創世記 15
15
上帝㧯亞伯蘭立約
1這事以後，亞伯蘭在異象中聽到上主對佢講：「亞伯蘭，毋使驚！𠊎愛保護你，大大賞賜你。」
2總係亞伯蘭應講：「至高个上主啊！𠊎既然無孻仔，你還愛賞賜麼介呢？𠊎个家業會被大馬士革人以利以謝繼承。」 3亞伯蘭又講：「你無給𠊎孻仔，所以在𠊎屋下出世个一個奴僕愛繼承𠊎个產業。」
4即時，上主又出聲對佢講：「奴僕以利以謝毋會做你个繼承人；只有你親生个孻仔正係你个繼承人。」 5上主然後帶佢出去外背，講：「你看天頂，算看仔星仔有幾多！你个後代會像星仔恁多。」
6 亞伯蘭相信上主，上主就看佢做義人。
7上主又對佢講：「𠊎係上主，𠊎帶你離開巴比倫个吾珥，為到愛將這垤土地賜給你做你个產業。」
8總係亞伯蘭問：「至高个上主啊！𠊎樣知一定會得到這垤土地呢？」
9上主應講：「你帶一隻三歲大个牛乸、一隻三歲大个山羊乸、一隻三歲大个綿羊牯、還有一隻月鴿仔、一隻班鳩到𠊎這位來。」 10亞伯蘭就將這兜動物帶到上帝該位，一隻一隻剖開，分做兩析，排做兩行；總係鳥仔無剖開。 11有鷂婆飛下來，停在該兜肉頂高，亞伯蘭就將它兜逐走。
12日頭會落山个時，亞伯蘭當好睡，有盡得人驚个大烏暗臨到佢身上。 13上主對佢講：「你一定愛知，你个子孫會在別人个地方做旅客，後來被人做奴才，被人欺負四百年。 14總係，欺負佢等个國家，𠊎一定愛責罰它；你个後代離開該位个時，會帶當多个財產出來。 15你自家會享長壽，平平安安轉到若祖宗該位，入土安葬。 16到第四代，你个子孫正能轉到這位來，因為𠊎愛等亞摩利人罪惡滿滿个時，正逐走佢等。」
17日頭落山斷烏个時，忽然有出煙个火爐㧯𤏸等个火把，對該兜肉當中經過。 18該日，上主就㧯亞伯蘭立約，講：「𠊎將這垤土地賜給你个後代；這垤地對埃及河直到幼發拉底大河一帶， 19就係基尼人、基尼洗人、甲摩尼人、 20赫人、比利洗人、利乏音人、 21亞摩利人、迦南人、革迦撒人㧯耶布斯人个土地。」
Айни замон обунашуда:
創世記 15: THV12Hdb
Лаҳзаҳои махсус
Паҳн кунед
Нусха
Want to have your highlights saved across all your devices? Sign up or sign in
© The Bible Society in Taiwan, 2012
All rights reserved
© 台灣聖經公會版權所有 2012