यूहन्ना 2
2
प्रभू यीशू का आगला चींह्न-चंमम्त्तकार
1च़ीज़ै देसे गलील ईलाके के काना नंगर दा कोसी के जाज्ड़ा थिया, अरह् प्रभू यीशू की माँ भे तेथै आऐ रऐ थी। 2प्रभू यीशू अरह् तिनके चैले भे जाज्ड़े दे बय्दी थुऐ थिऐ। 3तेथै जबे दाख्ह-अंगूरोह् का रंस चुकी गुआ, तअ प्रभू यीशू की माँ ऐ तिनखे बुलो, “ईनू लोगों कैई दाख्ह-अंगूरोह् का रंस चुक्की गुवा।” 4प्रभू यीशू ऐ जबाब दिता, “हे माँ, तुँऐं ऐजो मुँह कैई किन्देखे बुली लो? हेबी मेरा बख्त्त आऐ ने रंई।” 5तबे प्रभू यीशू की माँ ऐं तिनू टोह्लुवा खे बुलो, के “जुण्जो किऐ ऐ तुओं खे बुलो, तुऐं सेजो ही करे।” 6तेथै यहूदियों के शुद्ध हणों के मुँताबिक शे हाथ, लात्त, छ़ाल्णों-धुणों की ताँईऐं पाथरो के छ: घह्ड़े बड़े-बड़े माँट भरे अंदे थिऐ, जिदो दो-दो, च़ींन-च़ींन मंण पाँणी आँव थियो। 7प्रभू यीशू ऐ तिनू टोह्लुवा खे बुलो, “ऐजे घह्ड़े, माँट, पाँणी लई भरी दियो।” टोह्लुवा ऐ सेजे घह्ड़े, बड़े-बड़े माँट शिऐ-शी पाँणी लई भरी दिते। 8तबे प्रभू यीशू ऐ टोह्लुवा खे बुलो, “ऐबे ऐथू पाँणी गाड़ियों ज़ागौ के सियाँणें कैई नींयों, अरह् तिन्ऐ तेष्णों ही कोरो।” 9तबे ज़ागौ के सियाँणें ऐ सेजो पाँणी चाखों, तअ सेजो पाँणीं अंगूरोह् का दाख्ह रंस बंणी गुवा थिया; (तेसी सियाँणें कैई ऐजा पता ने थीं; के ऐजा दाँख्ह रंस केथै शा आँणीं थुवा), परह् जेने टोलुवा ऐ सेजो पाँणी तिनू माँटो-घह्ड़े शो ऊडो गाड़ी थुओं थियों, तेस कैई ऐजा पता थिया; ईन्देखे तेने सियाँणें ऐं तेसी दुल्हा बईदा। 10अरह् तेने तेस्खे बुलो, “बादे लोग आगे आछा अंगूरोह् का दाख्ह रंस दियों; परह् जबे बादे लोग पीईयों छकी ज़ाँव, तअ से दाँणिक हल़्का अंगूरोह् का दाख्ह रंस दियों, परह् तुँऐं तअ हेभी तोड़ी आछा अंगूरोह् का दाख्ह् रंस थऐ थुवा थिथा।” 11प्रभू यीशू ऐ गलील के काना नंगर दा ऐजा आगला ही चींह्न-चंम्त्तकार देखाऐयों आप्णी बड़ियाऐ पर्गट करी। अरह् तिनके चैले ऐ तिन गाशी बिश्वाष करा। 12तबे तिन्दे पाछ़ी प्रभू यीशू आप्णी माँ, आप्णें भाई, अरह् आप्णें चैले आरी कफ़रनहूम नंगर खे हुटे, अरह् तेथै से किऐ देसो तोड़ी तेथी रूवे।
देऊँठी शे प्रभू यीशू ऐ बईपारी आगू गाड़े
(मत्ती 21:12,13; मरकुस 11:15-17; लूका 19:45,46)
13यहूदियों के फ़सह को तैयारह् नंजीक थियों, ईन्देंखे प्रभू यीशू यरूशलेम खे हुटे। 14तेथै तिन्ऐं देऊँठी दे बोल़ोद, भैंड़ो, अरह् कबूतर बिक्णों वाल़े; अरह् रूपिऐ साटा-बाटा कर्णो वाल़े बंईपार कर्दे बंईठे अंदे देंखे। 15तबे प्रभू यीशू ऐ पागोई की डींडी बाँणीं, अरह् बादी भैड़ो अरह् बोल़ोह्दो संहमेंत्त सोभी देऊँठी शे बाँईडे गाड़ी दिते; अरह् रूपिऐ साटा-बाटा कर्णो वाल़े के सिक्कै खिदर-भिदर पाऐ दिते, अरह् तिनके बंईठंणों के पीड़े-पाट्डै ऊँटमुल़े पाड़ी दित्ते। 16अरह् कबूतर बिकणों वाल़े खे बुलो, “ऐजो सब-कुछ ईथै शो आगु नींहयों; मेरे पंरम-पिता को घहर बंईजार ने बणाँऐ।” 17तिनके चैले के पबित्र-ग्रन्थों का सेजा कंथन चींत्ते आया: “तेरे घहर की धूंन मुँह खाऐ पाँदी।” 18ईन्दें गाशी यहूदी निय्म के शिखाँणों वाल़े ऐं प्रभू यीशू खे बुलो, “तू जू ऐजो बुले, तअ तबे आँमों कैई शा कुँण्जा चींह्न-चंम्त्तकार देखाँई दा? जिन्दें लई आँमें ऐजो जाँणों, के ताँव कैई ऐजा हंक-अधिकार असो?” 19प्रभू यीशू ऐ तिनखे जबाब दिता, “ईयों देऊँठी ढाल़ी दियों, अरह् हाँव ईयों देऊँठी च़ीज़े के हजो पाछ़ू खह्ड़ी करियों देखाँऊबा।” 20ईन्दें गाशी यहूदी निय्म के शिखाँणों वाल़े ऐ बुलो, “ईयों देऊँठी बाँण्णों खे छियाल़िष सालों लागी रंई, अरह् कियों तू ईयों देऊँठी च़ीज़े की खह्ड़ी करी देंई दा?” 21परह् प्रभू यीशू ऐ सेजो आप्णी देह्-शरीर रूपी देऊँठी के बारे दो बुली लो थियो। 22ईन्देंखे जबे प्रभू यीशू मँरे अँदे मुँझ्शे पाछ़ू ऊबे जीऊँदें हुऐ, तअ तिनके चैले के सेजी बात चींत्ते आऐ; के प्रभू यीशू ऐ ऐजो आगे ही बुलो थियो, अरह् तबे तिनके पबित्र-ग्रन्थों अरह् प्रभू यीशू के तिनू बचन गाशी बिश्वाष हुवा।
प्रभू यीशू आदमी के मंन जाँणों थिऐ
23जबे प्रभू यीशू फ़सह के तैयारह् के बख्त्ते यरूशलेम दे थिऐ, तअ तिनके जाँणें बैजाऐ चींह्न-चंम्त्तकार देखाऐ ज़ाँव थिऐ, तबे तिनके नाँव गाशी बैजाऐ लोगें ऐ बिश्वाष करा। 24परह् प्रभू यीशू तिनकी तारिफ के मोंह्ताज ने थी; किन्देंखे के तिन कैई आदमी के संभाव का पता थिया। 25प्रभू यीशू ऐ आप्णें बारे दी आदमी के जाँणें, देऐ गऐ गुवाऐ-शाँज़्त्त के किऐ भे जरूरत्त ने थी, किन्देंखे के से जाँणों थिऐ के आदमी का सभाँव केष्णाँ असो।
Айни замон обунашуда:
यूहन्ना 2: sri
Лаҳзаҳои махсус
Паҳн кунед
Нусха
Want to have your highlights saved across all your devices? Sign up or sign in
© 2022, Wycliffe Bible Translators, Inc. All rights reserved.