Mwanzo 21
21
Ovokoliwa wa Esiyaakha
1Paata ya toole, Nnyizinku khumparikhiya Suhura, khunrettela etile aamwaahitiyeeyo. 2Suhura khwiimittha khumpattha mwaana wa Eburahiima ari wa wuuluvala, wakathi otthuupule Nluku aamwaahitiyeeyo. 3Mwaana otule aavokoliweeyo ti Suhura, Eburahiima khuntthaja nzina la Esiyaakha#21:3 Nzina ntthi la Esiyaakha lina maana a ye atheya.. 4Siikhu yanaane, Eburahiima khunthuula mwaana otule khulawa onkhiriyisa nkhama etthiipo Nluku anrumiyeezo. 5Wakathi Eburahiima ampatthiyeevo mwanawe Esiyaakha, aarettiye arina nyaakha miiya.
6Suhura khuri: “Nluku akinkha otheya, na atthu ooshi apale anttelaaye osiila anttela otheya vamote na miiyo.
7“Paani aari waakanyeraaye yoori Eburahiima aari oteela ompatthela mwaana Suhura? Na wuuluvala wawe, miiyo kampatthela mwaana!”
Wiikariwa wa Esumayila na Hajira
8Mwaana otule khusala awula mpakha ofiyelela olikha nziwa. Alikhiyeevo nziwa mwaana otule, papaawe khuretta njampo la furaha.
9Ila Suhura khumoona Esumayila mwaana wa Hajira mmisuri, otule aavokoliweeyo ti Eburahiima antheyaka mwanawe. 10Suhura khulawa omuuza Eburahiima yoori: “Omwiikare njaazi otule na mwanawe. Ye khanteela orithi vamote na mwanaka Esiyaakha.”
11Eburahiima khwiiya woozinkireya na kuvu na mattakhuzi apale mwaasa wa Esumayila wiiya mwanawe. 12Aphano Nluku khumuuza Eburahiima yoori: “Ohizinkireye mwaasa wa mwanawo na njaazi awo, osiileze etile anlupaaye Suhura, mwaasa yoori ojama awo onttela olankha vakatthi wa Esiyaakha. 13Mwaana wa njaazi otule onteela wiiyana omathi wa waatta mwaasa yoori na ye ojama awo.”
14Mmeesho mwaya, Eburahiima khuthuula phaawu na ttompwiyo ya maati, khunvikelisa Hajira khunleeza vamote na mwanawe. Yo khusala alawa ajeettettelaka n'yaara ya Beeresheba ahijuwaka ohali anttaawo.
15Wakathi amwiisheliyeevo maati nttompwiyo, ye khunlikha mwanawe nshini wa muutthi. 16Khulankha khulawa khwiikhala ohali woolepawo vattitthiiru na okhule aariiwo mwanawe, mwaasa yoori khaari otakha omoona mwanawe afwaka. Eekhaliye etthiipile, khusala alila.
17Nluku khusiila theenya huula ya mwaana otule eettaka olila. Nlayikha la Nluku khukhuwa pinkuuni linkhuwelaka Hajira, khumuuza yoori: “Wakafilikhela ni Hajira? Ohoove, Nluku asiila huula yawe mwaana oto alilaka vahali ariivo. 18Nlawe, onlanse mwanawo onkholele nkhono, phantte yawe kinteela waattisa omathi awe.”
19Elottelanaka Nluku khunthoonyeza Hajira nlipu wa maati, khulawa khuttekhelela ttompwiyo yawe khunnywisa mwanawe.
20Esumayila khusala awula mmakhono wa Nluku. Ye aari wiikhala n'yaara na aari njuwi wa weesa mattetthe. 21Aari wiikhala n'yaara ya Parani, mamaawe khumweekesela muukha wa Misuri khunlooza.
Osiilana wa Eburahiima na Apimeleekhi
22Wakathi aya opo, Apimeleekhi aalokoziwe ti Fikhoole namalokozela wa anajanka, khumuuza Eburahiima yoori: “Nluku ori vamote na weeyo khwa wakhula etile onrettaaye. 23Nasaapi ethiiti olaphe khwa nzina la Nluku yoori khunteela okihata miiyo wala aanaaka ama atuulwaka, ila nkhama etthiipile kuuretteliyeezo zooshapweya, na miiyo okirettele etthiipo na mmuti mphu oniikhalaamo.”
24Eburahiima khujipu araka: “Miiyo kinlapha.”
25Attaaphale Eburahiima khusala ajiliza mwaasa wa nlipu aanyakanyiweeyo pi akarumeya a Apimeleekhi. 26Ila Apimeleekhi khunjipu yoori: “Miiyo akaajuwiyevo etthu na khawaakuuziye, kintta osiilaru nasaapi ethiiti.”
27Aphano Eburahiima khuthuula pwittipwitthi na mompe khumwinkha Apimeleekhi. Oowiiri aya khuretta wahati. 28Elottelanaka Eburahiima khuphakula pwittipwitthi sapa za nliphanko mwawe. 29Apimeleekhi khumuuzela yoori: “Pwittipwitthi epo sapa omphakulaaye maana aya niini?”
30Eburahiima khujipu: “Okhupalele pwittipwitthi epi sapa kiniwinkhaaye khwa lifunku looshaahiti yoori nlipu opu ti miiyo kithipiyeeyo.”
31Tiito puuro yaya eto eniitthiwaaye Beeresheba#21:31 Nzina ntthi la Beeresheba lina maana a nlipu woolaphisaniwa ama nlipu wa sapa., mwaasa yoori oowiiri aya aalaphisaniye attaapho.
32Paata yawiisha osiilana opule Beeresheba okhule aariiwo, Apimeleekhi na Fikhoole namalokozela wa anajanka, khurutela nti wa Afiliishiti. 33Eburahiima noosala Beeresheba okhule khuzala muutthi wa nkolokope, khumwaaputu Nnyizinku, Nluku wa Mileele. 34Ye khwiikhala nti wa Afiliishiti khwa nyaakha za waatta.
Айни замон обунашуда:
Mwanzo 21: eko
Лаҳзаҳои махсус
Паҳн кунед
Нусха
Want to have your highlights saved across all your devices? Sign up or sign in
© 2020, Wycliffe Bible Translators, Inc. All rights reserved.