Eḍighiom ạar 9
9
Ẹzo unwe mạSol utẹnẹ mōoy tẸnaan
1Tamen bhibha, ạSol odi ni nạnogho mịiḅaghami ạzeey mobo bho nẹtuonuman mObạmọogh obho. Odi ạghi tuvẹmụ arōoy iḅo miiḅua obho 2agbẹel abhin mịbhereer ilo ịnogho zodi mịnyaam mọghi tarutu iikpulughu ibhꞌạDamaskos, merumolo odi ạmiin mōoy olo nạtuonuman mEbōom tObạmọogh obho, milobhir nꞌạraani, odi aḅologh apin atu taJerusạlẹm.
3Tebōom obho, suo odi nạki, natuan tạDamaskos obho, pazuḅa ọpuuny obꞌẹḅaal olo ạḍua tạnyu obho aru asōorōm zodi, 4keḍio odi ameel tade bho, keḍio ạmoghon oghōrōkō olo ạkpete kua ạnogho zodi, “ẠSol, ạSol! Eeghe kạna nạnogho kua zạmi mịiḅaghami?” 5Keḍio odi apuruan kua zodi, “Obumọogh, ạna kokōr ōoy?” Keḍio oghōrōkō bho ạbhagharana kua, “Ạami pạJizos obho ạna nạnogho mịiḅaghami obho. 6Keḍio ḅetunu mạghi tẹma bho, tọgba ọnogho zịna milo ạna taḍighi.” 7Arōoy obho nẹtuonuman zodi obho ịmara nꞌikpom ịnu; eedi nẹmoghon oghōrōkō bho keḍio ōoy olo eedi nẹmiin olo. 8Amen ạSol aḅetunu tade bho ạkparion riḍien odi, odi ọmiin io mạar, molo eedi ịbham zodi tạvo ireliom zodi ịghi tạDamaskos. 9Odi ạrol mikpom ariḍien mịraar aḍuma, olo eḍian ole ḍio, ạmuum ọbhoghol io.
10TạDamaskos, kir onyiin olo nạtuonuman mạJizos olo ughōl Ạnanayas. Odi ạmiin ghịiny olo Obạmọogh obho ạkpete kua ạnogho zodi, “Ạnanayas.” Keḍio odi ạbhagharana kua, “Oobho ạami, Obumọogh.” 11Keḍio Obạmọogh obho ạkpete kua ạnogho zodi, “Kōkōbhōghia mạghi tebōom obho ughōl ‘Asel ni’ obho, mapuruan mi totu taJudas mōoy olo ughōl Sọl obhꞌạTasos. Odi naakpulughu, 12nạamiin nạ ghịiny olo onyiin ōoy olo ughōl Ạnanayas ạḅamaghi rạvo mi talōor odi molo odi kamina kạmiin mạar.” 13Keḍio Ạnanayas ạbhagharana kua, “Obumọogh, ọlogh arōoy nẹegba ẹnogho ạami milꞌōoy obhobho, nꞌibꞌịkarabh ọkpo ilo odi naaḍighi marōoy onuma mi taJerusạlẹm. 14Keḍio esiibha odi naabhin mịnyaam mi taruvẹmụ iḅo miiḅua bho atu tạDamaskos moḅologh arōoy obo bho nekōl ḍien onuma bho.” 15Obạmọogh obho ạkpete kua ạnogho zodi, “Kịa, ạami nạason zodi ạseghe moḍighiom oḍighi ạmi, omutiom aḍien obhꞌạmi ọghi tobo bho ilōghōm io mẸnaan obho, nꞌạruula, nꞌarōoy Izirẹl. 16Keḍio ạami nịvo nịvo taḍeeriom zodi milo odi tạmiinom mebum aḍien ạmi.”
17PẠnanayas ạghi aḍigh totu obho, ạḅamaghi rạvo odi mi tẹmu tạSol, keḍio ạkpete kua, “ẠSol umōr ạmi. ẠJizos Obạmọogh obho nịvo nịvo, obho ạmiinan ạna mi tebōom obho suo ạna natu obho, arōm ạami moru molo ạna kạmiin mạar, nꞌolo Ẹmugh Iigbia bho kaḍigh talōor onuma kamuzō.” 18Tonyiin amen obho, pạar olo odi kopolom ena ạḍua ameel tariḍien tạSol, keḍio odi ạke momina ọmiin ạar, keḍio odi aḅetunu aru azua mụum; 19keḍio odi aru ale meḍian alōor odi amina aru ạghua.
ẠSol ạgba madōm obho mi tạDamaskos
Keḍio ạSol ạrolan mịbam aruḍuma nꞌobo bho nẹtuonuman mạJizos obho ibha idi tạDamaskos obho. 20Odi obhiẹmi ḍio men mọghi tarutu iikpulughu obho ọgba mạJizos Ọony obho tẸnaan. 21Keḍio oomo obo bho ịmoghon zodi obho neemōogh, nepuruan ghạ kua, “Oobho ōoy obho nạzeey bọ rōoy mi taJerusạlẹm, mobo bho nekōl maḍien obhobho bho ḍio gạ? Suo odi aru eebha mi tinyiin eedi abaabha bho, moḅologh eedi ọghiom aruvẹmụ arōoy iḅo miiḅua bho ḍio?”
22Keḍio ạSol ạgba ni ạkpaariom mibha ạJizos aru maKraist obho, keḍio ịnyaam ọnuekpete obhꞌodi iru ịghua magey molo arōoy aJu obho idi tạDamaskos obho irue ḍio mọbhagharana odi.
23Ịbam aruḍuma itẹn parōoy aJu obho iikōbhōghian moghigh ạSol. 24Puru ụgba ụnogho zodi mibha eedi nẹetua moḍighi obho. Keḍio ịrol iḅōrō moomo uḍugul nꞌootaany mi tọnu-ẹma bho moghigh odi. 25Molo, onyiin uḍugul obo bho nẹtuonuman mạSol obho ịseghe zodi ịlogh tọkpaagh isōorẹ mi tẹḅagh-otu obho.
ẠSol ạghi taJerusạlẹm
26ẠSol ạghi taJerusạlẹm keḍio ạva moḍigh ạni mi tobo bho nẹtuonuman mạJizos obho. Eedi irue ḍio momōruōm mibha odi naaru monyiin obo nạtuonuman mạJizos, molo aruugu nesibh eedi. 27Keḍio ạBanabas aru ạbhel zodi ạseghe odi ạghiom miteledōm obho. Keḍio aru ạgba mibha ạSol ạmiin mObạmọogh obho mi tebōom tạDamaskos obho, nꞌibha Obạmọogh obho ạkpete ạnogho zodi obho. Odi ạgba nạ mẹzo bho odi ạSol ạgbaam nꞌọoghuanaan ologhi milo igboloman nꞌạJizos. 28Keḍio ạSol tạtolan zeedi ạki mi toomo aJerusạlẹm nạgba maḍien tObạmọogh obho nꞌọoghuanaan ologhi. 29Odi nꞌarōoy aJu obho ịmoghon ịkpa mọnu aGris ẹghanan ghạ magey molo eedi ịrol ịva moghigh odi. 30Amen aburumōr obho ilōghōm miibha bho pịseghe zodi ịghi taSizaria ịkpete ịnogho zodi mọghi tạTasos.
31Tesuo keḍio oomo ạrasosi obhꞌaJudia nꞌaGalili nꞌaSameria tẹtol nꞌekima iru ịghua nạ magey. Ọnu arōoy obho tepōbh nạ mi tọlogh ạvo bho tẸmugh Iigbia bho nꞌẹzo oghiilaan obho eedi ịrol ịnogho mObạmọogh obho.
APita ạghi taLida nꞌạJopa
32APita ạrol ạghi kesi kesi, keḍio ạteeny monyiin aḍuma podi ạghi mọmiin arōoy tẸnaan ibha netugh taLida bho. 33Todi ẹma bho podi ạmiinan mōoy olo ughōl Inias, olo oomo alōor obho naamuugh ạman molo neegbẹbh ạbhenya ạsia doḅetunu ḍio tẹmuna. 34Keḍio aPita abheleghi ạkpete kua ạnogho zodi, “Inias, ạJizos Kraist naakō ạna. Ḅetunu makpōr mẹmuna onuma.” Todi onyiin amen obho podi Inias aḅetunu. 35Oomo arōoy obho netugh bọ mi taLida nꞌaSeron obho ịmiin mẹzo bho zodi, peedi ighiraan tObạmọogh obho.
36TạJopa kir ạni olo nạtuonuman mạJizos, olo ughōl Tạbita, tọnu aGris pạDokas, ẹmu aḍien obho pọnue. Odi ạseghe moomo aghuḍum odi aseeri moḍighiom iiḅi nꞌọbhel aruvekulom. 37Tamen opopo podi aru ạnwe ạbho. Keḍio uru uutōl moḍim obho todi ụmuneen tẹkpe totu ạnyu. 38ẠJopa ogbeeny io mịkanya mi taLida, molo amen obo bho imōruōm obho ịmoghon ighōl maPita odi taLida, peedi irōm rōoy ịghiom zodi, ighōl kua, “Sesen ni, kẹm maru tezōor.” 39Keḍio aPita aḅetunu aakōbhōghia ạtuonuman zeedi ạghi. Odi aru asi, pubhin zodi ụghi tạnyu otu obho. Oomo arukpukele ạraani obho iru ikō zodi aPita ikiton neleghe neḍereghiom mạrasuoma olo ạDokas ạkologh ạnogho zeedi men obho odi dọbho ḍio obho. 40Keḍio aPita abhirighan moomo eedi amutiom totu obho, keḍio agbuluman aakpulughu, aghiraan asōmōghan moḍim obho ạkpete kua, “Tạbita, ḅetunu!” Podi ạkparion riḍien odi, ạmiin maPita, podi aḅetunu ạrol delede. 41Keḍio aPita ạnogho zodi mạvo odi ạbham ạḅar zodi aḅẹtōn. Keḍio odi abheleghi mobo bho imōruōm obho nꞌarukpukele ạraani obho ạseghe zodi ạnogho zeedi nꞌaghuḍum. 42Ịimoghon nꞌạsuugba bho ilela moomo ạJopa, molo ọlogh arōoy imōruōm mObạmọogh obho. 43Keḍio aPita ạrol mịkanya aruḍuma mi tạJopa mi totu ōoy olo nalooy ghạ rụḅa izu ịnam olo ughōl Sạimon.
Айни замон обунашуда:
Eḍighiom ạar 9: OḌU
Лаҳзаҳои махсус
Паҳн кунед
Нусха
Want to have your highlights saved across all your devices? Sign up or sign in