Matayu 4
4
Ŋei Borikineŋo Yesu Liwekkake
1Pakiso Asu Koboboineŋo Yesu iwenka kepe yaup papaino arike, eŋe eya geki Ŋei Borikineŋo, liwek kayakane. 2Yesu eŋe yewa kaiwe 40 so ruwo 40 ŋaraine midaine ge mage, ŋarainane seukke. 3Eso Ŋei Borikineŋo eŋano lotke more rake, “Ge Kaisale wane Gipole gemaineo, yemo ranom, wesi iwaŋo qeinge more kasap okangep.”
4Yesuŋo mainge olatke. “Kaisale wane ekapŋo iwa yale ramaike, ‘Ŋeiŋo ŋara waneka maine mi geulukeyake, Kaisale wane piwo ŋine don kine kine sari okanmaike, eya detluke more, yemo maine geulukeyake.’ ”
5Pakiso, Ŋei Borikineŋo Yesu iwenka koso mat suwaine kobekine, Yerusalem, eya ari more, Bakom Urum wane bakine wetika weti, eya birakaki okorake. 6Pakiso olale rake. “Ge Kaisale wane Gipole gemaineo, yemo goŋomka iwa ŋine sontake kepo ketnom, onoka wane Kaisale wane ekapŋo iwa yale ramaike, ‘Kaisale eŋe baŋ aŋelokoune geŋane ra more edaniyake, edangi, eŋe baŋ meteeneŋo geu wiyekei, paki kiyeŋone wesiŋo mane mi kitasiyake.’ ” 7Yesuŋo mainge olatke, “Ŋo Kaisale wane ekapŋo eŋe yaleka iwa yale ramaike, ‘Ge Waomŋone Kaisale liwe liweko misuk birakakene.’ ” 8Pakiso Ŋei Borikineŋo koso Yesu bonaga kiro qatqale yewao iwenka wa more ŋei ŋerep magune magune so kepe baŋem eya wane simile kine kine suwaine zok manerop pamaike, eya sikanka wareke. 9Paki olale rake, “Ge wawetŋone qem paki, bakomne kitokene, yemo na yeye kine kine iwa korop baŋ ginwarekale.” 10Rakiso Yesu eŋe mainge olatke, “Ŋei Borikine, ge masikane arinom! Kaisale wane ekapŋo iwa yale ramaike, ‘Waomŋone Kaisale eŋe weku meŋenka more qelitine qekene.’ ” 11Yale rakiso Ŋei Borikine eŋe qeliŋka arike, pakiso aŋelo edo sari, so Yesu kito qesiŋ okankakoi.
Yesuŋo Kiyeke Urataine Galili Kepeo Make
12Yohane mulap urumgo birakau, Yesu eŋe kisiine detki paki, wiye more Galili kepeo arike. 13Eŋe Nazaret matko mi geke, eŋe qelige ari Kaperneyam matko geke. Mat yewa eŋe Galili doku namuŋ wazaino, Zebulun so Naptali erane kepe saiwo metke. 14Yale okangimo propet Isaiyaŋo don mane rake, eya wane wele wakonge, don iwa yale,
15“Zebulun wane kepe, so Naptali wane kepe, doku namuŋgo oken pamamik, Yordan nat parom, Galili qelaŋ ŋei ŋerep eŋane kepe! 16Ŋei ŋerep panaman koto gemami, eŋe baŋ qelaŋan kakapa suwaine mane kakei, ŋei ŋerep seuseu kepe wane panaman qekatno gemami, kuteno kiwa baŋ qelaŋaniyake.”
17Naso yewao Yesuŋo, donine iwa yale edange, “Borikine ŋine korop qelige ŋadekka wareu, onoka wane qeli gege togon nasoine mo bomilemaike!”
Yesuŋo Zawon Mama Ŋei Etke So Etke Edoraki Sarikoi
18Yesu eŋe Galili doku namuŋ meuno ariki paki, tatiŋon etke otke, ere zawon mama ŋei, Simon, eŋetine mane Pita, so ŋole Andreya, ere doku namugo kamagaŋo zawon ebu okorakoik. 19Yesuŋo etane rake, “Sariuk, narop ari more noŋo ŋei ebu ebu daleo ebukeik, eya wane kine kito ŋipongale.” 20Raki so, eyaka kamaga etne qelige so, eŋerop arikoik.
21Eŋe ari ari more, koso tatiŋon etke maratotke, Yakop so Yohane, Zebedi wane gipoletkine. Ere seki etne koto magaetne Zebedirop mere kamagaene maulukkoi, pakiso Yesuŋo etorake. 22Etoraki so, eyaka seki so magaetne qelige so, Yesurop weneŋ arikoi.
Yesuŋo Kisi Maep Don Kito Ebonge So Zoma Kubet Korop Ma Menaŋonge
23Yesu eŋe Galili kepe loli lolik ari more, Yuda lewa lewaŋ urumeno waki paki, qeli gege togon wane don kito edange, kisi maep don maine ra edange, so ŋei ŋerep kubet kine kine enerop, so zoma kine kine enerop ebuki menaŋgoi. 24Yale okangi, eŋane don kisiineŋo Siriya kepeo korop suwa ariki, dere more ŋei ŋerep eŋe detpi paki, zoma kubet korop so asu qotkoinerop so seuke wisikae gemaŋkoi, so matko papaine so kiye meteene seuseune, korop ebu Yesu wano ma sariu ma menaŋ onwareke. 25Ŋei ŋerep magu suwaineŋo ŋadino mogare arikoi, Galili kepeo ŋine, so Mat Suwaine Ten eya ŋine, so Yerusalem matko ŋine, so Yuda kepeo ŋine, so Yordan erinat kepe eya ŋine.
Айни замон обунашуда:
Matayu 4: onsNT
Лаҳзаҳои махсус
Паҳн кунед
Нусха
Want to have your highlights saved across all your devices? Sign up or sign in
© 2012, Wycliffe Bible Translators, Inc. All rights reserved.