Matiu 7
7
Sira yiam urufam-ikowa
(Luk 6.37-38; 6.41-42)
1Ni mua oko me wia tuuneka, oko nis pun Mua Maneka-ke sira nain nia kiripominon. 2Ni sira kamenap wia oniman nain kiripami nis pun naap nia kiripominon. Ne mua oko maa wiiman naap ikoka Mua Maneka-ke pepekiw ni nia kiripominon. 3No nena niamun mokoka maa sakua gelemuta wiar ikua nain urufap iirarominen nain, ne moram nena mokoka maa kakawa nefar ikua nain me name urufin? 4Ne no maa kakawa mokoka-pa nefar ikua nain me kema suuwowa kamenap niamun maakinan, ‘Aamun sa, no maa sakua fain iirarominen.’ 5No wadolalin. No kiikir akena maa kakawa nena mokoka-pa nefar ikua nain iirarep-puap maa baliwep urufami niamun maa sakua eliw iirarominan.
6Aria Mua Maneka maa eliwa siowa me wieka, oko maa enowa-ke naep kiremi nia kerawikuan. Ne maa eliwa omod onoma naap nain waaya me wia wafuromaka, oko maa oram-ke naep soomaremi akup-ititikuan.”
Mua Maneka farep nokarowa sira
(Luk 11.9-13)
7Aria ni Mua Maneka farep maa nokariwkin nia apekarinon. Maa akupap eliw imenowen ne omopora anumiwkin nia paaskominon. 8Moram wi mua maa-ko nokarimik nain eliw wiinon. Ne maa-ko akupimik nain imenikuan, ne omopora anumimik nain eliw wia paaskominon. 9Ni feenap-ko oniman-i e weetak? Muuka-ke enowa naeya nomona aawep onakowen-i? 10Ne mera naeya ifa onakowen-i? Weetak, ni naap me oniman. 11Ni mua samora-ke, nain ni muuka maa eliwa wiowa nain amisareman. Naemi niena Niawi owow iinan-pa ikua nain-ke ni maa nokariman nain maa eliwa kerewa me niiya-i?
12Aria ni mua oko sira eliwa yia onuk naep-na nis pun naapiw wia oneka. Moram Moses sira wuomakek nain ne wi profet opora maem-ikemik nain, sira nain mikap maem-ikemik.”
Omopora siina ne omopora maneka
(Luk 13.24)
13“Aria ni omopora siina-pa ikiweka. Moram, omopora maneka nain epa samora ikiwowa era-ke, ne era nain maneka. Mua unow akena era nain ookimik. 14Ne anane eliw ikowa nain omopora siin muuta. Neeke ikiwowa era lawisik yoowiya mua kui-kuisow imenimik.”
Wi mua maa oniwkin sira wiar ilenikuan
(Luk 6.43-44; 13.25-27)
15“Aria wi mua wadolalemi i profet-ke wiam maimik nain wia urufami ikeka. Moram wia urufowa-ke wi sipsip saarik, memel muuta ikaimik, nain wiena kema-ke onaiya, siow asia kema saarik. 16Wiena sira-pa wia urufap eliw wia amisarowen. Sira naap, wirimowa-ke makenaremi wain makena eliwa wuinon-i, e suaruwa-ke makenaremi fik makena wuinon-i? Weetak. 17Sira naapiw, nomokow eliwa-ke makenaremi makena baliwep wuiya, nomokow samora-ke makenaremi makena eliwa me wuiya, weetak. 18Nomokow eliwa-ke makenaremi makena samora me wuinon, ne nomokow samora-ke makenaremi makena eliwa me wuinon. 19Aria nomokow samora nain warep pu-puukap mukuna-pa wafurikuan. 20Sira naapiw, wi wadolalimik nain wiena sira-pa kema wiar amisarowen.”
Yeesus ikoka mua papako mikikira wiinon
21“Aria mua unowa yo ‘yiena Maneka’ efa naimik, nain mua unowa owow iinan Mua Maneka pika kemena me wiar ikiwikuan. Wi mua yena Auwa owow iinan-pa ikua nain kookalowa wiar onam-ikaimik, muut nainiw owow iinan ikiwikuan. 22Ikoka Mua Maneka miiw mua nia mekawow epa nain imenareya mua unowa ekapemi efa maakikuan, ‘Maneka, is pun yia aawe. I no unuma-pa Mua Maneka opora wia maakem-miemik, sawur wia anirawap ikemik nain wia iirarem-miemik ne no unuma-pa maa miililina imenam-miemik,’ naap efa maakikuan. 23Ne yos-ke arimaniw feenap wia maakinen, ‘Yo-ko me nia amisarem, ni eenap ekeka. Ni mua sira samora-pa ikeman nain-ke,’ naap wia maakinen.”
Koora kuowa sira erup
(Luk 6.47-49)
24“Ni mua opor unowa fain efar miimap ookiman nain ni mua kema-ke. Nain feenap, mua koora kuowa naep miiwa kuap peperowa imenap poka soopap-puap koora kuak, nain saarik. 25Koora baliwep kueya ewar ipia onaiya ekapemi eka luuma iwiya nain koora me teninon. Moram koora nain peperowa iinan-pa kuak.
26Ne ni mua yo opora efar miimap me ookiman nain ni mua momora, kema marewa. Nain feenap, mua koora miiw iinan-pa kuak nain saarik. 27Ne ewar ipia onaiya ekapemi eka luuma iwami koora nain anu-fienami teekeya iiwawun samorarinon, naap saarik.”
28-29Aria opora nain wia maakep weesereya wi unowa o warikap ikemik nain opora wiar miimap soranemik. Moram opora wia maakek nain ona kekanowa onaiya ikua, ne wi sira amis mua suule wiemik naap weetak.
Айни замон обунашуда:
Matiu 7: mhlNT
Лаҳзаҳои махсус
Паҳн кунед
Нусха
Want to have your highlights saved across all your devices? Sign up or sign in
© 1998, Wycliffe Bible Translators, Inc. All rights reserved.