मत्ती 2
2
पूरुवसे आइल ज्योतिषीहुँक्र
1हेरोद राजक समयम यहूदिया क्षेत्रक बेथलेहेम सहरम जब येशूक जन्म हुइलन। तब पूरुवसे ज्योतिषीहुँक्र यरूशलेम सहरम अइल 2ओ हुँक्र मनैन पुछ्ल, “यहूदीन्हक राजा होक जन्मल् लर्का कहाँ बाट? उहाँ जन्मलक थाहाँ देना तोरैँया हम्र पूरुबओर देख्ली, उहओर्से उहाँह दर्शन कर आरली।”
3जब हेरोद राजा यी बात सुन्ल तब अशान्तिले छट्पटाइ लग्ल, ओ हुँकहार सँगसँग सारा यरूशलेमक मनै फे अशान्तिले छट्पटाइ लग्ल। 4तबदोस्र हेरोद सब मुख्य पूजारीन ओ शास्त्रीन बलाक “ख्रीष्टक जन्म कहाँ हुइना बाटन?” कैक सोधपुछ कर्ल। 5हुँक्र कल, “यहूदिया क्षेत्रक बेथलेहेम सहरम। काकरकि अगमवक्ता लिख्रख्ल:
6‘हेरो, बेथलेहेम सहरक मनै,
टुह्र यहूदिया क्षेत्रम रहल कौनो सहरक मनैनसे कम नैहुइटो,
काकरकि टुन्हक सहरम एकठो महान शासक जन्मुइयाबाट,
ओ ऊ म्वार मनै इस्राएलीन्हक रेखदेख करुइयाबाट।’”#मीका ५:२
7हेरोद ज्योतिषीहुँकन गुपचुपम बलाक तोरैँया देखपरल ठीक समय पत्ता लगैल। 8तबदोस्र ऊ हुँकन असिक कैक बेथलेहेमम पठैल, “जाओ, ओ मजासे उ लर्कक् खोजी करो। हुँकहीन पत्ता लगैबो त, महीह फे खबर करहो, मै फे जाक हुँकहार दर्शन करम।”
9राजक बात सुन्क ज्योतिषीहुँक्र आपन डगर लग्ल। जौन तोरैँया हुँक्र पूरुबम देख्लह उ तोरैँया हुँकन्हक आघ-आघ लागल, ओ लर्का रहल ठाउँक स्वाझ उप्पर पुग्क टक्कसे अर्यागैल्। 10हुँक्र तोरैँयह देख्क एकदम आनन्दित हुइल। 11तबदोस्र हुँक्र घरम पैँठ्ल त लर्कह आपन डाई मरियमकसँग देख्ल। ओ हुँकहार पाउ पर्क दण्डवत कर्ल, दोस्र आपन-आपन सन्धूक खोल्क हुँकहीन स्वान, सुगन्धित धूप ओ धेर महङ्ग अत्तर भेटी चह्रैल। 12तबदोस्र सपनम “हेरोदकठे जिन जैहो” कना चेताउनी पैल त हुँक्र और डगरसे आपन देशम घुम्ल।
भाग्क मिश्रदेशम गैलक
13ज्योतिषीहुँक्र घुम्क गैल त योसेफ सपनम परमप्रभुक स्वर्गदूतह देख्ल ओ स्वर्गदूत हुँकहीन असिक कल, “उठो, लर्का ओ हुँकहार डाईह लेक मिश्रदेशम भागजाओ, ओ मै नैकहट्सम उहँ पलरहहो। काकरकि, हेरोद लर्कह मुवाइक लाग खोजी करटा।”
14तबदोस्र योसेफ उठ्क लर्का ओ हुँकहार डाईह लेक रात्तीह मिश्रदेशम भाग्गैल। 15राजा हेरोदक मृत्यु नैहुइट्सम ऊ उहँ पलरल। असिक अगमवक्ताद्वारा परमप्रभुक ब्वालल् वचन पूरा हुइल्: “मै आपन छावह मिश्रदेशमसे बलैनु।”#होशे ११:१
16जब हेरोद ज्योतिषीहुँक्र हुँकहीन छकाइल बात थाहाँ पैल, तब ऊ रिसले चूर हुइल। ऊ ज्योतिषीहुँकनसे थाहाँ पाइल समय अनुसार बेथलेहेम ओ उ इलाकम रहल दुइ वर्षसमक सब छावा लर्कन मुवाइ लगैल। 17असिक अगमवक्ता यर्मियक ब्वालल् वचन सत्य हुइल्,
18“रामा कना ठाउँम चिल्ला-चिल्लाक रुइट्
ओ विलाप करँट् सुनमिलटा।
राहेल आपन लर्कन्हक लाग रुइटी।
हुँकहीन कुई फे सुफ्लाइ नैसेक्ल,
काकरकि हुँकहार सक्कु लर्का ओरागैल।”#यर ३१:१५
घुम्क नासरतम अइलक
19राजा हेरोद मुल त परमप्रभुक एकठो स्वर्गदूत मिश्रदेशम योसेफकठे सपनम देखपर्ल ओ असिक कल, 20“उठो, आब छावा-डाईह लेक इस्राएल देशम घुम्क जाओ। काकरकि लर्कक् प्राण लिह खोजुइयन मुसेक्ल।”
21ऊ उठ्ल ओ छावा-डाईह लेक इस्राएल देशम घुम्क गैल। 22तर यहूदियम हेरोदक छावा अर्खिलाउस आपन बाबक ठाउँम राज्य करट कना बात सुन्ल त ऊ उहाँ जाइ डरैल। तब ऊ फेदोस्र सपनम चेताउनी पैल त गालील क्षेत्रम गैल। 23उहाँ जाक नासरत कना सहरम बैठ्ल। असिक अगमवक्तन्हक “उहाँह नासरी कैजिनेबा” कना वचन पूरा हुइल्।#मर्क १:२४; लूक २:३९; यूह १:४५
Айни замон обунашуда:
मत्ती 2: thl
Лаҳзаҳои махсус
Паҳн кунед
Нусха
Want to have your highlights saved across all your devices? Sign up or sign in
© 2020, Wycliffe Bible Translators, Inc. All rights reserved.