Маттэ 10
10
ЯПШӀЭНЭРЭШЪХЬ
Апостол пшӀыкӀутӀур
(Марк 3:13-19; Лука 6:12-16)
1Исус игъогу рыкӀорэ нэбгырэ пшӀыкӀутӀумэ къяджи, ахэмэ джынэпцӀэ Ӏаехэр цӀыфмэ ахафынхэу тетыгъо аритыгъ, хэтрэ сымаджи гъойщаий агъэхъужьынэуи лъэкӀ аритыгъ.
2А апостол#10:2 апостол – нэмыкӀ цӀыф горэм ыцӀэкӀэ гущыӀэнэуи Ӏоф ышӀэнэуи фитыныгъэ зиӀэр ары. Исус игъогу рыкӀорэ нэбгырэ пшӀыкӀутӀум «апостолхэкӀэ» яджэх. Ахэр Исус илӀыкӀохэу тетыгъо зэритыгъэхэр ары. пшӀыкӀутӀумэ ацӀэхэр мары: апэу Симонэу ПетрэкӀэ заджэхэрэр; ащ ышэу Индрыс; Зебедей ыкъуитӀоу Якъубэрэ Иуанрэ; 3Филипп, Бар-Талмай, Фомэ, Маттэу хьакъулахь ахъщэр хэзыхыщтыгъэр, Алфей ыкъо Якъуб, Таддей; 4Симонэу зихэгъэгу ыпсэ емыблэжьэу фэлажьэщтыгъэр#10:4 Симонэу зихэгъэгу ыпсэ емыблэжьэу фэлажьэщтыгъэр – ар Палестин хэгъэгум фэлажьэрэ цӀыф куп горэм щыщыгъэнкӀи мэхъу. Рим къэралыгъошхом щыщхэу яхэгъэгу ашӀозыубытыгъэхэм къатырахыжьыным а купым хэтхэр ыуж итыгъэх., Иудэ Искариот; а Иудэр ары нэужым Исус тетыгъо зиӀэхэм язгъэубытыгъэр.
Исус апостол нэбгырэ пшӀыкӀутӀур Тхьэм фэлэжьэнхэу зэрэдигъэкӀыгъэхэр
(Марк 6:7-13; Лука 9:1-6)
5А апостол пшӀыкӀутӀур Исус зыдегъэкӀым, мы унашъор афишӀыгъ:
– Хымэ лъэпкъхэм адэжь шъумыкӀу, Самарие хэкум#10:5 Самарие хэкур – Иудей хэкумрэ Галилей хэкумрэ азыфагу дэлъ хэкур арыгъэ. Джуртхэмрэ самарие цӀыфхэмрэ алъэпкъхэри, яхабзэхэри, ядинхэри зэрэзэфэшъхьафхэм пае зэпыищтыгъэх. щыщ къалэ горэми шъудэмыхь. 6Ащ нахьи израиль цӀыфэу мэл кӀодыгъэхэм афэдэхэм адэжь шъукӀу. 7ШъукӀуи, «Тхьэу уашъом щыӀэм и Тетыгъошхо къэблэгъагъ» шъуӀуи, къэбар яжъугъэӀу. 8Сымаджэхэр жъугъэхъужьых, лӀагъэхэри къэжъугъэтэджыжьых, шъоджэ уз Ӏаер зиӀэхэри псаухэу, къабзэхэу жъугъэхъужьых, джынапцӀэхэри цӀыфхэм ахэшъуфых. Уасэ хэмылъэу къышъуӀэкӀэхьагъ, шъори уасэ хэмылъэу яшъутыжь. 9Шъуибгырыпхыхэм арылъэу дышъи, тыжьыни, гъоплъэ ахъщи зыдэшъумышт. 10Гъогум шъузытехьэкӀэ, Ӏалъмэкъи, джэнитӀуи, цуакъи, бэщи зыдэшъумыштэх. Сыда пӀомэ, лэжьакӀом игъомлапхъэ ыгъотыныр ифэшъуаш.
11– Къалэми, къуаджэми, тыдэ шъудахьэми, зифэшъошэ цӀыф горэм шъукӀэупчӀ. А чӀыпӀэм шъукъекӀыжьыфэ а цӀыфым иунэ шъуис. 12Унэм шъузихьэкӀэ, «Тхьэм шъо мы унэм исхэм гупсэф къышъуерэт» шъуӀуи, шӀуфэс яшъух. 13Унэм исхэм а шӀуфэс гущыӀэр яфэшъуашэмэ, Тхьэм гупсэф ахэмэ къаритыщт, ау имыфэшъуашэу къычӀэкӀмэ, гупсэфым шъуадэжь къерэгъэзэжь. 14Ау зы унэ горэм исхэм, е зы къалэ горэм дэсхэм ащыщэу зыми шъуримыгъэблагъэмэ е шъуигущыӀэхэм къямыдэӀумэ, а унэм шъукъызикӀыжькӀэ, е а къалэм шъукъыздэкӀыжьыкӀэ, шъулъакъохэм ателъ сапэр атешъуутхыпкӀыкӀыжь. 15Шъыпкъэр шъосэӀо, ахърэт мафэм а къалэм къинэу ыщэчыщтым нахьи, къалэхэу Содомрэ Ӏаморрэрэ#10:15 къалэхэу Содомрэ Ӏаморрэрэ – ахэр Хы ЛӀагъэм иӀушъо Ӏутыгъэх. Ахэмэ адэс цӀыфхэм ябзэджагъэ пае Тхьэм а къэлитӀур машӀокӀэ ыгъэкӀодыгъагъэх. Еплъ Пегъымбар Мусэ апэрэ тхылъэу ытхыгъэм (УблапӀэм) 19:24-28. къинэу ащэчыщтыр нахь мэкӀэщт.
Сэ сигъогу шъузэрэрыкӀорэм пае, цӀыфхэм къин шъуагъэщэчыщт
(Марк 13:9-13; Лука 21:12-17)
16– Мары, мэлхэм шъуафэдэу тыгъужъхэм шъуахэсэгъахьэ. Арышъ, блэхэм афэдэу зыжъугъэӀуш, гъэпцӀэн зыхэмылъ тхьаркъохэм афэдэуи шъущыт. 17ЦӀыфмэ шъуафэсакъ, сыда пӀомэ, тхьэмэтэ хасэхэм апашъхьэ шъуаращэщт, ясинэгогухэми къамыщкӀэ къащышъоощтых. 18Сэ сигъогу шъузэрэрыкӀорэм пае, Ӏэшъхьэтетхэмрэ пачъыхьэхэмрэ апашъхьэ шъуаращэщт. ШъузыращэкӀэ, ахэми хымэ лъэпкъхэми апашъхьэ къэбарышӀум шыхьат шъуфэхъунэу игъо шъуифэщт. 19ХьыкумэшӀым ыпашъхьэ шъузыращэкӀэ, «Сыда тӀощтыр?» е «Сыдэущтэу тӀощта?» шъуӀоу шъумыгумэкӀ; сыда пӀомэ, шъуӀон фаер Тхьэм ы Псэ ЛъапӀэ ащ дэжьым шъугухэм къарилъхьащт. 20КъэгущыӀэщтыр шъорэп, шъуя Тэ лъапӀэ ы Псэ ЛъапӀэу шъугухэм арылъыр ары нахь.
21– ЦӀыфым ежь ыш, тым ежь илъфыгъэ тетыгъо зиӀэхэм арагъэукӀыным пае, арагъэубытыщт. Лъфыгъэхэри ны-тыхэм апэуцущтых, тетыгъо зиӀэхэми арагъэукӀыщтых. 22Шъо сэ сцӀэ зэрэжъугъэлъапӀэрэм пае, цӀыф пстэуми шъуауджэгъущт. Ау кӀэухым нэсыфэ теубытагъэ зиӀэр мыкӀодэу Тхьэм къыгъэнэжьыщт. 23Зы къалэм къин щышъуагъэщэчымэ, нэмыкӀ къалэ горэм кӀэшъуӀэжь. Сыда пӀомэ, шъыпкъэр шъосэӀо, Израиль хэгъэгум икъалэхэр къэшъукӀухьанхэу игъо шъуимыфэзэ, ЦӀыф Лъэпкъым ы Къо къэкӀожьыщт.
24– ЕджакӀор езгъаджэрэм нахьи нахь инэп, Ӏофтабгэри итхьэматэ нахьи нахь инэп. 25ЕджакӀор езгъаджэрэм фэдэ хъумэ, ащ фырикъущт, унэӀутри итхьэматэ фэдэ хъумэ, ащи ар фырикъущт. Унэр зыем БаӀал-ЗэбулкӀэ#10:25 БаӀал-Зэбул – джынапцӀэхэм япэщэ шэйтаныр ары. зеджэхэкӀэ, унагъом исхэми ащ нахьи нахь Ӏае афаӀонба?
Шъузщыщынэн фаер
(Лука 12:4-7)
26– Арышъ, ахэмэ шъуащымыщын, сыда пӀомэ, къэмылъэгъожьынэу чӀэухъумагъэу зи щыӀэп, цӀыфхэм къамышӀэнэуи гъэбылъыгъэу зи щыӀэп. 27Мэзахэм щышъуасӀорэр мэфэ нэфынэм щышъуӀотэжь. ШъутхьакӀумэхэм къяӀушъашъэхэу къышъуаӀорэр унашъхьэхэм шъуатетэу цӀыфхэм яжъугъэӀу. 28Псэр зыукӀын зымылъэкӀэу, пкъыр зыукӀыхэрэм шъуащымыщын. Ащ нахьи, псэри пкъыри джэхьнэмым щызгъэкӀодышъущтым шъущыщын. 29Бзыу цӀыкӀуитӀур зы чапычкӀэ ащэрэба? Ау щытми, шъуя Тэ лъапӀэ фэмыеу, ахэмэ ащыщэу зи чӀыгум къытефэщтэп. 30Ау шъо шъушъхьэ тет шъхьац нэлъэ пстэури лъытагъэ. 31Арышъ, шъумыщын. Шъо бзыубэхэм анахьи шъуанахь лъапӀ.
Христос игъогу рыкӀохэрэм узэращыщыр цӀыфхэм ябгъэшӀэныр
(Лука 12:8-9)
32– ЦӀыфмэ апашъхьэ сэ сигъогу рыкӀохэрэм зэращыщыр хэтми къыщызыӀорэр, ар сигъогу рыкӀохэрэм зэращыщыр ся Тэу уашъом щыӀэм ыпашъхьэ сэри щысӀощт. 33Ау хэтми сэ сигъогу рыкӀохэрэм ащымыщэу цӀыфмэ апашъхьэ щызыӀорэр, ар сигъогу рыкӀохэрэм зэращымыщыр ся Тэу уашъом щыӀэм ыпашъхьэ сэри щысӀощт.
Зэзэгъыныгъэр чӀылъэм къыфэсхьынэу арэп сыкъызфэкӀуагъэр, чатэр къыфэсхьынэу ары нахь
(Лука 12:51-53; 14:26-27)
34– Зэзэгъыныгъэр чӀылъэм къыфэсхьыным пае, сэ сыкъэкӀуагъэу шъумыгугъ. Зэзэгъыныгъэр къэсхьынэу арэп сыкъызфэкӀуагъэр, чатэр къэсхьынэу ары нахь; 35сыда пӀомэ, сыкъызфэкӀуагъэр къор ятэ, пхъури янэ, нысэри игуащэ пэзгъэуцужьынэу ары. 36ЦӀыфым ипыйхэр ежь иунагъо исхэр ары.
37– Хэтми сэ шӀу сызэрилъэгъурэм нахьи, зятэ е зянэ нахьышӀу зылъэгъурэр сфэшъуашэп. Ащ фэдэуи хэтми сэ шӀу сызэрилъэгъурэм нахьи, зыкъо е зыпхъу нахьышӀу зылъэгъурэр сфэшъуашэп. 38Хэтми зикъащ къэзымыштэу, сауж къырымыкӀорэр сфэшъуашэп. 39Хэтми зыпсэ мыкӀодэу, къызэригъэнэжьыщтым ыуж итым ыпсэ шӀокӀодыщт, ау хэтми сэщ пае зыпсэ зышӀокӀодрэм ыпсэ мыкӀодэу къыгъэнэжьыщт.
ӀахьышӀу бгъотыныр
(Марк 9:41)
40– Шъо шъуезгъэблагъэрэм сэри сыригъэблэгъагъэу мэхъу, сезгъэблагъэрэми сыкъэзгъэкӀуагъэри ригъэблэгъагъэу мэхъу. 41Хэти пегъымбар горэ зэрэпегъымбарым пае езгъэблагъэрэм пегъымбарым иӀахьышӀу ыгъотыжьыщт, хэти шъыпкъагъэ зиӀэ цӀыфыр ащ ишъыпкъагъэ пае езгъэблагъэрэми шъыпкъагъэ зиӀэ цӀыфым иӀахьышӀу ыгъотыжьыщт. 42Хэти мы цӀыф цӀыкӀухэм ащыщэу зыгорэ сигъогу зэрэрыкӀорэм пае, зы псы чъыӀэ шъоныбжъ нэмыӀэми езгъашъорэм, шъыпкъэр шъосэӀо, ащ ифэшъошэ ӀахьышӀур шӀокӀодыщтэп.
Айни замон обунашуда:
Маттэ 10: AdgNT14
Лаҳзаҳои махсус
Паҳн кунед
Нусха
Want to have your highlights saved across all your devices? Sign up or sign in
© Институт перевода Библии, 1991, 1992, 2014. Стокгольм