Luk 17
17
Bade abiafem
(Mat 18:6-7,21-22; Mak 9:42)
1Jisos kehm bungu tong abatꞌtoono ebe re, “Nsol nyi kpo lim nne gbo yel abiafem bahke tiki ba. Eyuu a nne no bahke wahnge re ba! 2Ga nob re bo kahn-e eltal go emel, tub-e kak alahb, sehnge re á lim mmonse awohng go ellong abonse baa, á gbo yel abiafem.#17:2 Mak 14:21.
3“Jo gberen elnahne!
“Mmonanne lꞌlim abiafem, jo rehk-e. Á lꞌgbo ndon, tahm ka-e.#17:3 Mat 18:15-17. 4Á lꞌsood-a nkpel esehma efung abehng, fere ba gboong-a nkpel esehma re, ‘Ndon ma-m fili!’ tahm ka-e.”
Bade eltaame
5Owo abatiingetib kehm tongo Ntul a Jisos re, “Lim eltaame enahre gbal!”#17:5 Mat 8:10; 15:28.
6Ntul a Jisos kehm faange bo re, “Li re ń kpi eltaame ni se ana mmohk asia, kehn ń li ma bung tong etaamenti bia re, ‘Mehl, wo song yiimi go aya!’ kehn bahk-n wuku.#17:6 1 Jon 5:4.
Ji li ka nlokeltum re á lim
7“Li re nne awohng ewahne kpi nlokeltum no kpo bahm egbe, tohko jol ano á kpo baabe ebul. Á lꞌkehnge egbe ba, nde kpo tong-e tong rea, ‘Ba elwaare, wo ba ji ekpꞌkuru li nsola?’
8“Eꞌee! Á bahk-e tongo na re, ‘Song lam nsol ka-m, wo fere toobo ebjing bi a bahk-m loko ngare nyi n kpi nsol li. N lꞌli mal, wo kehm tob li.’
9“Anv, á bahke kake nlokeltum ewe nnyo go nsol nyi á tong-e re á lima?
10“Wahn fvfo, ń lꞌlim nsol kpee nyi bo tong-n re wahn lim, jo bungen re, ‘Wahr alokeltum baka baka ba. Wahr eblim ji li ka-r re wahr lim.’ ”#17:10 1 Kor 9:16.
Ana Jisos limi aneb abili na awubu, bo nob
11Eji Jisos je go Jerusalem, á sehnge go Samaria, a Galili.#17:11 Luk 9:51; 13:22.
12Eji á rehnge go ejahbe ajehng, aneb abili na awubu kehm ba wan-e. Bo yiimi go fee, 13kehm rabe re, “Jisos nso ejahre, nong, wahr fil-a ndon!”
14Eji Jisos nyehne bo, á kehm tongo bo re, “Songen, wahn song kpiri abalimajom, fere tib bo elnahne.”
Eji bo jo jen asongo, bo kehme elnobo.
15Nne awohng go bo ellong, eji á nyehne re yeblohko nob, á kehm feere abake, jo tehk Esowo wahre wahre, 16kehm ba gbo go alata nya Jisos, kehm-e kake saam. Nne noo jolo nne a Samaria.#17:16 Jon 4:9,39-41.
17Owo Jisos kehm bungu re, “Anv, ane awubu sang nobo noa? Ane asehmwubu bako bana? 18Nnene feerem ba re á ba tehk Esowoa, sehngem njenne nyia nyi nyi feere noa?”#17:18 Kol 3:17; Ell 15:3-4.
19Owo á kehm-e tongo re, “Mehl, wo song, eltaame ena eblim, wobnob.”
Elbake ni etul bi Esowo
(Mat 24:23-28,37-41)
20Egom Farisi jindiki kehm bahbe Jisos re, “Ngare anyi etul bi Esowo bahke bake!”
Owo Jisos kehm faange bo re, “Etul bi Esowo nehm ba go mbang nyi ane bahke nyehne.#17:20 Jon 18:36. 21Nne awohng awohng limm, no bahke bungu re, ‘Nyehn, bi gana!’ jol, ‘Nyehn, bi gona!’ Tibre etul bi Esowo bia, wob-n go atahng.”
22Owo á kehm tongo abatꞌtoono ebe re, “Ngare kpꞌbake nyi ḿ bahke sebe re efung abehng bi Mmon no nne kpir-n, jol wahn nehm kpiri. 23Bo bahk-n jo tong re, ‘Nyehnen gona!’ Ane bako bahk-n jo tong re, ‘Nyehnen ga!’ Kana lohng je ona! Jol kana toono bo! 24Ana emangedu kpo lim, lennge go elbung, rehng ejang abehng abehng, ano wo fvfo Mmon no nne bahke jolo go ege efung. 25Á bahke gboko mbang nyehn erem gbalee. Ane ba li anv bahk-e tene.#17:25 Luk 9:22.
26“Ana jolo ngare nyio nyi Noa, ano wo fvfo bahke tob jol afung nyao nya Mmon no nne. 27Ngare nyio ane jo li, fere jo wꞌwo. Aneblum jo ko akal, anebkal jo bal alum, tete rehng efung bio bi Noa yele go egbang. Owo nnyel kehm yele, ba wul bo kpee.
28“Bahke jolo ana jolo ngare nyio nyi Lot. Bo jo li, fere jo wꞌwo, jo gunu, fere jo gꞌgungu, jo bahm ebgbe, fere jo si ntahk. 29Efung bi Lot lohngo go Sodom, agun, a asalfa kehm kehme elnake go ejahbetul Esowo, ba wul bo kpee.#17:29 1 Tes 5:3.
30“Ano wo bahke tob jol fvfo efung bi bo bahke lennge Mmon no nne tib. 31Efung bio, nne no lꞌkuumu go ege ero etahk, á lꞌbadde, á kꞌtohko kpe ji, yel go ege ekpꞌkpa, song rod nsol enye. Ano wo fvfo tob li ka nne no li go ege egbe, á nehm tohko kpe feere go ege etahk.
32“Buumen nkal a Lot! 33Nne awohng awohng no lꞌgare re á tahre elkpin ene, á bahke tane na elkpin ene. Nne no lꞌtane elkpin ene, á bahke tahre na elkpin ene.
34“N kp-n tongo re, atv mao ane abal bahke noongo go edilnong ajehng, noko, bo bahk-e rodo tahm a ne, noko sa. 35Anebkal abal bahke jo gok nsol, noko, bo bahk-e rodo tahm a ne, noko sa. 36Aneblum abal bahke jolo go egbe, noko, bo bahk-e rodo tahm a ne, noko sa.”
37Owo abatꞌtoono ebe kehm-e bahbe re, “Nsoo, gan wo?”
Jisos kehm faange bo re, “Edi ji ekpakv ejum li no, owo ntere kpo song rur.”#17:37 Mat 24:21; Ell 16:14-16; 19:17-21.
Айни замон обунашуда:
Luk 17: ekaNT
Лаҳзаҳои махсус
Паҳн кунед
Нусха
Want to have your highlights saved across all your devices? Sign up or sign in
© 2012, The Nigeria Bible Translation Trust and Wycliffe Bible Translators, Inc. All rights reserved.