Jenesesi 6
6
Wendjedeya wa jotega mwilamboni
1Tempu yenne atu kaindjivihanaga mwilamboni, kohoroma abala ahima a ahiyana. 2Evale ana Mulugu a alombwana#6:2 Ili yorutcha iziwa zela ana Mulugu na ahiyana anawongiwa eva. Atu amohiwa anaumbuwela ira ana Mulugu anawongiwa ba angelro. Mbwenye nafwanya mMazuni, Markuji 12:25 nnovwa ira angelro kinabalihana. Eto atu amohiwa anaumbuwela ira ana Mulugu anawongiwa ba ale kabaliwe muzizani mwa Seti karomile muhara Mulugu, nomala eno aliwa roma aziveliwa ahiyana kabaliwe muzizani mwa Kayini anno kahanna tempu para ja Mulugu. kagaaing'anile ahiyana anno kaabanle atwale, kohaona ira kali ahima obaleya. Evale aliwa kohodowa, aliwa asakulra anne kaafunne atu, aliwa atukula ira kakale ahiyaniwa.
3Evale Yehova ohowonga eraga: <<Yovuma inavaha miyo, kinakalegeve mwa atu kala no kala.#6:3 Yovuma inavaha miyo, kinakalegeve mwa atu kala no kala. Va Mulugu unawonga zela kwa wa mutu. Ku wonga mutu yovuma yenno invahile Mulugu, inerege kumamo, iwelele wa Mulugu anvahile. Tchoira aliwa joira jiwa jihimala viringana. Nona, malambo ewa mwilamboni anafuna kakale yaka 120.>>#6:3 malambo ewa mwilamboni anafuna kakale yaka 120: Afwase Mulugu awongaga eno, ku tapulela ira kuma siku nenne ante siku nafuna Mulugu atolotcha atu na mahindje vafuna vimale yaka 120. Owu hehi, Mulugu afuna avungule yaka dokalawo wa mutu ira digomege yaka 120 nnga vinaona hiyo tempu ili hiyo ila. 4Muwari mwa tempu yenne kohokalawo atu alukulu a kopolo kaitaniwa aNefili. Eto ahima a Mulugu ale kagaagonnena ahiyana ale, ahima kaabanle atu kali alukulu, a kopolo eto kali atu ovweya malambo anne.
Yehova ohokumbanya na mwasa ompandutcha mutu
5Yehova ohoona ira: <<Jabure jinera atu jihisimbwa indjiva eto joumbuwela jiwa jinaumbuwela atu mmirimani mwiwa ti jotakala ora datene.>> 6Mwa enne Yehova ohokumbanya ira: <<Dairele nni vale dimusakanyaga mutu, dimuhelaga mwilamboni ya vati?!>> Liye kukumuwaga mmirimani mwaye.
7Yehova moona ejile, ohowonga ira: <<Nnoatolotcha atu atene daapandutchile miyo ira kahafwanyeye mwilamboni. Roma atu, dowa vinyama, na jomburunuwa jatene, na mbalrame datene nnavava zulu, mwasiwa dapandutchele miyo kadizi.>>
8Mbwenye mulombwana Nowe ekave bahi gwafwanyile mahala vamentoni va Yehova.
Muselu wa mulombwana Nowe
9Ula gu muselu wa mulombwana Nowe. Nowe bahi gwali mutu wapama eto owongowa muwari mwa atu atene a tempu yaye. Liye awendetcha na Mulugu. 10Nowe aabanle anapongwe araru: Semi, Kami na Jafeti.
11Mwa tempu yenne ilambo yatene vamentoni va Mulugu yohomala viringana eto mohozala irelana ubure. 12Mwa enne Mulugu againg'anne jaireya mwilamboni ya vati ohoona ira ilambo yohomala nongeya. Tchoira mwa tempu yenne atu atene a mwilamboni ya vati makalelo ewa kohomala viringana.
Mulugu ohomuwandela mulombwana Nowe ira aseme mwadeya
13Evale Mulugu ohomuwandela Nowe eraga: <<Miyo nnafuna daatolotche atu atene mwasiwa ilambo imala zala irelana ubure. Nona nnafuna daatolotche atu atene vamohi na ilambo ya vati yatene. 14Weyo mbwenye uvisemele mwadeya mulukulu. Usakanye na matabwa apama a sipereste. Muwari mwa mwadeya ugawemo makwartu. Wagamanle sakanya, umare na alikataraya muwari na unde. 15Mapimeluwa kakale eni. Molapela muwa upime mameturu 130. Rambalala uwa ukale mameturu 22. Regama uwa ukale mameturu 13. 16Zulu uwa utomeyewo. Kuma vagomenle ntchihi ante fiya vanantopini, vikale meyu meturu. Mulanguwa uhele mmambalo mwa mwadeya. Eto muwari mwa mwadeya mule ugawemo mamburo mararu, otandanyedeya. Nimohi vati, nimohi niwa vari, nogomiheda vazulu. 17Tchoira miyo nnoza dirume mahindje madjindji, kavuhelele ilambo yatene ira katolotche jovuma jatene jili mwilamboni. Jatene jene jinafwanyeya ilambo ya vati jinotolowa. 18Mbwenye nnafuna disakanye yopangana yaga na weyo. Roma weyo, muhiyanawo, ahimawo, vamohi na ahimawo ahiyaniwa, munovolowa atene mmwadeyani. 19-20Eto weyo unovolotchiha mmwadeyani mule mulombwana mmohi na muhiyana mmohi muwari mwa jatene jokana ingumi. Kada yengo ya ingumi uvolotchihe mmwadeyani mule mulombwana mmohi na muhiyana mmohi, jivolowe vamohi na weyo ira jahakwe. Roma mbalrame ili yatene, dowa mwanainyama uli watene na jatene jomburunuwa vati, kada yengo ya ingumi jizege mbinli mbinli, mmohi wa mulombwana, mmohi wa muhiyana, uvolotchihe ira jikalewove. 21Weyo unotukula eto jodja jatene jinadjiwa, uvolotchihe mmwadeyani mule, ukoye ira jikale jodja jawo na ja anavinyama ale.>> 22Evale Nowe ohoirana jatene nnga mwamurumele Mulugu. Jatene jene oharihamo.
Айни замон обунашуда:
Jenesesi 6: iLolo
Лаҳзаҳои махсус
Паҳн кунед
Нусха
Want to have your highlights saved across all your devices? Sign up or sign in
© 2018 Visão Integral