Mark 5
5
Iyesu te korku sōnhal ge err ho ran vanten hu, te vanten ge le te wu mōl.
1Ngate, mōl mōn, Iyesu krinen mwenan vanten nyer err me tamtee en tahi Tee Kakre Kalili lon tan ne ōrr Kerrasa.
2Bone ge Iyesu te me senōrr ran afloo kakae, te lhe vanten hu ge sōnhal te rru ran ge te yel metenen tan ne rrmyarr te me ne Iyesu.
3Vanten ge a te rrō fwerr fwerr en ōrr ge le, te vanten telōn e ngrengre he bwe nga fokte ne awa te jen.
4Ngamto nga bone ge err rrō fokte veran te yen ne jen, te te rrō sekokote. Vanten ge a te hel ten, telōn e ngrengre vanten te hu ne halen.
5Ran wobung bonga, te nelibung bonga te rru ran tan ne rrmyarr, te ran wau nyer. Te te rrō fwifwir bya mre, a te rrō rre rre nge ne verr mōn.
6Bone ge te lhe Iyesu ge te mang rru hatin kakae nga rrō bwe, nge te mku byane Iyesu, te te a singrrur byane nge.
7-8Te nge te fwifwir te hel bya mre, te te fe, “Iyesu, neng ōm be Terere Mleng Genti Yafukon ge san mu rru mre kon kon! Ōm rrō me ge fō rrwene ha ne ni? Kabria, lon sa Yafukon, fō lōn sene jenjenan te hu me ne ni!” Ngate, Iyesu te fe, “Sōnhal, ō houre metenen vanten ge a!”
9Te te whu nge ge, “Sam nge si?” Te nge te fe, “Sang nge Wor ge Rrlam tebyan ge myam be lol.”
10Nge te rrō wuwuu vetune Iyesu ge eb lōn hutamkuku nyer metenen vere ge a.
11En ōrr ge le, barrbarr err ve lol err hō en siriri wau.
12Bone ge le sōnhal nyer err wuwuu vetune Iyesu ge, “Kabria, fō hutamne gemya bya lon barrbarr ge nyer i. Efō mō ne gemya emya vya ho lon barrbarr ge nyer i.”
13Ngate Iyesu te rrmane, te sōnhal ge nyer a, err yel metenen vanten ge a, te err vya lōn barrbarr ge nyer le. Barrbarr ge nyer le, ge err ve 2,000 nge bonga, ete mkuri belbel ten nga en tahi bihii hu. Ngate err vya goo bya lon tee kakre ge a, te err rronrron bonga.
14Vanten ge err rrō byane barrbarr ge nyer le, ete mkumku bya bsaō ge rrlam, te besaō ge err ho tiliuti. Te err vya saarōne sese ge te rrwe a. Telōn ve myarin, vanten ne ōrr ge nyer a, err rongtane sarōan ge a, te err me lhe ha ge te rrwe.
15Err me ne Iyesu, te ete lhe vanten ge sōnhal te ho ran te taa rru. Ete lhe ge te kokor ul rru burr, te mwenan rrinrrinan te me wu burr. Bone ge ete lhe, lur te myorr ne.
16Te ge nyer ge ete lhe ha ge te rrwe, err saarōne byanen ge nyer ge err nga nga me. Err saarōne ha ge te rrwene vanten ge a ge sōnhal te ho ran, te err saarōne ha ge te rrwe byanen barrbarr ge nyer le.
17Te ete whu Iyesu ge, “Kabria, ō yel metenen ōrr ge a.”
18Mōl mōn, bone ge Iyesu te rrō vya ran afloo kakae, vanten ge sōnhal te ho ran, te whu vetune Iyesu ge, “Kabria, na krine neng?”
19Te Iyesu telōn mō ne. Te te fe byanen ge, “Fō la mōl bya bsaō ne neng. Te fō a fe byane mam buluim sese ha ge rrwu ge Yafukon ma rrwene byane neng ge mo lol hane neng.”
20Ngate vanten ge a te saarō en ōrr ge rrlam a ge san nge Tekabolis. Nge te suuto ha ge Iyesu te rrwene byanen. Te bone ge err rongtane sarōan ge nyer le, err non metenen.
Iyesu te kone vehen hu tebyan ge te rrinkete nge.
21Ngate Iyesu te la mōl ran afloo kakae bya en tahi Tee Kakre Kalili. Senōrr ne tee kakre ge a, vanten err ve lol err me kru tiliuti nge.
22Ngate, yafu hu rrlam ne im kakae ne tamtamyaōan, te me lhe Iyesu, san nge Jaerras. Bone ge te lhe Iyesu, te murr bya fyan bon ye Iyesu.
23Byaho nga, nge te wuu vetune Iyesu ge, “Mweneng terere vehen ma mse tam rru ge fyaasi eb myarr nge le. Kabria, fō me lngi veram ran, tebyan ge nge eb rongtane e wu mōl lon mwenan mesean.”
24Ngate Iyesu te rrutōn. Te vanten err ve lol mōn ge ete krinen rru, err rrō rrmurrmu nyer e Iyesu.
25Ngate, vehen hu te rru ge mesean mwenan vehen nyer te rru ran wobung bonga, te tongve huwo te 12.
26Vehen ge a te gye vanten ne kone an te e lol, te rrwene ge mwenan buverr te nong. Te vanten ne konean ge nyer a, err rrlōne rrwene ge bwe nga rongtane bu wu, te mesean te nga me rrō hakbe tam.
27-28Bone ge nge te rongtane rral e Iyesu ge be vanten ne konean, nge te rrō jerrlalane nga hobōn ge, “Ge he ena hubri mwenan arrlirrli tengamri nga, ena rongtane e wu.” Ngate nge te me tō Iyesu lon vanten lam ge nyer le, te te hubri mwenan arrlirrli.
29Byaho nga, rra te nong, telōn nga roō en. Te te rongtakya lon tablin ge nge te wu mōl.
30Byaho nga, Iyesu te rongtakya ge mwenan helan te roō metenen. Ngate, te kilhi nge lon tobol e vanten lam ge nyer a, te te whu ge, “Si nge mo tongve mweneng ul?”
31Ngate mwenan vanten nyer err fe byanen ge, “Mwi yi be nge ōm rrō whu he, ‘Si nge mo tongve ni?’ Ōm kya vanten nyer em rrō ho tumtum biiri neng!”
32Te Iyesu te mang rrō teter tiliuti nyer bwe ge si nge te tongve nge.
33Te vehen ge a, te yekya rru burr e nge ge te ktu konean. Te rrwene ge lun te rrō myorr, te te rrō rurur metenen. Te murr bya fyan lon meta Iyesu, ngate te survyōvyō sese bonga ge te rrwene.
34Te Iyesu te fe, “Ntung vehen, mwenam rrinketean ma rrwene ōm wu mōl metenen mwenam mesean. Fō lōn nga rrō rrinrrin eb lam ten. Mwenam mesean mo nong. Fō vya lon rongne mu wu an.”
Iyesu te kone terere vehen mwena Jaerras tebyan ge te rrinkete nge.
35Bone ge Iyesu te mang rrō susur byanen vehen ge a bwe, vanten worhu err me metenen im ma Jaerras, te err me fe byane Jaerras ge, “Ntum vehen me myarr burr. Tōlō wu ne ge Vanten ne Wuhuran eb nga me mwee nga.”
36Te Iyesu telōne rrmerrme bwe hel ha ge err rrō fe. Te te fe byane Jaerras ge, “Lum eb lōn myorr. Fō rrinkete nga.”
37Bone ge nge te rrō a bsaō ne Jaerras, nge telōn nga rrmane ge vanten nyer fe rrutōn. Te te nga rrya ge nyesul a nga, Bita, te Jemes krinen taalan ge Jon, tesu nga rrutōn.
38Ngate tesu me tamtee bon im ma Jaerras. Te Iyesu te lhe vanten te e lol err rrō rreng. Te tining ne rrengan ge a te rru mre ge mre.
39Bone ge nge te vya lon im, te whu ge, “Tining ne ha nge bya rru mre mwi yi a? Terere vehen ge a tōlō myarr bu rru. Nge mwe fwerr nga rru.”
40Te err myanbi. Te nge te hutamkuku nyer bya vre. Te te nga rrya ge nyesul a nga, temyan terere vehen ge a, te rahen, te mwenan vanten nyesul nga, tesu nga hil bya lon rruim ge terere vehen ge a te rru en.
41Ngate te hal telala ne veran. Te te fe byanen ran tolor, te fe, “Talita, koum,” mwe yen ge, “Ntung vehen, ō fyarr!”
42Byaho nga, te fyarr, te te rrō yeyel. An huwo te 12. Bone ge ete lhe sese ge le, err non metenen.
43Te Iyesu te rrnyorrnyo nyer ge, “Emi lōn fe sese ge ma rrwe a.” Te te fe byane nyer ge, efe ktu meyee te hu byane terere vehen ge a.
Айни замон обунашуда:
Mark 5: mmg
Лаҳзаҳои махсус
Паҳн кунед
Нусха
Want to have your highlights saved across all your devices? Sign up or sign in
© Wycliffe Bible Translators, Inc. All rights reserved.