Naanearü ügüchiga 1
1
Guxü̃ma ga yema Tupana ngo̱xẽẽxü̃chiga
1-2Yema Tupana namaxã inaxügüxü̃ nixĩ nax naxüaxü̃ ga guxü̃ma i daxũwa ngẽxmaxü̃ rü ñoma i naane. Natürü ñaa naane ga noxri rü taxũta mea nango̱x yerü dexátüü̃wa nayexma rü naxẽanemare. Rü nüma ga Tupanaãxẽ rü naétügu ínachü̱xüxüxü̃.
3Rü yexguma ga Tupana rü ñanagürü: —¡Nangexma̱x i nangóonexü̃! —ñanagürü. Rü ningóone.
4Rü Tupana rü yema ngóonexü̃maxã nataãxẽ rü yemaca̱x nüxrüwama nanayexmaxẽxẽ ga yema ngóonexü̃ nüxna ga yema ẽanexü̃.
5Rü yema ngóonexü̃ rü ngunexü̃gu nanaxüéga rü ga ẽanexü̃ rü chütaxü̃gu. Rü yemaacü ningu ga nüxíraxü̃xü̃ ga ngunexü̃.
6Rü yemawena rü ñanagürü ga Tupana: —¡Name nixĩ i ngẽma dexá i cherena ixĩxü̃ rü nachü̱xüxnagü nax tama ngẽma dexá i ñaxtüwa ngẽxmaxü̃na yaxũxü̃ca̱x, rü ngẽmaãcü nax naxãchicaanexü̃ca̱x i norü ngãxü̃wa! —ñanagürü. Rü yemaacü nixĩ.
7Rü yemaacü Tupana nanaxüchicaane ga yexguma yaxũgachixẽẽã̱xgu ga yema cherena nüxna ga yema dexá ga ñaa naanewa yexmaxü̃. Rü daxũwa nayexma ga caixanexü̃ rü yematüü̃wa ga dexá.
8Rü Tupana rü yema daxũwa yexmaxü̃ rü ngo̱xmaanexü̃maxã nanaxu. Rü yemaacü ningu ga norü taxre ga ngunexü̃.
9Rü yexguma ga Tupana rü ñanagürü: —¡Ñaa dexá i waixü̃müétüwa ngẽxmaxü̃ rü wüxiwa naxũ nax ngẽmaãcü nangóxü̃ca̱x i paanexü̃! —ñanagürü. Rü yemaacü nixĩ.
10Rü yema paanexü̃ rü waixü̃mügu nanaxüéga ga Tupana. Rü yema dexá ga wüxiwa ũxü̃ rü mármaxã nanaxu. Rü Tupana nüxü̃ nadau ga nax namexü̃ ga guxü̃ma ga yema.
11Rü ñanagürü: —¡Naxügü i waixü̃müwa i naguxü̃raü̃xü̃ i nanetügü rü natüanegü i ãxchirexü̃ rü naigü i oṍxü̃! —ñanagürü. Rü yemaacü nango̱x.
12Rü yexguma yema waixü̃müwa narüxügü ga naguxü̃raxü̃xü̃ ga nanetügü rü natüanegü ga ãxchirexü̃ rü naigü ga mexü̃ nax nangṍxü̃ i norü o. Rü Tupana nüxü̃ nadau ga nax namexü̃ ga guxü̃ma ga yema nango̱xẽẽxü̃.
13Rü yemaacü ningu ga norü tomaepü̱x ga ngunexü̃.
14-15Rü yexguma ga Tupana rü ñanagürü: —¡Nangexma̱x i nangóonexẽẽruü̃gü i daxũwa nax naanexü̃ nangóonexẽẽxü̃ca̱x, rü nax nangemaxü̃ca̱x i ngunexü̃ rü chütaxü̃, rü ngẽmaãcü nüxü̃ icuáxü̃ca̱x i wüxichigü i ngunexü̃ rü taunecü rü mucü! —ñanagürü. Rü yemaacü nixĩ.
16Rü yemaacü nanaxü ga yema taxre ga nangóonexẽẽruxü̃ ga üa̱xcü rü tauemacü, rü ngẽma rütamaexü̃ nax ngunecü inabáxixü̃ca̱x, rü ngẽma rüxíramaexü̃ nax chütacü inabáxixü̃ca̱x. Rü nanaxü ta ga ẽxtagü.
17-18Rü daxũwa nanayexmagüxẽxẽ nax ñaa naanegu nabáixgüxü̃ca̱x i ngunecü rü chütacü. Rü yemaacü yema ẽanexü̃na nayaxũgachixẽxẽ ga ngóonexü̃. Rü Tupana nüxü̃ nadau ga nax namexü̃ ga guxü̃ma ga yema.
19Rü yemaacü ningu ga norü ãgümücü ga ngunexü̃.
20Rü ñu̱xũchi Tupana rü ñanagürü: —¡Dexáwa nangó rü yamu i naguxü̃raxü̃xü̃ i choxnigü rü naguxü̃raxü̃xü̃ i ta̱xacü i to i dexáwa maxẽxü̃! ¡Rü ngẽxgumarüxü̃ ta nangó i naguxü̃raxü̃xü̃ i werigü i ñaa naaneétügu íxüüüxü̃! —ñanagürü. Rü yemaacü nixĩ.
21Rü yexgumarüxü̃ ta Tupana nanaxü ga naeü̃gü i taxüchixü̃ i márwa maxẽxü̃. Rü nanaxü ta ga naguxü̃raxü̃xü̃ ga choxnigü i dexáwa maxẽxü̃, rü naguxü̃raxü̃xü̃ ga yema ixãxpe̱xatüxü̃. Rü Tupana nüxü̃ nadau ga nax namexü̃ ga guxü̃ma ga yema naxüxü̃.
22Rü mexü̃ namaxã naxuegu ga yema naxüxü̃, rü ñanagürü: —¡Pemuxacügü rü penapagüxẽxẽ i taxtügü rü márgü! ¡Rü pema ixãxpe̱xatüxe, rü penapaxẽxẽ i ñaa naane! —ñanagürü.
23Rü yemaacü ningu ga norü wüxime̱e̱xpü̱x ga ngunexü̃.
24Rü yexguma ga Tupana rü ñanagürü: —¡Nangexma̱x i naanewa i naguxü̃raxü̃xü̃ i naeü̃gü i naxü̃na ixĩgüxü̃, rü naeü̃gü i naixnecüwa maxẽxü̃, rü naeü̃gü i waixü̃müanegu nügü itúgüxü̃! —ñanagürü. Rü yemaacü nixĩ.
25Rü yemaacü Tupana nanaxü ga naguxü̃raxü̃xü̃ ga yema naeü̃gü. Rü nüxü̃ nadau ga nax namexü̃ ga guxü̃ma ga yema.
26Rü yexguma ga Tupana rü nügümaxã ñanagürü: —¡Ngĩxã yigüraxü̃ãcü tanaxü ya yatü! Rü nüma rü namaxã tá inacua̱x i guxü̃ma i ngẽma dexáwa maxẽxü̃, rü ngẽma ixãxpe̱xatüxü̃, rü ngẽma naxü̃nagü, rü ngẽma naeü̃gü i naixnecüwa maxẽxü̃, rü ngẽma naeü̃gü i waixü̃müanegu nügü itúgüxü̃ —ñanagürü.
27Rü yemaacü ga Tupana rü nügüraxü̃ãcü nanaxü ga duü̃, yatüxü̃ rü ngexü̃.
28Rü yexguma ga Tupana rü mexü̃ namaxã naxuegu rü ñanagürü nüxü̃: —¡Pexãxacü rü pimu! ¡Rü penapaxẽxẽ i ñaa naane, rü namaxã ipecuá! ¡Rü namaxã ipecuá i choxnigü, rü ngẽma naeü̃gü i ixãxpe̱xatüxü̃, rü guxü̃ma i naeü̃gü i waixü̃müanegu ixũxü̃! —ñanagürü.
29Rü yemawena rü ñanagürü ta nüxü̃: —Dücax, marü pexna chanaxã i guxü̃ma i nanetü i itoxü̃ i ãxchirexü̃ rü guxü̃ma i naigü i ãarüxoṍxü̃. Rü guxü̃ma i ngẽma rü perü ngõ̱xruxü̃ tá nixĩ.
30Natürü guxü̃ma i ngẽma naeü̃gü i naixnecücüã̱x, rü naxü̃nagü rü ngẽma waixü̃müanegu nügü itúgüxü̃ rü ngẽma naeü̃gü i ixãxpe̱xatüxü̃, rü choma rü maxẽ rü nanetü nüxna chaxã nax ngẽmamaxã naxãwemügüxü̃ca̱x —ñanagürü. Rü yemaacü nixĩ.
31Rü Tupana nüxü̃ nadau nax namexẽchixü̃ ga guxü̃ma ga yema naxüxü̃. Rü yemaacü ningu ga norü 6 ga ngunexü̃.
Айни замон обунашуда:
Naanearü ügüchiga 1: tcaP
Лаҳзаҳои махсус
Паҳн кунед
Нусха
Want to have your highlights saved across all your devices? Sign up or sign in
© 2022, Wycliffe Bible Translators, Inc. All rights reserved.