Tobit 7
7
Tobias mi' ik'otel ti iyotot Ragüel
1Che' tsa' ochiyob majlel ya' ti Ecbatana, Tobías tsi' su'be jiñi ángel:
—Kerañ Azarías, toj päyäyoñ majlel ya' ti yotot jiñi Ragüel.
Jiñi ángel tsi' päyä majlel ya' ti iyotot Ragüel, ya' buchul ti ti' iyotot che' tsa' k'oti itajob. Jiñi Tobías yik'ot ángel tsa' ñaxañ kaji ichukbeñob ik'äb, ixku jiñi Ragüel tsi' su'beyob:
—Ocheñla kerañob ti' tijikñäyel la' pusik'al.
Tsi' su'beyob ochel ya' ti iyotot. 2Jiñi Ragüel tsi' su'be jiñi Edna iyijñam:
—K'eleku, ili ch'itoñ lajal bajche' jiñi käskuñ Tobit.
3Jiñi Edna tsi' k'ajtibeyob:
—Kpi'älob, baki ch'oyoletla, che'eñ.
Jiñob tsi' jak'äyob:
—Joñoñ iyalobiloñ lojoñ Neftalí, joñoñäch lojoñ tsa'bä chojkiyoñ lok'el ya' ti tejklum Nínive.
4Edna tsi' cha' k'ajti:
—¿Kämbil la' cha'añ jiñi kerañ Tobit? ¿Bajche' añ wäle?—che'eñ.
Tsi' jak'äyob:
—Kämbiläch kcha'añ lojoñ, 5Awilan, kuxuläch, uts'atäch añ, —che'ob.
Che' jiñi Tobías tsi' iyälä:
—Jiñi Tobit jiñäch ktat.
6Ti' se'el tsa' tejchi ch'ojyel jiñi Ragüel, tsi' ts'ujts'u, tsa' uk'i yik'ot tsi' su'be:
—¡La' ich'ujutesañet Lak Yum kalobil! ¡Jiñi atat jiñäch juntikil tojbä wiñik! Ch'ijiyemtikax ti ku'bi che' juntikil tojbä wiñik tsa' käle ti xpots'.
Jiñi Ragüel tsi' lik'choko ibä ti' bik' jiñi Tobías, ya'i tsa' kaji ti uk'el. 7Che' ja'el tsa' kaji ti uk'el jiñi Edna yik'ot iyixik'al ik'aba' Sara. 8Awilañ, weñ ñuk itijikñäyel ipusik'al jiñi Ragüel cha'añ ya'añ yik'otob jiñi Tobías yik'ot jiñi Azarías, jiñ cha'añ tsa' iyäk'ä ti tsäñtsäñtel junkojt täñäme' cha'añ mi komol k'uxob iwaj.
Iñujpuñijel Tobías yik'ot Sara
9Che' ujtemo'bix ipokob ik'äb yik'ot che' tsa'ix ts'ämiyob, tsa' kajiyob ti uch'el. Ixku jiñi Tobías tsa' kaji isu'beñ jiñi Rafael:
—Kerañ Azarías, yom ma' su'beñ jiñi Ragüel cha'añ mi' yäk'eñoñ ti kijñam jiñi Sara.
10Che' tsi' yu'bi jiñi Ragüel ili t'añ, tsa' kaji isu'beñ jiñi Tobías:
—K'uxu awaj, japä, cha'leñ uch'el ti' tijikñäyel apusik'al ti ili ak'älel. Ma'añik majch juñtikilik wiñik, kojach jatet mi' käytäl ti' atojlel cha'añ mi' mejlel apäy jiñi kixik'al ti' awijñam, ma'añik mik mejlel käk'eñ yambä wiñik, kojach jatet, kome jatet iyalobiletäch kerañ. Jiñ cha'añ mi kaj su'beñet ti toj bajche añ jiñi kixik'al. 11Wukyalelix ksiji jiñi kixik'al ti' tojlel iyalobilob lak pi'älob, ti' pejtelel tsa' laj chämiyob ti jiñi jachbä ak'älel che'bä tsa' ñujpuñiyob che' maxto ipi'äleyob ibä ti wäyel. Kojach jatet yom ma' cha'leñ we'el ti' tijikñäyel apusik'al, kome Lak Yum mi kaj ikoltañetla.
12Jiñi Tobías tsi' jak'ä:
—Ma'añik mi kaj kcha'leñ we'el uch'el mi ma'añik ma' ñaxañ sujmetisañ aña'täbal cha'añ jiñi wolibä jk'ajtibeñet.
Ragüel tsi' su'be:
—Yomäch. Päyä wäle che' bajche' añ ti juñilel jiñi ixik'ojel Moisés. K'äläl wäle, jatet iyäskuñet, ixku jiñi x-ixik jiñäch bajche' awits'iñ, acha'añäch, mi' kaj ti' kälel awik'ot ti' pejtelel k'iñ. Jiñi Lak Yum ambä ti Pañchañ la' ikoltañetla cha'añ uts'at mi la' ñusañ ili ak'älel, yik'ot la' iyäk'eñetla iñäch'tälel.
13Ragüel tsi' päyä tilel iyixik'al Sara, che' ya'ix añ ti' yojlilob, tsi' chukbe ik'äb, tsi' yäk'ä ti' tojlel Tobías, tsa' kaji isu'ben:
—Mij käk'eñet ili kixik'al che' bajche' ts'ijbubil ti' juñ icha'añbä Moisés. Päyä majlel ti awotot ba'añ atat. Jiñi Lak Yum ambä ti pañchañ la' iyäk'etla majlel ti ñäch'tälel ti uts'atbä bij.
14Ragüel tsi' päyä tilel jiñi iyijñam cha'añ mi' ch'äm tilel juñ, tsi' ts'ijbu ijuñilel ñujpuñijel, baki mi' yäl cha'añ ak'bilix ti ijñamäl, bajche' albil ti' käñtesa Moisés. Che' tsa'ix ujtiyob, tsa' kajiyob ti we'el ti uch'el. 15Ragüel tsi' päyä tilel iyijñam, tsi' su'be:
—Ixik yom ma' chajpañ yambä wäyi'bäl, ya' ma' päy majlel jiñi Sara.
16Edna, iyijñam Ragüel; tsa' majli ichajpäbeñ iwäyib bajche' tsa' su'beñti, ya'i tsa' kaji ipäy majlel iyixik'al. Edna tsa' kaji ti uk'el, che' woli isujkuñ iwut, tsa' kaji isu'beñ iyixik'al:
17—Kixik'al mach amel apusik'al, jiñi Lak Yum ambä ti pañchañ mi' kaj iyäk'eñet atijikñäyel mach jiñik ch'ijiyemlel, yom xuk'ulet ma' wajñel kalobil, che'eñ.
Ti wi'il tsa' lok'i majlel jiñi iña'.
Айни замон обунашуда:
Tobit 7: CholDc
Лаҳзаҳои махсус
Паҳн кунед
Нусха
![None](/_next/image?url=https%3A%2F%2Fimageproxy.youversionapi.com%2F58%2Fhttps%3A%2F%2Fweb-assets.youversion.com%2Fapp-icons%2Ftg.png&w=128&q=75)
Want to have your highlights saved across all your devices? Sign up or sign in
© Biblia Chol de estudio con DC- Derechos reservados por SBM