Matiu 11
11
Jɔɔnn wunba din wuur niib Yennu nyunwuru na labaar
(Luk 7.18-35)
1Yisa nba din wann u poorpoweiteeb piik nan bannlee na wannu maŋ ki gbenn yoonba, ki u nyii leŋ ki saan bi doi ni ki mɔɔntir Yennu maan ki want niib.
2Tɔn, Jɔɔnn wunba din wuur niib Yennu nyunwuru na din kɔɔ dansarik, ki tan gbat Yisa Masia toona labaar po; ki u tun u poorpoweiteeb Yisa boor ni 3a bin saa boiɔ a “Fine tee wunba yaa wun tan baar na amii tii daa kii guu lɔɔ-ɔɔ?”
4Ki Yisa ji bet Jɔɔnn toomiinba maŋ a “Yi ŋmat man ki saa bet Jɔɔnn linba ki i gbat ki bia la na, 5a i la ki jɔɔnii nyɔɔntir, ki wɔbii taa naatir ki bi somm, ki gbaata ŋaat gbent, ki tukpaa ji gbia, ki kpeemm fi kuun ni, ki talasdamm gbiintir barŋanii mɔɔntii. 6Ki parpeenn be wunba ki birisin na paak.”
7Tɔn, Jɔɔnn toomiinba na nba din nyii leŋ ki ŋmat kun yoonba na, ki Yisa ji din piin ki boi niib maŋ buboit ki jikit saa Jɔɔnn po a “Ya daan saan Jɔɔnn peŋ muuk ni na, i daan dukii a i sa saa la bee? I daan mi a i sa la muuk nba ki wouŋ damm naee? 8I mantik jia daan saan a i sa la bee? Nirɔ ki u lia taŋant amii? Nnara, binba lia taŋant be kpanbara ŋei nie. 9Ŋaan i mantik jia daan saan a i sa la bee? I daan dukii a i sa la Yennu sɔkiniiee? Barmɔniie ki n beeri na, Jɔɔnn ŋanin gar sɔkiniiwa. 10Ŋɔɔ poe ki Yennu gbouŋ poŋ din sɔb want na, a ‘Nnara, n sa tun n toomu ki wun liit ki gar ŋamm a baaru sɔnu.’ ” 11Ki Yisa bia din yetib a “Barmɔniie ki n beeri na, bi daa ki mi mar sɔɔ ki u chee Jɔɔnn nba daan wuur niib Yennu nyunwuru na, ŋaan wunba joont tarik Yennu naan ni cheeu. 12La daan nyii Jɔɔnn maŋ yoo ki tan tuu mɔtana, binba ki bi ninbina mɔn nan bin tan kɔɔ Yennu naan ni dia nan ninmɔnn a bin tan kɔɔ nan paŋ. 13Yennu sennu nan u sɔkiniinba maan na poŋ din pak u naan poewa, ki Jɔɔnn tan baar. 14Li-i tee ki i loon yin teen linba na yadaie, ŋɔɔe tee Yennu sɔkinii Elaija wunba yaa wun tan baar na. 15Wunba mɔk tuba, wun gbiint.”
16Ki Yisa bia yet a “Yimm, mɔtana nigbouŋ na, n sa bikini nan bee na? I naan nan waas nba tuu tikir ki kar daak ni ki tian leeb paak nee a 17‘Ti peeb yerii ki teeni, ŋaan ki i ki waa. Ti mɔ kpemɔnii ki teeni, ŋaan ki i ki mɔ fabini.’ 18Yimm mɔtana nigbouŋ na mun naan nan waas maŋe, kimaan Jɔɔnn daan baar ki ki di jemɔntii, ki bia ki nyu daami, ŋaan ki i yaa a u waate; 19ki min nisaarik Bik mun tan baar ki di ki nyu, ŋaan ki i bia yaa a ‘Gotir jɔɔ na! u tee podaanɔ nan danyuruko, u bia tee lampogaarteeb nan biitdamm yɔɔke.’ Tɔn, Yennu nba tuun biaŋinbae want nan u mɔk yan nba ŋan.”
Yadakanpɔɔna doi po
(Luk 10.13-15)
20Li yoo na ki Yisa din piin ki piak biir doi nba daan la u bakitnauŋ toonjaana nba ki u daan tun leŋ, ŋaan ki bi yêt nan bin nyik bi biit na. 21Ki u din yet a “Li tan sii bi yimm Korasin teeb paak; li tan sii bi yimm Betsaida teeb mun paak; kimaan mi-i bo-i tun bakitnauŋ toonjaana Taya nan Saidon doi ni kaman nan ma daan tun i doi ni na, bi daan bo sa nyik bi biit yiama, ki pat faauk ki puk bi mɔŋ tanpent ki lin wann nan bi dii sindanta. 22Ŋaan n beerie, daar nba ki Yennu tan sa bu niib buut na, i tubdatu tan sa gar Taya nan Saidon teeb yara. 23Ki yimm Kapenaum teeb, Yennu tan sa donni sanpaapo-oo? Aaii. U tan sa sikini muu nba kaa gbennu niwa, kimaan mi-i bo-i tun bakitnauŋ toonjaana Sodom doo ni kaman nan ma daan tun i doo maŋ ni na, Sodom doo maŋ din bo daa be man. 24Ŋaan n beerie, barbunu daar maŋ, i tubdatu tan sa gar Sodom teeb yara.”
Baat man ki tan gaar foon
(Luk 10.21-22)
25Li yoo maŋ ki Yisa din yet a “N Baa Yennu wunba tee sanpaapo nan tingbouŋ na Yomdaanɔ, n piaka, kimaan a bɔr a maan na subindamm nan miteeb, ŋaan fiit wann waase; 26kimaan nnee ki a tuun a toona ki li mana.
27“Tɔn, n Baa Yennue wannin barii kura; ki sɔɔ ki mi ma tee wunba, see n Baa maŋ; ki sɔɔ mun bia ki mi n Baa maŋi, see min, u Bija na, nan binba ki n loon ki n fiit wannib na.
28“Yimm nba tuun toona ki jii jikpiata ki bak na, baat n boor ni man, ki n sa turi foon. 29Yi sak n weiu man, kii tumii n wannu, ki i sa la foon ki tur i sei, kimaan n tee sikininmɔŋ daanɔe, ki n par mei. 30N weiu bia ki paari; ki n jikir mun bia ki kpai.”
Айни замон обунашуда:
Matiu 11: BIM
Лаҳзаҳои махсус
Паҳн кунед
Нусха
Want to have your highlights saved across all your devices? Sign up or sign in