Mateus 7
7
Heb nongen le dieni su ndramed.
1Mbue dieni homo debosan su gdieni uo. 2Ar mu gdieni homo, su gdieni umu dagara lie. Su dandohongeni uo gle gelman, dege uo gin dandohongeni su. 3Uo derbe, uo da ilndri ndomargei i da le begmarn ad ndern? Derbe uo de ilndri gei manden i da le begmarm bui. 4Uo derbe? Ar uo vong le ndro nderm: Hian io beg rui ndomargei le begmarm giao i da hinen begmarm momen ge. Ma uo de hanguruen gei manden i da le begmarm bui, i hinen begmarm gina momen gane? 5Hanguruen adem i de heb monen bui, rui hanu gei manden i da le begmarm giao muren uo danem rui ndormargei mandehe giao, i da le begmarn ad nderm. 6Mbue daui longu ademu hian helian le ndro su, su dege mui, mbue bieni memrad ademu hian le ndro su bu, debosan su bo momen leri, debosan su hedi mu, su ndumbue mu.
Heb nongen le soling.
7Hian ndemani su le longu hendre, su ghengen i le ndro mu, hian gahi, mu gu danoni i, hian reregdi babi, su audi i. 8Be homo i ndemani Jehova, i hengen le ndro i, be homo i gahi, i gu danoni i, be homo i reregdi, Jehova i audi babi. 9Hom ndramed i da oho, ar ndurn i soling gle suslong, i hengen bad le ndro i. 10Ar i ndemani i gle ni, i hengen i ndrondrhun. 11Ar mu, mu da momen ge, danmu hengen longu hian le ndro su ndurn, Damu i da lang i hengen hian ge le ndro su, su da soling. 12Longu masi mu lengi su ndramed su hengen le ndro mu, hian hengen i le ndro su dagara lie. Mose ma su Provet ber goru su gin hondre dagara lie.
Heb nongen le sal marsel.
13Dogi le sal lundielang le babi mandehe. Babi manden, e sal manden i la gor ngendian ge. Su mabosanged su dogi ri. 14Babi i mandehege, sal i momen, bad ge, babi mandehe le lundiegor ad Jehova, su holel ge su gin danoni i, su dogi ri.
Heb nongen le su Provet momen.
15Or gulue meluamu le su Provet momen, mandersu i hian ge, su dege meh, bergolsu i momen ge, su dege mui. 16E lele mburer asu, longu asu su da hinen i. Mu de danmu hedi mbuegei le borndrui i bui, mu de danmu hurdi sengen hian gle gei momen molhege bugane. 17Gei heie hian, mbuegei hian i dari. Gei heie momen, sengen momen i dari. 18Gei heie hian de danen hengen mbuegei momen bui, gei heie momen de danen hengen sengen hian bugane. 19Gei heie e heie sengen hian bui, su sindrdi gei, su gbieni i le moan manden ge. 20Dagara su ndramed, mu danmu su sie, armu ilndri mburer asu.
Heb nongen le su lao momen.
21Be homo i vong: Ndorlaben, Ndorlaben, gle bohon ge i de meher le gor lundielang bui. Homo, ge, i da hinen nongen ad Damen ber lang, i ge, i gla ndro i. 22Su mabosanged, su gmeher ndro io bersi muren, su vong, su bai: Ndorlaben, Ndorlaben du gin boharni nongen hian le ngarm, du gin robuldi ngongong mabosanged le ngarm, iou gin hinen gelman dsoln le ngarm. 23Muren io vong le ndro su, io bai: Io de dono mu bui, mu ndramed momen ge, alndi, giao.
Heb nongen le um hian e momen.
24Homo ma homo i hirong nongen ordo, i hinen i, i dege hom ndramed hian monen ge, i da gin mengseni um aden, hian monen ge. 25Lengen manden i ndrud, ior manden i mehere, hai mandromai i ngoh, i de bud bui, i hian ndoun, ndoun ge. 26Homo e homo i da hirong nongen ordo, i de hinen i bui, i dege hom ndramed, mburer aden i de heb monen bui. I de gin mengseni um aden hian, ndoa bui, i soie um aden i doruon i bondel ge. 27Lengen manden i ndrud, labenen ndor mehere, hai i ngoh, su menueini um, um i gin bud, i gina boan sumburdi. 28Nongen ad Jesu boen, meluasu masi i ieb leri. 29I gin henunuen su ndoundoun, i de gin henunuen su dege su ndremda hernou, su hinen i bugane, i gin henunuen su gle ndoui ad Ndorlaben ber lang.
Айни замон обунашуда:
Mateus 7: LLENT
Лаҳзаҳои махсус
Паҳн кунед
Нусха
Want to have your highlights saved across all your devices? Sign up or sign in
Published by the British and Foreign Bible Society 1956