Mwanzo 44
44
Pilawuri ya Yuusufu mwiisurupa wa Bejami
1Yuusufu khunruma karumeya nwulu wa vaje vawe yoori: “Wiitaaze saaneene etthu yoojiwa visurupa za atthu apa anwahaaye othuula, ottheemo nzurukhu aya omilomo wa visurupa zaya. 2Nawiisha, othuule pilawuri yaka ya feeta otthe omilomo wa esurupa ya otu wa efutti aya na nzurukhu aya opo atiisiyeeyo wuuzanyela tiriku.” Karumeya otule khuretta etthiipo ooziweezo ti Yuusufu.
3Mmeesho mwaya supuyeene, attwiize Yuusufu khunleeza khuwaathuula apuuru aya khusala alawa. 4Noolaamo nsitati mphule ahinafiyaze peetiwene, Yuusufu khunruma karumeya awe yoori: “Olankhe nasaapi owaatthirele atthu apale eettiye aphale, amana owaasikana wawoozele yoori: Oretteliwa vitthu zooshapweya mweeyo mwaripha khwa zootakhala? 5Mweeyela ni pilawuri ya mbwanaaka? Annywelakaaye na anjuwanaaye vitthu zoorettikhana? Mweeyo mwaretta vitthu zootepa otakhala.”
6Ye khuwaatthirela mpakha owaasikana khuwooza etthiipile ooziweezo ti Yuusufu. 7Yo khujipu araka: “Mwaasa aya niini Mbwana eetthu alupaka toowo? Fweeyo akarumeya awe khaninwahi oretta vitthu zaya epo! 8Onuupuwela yoori fweeyo nawahi orutisa nzurukhu Kanaani naasikaniyeeyo omilomo wa visurupa zeetthu? Toowo na atthu ninwahaaye wiiya feeta ama weero ya vaje wa Mbwana awo? 9Apha niriivo, karumeya otule onttelaaye onsikanana pilawuri eto afwe. Fweeyo ninttela osala niri amwiitthwaana a Mbwana eetthu.”
10Ye khuri: “Kakhupali epo mwilupiyeezo, ila othuuto kinttelaaye onsikanana tiye anttelaaye wiiya mwiitthwaana aka, mweeyo khamwiniiyana hatha koosa.”
11Wakhula ntthu khupakhula esurupa yawe khupweha vathi khufukula nasaapiru. 12Karumeya otule khwaaza weekesa mwiisurupa ya otu nwulu khwiishela esurupa ya otu weefutti aya. Attaaphale khusikana pilawuri etile mwiisurupa wa Bejami. 13Nooretta toole, khuvarula kuwo zaya, khupakhira opheya visurupa zaya vapuuru khusala arutela ositati ottuukhule.
14Wakathi Yuuda na attwiize afiiyeevo owawe Yuusufu khunsikana ye ari ottuukho, khukokhora khwiinama attaaphale aariivo Yuusufu. 15Yuusufu khuwoozela yoori: “Mwarettela ni etthu eti? Mweeyo khamwinjuwa yoori ntthu nkhama miiyo kinwahi woona vitthu nkhama epo?”
16Yuuda khujipu araka: “Niwuuze niini mbwana! Apho nijihakikhi toovi? Nluku avithula twampi zeetthu. Aphano na amwiitthwaana a Mbwana eetthu nkhama otule asikananiweeyo pilawuri.”
17Yuusufu khulupa yoori: “Miiyo akinwahi oretta etthu aya eto! Othuuto asikananiweeyo pilawuri yaka ti ye anttelaaye wiiya mwiitthwaana aka, mweeyo mwirutele wa papeenu na heeri.”
18Yuuda khunsusela Yuusufu khumuuza yoori: “Safwatali mbwanaaka! Mwinlikhe karumeyeenu awuuzeni nttakhuzi na mwihinkatipukhele, mwaasa yoori mweeyo mwiri nkhama Firawuuna mweenyeweene. 19Mbwanaaka mwaawoozeliye akarumeya enu mwiraka: ‘Mwinaaye papeenu na ttwiiyenu?’ 20Fweeyo khujipu yoori: ‘Ninaaye paapa ila ooluvala na ninaaye ttwiiyetthu weefutti apattikhaniyeeyo paapa ooluvaliye. Aarina ttwiiye afwa, ye asala otthwe wuumamani wawe, ti woophetiwa na kuvu ti papaawe.’
21“Mweeyo mwawaarumiye akarumeya enu yoori antiise mwite mwimoone khwa maasho enu. 22Ila fweeyo khuujipuni mweeyo mbwana yoori: ‘Mwaana oto khanwahi olikhiwa ti papaawe. Amana ampwetheya, papaawe ontta ofwa.’ 23Ila mweeyo khunuuza yoori: ‘Amana mweeyo mwihintiisi ttwiiyenu, khamwinteela onipwekherela opheya vaje venu apha.’ 24Noofiya onti, fweeyo khumuuza papeetthu mattakhuzi apale mwaanuuziyeeyo mbwana eetthu.
25“Wakathi papeetthu anirumiyeevo orutela okhuno oteela wuuzanya theenya etthu yoojiwa. 26Fweeyo khumuuza yoori: ‘Khaninwahi orutelawo nihilawaneeni ttwiiyetthu otu wa weefutti, amana nihilawani khaninlawa okutthanana mwinyi oto.’
27“Karumeya enu papeetthu khunuuza yoori: ‘Mweeyo mwinjuwa yoori muukhaaka akipatthela aana awiri, 28otu mmote akaashikha mpakha leelo akinamoone. Kakhupali yoori ooliiwa ti nyama ya ntthuttu khunrafuna. 29Amana mwinlazavo otu nompattha etthu yootakhala, mwintta okiishukhelisa ahera na pwi zaka kirina huzuni yoototheliwa ti mweeyo.’ 30-31Aphano amana nirutela onti ninlikha ye, nintta omuula na huzuni papeetthu, mwaasa yoori mwanawe animphetachaaye. Akarumeya enu anttela ompatthisa papaaya wiishukhela ahera na pwi zawe arina huzuni.
32“Olikha eto, miiyo kamwaahiti paapa yoori kininrutisa, amana kihinrutisi kookosani ohaayi aka wooshi.
33“Apho kinuuvekela yoori safwatali, miiyo kintta osala kiri mwiitthwaana enu mbwana zwaamu ya shaapu otu, mwinlikhe ye arutele onti na attwiize. 34Toowo kinttela orutela toovi wa paapa woohilawani shaapu otu? Miiyo akinwahi omoona ari mmatteso paapa.”
Айни замон обунашуда:
Mwanzo 44: eko
Лаҳзаҳои махсус
Паҳн кунед
Нусха
Want to have your highlights saved across all your devices? Sign up or sign in
© 2020, Wycliffe Bible Translators, Inc. All rights reserved.