Panagnaꞌan 46
46
Pī si Yakub hap lahat Misir
1Manjari tahalaꞌ ne disi Yakub amban lahat Kanaꞌan duk meꞌ kēmonden. Pag tekka ne siye si Beer-sheba laꞌi si lān tudju Misir magkurban ne si Yakub si Tuhan iye pagtuhanan weꞌ samane Ishakley. 2Pag sangem ne missā Tuhanin pu si Yakub, paꞌinne, “O, Yakub, Yakub.” Nambung si Yakub, paꞌinne, “Tiyaꞌ ku.” 3Paꞌin Tuhanin, “Aku Tuhan pagtuhanan samanu ley. Daꞌa kew tinalew padurul pī si Misir peggeꞌ laꞌi paꞌekkaku tubuꞌnun duk kew manjari bangsa basag. 4Saweꞌante kaꞌam pī si Misir duk si pasōngan tūrananku du tubuꞌnun balik si Kanaꞌan. Si Yusup du makeddem matanun bang kew matey.”
5Manjari miyaꞌan tahalaꞌ ne disi Yakub amban Beer-sheba. Pinasakey weꞌ meꞌ anakne lellahin si Yakub duk meꞌ anakde madikiꞌin duk meꞌ andaden diyataꞌ meꞌ kahdu bakas pinaboꞌohan weꞌ sultanin. 6Binoꞌo isab weꞌ de meꞌ hayepden duk meꞌ alataꞌden duk kēmon bakas taꞌusahade laꞌi si lahat Kanaꞌanin. 7Sā miyaꞌan disi Yakub pī si Misir magtuhut duk kēmon meꞌ anak-ampunen lella-dende. Kēmon siye meꞌ tubuꞌnen magtuhut siye pī si Misir.
8Inin ēn meꞌ tubuꞌ si Yakub mapadurul pī si Misirin. Meꞌ anak si Yakub duk andane poꞌonin si Leꞌa: Si Ruben anak si Yakub sakahin;
9duk meꞌ anak si Ruben lellahin disi Hanok, si Pallu, si Hesron, duk si Karmi.
10Simeon duk meꞌ anakne lellahin disi Yemuꞌel, si Yamin, si Ohad, si Yakin, si Sohar duk si Saꞌul. Si Saꞌul miyaꞌan anak Simeon duk andane bangsa Kanaꞌan.
11Si Lebi duk meꞌ anakne lellahin disi Gereson, si Kohat, duk Merari.
12Si Yahud duk meꞌ anakne lellahin disi Er, si Onan, si Shela, si Peres duk si Sera. Saguwaꞌ si Er duk si Onan ubus ne matey laꞌi si lahat Kanaꞌan. Duk meꞌ anak si Peres lellahin si Hesron, duk si Hamul.
13Issakar duk meꞌ anakne lellahin disi Tola, si Puwa, si Yasub, duk si Shimron.
14Sebulon duk meꞌ anakne lellahin disi Sered, si Elon, duk Yahleꞌel.
15Kēmon meꞌ aꞌa miyaꞌan meꞌ anak-ampu si Yakub duk si Leꞌa. Kēmon siye inanakan laꞌi si Paddan Aram. Niyaꞌ pe anakde dende inēnan si Dina. Tellumpūꞌ duk tellu tubuꞌ si Yakub duk andanen si Leꞌa.
16Inin meꞌ tubuꞌ si Yakub duk anda-andane si Silpa. Ēn anakden si Gad duk si Aser. Meꞌ anak si Gad lellahin disi Sipyon, si Haggi, si Shuni, si Esbon, si Eri, Arodi duk Arꞌeli.
17Meꞌ anak si Aser lellahin disi Yimna, si Yishwa, si Yishwi, si Beria duk anakne dendehin inēnan si Sera. Meꞌ anak Beria lellahin si Heber duk Malkiꞌel.
18Siye miyaꞌan meꞌ anak-ampu si Silpa, iye daraꞌakan bakas pinangurung pu si Leꞌa weꞌ samanen si Laban. Sampūꞌ duk ennem kēmon siye meꞌ anak-ampu si Silpa duk Yakubin.
19Meꞌ anak si Rakel anda si Yakub tugguhin: si Yusup duk Binyamin. 20Meꞌ anak si Yusup inanakan laꞌi si Misirin si Manasse duk Eprayim. Siye miyaꞌan meꞌ anak si Yusup duk Asenat, anak Potipera imam amban On.
21Meꞌ anak Binyamin lellahin: disi Belaꞌ, si Beker, si Ashbel, si Geraꞌ, si Naꞌaman, si Ehi, si Rosh, si Muppim, si Huppim, duk si Ard.
22Siye miyaꞌan meꞌ anak-ampu si Rakel duk si Yakub. Kēmon siye sampūꞌ duk ampat.
23Inin meꞌ tubuꞌ si Yakub duk anda-andane si Bilha: si Dan duk anakne lellahin ēnnen si Husim.
24Naptali duk meꞌ anakne lellahin disi Yahseꞌel, si Guni, si Yeser, duk si Shillem.
25Siye miyaꞌan meꞌ anak-ampu si Bilha, iye daraꞌakan bakas pinangurung pu si Rakel weꞌ samanen si Laban. Kēmon anak-ampu si Bilha duk Yakubin pituꞌ.
26Kēmon meꞌ tubuꞌ si Yakub matekka si Misirin, bukut meꞌ eyuꞌannen ennempūꞌ duk ennem ekkahanden kēmon. 27Duk niyaꞌ pe duwe anak si Yusup inanakan si Misir sampay si Yusup ne duk si Yakub. Hangkan hep siye pitumpūꞌ ekkahanden magtewteyꞌanakin laꞌi si Misir.
28Manjari dinaꞌak weꞌ si Yakub padehellu si Yahud pī pu si Yusup makasampang iye si Gosen. 29Pag kataꞌuhan si Yusup weꞌ laꞌi ne siye, magtawus memes si Yusup pasakeyannen bu pī iye nampang samanen hap Gosen. Pag magkasuwaꞌ ne siye kinekkepan weꞌ si Yusup samanen duk tiggel siye magtangis. 30Ubus paꞌin si Yakub pu si Yusup, “Na, kuweꞌitu maglillaꞌ ne ku matey peggeꞌ takitete ne kew weꞌ ellum pe kew.”
31Manjari paꞌin si Yusup si me pungtinaꞌinen duk si meꞌ usbanen kēmon, “Pī ne ku ngakahan sultan Misirin weꞌ tekka ne meꞌ pungtinaꞌikun duk meꞌ usbakun amban lahat Kanaꞌan. 32Akahanku isab iye weꞌ kaꞌam meꞌ aꞌa magipat-ipat meꞌ bili-bili duk meꞌ sapiꞌ duk weꞌ tiyaꞌ ne binoꞌo weꞌ bi meꞌ hayepbin duk meꞌ kēmonbin. 33Bang tawag sultanin kaꞌam duk tilewne kaꞌam bang ine hinang-hinangbin, 34nambung kaꞌam, paꞌinun bi, ‘Kami, meꞌ daraꞌakannun, kēmon pangkatan kamihin magipat hayep kamuwe matuꞌuley sampay kuweꞌitu.’ Iye miyaꞌan panambungun bi duk kaꞌam makajari patennaꞌ tuꞌu si lahat Gosen inin. Peggeꞌ kēmon meꞌ aꞌa magipat bili-bili lemmiꞌ hep meꞌ aꞌa Misirin si siye.”
Айни замон обунашуда:
Panagnaꞌan 46: yakV
Лаҳзаҳои махсус
Паҳн кунед
Нусха
Want to have your highlights saved across all your devices? Sign up or sign in
© 2019, Wycliffe Bible Translators, Inc. All rights reserved.