Mwanduso 7
7
Mazi mengi goigubika isi
1Mndewa Imulungu kamulongela Nuhu, “Ingila mdisafina gweye na wanhu wa mng'anda yako, kwavija mna iwanhu wose iwokala sambi mwiisi gweye wiiyeka ayo utenda ganogile. 2Mna iwanyama odigwa sola saba saba mbigalo na mtwanzi kwa kila aina, na mna iwanyama hawadigwa sola wabili wabili mbigalo na mtwanzi kwa kila aina. 3Vivija sola ndege saba saba wa kimbigalo na wa kitwanzi kwa kila aina, ili wike mbeyu kabili mwiisi. 4Kwavija siku saba kumwande, nogala mvula mwiisi yonda itowe siku malongo mane imisi na ikilo, na vinhu vose vili na ugima vinilumbile mwiisi vofa.” 5Nuhu katenda kila kinhu kamba viyalagizwe na Mndewa Imulungu.
6Kipindi mazi mengi vigezile mwiisi, Nuhu kakala na miyaka magana sita. 7Nuhu na mwehe wake na wanage na wehe zao wengila mdisafina ili wahonyeke na mazi mengi. 8Wanyama odigwa na wanyama hawadigwa na ndege na wang'onyo wose otambala mwiisi, 9mbigalo kwa mtwanzi, wengila mdisafina hamoja na Nuhu kamba viyalagize Imulungu. 10Siku saba kumwande mazi mengi gasonga kuigubika isi.
11Nuhu viyakalile na miyaka magana sita, mna isiku ya longo na saba ya mwezi wa kabili, siku ayo nzasa zose za mazi zili hasi mwiisi zivuguka, na nyivi zose za mazi ga kuulanga zivuguka. 12Na mvula itowa mwiisi siku malongo mane imisi na ikilo. 13Siku didija mvula viisongile kutowa, Nuhu na mwehe wake na wanage, Shemu na Hamu na Yafeti, hamoja na wehe zao, wengila mdisafina. 14Wengila hewo wenyego hamoja na aina zose za wanyama wa kumuhulo, aina zose za wanyama ofugigwa, aina zose za wang'onyo otambala na kila aina ya ndege. 15Wabili wabili wa kila aina ya vinhu vilumbigwe vili na ugima vingila mdisafina hamoja na Nuhu. 16Wanyama wengile wakala wa kitwanzi na wa kimbigalo kwa kila aina ya kinhu kilumbigwe kili na ugima kamba Mndewa Imulungu viyamulagize Nuhu. Abaho Mndewa kahinda ulwivi kukisogo cha Nuhu.
17Mazi gagendelela kumema kwa kipindi cha siku malongo mane, mazi gongezeka na kwinula disafina uchanha ng'hani. 18Mazi gongezeka ng'hani mwiisi na safina jeluka uchanha yake. 19Mazi gago gakala mengi ng'hani uchanha mwiisi, gavigubika vigongo vose vitali vili mwiisi. 20Mazi gongezeka mbaka gavigubika ivigongo utali wa makono saba. 21Vinhu vose vili na ugima mwiisi vifa, ndege na wanyama ofugigwa na wanyama wa kumuhulo na kila mng'onyo yotambala mwiisi na wanhu wose wafa. 22Kila kinhu kili na mhumuzi ya ugima mwiisi inyalile kifa. 23Kila kinhu kili na ugima mwiisi kifa, wanhu na wanyama na wang'onyo wose otambala na ndege wakomigwa. Nuhu yaiyeka ayo yasigale hamoja na waja yakalile nao mdisafina. 24Mazi gago hagahunguke mwiisi kwa siku gana na malongo matano.
Айни замон обунашуда:
Mwanduso 7: King'hutu
Лаҳзаҳои махсус
Паҳн кунед
Нусха
Want to have your highlights saved across all your devices? Sign up or sign in
NT: © 2014 Pioneer Bible Translators and The Word for the World
OT: © 2019 Pioneer Bible Translators