Lükɛ̀n 17
17
Ɛgbàn mán ɛgbàn-bɩ-ce
(Nyɛ́n nyan Matie 18:6-7,21-22; mán Markɛ̀n 9:42 wrú lɔ mɛ̀n)
1Zhezü kɛ dɔ́ n'ɛsɛnkɛn-bɔ̀ le: “Ɛnvra lɔ fɛn, eci-hán ke le dù ke le di anwrɔn ɛgbàn mɛ̀n. Tɛ́n, muzhie dú tán anwrɔn léyi ke le di ɔwrɔn ɛgbàn mɛ̀n nɔn! 2Zrɔ tán le nɛ tɛn ye bɩ́ obù ye mú nɛ̀n ɔbɔ̀n, ô yɛ kɔ́n nɛ̀n di ecüe, ndɔ lɔ zrɔ vrán hɩ le ye le teze nɛ̀n, ô nɛ̀n di ɛnẅì cɛ zri kpokpo ɛgbàn mɛ̀n. 3Nyɛ́n wá esùva anvrɛnvrɛn! Ke dú kɛ ɔmuan-ẅì kɛ hán eci gbangbàn, ɛ̀ kran ankà è yé nɛ̀n. Ke dú kɛ nɛ ẅɛn ɛgbàn-bòtò hô, è bɩ ce nɛ̀n. 4Ke dú kɛ nɛ fɔndɔ́n mɛ́n andɛ̀n ɔbɔɛ̀n ɛnbì zri lɔ mɛ̀n, kɩ nɛ vá dɔ́ mɛ́n le: ‘Me boto m'ɛgbàn lɔ’, è bɩ ce nɛ̀n.”
Ankàẅì-bùtan
5Ɔkɔhɔ̀n-wá-bɔ̀ kɛ dɔ́ Ɛẅɛnwrɔn le: “È ku bɔ̀ ankàẅì-bùtan ɛmɛ̀n.” 6Ɛẅɛnwrɔn mrɛ́n ɔmùan le: “Ke dú kɛ nyɛ́n ẅɛn ankàẅì-bùtan sevri hán anjràkàn-ẅì hɔ̂, nyɛ lɛ dɔ́ ɛẅì-shi-tɛ̀ ndɔ lɔ le: ‘Fù v'edomɛ̀n ɛ̀ hɔ̀n ɛ̀ shɛ́n ecüe mɛ̀n’, kɩ eci lɔ kɛ lɛ hán.”
Eci-bɩ̀tan-wrɔn kɔhɔ̀n-hán-kɔhɔ̀n
7“Bɔ̀ tro ankà ndɔ lɔ: ny'ɛmɛ̀n lɔ, ɔwrɔn tɔ̀n ẅɛn eci-bɩtan-wrɔn tɔ̀n kɛ hán ɔkɔ̀hɔ̀n ankɛ̀tɛmɛ̀n, kɩ ɛnvra tɔ̀n nɛ nán annɔ̀n. Ɛnvra léyi nɛ kán yi ke dú ovomɛ̀n kɛ vá ɛbemɛ̀n nɔn, n'ankà-yé-wrɔn kɛ lɛ dɔ̀ nɛ̀n le: ‘Ɛ̀ kpramàn ɛ̀ yɛ́ tɛbrɛ̀ wúɛ nɛ̀n’? 8Hɔ̂, nɛ lɛ gɔ̀ dɔ́ yi le: ‘Gbrɛ̀ ɛci tán mɛ̀n, crɔn ɛceci, ô è kù ɛci ɛ̀ tán mɛ̀n mɛ̀n zî; ɛnvra léyi ndɔ lɔ kɛ trɔ nɔn, yakɛ e le zî ɛci, e le mi ɛnshi.’ 9Nɛ̀n sɩ̀ ẅɛ̀n ɔkùɛn hɩ n'á tán n'eci-bɩtan-wrɔn lɔ nɔn, ɔmuhi, dú eci-bɩtan-wrɔn lɔ kɔ̀hɔ̀n-hán-kɔ̀hɔ̀n nɔn; ke sɩ̀ dù hiɛ? 10Eci zri lɔ de dú tán nyɛ́n mán nɔn: Ɛnvra léyi nyɛ lɛ hán eci léyi yɛ wá yɛ tán nyɛ̀n nɔn, nyɛ́n dɔ̀ le: ‘Bɔ̀ dú eci-bɩtan-bɔ̀ kora; bɔ̀ hán ɔkɔ̀hɔ̀n léyi dú bɔ́ ɔkɔ̀hɔ̀n-hán-kɔ̀hɔ̀n nɔn.’ ”
Zhezü kɔrɛ kokove-lɔwiɛ-bɔ̀ ɛvà
11Ɔmuhi Zhezü kɛ nán esù hɔ́n Zherüzalɛmɛ̀n anmàn, nɛ̀n ci Samari mán Galile vɔ̀n. 12Nɛ̀n bru anmàn tɔ̀n ɛnvra léyi kokove-lɔwiɛ-bɔ̀ ɛvà hɔ́n nɛ̀n ɛsù. Yɔ nyɔn esù she, 13kɩ yɔ bukru yɔ di bobo yɔ dɔ̀ le: “Zhezü, ankà-yé-wrɔn, è nyri bɔ̀ ɛnhyɔ̀bɔ̀!” 14Zhezü kán yɔ kɩ kɛ dɔ́ yɔ le: “Nyɛ́n hɔ̀n nyɛ́n yé ny'edomɛ̀n Ɔwɔ-cice-bɔ̀.” Ɛnvra léyi ye dú ɛnlevri yɔ hɔ̀n nɔn, kɩ yɔ kɔrɛ̀. 15Ɛnzri dú ɛmɛ̀n, ɛnvra léyi nɛ̀n kán ɔmu le nɛ́n kɔrɛ̀ nɔn, nɛ̀n vru ɛmɛẅi nɛ́n hɔ̀n nɛ mrɛ́n Ɔwɔ ɔmùan ɛwú sɩ́emɛ̀n. 16Nɛ̀n bore Zhezü ɛnan ziwú, nɛ̀n sɩ́ ezì ɛnhi, kɩ nɛ̀n tán yi ɔkùɛn. Ɔwrɔn ndɔ lɔ dú Samari-wrɔn. 17Zɛtɛn Zhezü kɛ dɔ̀ le: “Nyɛ́n anwrɔn ɛvà lɔ fɛn nyɛ́n kɔrɛ̀a? Kɛ̂ ɔmrɔ̀ ndɔ hɔ̀n lɔ, tɛyri yɔ dùɛ? 18Ɛnzriɛmɛ́n, kɛ sɩ̀ tro Ɔwɔ léyi nɛ lɛ và nɛ̀n tán ɔkuɛ̀n nɔn, ke dú kɛ ke sɩ̀ dù ɛmɛ̀n nyàntɛn mɛ̀n wrɔn ndɔ lɔa?” 19Kɩ Zhezü kɛ dɔ́ nɛ̀n le: “Tɔhú hɔ̀n; v'ankàẅì-bùtan lɔ bɩ́ mɛ́n die.”
Anhobɩ́ Nɛ̀ncüì-dúyri vá vra
(Nyɛ́n nyan Matie 24:23-28,37-41 wrú lɔ mɛ̀n)
20Ɔwɔ-nyanmàn-sùva wá-bɔ̀ ke yrɛ Zhezü ɛnvra léyi Anhobɩ́ Nɛ̀ncüì-dúyri kɛ lɛ và nɔn. Zhezü mrɛ́n yɔ ɔmùan le: “Anhobɩ́ Nɛ̀ncüì-dúyri ke sɩ̀ và kɛ̀ hán tán yɛ kán nɛ̀n. 21Ye sɩ̀ dɔ̀ le: ‘Nyɛ́n nyan nɛ̀n dú ɛnu!’ Ɛnvra tɔ̀n hô: ‘Nɛ̀n dú ezì!’ Ɔmuhi ke ji le nyɛ́n nyrì le, Anhobɩ́ Nɛ̀ncüì-dùyri lɔ dú nyɛ̀n anwanzi nɔn.”
22Zɛtɛn Zhezü kɛ dɔ́ n'ɛsɛnkɛn-bɔ̀ le: “Ɛnvra kɛ lɛ và, kɩ nyɛ́n le ji le, nyɛ́n kán, ɔwrɔnẅì Ẅì wúvà lɔ n'ɛnbì zri, tɛ́n nyɛ́n sɩ̀ kàn rɔ́. 23Yɛ lɛ dɔ́ nyɛ̀n le: ‘Nyɛ́n nyan ɛzìɛhɛ́n!’ Ɛnvra tɔ̀n hô: ‘Nyɛ́n nyan ɛnu!’ Tɛ́n ke sɩ́ ji le nyɛ́n hɔ̀n, ke sɩ́ ji le nyɛ́n srɛ́ mán. 24Hán ɔmu le ɛwú kɛ kpɛ́n ɛnhyà, hɩ ɛnhi mumù lɔ fɛn kɛ gbrɛ́n, ke dú ɛyri-kán mɛ̀n, ɔmu lɔ de ke le dú ɔwrɔnẅì Ẅì bì zri bì lɔ nɔn. 25Tɛ́n ke ji le nɛ̀n kán ɛgbàn bobrebe, ô ɛnvra ndɔ lɔ mɛ̀n-bɔ̀ kɛ̀ kɔ́n nɛ̀n ze. 26Eci zri léyi wɔɛn Noe vra lɔ nɔn, eci zri lɔ de kɛ lɛ wɔɛn ɔwrɔnẅì Ẅì wúvà bì lɔ mɛ̀n nɔn. 27Anwrɔnẅì ke zî ɛci, ke mi ɛnshi, kɛ koran eyrì-koran, ɛnvra tɔ̀n hô ye yri y'edomɛ̀n hàn kɩ cɔ́ ɛnvra léyi Noe bru Ɔwɔ anhàka vri lɔ mɛ̀n nɔn: zɛtɛn ɛnshi-yɩ́-vra cɔ̀, wri yɔ lɔ fɛn. 28Ke le dù kɛ lɛ hán Lɔtɛ̀n vra lɔ: anwrɔn ke zî ɛci, ke mi ɛnshi, kɛ wɔ́ ɛci, kɛ hɛ́ ɛci, kɛ tɛ́ ɛci, ke ku anwɔn. 29Tɛ́n ɛnbì léyi Lɔtɛ̀n cɔhɔ́ Sodɔmɛ̀n anmàn nɔn, ɛnhyà mán ɛnhyà-ẅì dú anhobɩ́ kɛ nàn kɛ hán ɛnshi hɔ́; kɩ hán yɔ lɔ fɛn yɔ wù. 30Eci zri lɔ de kɛ lɛ wɔɛn ɛnbì léyi ɔwrɔnẅì Ẅì kɛ lɛ srɔ nɔn.
31Hɩ vra lɔ, ɔwrɔn léyi ke le dú ɔwɔn wú, n'ɔwɔn zìwú ke sɩ́ ji le nɛ̀n kàkɛ nɛ̀n hɔ́n anwɔn mɛ̀n nɛ̀n bɩ́ n'ɛci léyi dú nanvrɛn nɔn; ɔmu zri lɔ ɔwrɔn léyi dú ankɛ̀tɛ mɛ̀n nɔn, ke sɩ́ ji le nɛ̀n vru nɛ̀n vá n'ɔwɔn lɔ mɛ̀n. 32Nyɛ́n tro Lɔtɛ̀n hi ankà! 33Ɔwrɔn léyi ke le ji n'ɛwúvà bɩdie-yri nɔn, kɛ lɛ zrɛ́n nɛ̀n; tɛ́n, ɔwrɔn léyi kɛ lɛ zrɛ́n n'ɛwúvà lɔ nɔn, ke le bɩ́ nɛ̀n kè die. 34Mɛ dɔ́ nyɛ̀n, ɛnnyran ndɔ lɔ mɛ̀n, anwrɔn anhyrɛ̀ ke le dú sofa zri wú: ye le bɩ́ nzri, ye le teze ɔtɔ̀n. 35Wúyɔ̀ anhyrɛ̀ ke le dú ɛci-sɔ́n mɛ̀n: ye le bɩ́ nzri kɩ ye le teze ɔtɔ̀n. [36Anwrɔn anhyrɛ̀ ke le dú ɛkɛ̀tɛ̀ tɔ̀n mɛ̀n: ye le bɩ́ nzri yɛ sɔhɔ́ kɩ ɔtɔ̀n kɛ lɛ yɛ́.]” 37N'ɛsɛnkɛn-bɔ̀ ke yrɛ nɛ̀n le: “Tɛyri de ɛci hɔ̀n lɔ kɛ lɛ wɔɛ̀n nɛ́n?” Kɩ nɛ̀n mrɛ́n ɔmùan le: “Ɛyri léyi ezhe kɛ lɛ dɛ́ nɔn, nanvrɛn lɔ de ɛmrɛ̀ncì mán ke le dù nɔn.”
Айни замон обунашуда:
Lükɛ̀n 17: ƐAA03
Лаҳзаҳои махсус
Паҳн кунед
Нусха
Want to have your highlights saved across all your devices? Sign up or sign in
Alladian: Ɛmɛẅi ankà ankrànkràn © Alliance Biblique de Cote d'Ivoire, 2003.