Hwègbèèlì 18
18
Pàwolò a ɛndi ò mbòwa ndɛnɛ ya Kɔ̀rintò
1O mburzà hwenè hweyà hwe arzɛ, Pàwolò à mà anjiya ò mbòwa ndɛnɛ ya Atɛ̀nrzì rzi a ɛ̀ndɛ ò mbòwa ndɛnɛ ya Kɔ̀rintò. 2Nà òma à mà uke aŋga à mà ùŋmanɛlɛ mòtò wa wònyà Yudà ema à mà hwɛ̀lɛ̀hwɛ̀ Akwìlà. Akwìlà à mà ŋyàhwɛlɛ ndi ò mbòwà ndɛnɛ ya Pòntìyùrzì. Mɔ̀ à mà uwɛ̀lɛ̀lɛ̀yi ndi mòhvènya ò èkòmè ya Itàlì na e jòjìyɛ̀ ya eni Prìrzìlà. Wɔ̀ hwà mà anjiya ò Itàlì ehwànja e Kàyirza ya Ròmànì, Klàwùdìyùrzì à mà akɛlɛ njàmbɛ̀ ama hwatò hwa arzɛ ema hwa hwèlì wònyà Yudà, hwa anjiye ò èkòmè ya Ròme. Pàwolò à mà ɛ̀ndɛ lì ɛnɛ Akwìlà na jòjìyɛ̀ wa eni. 3Èhwanja mɔ̀ hvɛ à mà hwɛ ndi mòòŋgelì wa màwòndò na òma wɔ hvɛ hwà mà hwɛ, ò eŋgànɛ̀lɛ̀ mɔ̀ hvɛ à mà lìya rzìi a à gbeyà èwòlò na wɔ̀. 4Tɔ̀ ima Wùnya wò lì Arzìyòlɛ Pàwolò à mà hwɛ lì ɛndɛ ò ndawò ya màkanɛ̀ ya wònyà Yudà, ò lì òhwirzɛnɛ hwatò hwa wònyà Yudà na e hwa Grìki, aŋga nanù wɔ hwa lòkɛ̀ hweyà ema à mà hwɛ lì hwa òhweyà.
5Nà òma Rzàyilarzi na Tìmòtì hwà mà uwɛ̀lɛ̀lɛ̀yi ò mbòwa ndɛnɛ ya Màrzèdonìyà, Pàwolò à mà aŋgbɛ mɔ̀ ŋmìti tòwòtòwò ò lì òhwà Ŋmɛ̀ndì mò Gbamù. Mɔ̀ à mà hwɛ lì òhweyà hwatò hwa Yudà nanù ema Yerzù à hwelì ndi è Mɔ̀ ema à Ɔ̀kirzɛ̀hwɛ̀yi. 6Ndi wɔ̀ hwà mà hwɛ lì teŋgɛ̀nɛ̀ Pàwolò na lì mò òhwàna hweyà hwe wòhwe, à mà titòwa e rzɔ̀wɛ̀ ema e ma mò hwɛ ò mataŋgà mà eni ò lì uŋmɛ̀lɛ̀ nanù ema e kɔ̀kìrzɛ̀ ya ama Lohwɛ̀ e hwèlì lì hwa ambɛ̀lɛ̀ rzìi mɔ̀ à hwa òhweyà nanù ema, “È wɔ̀lɛ̀nɛ̀ tɛ òma inyɔ hwiti ndi e arzi. Nà rza enje e ya ami ò tenì. Li wòteya nàŋgɛ̀ na ɛ̀ndɛ ndi lì òhweyà hwaŋga hwatò ema hwa rza enje wònyà Yudà ŋmɛ̀ndì mò gbamù.” 7O èŋgànɛ̀lɛ̀ Pàwolò à mà hwɛmɛ e ndawò ya màkanɛ̀ ya wònyà Yudà, rzi a ɛ̀ndɛ lì lìya ò ndawò ya ama mòtò mɔ̀kɔ ema a hwɛ̀lɛ̀hwɛ̀ Tàyìtùrzì Jùrzìtùrzì. Tàyìtùrzì à mà hwɛ lì kànɛ Lohwɛ̀, ndèŋgànɛ̀lɛ̀ e ndawò ya eni e ma kòmbɛnɛ e ndawò ya màkanɛ̀ ya wònyà Yudà. 8Klìrzpùrzì, ema mɔndi à mà hwɛ e mòkànèlì wa e ndawò ya màkanɛ̀ ya wònyà Yudà, mɔ̀ na lìtumba la eni la arzɛ, hwà mà lòkɛ̀ e Rzàŋgò. Rzayì-rzayì ja hwatò hvɛ ò Kɔ̀rintò hwà mà hweyà Ŋmɛ̀ndì mò Gbamù, hwà mà mò lòkɛ̀ ndèŋgàna hwà mà lùhwìrzɛ̀hwɛ̀.
9Wu wɔ̀kɔ e Rzàŋgò e ma òhwirzɛnɛ Pàwolò ò jɛ̀nɛni, à mà mò òhweyà nanù ema, “O rza òka tɔ̀ wɔ̀ŋgɔ̀, hwɛ ndi ò lì òhwa nanù mɛnɛ, ò rzi lìya ŋmɛɛ. 10O hwiye nanù ema imba na hwèlì na ò wa. Tɔ̀ mòtò a rza tànɛyi lì ò urzuweya na lì ò hvaŋga. Èhwanja na òhvi rzayì-rzayì ja hwatò ò ene mbòwà ndɛnɛ.” 11Ène ŋgàna e ma gbeyà Pàwolò à mà lìya ò Kɔ̀rintò ŋma mɔ̀kɔ na èhvarzù, ò lì òkòlɛ̀ hwatò Èya ya Lohwà.
12È hvònda ema Kàyirza à mà lìirzɛ Galìyò ò mbòkò nàa e Gɔhwina ndɛnɛ ò erzòòkà ya Àkayiyà, hwatò hwa wònyà Yudà ò mbòwa ndɛnɛ ya Kɔ̀rintò hwà mà alatanɛ, rzìi hwa ŋgbaŋgɛ Pàwolò, rzìi hwa mò jànà ò ndawò ya hwèkàyìrzèlì. 13Hwà mà òhwa nanù ema, “O nò mòtò a hwèlì a keka lì lukɛlɛ hwatò ò lì kànɛ Lohwɛ̀, nyayi ema e teŋgɛ̀nɛ̀ e mbenda.” 14Nà òma Pàwolò à mà arze lì òhwa, Galìyò e Gɔ̀winà rzi a òhweyà wònyà Yudà nanù ema, “Ène eyà e ma hwɛ tɛ ndi nàa lùùrze, tɔ eyà ya wòhwe ema mòtò a gbèyi, aŋga òma na hwɛni lìtiŋga ò lì e hweyàna inyɔ wònyà Yudà. 15Kanatɛ e hwèlì ndi eyà ya hvenda lì teŋgɛ̀nɛ̀ e mbɔrzi, mìinà na e mbenda ya anyu, inyɔ hwiti e kulɛ mònò mòtaŋgò. Imba na rza kàyìrzɛ̀ ene nyayi ya ŋmàŋgò.” 16Ène eyà e ma gbeyà Galìyò à mà hwa hvaya ò tenì ya e ndawò ya hwèkàyìrzèlì. 17Wɔ̀ hwa arzɛ hwà mà hvùma Rzɔ̀rztenìrzì ema mɔ̀ ndi à mà hwɛ e mòtimbèlì wa e ndawò ya màkanɛ̀ ya wònyà Yudà, rzìi hwa mò anana njùma ò wòrzò wò èŋge ndawò ya hwèkàyìrzèlì. Ndi èŋge eyà e rzi tàkirzɛ Galìyò tɔ̀ tenyi.
Pàwolò a timbi ò mbòwa ndɛnɛ ya Antìyɔ̀kì
18Pàwolò ama lìya na hwàlòkèlì ò mbòwa ndɛnɛ ya Kɔ̀rintò rzayì-rzayì ja mèenyà, rzìi a hwɛmɛ hwàlòkèlì a kpèeyà ò melì me ŋmànja, rzìi a aka ŋmànja ò lì uka ò erzòòkà ya Rzìrìyà. O yɔ̀ndɔ ya eni, à mà ɛ̀ndɛ̀nɛ̀ Prìrzìlà na Akwìlà. Ndèŋgànà a e anjiya ò mbòwa ndɛnɛ ya Rzɛ̀nkreyà, à mà rzòòwa lìhvumbu la eni la mòhvò èhwanja ò ma hwɛ hweyi ema à mà aàtɛ. 19Hwà mà uka ò mbòwà ndɛnɛ ya Ɛ̀hvɛ̀rzɔ̀rzì. Nà òma hwà mà uke aŋga Pàwolò à mà lìiya Prìrzìlà na Akwìlà, rzìi a ɛ̀ndɛ ò ndawò ya màkanɛ̀ ya wònyà Yudà ò lì kòhwa na wònyà Yudà. 20Wɔ̀ hwà mà mò òhweyà ema a lìya aŋga hvònda ema e wawi, ndi mɔ̀ à rzi emeyà. 21Ndi ò hwɛndèli hwe eni à mà hwa òhweyà nanù ema, “È hwèlì tɛ lì emeyà la ama Lohwɛ̀ na ò e timbeya.” A ma kpèeyà ò melì me ŋmànja rzìi a anjiya ò mbòwa ndɛnɛ ya Ɛ̀hvɛ̀rzɔ̀rzì. 22È hvònda ema à mà ùke ò mbòwa ndɛnɛ ya Kàyìrzèrìyà, à mà agba ò mbòwà ndɛɛndɛ ya Jèrurzalɛ̀mù, ò lì kɔmɔ hwatò hwa ŋmèmba, rzìi a ɛndɛ ò mbòwa ndɛnɛ ya Antìyɔ̀kì. 23O mburzà ya hvònda ema à mà hvaŋge hvònda ò mbòwa ndɛnɛ ya Antìyɔ̀kì, Pàwolò rzìi a anjiya aŋga, rzìi a ɛ̀ndɛ ò hwèrzòòkà hwe Gàlèrzìyà na Hvrìgèyà ò lì kòkòwɛ̀lɛ̀ na lì ètìrzɛ̀ hwàlòkèlì hwa arzɛ.
Apòlòrzì a òhwi eyà ya Lohwà ò Ɛ̀hvɛ̀rzɔ̀rzì na Kɔ̀rintò
24O èŋge hvònda mòtò mɔ̀kɔ wà Yudà ema à mà hwɛ̀lɛ̀hwɛ̀ Apòlòrzì, ema à mà ŋyahwɛlɛ ò mbòwà ndɛnɛ ya Alɛ̀rzàndrìyà, à mà jà ò Ɛ̀hvɛ̀rzɔ̀rzì. A ma hwɛ ndi mòtò ema à mà hwiya lì òhwa jòhwi ja gbamù, ndèŋgànɛlɛ à mà rzɔŋgɔ lì rzɔ̀ŋgìtɛ̀nɛ̀ la e kaàtì ya ama Lohwà. 25A ma òkòwa hweyà hwe e njiya ya ama e Rzàŋgò. A ma òhwa, na lì òkòlɛ hwatò hweyà lì hvòmɛ̀nɛ̀ Yerzù nyayi ema e ma hvòmɛ̀nɛ̀ na e nyɔ̀ŋgi ya eni ya arzɛ. A ma hwiya ndi lì lùhwìrzɛ̀ la ama Yòwanìrzɛ̀ mɛnɛ. 26Onò mòtò rzìi a wòteya lì òhwa ò ndawò ya màkanɛ̀ ya wònyà Yudà e rzi hwɛ lì òka tɔ̀ wɔ̀ŋgɔ̀. Nà òma Prìrzìlà na Akwìlà hwà mà hweye hweyà ema à mà hwɛ lì òhwa, hwà mà mò yòwɛ ò mààndà ma awu, rzìi hwa mò tɛlɛlɛ kɔ̀yi-kɔ̀yi e njiya ya ama Lohwɛ̀. 27Nà òma Apòlòrzì à mà arze lì ɛ̀ndɛ ò èkòmè ya Àkayiyà, hwàlòkèlì hwa e mbòwa ndɛnɛ ya Ɛ̀hvɛ̀rzɔ̀rzì hwà mà mò òŋgòwàna rzìi hwa tìleya hwàlòkèlì ò eŋge erzòòkà ò lì mò kàrzɛ. Nà òma mɔ̀ à mà uke aŋga, à mà òŋgòwàna hwaŋga hwatò ema hwà mà lòkɛ̀ lì akeyà na e ndèli ya ama Lohwɛ̀ ema hwà mà luwe. 28O hvenda ya eni ya ŋginyà mɔ̀ à mà rzuwàna wònyà Yudà ò hwèki hwe ŋgìndì. Mɔ̀ à mà hwa telɛlɛ lì akeyà na e kààtì ya Lohwà nanù ema Yerzù mɔ̀ ndi à hwèlì è Mɔ̀ ema à Ɔ̀kirzɛ̀hwɛ̀yi.
Айни замон обунашуда:
Hwègbèèlì 18: bri
Лаҳзаҳои махсус
Паҳн кунед
Нусха
Want to have your highlights saved across all your devices? Sign up or sign in