മത്തായി 2
2
ക്‌ളാക്ക് സാരിര്‌ന്ത് ണോഡ്യ ബന്തവാര്
1എരോദാ് റാജാവായിര്‌ന്ത കാലാത്തിലി എഗുദ ണാഡില്യ ബെദ്‌ലെഗേമ് പട്ടണാത്തിലി ഏസു പ്‌റാന്താ്. ഏസു പ്‌റാന്ത പ്‌റ ക്‌ളാക്ക് സാരിര്‌ന്ത് ണാള്‌നച്ചെത്ത്‌റ ണോഡുറവാര് എര്‌സലേമ്‌ക്കെ ബന്താര്. 2അവാര്: <<എഗുദാര്‌ക്ക് റാജാവായി പ്‌റാന്തവാ് ഏദിലി? അവാ് പ്‌റാന്താ് എന്ത് കാട്ട്‌റ ബെ്ള്ളി ക്‌ളാക്ക് സാരിര്‌ന്ത് കഡാന്താദ്‌ണ എമ്മ കണ്ട് അയാള്‌ണ കുമ്മുഡ്യ ബന്തിര്‌ക്കേര്>> എന്ത് ആള്‌ഗാക്ക് സൊന്നാര്.
3ഈ സേദിന കേ്ട്ട് എരോദാ് റാജാവുമ് എര്‌സലേമിലിര്‌ക്ക മുച്ചുഡ ആള്‌ഗാമ് അങ്കലാപ്പ്‌പട്ടാര്. 4റാജാവു എഗുദ പൂസാരി തലെവലണാമ് ബേദ ബാത്ത്യലണാമ് ഒളേത്ത് ബര്‌സി: <<ക്‌റ്‌സ്‌ത്ത് ഏദ് പട്ടിലി പ്‌റാക്കാദ്>> എന്ത് അവാര്‌ണ കേ്ട്ടാ്. 5-6അക്കുളെ അവാര്: <<എഗുദ ണാഡില്യ ബെദ്‌ലെഗേമ് പട്ടണാത്തിലിത്തെ>> എന്ത് സൊന്നാര്.
<< <എഗുദ ണാഡില്യ ബെദ്‌ലെഗേമെ,
ണീ സിന്ന പട്ടണ ആനാല്‌മ് എഗുദ ണാഡില്യ പട്ടണാത്തിലി ണീ മുക്ക്യമാന പട്ടണാത്തെ.
എന്ത്‌ക്കെന്റ എന്ന് ആള്‌ഗളാന ഇസ്‌റേല്‌ക്കാറാര്‌ണ
ഒരു മാട്ട്യാന പാസെ മേസ്യ ഉള്ളവാ് ണിന്ന് പട്ടിലിര്‌ന്ത് ബരുവാ്>#മീഗാ് 5:2
എന്ത് സാമിദാസ്‌ഗ മേലെ എ്ള്‌ദിര്‌ക്ക്‌ദ്>> എന്ത് സൊന്നാര്.
7അക്കുളെ എരോദാ് റാജാവു അയ്യി ണാള്‌നച്ചെത്ത്‌റ ണോഡുറവാര്‌ണ സൂഗാന ഒളേത്ത് ഏദ് ഗള്യെ ബെ്ള്ളി കഡാന്ത്‌ദ് എന്ത് സൊക്കാന കേ്ട്ട് ണെപ്പ്‌കെ്ഡേസിനാ്. 8പ്‌റ എരോദാ് റാജാവു: <<ണിമ്മ ബെദ്‌ലെഗേമ്‌ക്കെ പോയി അയ്യി മ്‌ഗാണ പറ്റ്യുള്ള കാര്യ സൊക്കാന കേ്ട്ട് ണോഡിരി. കണ്ട പ്‌റ ണാന്‌മ് അയ്യി മ്‌ഗാണ കുമ്മുഡ്യ എനാക്ക്‌മ് ണിമ്മ ബന്ത് സൊല്ലിരി>> എന്ത് സൊല്ലി അവാര്‌ണ സൊല്ലിബ്‌ട്ടാ്.
9അച്ചെ അവാര് റാജാവു സൊന്നാദ്‌ണ കേ്ട്ട് അദിലിര്‌ന്ത് പോനാര്. അവാര് ക്‌ളാക്ക് സാരി കണ്ട ബെ്ള്ളി മ്‌ഗ ഇര്‌ക്കാദ്‌ക്ക് ണേരെ പോയി ണില്ല്‌റ മാട്ട്‌മ് അവാര്‌ദ് മുന്നുക്ക് അദ് പോയികൊണ്ടെ ഇര്‌ന്ത്‌ദ്. 10അച്ചെ അവാര് അയ്യി ബെ്ള്ളിന കണ്ടാദ്‌ണാലെ പിര്യപൊങ്കി മറ്‌ന്താര്. 11അവാര് അയ്യി കൂരേക്കെ പോയി ണോഡുഗാട്ടി അവ്വാസി മറിയാദൊപ്പ മ്‌ഗാണ കണ്ടാര്. അയ്യി മ്‌ഗാണ കണ്ട് അവാര് സഡാങ്ക ബ്‌ന്ത് കുമ്മുഡിനാര്. പ്‌റ പെ്ട്ടിന തുറാന്ത് പൊന്നുണാമ്, തുമ്മണാമ്, മൂര്#2:11മൂര് ഇദ് തുമ്മണ പാസെ ഇര്‌ക്ക ഒരു മരാദ് കറെത്തെ. ഇദ് തുമ്മണ ബ്‌ഡ ണല്ല ഗമ്‌ഗമ ബാഡെ അഡിക്കു. എങ്ക ണല്ല ബാഡെ അഡിക്ക ജാദിനാമ് കാണിക്കെ ബെത്താര്. 12ആന കനേസിലി സാമി അവാര്‌ക്കെ എരോദാ് പട്ട്‌ക്കെ തിലിമ്പി പോഗാദി എന്ത് സൊന്നാദ്‌ണാലെ അവാര് തമ്മ് ണാഡ്‌ക്കെ ബേ്റെ ബയ്യിമേലെ പോനാര്.
ഈജിത്ത് ണാഡ്‌ക്കെ ഓഡി പോരാര്
13അവാര് പോന പ്‌റ ആണ്ടവാന്‌ദ് ദൂദാ് കനേസിലി ഓസേപ്‌ക്കെ: <<എരോദാ് റാജാവു മ്‌ഗാണ കൊല്ല്യ ബേ്ണ്ടി പരാക്ക്യ ണെനേത്തിര്‌ക്കാ്. അദ്‌ണാലെ ണീ എ്ന്ത് മ്‌ഗാണാമ് അവ്വാസിനാമ് കൂട്ടി ഈജിത്ത് ണാഡ്‌ക്കെ ഓഡി പോ. ണാന് ണിനാക്കെ സൊല്ലുറമാട്ട്‌ക്ക് അദിലിതാനെ പെ്ളെ>> എന്ത് സൊന്നാ്. 14ഓസേപ് അപ്പ്‌താനെ എ്ന്ത് മ്‌ഗാണാമ് അവ്വാസിനാമ് കൂട്ടികൊണ്ട് ജാമ കൊണ്ടെ ജാമ ഈജിത്ത്‌ക്കെ ഓഡി പോനാ്. 15എരോദാ് റാജാവു സാഗമാട്ട്‌മ് അവാര് അദിലി പെ്ളേത്താര്. <<ഈജിത്ത് ണാഡിലിര്‌ന്ത് ണാന് എന്ന് മഗാന ഒളേത്ത് ബര്‌സിനെ>>#ജോസയ്യാ് 11:1 എന്ത് ആണ്ടവാ് തന്ന്‌ദ് ദാസ്‌ഗ മേലെ സൊന്നാദ് അദേപാസെ ണഡാന്ത്‌ദ്.
എരോദാ് റാജാവു ആണ് പ്‌ള്ളെഗണ കൊല്ലുറാ്
16ണാള്‌നച്ചെത്ത്‌റ ണോഡുറവാര് തനാണ ഏമാത്തിനാര് എന്ത് തെരിന്ത് എരോദാ് റാജാവുക്ക് റമ്പ മൊനെ ബന്ത്‌ദ്. അദ്‌ണാലെ മ്‌ഗ പ്‌റാക്കാദ്‌ണ കാട്ട്‌റ ബെ്ള്ളി കഡാന്താദ്‌ണ പറ്റി ണാള്‌നച്ചെത്ത്‌റ ണോഡുറവാര് സൊന്ന സമ്യാണ ണോഡി റാജാവു ബെദ്‌ലെഗേമ്‌ക്ക്‌മ് അദ്‌ക്ക് സുറ്റുമിര്‌ക്ക എല്ല എ്ഡേക്ക്‌റാഗാക്ക്‌മ് ആള് ബ്‌ട്ട്, റണ്ട് ബയ്യിസ്‌മ് അദ്‌ക്ക് അഡിമ് ഇര്‌ക്ക ആണ് പ്‌ള്ളെഗണ മുച്ചുഡ കൊല്ലിസിനാ്. 17-18അച്ചെ
<<റാമെലി ഒരു ജദ്ദ കേ്ട്ട്‌ദ്,
അഗാറ്‌റ ജദ്ദാമ് ദുക്കാക്ക് മണ്ടെനമാര്‌ണ അഡിത്ത് അഗ്‌റ ജദ്ദാമ്‌ത്തെ.
റാഗേല് തന്ന് മക്കഗാക്ക് ബേ്ണ്ടി അഗ്‌റ,
അവാണ ആള്‌ഗ പിരാക്കി ഗൂഡി അദ് കേ്ക്ക്യ മനേസ്സില്ലെ.
എന്ത്‌ക്കെന്റ അവാള്‌ദ് പ്‌ള്ളെഗ സത്തെക്കിനാര്>>#ഇരെമ്യാ് 31:15
എന്ത് ഇരെമ്യാ് സാമിദാസ്#2:17–18 സാമിദാസ് സാമിക്ക് സൊല്ല്യ ഇര്‌ക്ക കാര്യഗണ ആള്‌ഗാക്ക് സൊല്ലുറ ആള്‌ത്തെ സാമിദാസ്. ഇയാള്‌ണ സാമിത്തെ തെരിന്തെ്ഡ്‌ത്തിര്‌ക്കാദ്. പോന കാലാത്തിലി ണഡാന്താദ്‌ണ പറ്റിമ് ഇപ്പ് ണഡാക്കാദ്‌ണ പറ്റിമ് ഇനി ണഡാക്ക്യ പോരാദ്‌ണ പറ്റിമ് ആള്‌ഗാക്കെ സൊല്ലുറ ആള്‌ത്തെ ഇയാള്. മേലെ സൊന്നാദ് അദേപാസെ ണഡാന്ത്‌ദ്.
ണസറത്ത് പട്ടണാക്കെ തിലിമ്പി ബരാര്
19അച്ചെ എരോദാ് റാജാവു സത്ത പ്‌റ ആണ്ടവാന്‌ദ് ദൂദാ് ഈജിത്തിലി ബെത്ത് ഓസേപ്‌ക്കെ കനേസിലി: 20<<മ്‌ഗാണ കൊല്ല്യ ണോഡിനവാരെല്ല സത്താര്. അദ്‌ണാലെ ണീ എ്ന്ത്, മ്‌ഗാണാമ് അവ്വാസിനാമ് കൂട്ടികൊണ്ട് ഇസ്‌റേല് ണാഡ്‌ക്കെ പോ>> എന്ത് സൊന്നാ്.
21അച്ചെ അവാ് എ്ന്ത് അയ്യി മ്‌ഗാണാമ് അവ്വാസിനാമ് കൂട്ടികൊണ്ട് ഇസ്‌റേല് ണാഡ്‌ക്കെ പോനാ്. 22ആന എരോദാ് റാജാവു സത്ത പ്‌റ അയാള് മഗാ് അറ്‌ക്കലോസ് എഗുദ ണാഡ്‌ണ ആള്‌റാ് എന്ത് ഓസേപ്‌ക്ക് സേദി കെ്ഡേത്ത്‌ദ്. അദ്‌ണാലെ അയാള്‌ക്ക് ആങ്ക് പോയ കോവെ പ്‌ഡിത്ത്‌ദ്. ആങ്ക് പോഗ ബേ്ഡ എന്ത് കനേസിലി കാട്ടിനാദ്‌ണാലെ അയാള് അദിലിര്‌ന്ത് ഗെലീലെ ണാഡ് സാരി പോനാ്. 23ഓസേപ് ഗെലീലെ ണാഡില്യ ണസറത്ത് എങ്ക പട്ടണാക്കെ പോയി പെ്ളേത്താ്. അച്ചെ ഏസുണ <<ണസറത്ത്‌ക്കാറാ് എന്ത് ഒളേക്കുവാര്>> എന്ത് സാമിദാസ്‌ഗ മേലെ സൊന്നാദ് ണഡാന്ത്‌ദ്.
Айни замон обунашуда:
മത്തായി 2: സാമിദ് സേദി
Лаҳзаҳои махсус
Паҳн кунед
Нусха
Want to have your highlights saved across all your devices? Sign up or sign in
New Life Literature