Gen. MAZWI EKUTANGA
MAZWI EKUTANGA
Zina rinoti Genisisi rinoronza kuti “Kutanga ” Bhuku iri rinotironzera ngendaa yokusikwa kwezviro zveshe. Kutanga kuvapo kwemunhu, kutanga kwechishaishi nokutambudzika munyika, nenjira iyo Mwari yaanobata ndiyo vanhu. Bhuku raGenisisi rinokona kugurwa kuita ndima huru mbiri.
1. Zviparadzaniso 111 Kusikwa kwenyika norungano rwevanhu vekutanga. Umu ndimwo munendaa dzaAdhamu naEvha, Kheni naAbhera, Noa nendambi nethawa reBhabheri.
2. Zviparadzaniso 12—50. Rungano rwemadzibaba makuru evaIsuraeri. Wokutanga ndiAbrahama wakaziikanwa ngendaa yokugonda nokupurutana kwake kunaMwari zvino kwoteera ndaa dzemwana wake Isaka nomuzukuru wake Jakobe (uwo waidaidzwa kuti Isuraeri,) nendaa dzevana vaJakobe gumi navairi, avo vakatanga madzinza gumi namairi aIsuraeri. Kunonasa kuringisiswa yaamho kumwana wake umwe, Josefa, neizvo zvakaita kuti Jakobe nevana vake vamweni nemhuri dzavo vagare muEgipite.
Kunyazwi bhuku iri rechironza ngendaa dzevanhu, chokutanga nechikuru chacho indaa yezvakaitwa ndiMwari. Rinotanga ngokugwinyisa kuti Mwari wakasika denga nenyika, zve rinogumisira ngechigondiso chokuti Mwari unozoangira kuonisa kubatika kwake ngevanhu vake. Mubhuku reshe iri mukuru unoereketa ndiye ndiMwari, unotonga nokujezisa avo vanoita zvakashata, unotungamira nokudetsera vanhu, unonasira rungano rwokuhamba kwavo. Bhuku iri rekare rakanyorwa kuva nerungano rwekugonda kwevanhu nokudetsera kungwarira kugonda ukwo kwechipona.
URONGWA HWEZVIRI MUBHUKU RAGENISISI
Kuamba kwokushaisha nokutambudzika 3:1-24
Kubvira kunaAdhamu kuguma kunaNoa 4:1—5:32
Noa nendambi 6:1—10:32
Thawa reBhabheri 11:1-9
Kubva kunaShemu kuguma kunaAbrama 11:10-32
Madzibaba, Abrahama, Isaka, Jakobe 12:1—35:29
Mibarirwana yaIsau 36:1-43
Josefa nehama dzake 37:1—45:28
VaIsuraeri muEgipite 46:1—50:26
Айни замон обунашуда:
Gen. MAZWI EKUTANGA: Ndau
Лаҳзаҳои махсус
Паҳн кунед
Нусха
![None](/_next/image?url=https%3A%2F%2Fimageproxy.youversionapi.com%2F58%2Fhttps%3A%2F%2Fweb-assets.youversion.com%2Fapp-icons%2Ftg.png&w=128&q=75)
Want to have your highlights saved across all your devices? Sign up or sign in