ̀a yòó van hɔ̀ Zerizalɛɛmu, ɛ́ ɓɛ́ Zuifuɓɛ ńdɛsĩ̀riè ɛ́ van ɛ́ ɔ̀ wũ̀aní 3ɛ́ nɛ làa: «Kɔ́ van zɔn ɓɛ̀ nìnbirìe lɛ yí fũ̀a zĩhĩ́ɛ, ɛ́ zɔn dú àá ɓɛ́!» 4Ɛ́ Piɛre ɛ́ siɛ mɔ̀ bòo lɛ ɛ́ hɔ́pe bòo ɛ́ dàa wɔ́ míkùi ɛ́ bie ɛ́ lɛ́ ɓà ǹ ɛ́ nɛ làa: 5«Ń zɔn wi hɔ Zopee lóo hũn; ɛ́ hɔ́ lɛ ɛ́ nín Dɔfĩn ɛ̀ hɛ̃nnin, ɛ́ hɔ́pe Dɔfĩn ɛ́ zɛ̃́niɛ yìnmirà bòo dɔ̀ mi ǹ. Ń mɔn dìɛ dɔ̀ kɛ́ lé yòó lɔ́ hɔ́ hóohũn ɛ́ siɛ kã́a mi, ɛ̀ lè dɛ̃̀ kɛ̀a ie fúrɛ́ dɛ̀bɛhɔ́ dɔ̀ lɛ ɛ́ ɓɛ́ zɛ̃nkɛanin àá mí ɲihĩ́ɛ bɔ̀nbɔ̀ nɛ́. Ɛ́ lé yòó lɔ́ hɔ́ hóohũn ɛ́ ɓɛrɛ siɛ lúwiniɛ mi ǹ. 6Ɛ́ hɔ́ lɛ ɛ́ ń mɔ̀ niǹ yìi ɛ́ fɛ́ lè ǹ ɛ́ hɔ̀ bòo lɛ ɛ́ zɔn wi le hũn ɛ̀ húi sãàní, ɛ́ ń mɔn bìlaàsiè laahĩ́ bɔ̀nbɔ̀ nɛ́nɛ́ ɓàasiè, àá mɛ-biè, àá ɓɛ́ biè lɛ́ ɛ́ wóò vɛ́sí vɛ́sílɔ́ ɓɛ́ vùkùo lɔ̀n, àá ɓɛ́ bìyíeriè. 7Ɛ̀ ǹ lò ɲɛ́ hɔ́ tɛmu dɔ̀ kɛ́ hɔ́ ɛ́ bie àá mi ɛ́ nɛ làa: “Piɛre, síɛ hĩ́ní, khíi ɓé ɛ̀ kɔ̀ lɛ̀!” 8Ɛ́ ń zɔn kɔ̃́niɛ ɛ́ nɛ: “Ɲunsɔ, ńɓùé dɛ́! Bòo lɛ lɔn àá bòo lɛ ɛ́ yá ce ɛ́ ɲɛùn yí zɔ niǹ ɲunù ɛ́ yí mi wɛ̀.” 9Ɛ́ hɔ́ tɛmu sɔ ɛ́ bĩniɛ yòó tɛ̀ hɔ̀ hóohũn kɛ̀a yìehɛ̃̀ ɲulán ɛ́ nɛ: “Hɔ̀ bòo lɛ ɛ́ Dɔfĩn ɛ́ nɛ hɔ ɛ́ ce ɛ́ kɔ́pe ɛ́ bí bie nɛ hɔ ɛ́ lɔn wɛ̀.” 10Ɛ́ hɔ́ ɛ́ wɔ́ kɛ̀amu fúu yìehɛ̃̀ tĩ, ɛ̀ hɔ̀pe míkùi ɛ́ khũ̀a cɔ́ van yòó hɔ́ hóohũn. 11Ɛ́ pehɔ̀ lɔ̀n, ɛ̀ báa bìɛ tĩ dɔ̀ lɛ ɛ́ ɓɛ́ tɔrɛ ɛ́ ɓɛ́ lɔ́ hɔ́ Sezaree lóo nɛ ɓɛ ɛ̀ ɓen niǹ viì, ɛ́ ɓɛrɛ dɛ̃un lè zũnù lɛ ɛ́ ké ɛ́ wi hũn. 12Ɛ́ lé Mɛkɛ̃n-Sãanu ɛ́ bie lɛ́ mi ǹ nɛ n khíi bèɓán àá ɓɛ́ kɛ́ ń bí titikɛ wɛ̀. Ɛ́ ɓɛ́ kìe zɛ̀ɓɛ̀ ńdɛsĩriè nìɛ huezĩ́ lɛ ɛ́ bɔ̀ɓán àá mi ɛ́ dàa ɓɛrɛ hũ̀nún, ɛ́ ɓiɛ̀ khie bɔ̀ɓán àá mi ɛ́ ké dàa van ɔ̀ Kɔrɔnɛɛyi yíe, àpe nùún lɛ ɛ́ te ɓɛ báa bìɛ tĩ ɛ́ tɔrɛ ɛ́ ɓɛ́ ɓɛrɛ niǹ viì. 13Ápe Kɔrɔnɛɛyi ɛ́ khɛ́ bòo lɛ á dàa mɔn ɔ̀ mɛlɛkɛ dɔ̀ mí zũnù hũn ɛ́ lɛ́ kiè ǹ. À mɛlɛkɛ sɔ ɛ́ den ɓɛrɛ dɛ̃̀, à zɔn khɛ́ lɛ́ à ǹ ɛ́ nɛ làa: “Tɔn nìnbirìe dɔ̀ nɛ ɓɛ vɛ hɔ Zopee lóo ɛ̀ vɛ vi-e Simɔn lɛ ɛ́ ɓɛ́ wóo ve nɛ Piɛre nɛ a ɛ̀ ɓen. 14Á ɓén bie hɔ biehĩ́ lɛ ɛ́ mii lɛ́ ɛ̀ kɔ̀pe àá kɔ́ zũnù nìɛ ɓɛ́kùi ɛ̀ dàá fuen ɛ́ lɛ́ kɔ ǹ.” 15Ɛ́ hɔ́ lɛ ɛ́ ń zɔn ɛ́ bie, ɛ́ lé Mɛkɛ̃n-Sãanu ɛ́ ɓɛrɛ siɛ peɓɛ̀ lɔ̀n, kɛ̀a bòo lɛ ɛ́ lé dàa hàarí siɛ kè lɔ̀n pehɔ̀ fìi ɓánlén. 16Ɛ́ ń den siɛ lieniɛ hɔ̀ bòo lɛ á Ɲunsɔ ɛ́ hàarí khɛ́ ǹ lɛ nɛ làa: “À Zãn ɛ́ líiníkɛa ɓɛ̀ nìnbirìe hɔ̀ ɲumu hũn, kɛ́ mípe ɛ́ ɓén tí àá lé Mɛkɛ̃n-Sãanu.” 17Ɛ́ Dɔfĩn ɛ́ wo lɛ́ hɔ́ hɛ̃mù bòo dìcóoní ɓà ǹ kɛ̀a bòo lɛ ɛ́ Hɔ́ ɓiɛ̀ dàa lɛ́ hɔ́ kèpe lɛ ɛ́ dũmuasɛ̃̀ à Ɲunsɔ Yiezu Kirisa ǹ, ɛ́ ńpe ɛ́ iè wieni ɛ̀ ǹ bie nɛ nín pĩ́ hɔ́ bòo lɛ ɛ́ Dɔfĩn nɛ hɔ fɔ́ɓán ɛ̀ hɔ̀ wé?» 18Ɛ́ hɔ́ lɛ ɛ́ ɓɛ́ ɲɛ́ hɔ́ biehĩ́ sɔ vɔ́, ɛ́ ɓɛ́ yòó wuaniɛ ɓɛ́te ɛ̀ ɓɛ̀ khie ɛ́ Dɔfĩn ɛ̀ ɓàanínin kɛ́ ɓɛ́ ɛ́ bie ɛ́ nɛ làa: «Hɔ̀pe hɛ̀ wo bɔn, Dɔfĩn ɛ́ ɓiɛ̀ lɛ́ lé wṹn ɓɛ̀ nìnbirìe lɛ ɛ́ yí ɓɛ́ Zuifuɓɛ ǹ nɛ ɓɛ zɛ̀ní ɓɛ́ tĩɛ̀ àá ɓɛ́ bɔ̀werà ɛ̀ ɓɛ̀ yí lé mɛkɛ̃nì àá bɔ̀bín.»
Baranabaasi àá Sooli ɛ́ van wi Antiɔsi lóo hũn
19Ɛ́ bòo lɛ ɛ́ Etiɛnɛ ɛ́ ɓɛ́ ɓɔ́ vɔ́, ɛ́ ɓɛ́ ńdɛsĩ̀riè lɛ ɛ́ ɓɛ́ hàarí ɛ́ ɲɛkɛ̃̀a ɛ̀ vɛ́ zɔ̀kɛ ɛ́ saakɛa. Ɛ́ ɓɛ́dɔ̀ ɛ́ zɔ̀ van Fenisi àá Siipere pɛ̃hɛ̃ hũn, ɛ̀ ɓɛ̀dɔ̀ ɛ́ zɔ̀ van Antiɔsi#11.19 Hɔ̀ Antiɔsi lɛ ɛ́ ɓɛ́ bòo ɛ́ bie hũ̀nún iè hɔ̀ Antiɔsi lɛ ɛ́ wi hɔ Siiri pɛ̃̀hɛ̃ hũn. lóo hũn, kɛ́ ɓɛ́ ɛ́ lè Bentĩnu buie. Kɛ́ ɓɛ́ den hṹn iè ɓɛ̀ Zuifuɓɛ ɓɛ́ dòonún ɛ́ ɓɛ́ ɛ́ lèpe Bentĩnu ɛ̀ buie lɛ́ nin. 20Kɛ́ ɓɛ́dɔ̀ peɓɛ̀ tĩ́ihṹ lɛ ɛ́ lé Siipere àá Sirɛnɛ, ɛ́ van dɛ̃un hɔ̀ Antiɔsi lóo, ɛ̀ ɓɛ̀ lò ɓiɛ̀ ɛ́ ɔ̀ Ɲunsɔ Yiezu Kirisa Bentĩnu ɛ̀ buie ɛ̀ lɛ́ ɓɛ́ nìnbirìe lɛ yí ɓɛ́ Zuifuɓɛ ǹ. 21Ɛ́ Ɲunsɔ pànkɛ́ lɛ ɛ́ hàarí ɛ́ wi àá ɓɛ́, ɛ́ lɛ́ ɛ́ nìnbí-kuì ɛ́ dũmuasɛ̃̀, ɛ́ ɓɛ́ lɛ́ ɓɛ́te àpe Ɲunsɔ ǹ.
22Ɛ́ Zerizalɛɛmu ńdɛsĩ̀riè ɛ́ ɲɛ́ hɔ́, ɛ́ ɓɛ́ tɔrɛ Baranabaasi nɛ a vɛ hɔpe Antiɔsi. 23Ɛ́ bòo lɛ ɛ́ Baranabaasi ɛ́ van dɛ̃un, á mɔn bòo lɛ ɛ́ Dɔfĩn ɛ́ dàa ɛ́ mí hiì ɛ̀ wé àá ɓɛ́ nìnbirìe yán, á hɛ̀ wɛniɛ míte à hĩ̀iníkɛa peɓɛ̀ tĩɛ̀ nɛ ɓɛ cɛ ɓɛ́ kuò sãàní Ɲunsɔ Dɔfĩn bòo hũn àá ɓɛ́ tĩɛ̀ míkùi. 24Baranabaasi ɛ́ den hàarí iè nìnbí-tente lɛ tú àá lé Mɛkɛ̃n-Sãanu, à lò hàarí dàa ńdɛsĩ̀nlɔ́ cɛ̃̀un. Ɛ́ nìnbí-kuì ɛ́ lɛ́ ɓɛ́te Ɲunsɔ ǹ ɛ́ sĩiniɛ.
25Ɛ́ Baranabaasi wo ɛ́ khie cɔ́ van Tarise ɛ́ nɛ mii vɛ cɛ̀ Sooli yán. 26Ɛ́ bòo lɛ á van mɔn ɔ̀, á khie fɔ́-á ɛ́ dàa van hɔ̀ Antiɔsi. Ɛ́ ɓɛ́pe ɓɛ́ ɲuunáa ɛ́ wɔ́ lɔ́lɔ́-kùi míkùi àá ɓɛ́pe Antiɔsi lóo ńdɛsĩ̀riè, ɛ́ wóò kɛ̀rán ɓɛ́ nìnbí-kuì hɔ̀ ńdɛsĩ̀nlɔ́ bòo hũn. Ɛ́ hɔ́ iè pe Antiɔsi lóo hũn ɛ́ ɓɛ́ nìnbirìe ɛ́ dàa ɓɛ́ hɔ́ fìi ɛ́ wóò ve ɓɛ ńdɛsĩ̀riè nɛ «kèrètĩ́ɛɓɛ̀»
27Ɛ́ pehɔ̀ yìi hũn, ɛ́ Dɔfĩn bɔ̀háaníriè dɔ̀ ɛ́ lɔ́ Zerizalɛɛmu ɛ́ siɛ van hɔ̀pe Antiɔsi. 28Ɛ́ peɓɛ̀ tĩ́ihṹ ádɔ̀ lɛ yèrè ɛ́ ɓɛ́ nɛ Akabuuse ɛ́ siɛ hĩ́nà ɛ́ khɛ́ àá Mɛkɛ̃n-Sãanu pànkɛ́ ɛ́ nɛ hĩn-bɛhɔ́ ɛ́ ɓén lé lé sṹsùnù míkùi lɔ̀n. (Ɛ́ hɔ́ hĩni ɛ́ ɓiɛ̀ lɔ́ àá bɔ̀bín pɛ̃̀hṹ lɛ á Kuloode ɛ́ dàa temu hàarí ɛ́ iè bɛ́zu-bɛhɔ́ hɔ̀ Rɔmu cɛ̃̀mɛ̀nɛ́ hũn.) 29Ɛ́ ɓɛ́pe ńdɛsĩ̀rìe ɛ́ ɲɛ́ ɓán ɛ̀ ɓɛ̀ nɛ ɓɛ́ tĩ́ihṹ ɛ́ hɔ́rɔ wóo lɛ́ mí núnú hũn bòo lɛ á dɛ̀ ɛ́ lɛ́ ɛ̀ ɓɛ́ dàá vɛ sĩiní ɓá zɛ̀ɓɛ̀ ńdɛsĩ̀riè lɛ wi hɔ Zudee pɛ̃̀hɛ̃ hũn. 30Ɛ́ ɓɛ́ ɛ́ wɔ́ hɔ́. Ɓɛ̀ ɛ́ khie tɔniɛ ɓɛ́ hɛ̃mù bòo àá Baranabaasi àá Sooli nɛ ɓɛ vɛ lɛ́ hɔ́ Zudee ńdɛsĩ̀riè nìkĩ́ɛ ǹ.
Айни замон обунашуда:
Bɔ̀werà 11: bwj
Лаҳзаҳои махсус
Паҳн кунед
Нусха
Want to have your highlights saved across all your devices? Sign up or sign in
© 2023 L’Association Nationale pour la Traduction de la Bible et l’Alphabétisation