Mwanzo 15
15
Mola akumpa tamaa Buraimu yakumpata mwana na inti
1Bandi ya vire vikunire vire piya, Mola akimwisusira Buraimu ruhuya nkati ya mawoneso akimwambira akamba: “Buraimu! Usope kinu! Omi ndi kinga rako. Omi ndi tuzo rako rikulu futi!” 2Fala Buraimu akijibu: “Mwenyezimungu Mola wetu, ruhuya yako inifãini kwa kuwa nukufwa mulumwengu-mu sanimpatire mwana? Epa Eliezeri wa Damashiku ndi ája kuriti pakaya pangu-pa?” 3Buraimu akimwambira tena javi: “Kwijiwa sana-sana kuwa aunijanliye kumpongola mwana, basi nang'aniza! Ntumisi wangu apongóriwe pakaya pangu-pa ndi ája kuniriti!” 4Kwa mpunde noure Mola wetu akinjibu akamba: “Siye ája kukuriti! Mwanawo álisi ndi ája kukuriti.” 5Noparepare Mola wetu akinlavira panja Buraimu akimwambira: “Ona! Sambi nang'aniza julu binguni uwalange nondwa, uwone kamba ukidiri kuwalanga, konta novyo-novyoni ndi vyaúja kuwa ujukulu wako.” 6Buraimu akimwamini Mola wetu, ntamana iye kaisabiwa kuwa kamilifu.#15:6 Ona waGalata 3:6 na waRoma 4:22.
7Basi sambi, Mola akimwambira tena Buraimu: “Omi ndi Mola, nukulavire kaya ya Uri, inti ya waKaldeya, ipate nukupe eyi inti-yi iwe miliki yako.” 8Fala Buraimu akindairi: “Mwenyezimungu Mola wetu, nísaka kwijiwa mwaja kuwa nikuja kumiliki eyi inti-yi kamba yangu?” 9Mola wetu akinjibu: “Njo nawo kang'ombe, ncamba wa ng'ombe, ncamba wa mbuzi muka na ncamba wa kondoo nlume, piya wa myaka mitatu-mitatu, njiwa pamoja na pomba.” 10Buraimu akija nawo manyama ware piya na akiwasinja, kila nyama akimwawanya vipande viwiri-viwiri, akarira swafa mbiri vipande vya kulongozana, falakini njiwa na pomba ire aawawanye. 11Marembo wákisaka kumota panyama zasinjire zire, basi Buraimu ákiwawinga.
12Juwa rikizama sinini-sinini, Buraimu ukintokotera usingizi, kumaso kukimwinukala pí akisusuka pakulu futi. 13Noparepare Mola wetu akimwambira javi: “Wijiwe sana-sana kuwa ujukulu wako úkuja kwikala kiyeni inti sairi yawo, wakúja kuwa watwana na kutabishiwa muda wa myaka miya nne. 14Fala nomi-nomini níwahukumu wanu wája kuwatenda utwana-wo, na mwinshoni ujukulu wako ukuja kusama na mali mengi awenye. 15Falakini uwe-po ukuja kuwafulata wakulungwa wako kwa heri, na ukufwa kwa vyema ulúvare. 16Tarehe ya ane, ujukulu wako úludira nopa, konta makosa a waAmori anamba kufika mwinsho pakupata ukumu yawo ya kuwajuzi.”
17Basi iwa juwa rire ritita kwinukala pí, ona, pákiwoneka pauralu pakifuka rosi na nlangaza ukikorera ukipita kati-kati ya nyama zisinjiwe zire. 18Kwa noire suku ire Mola wetu akitula miyadi ya kupatana na Buraimu akamba: “Ujukulu wako níwapa eyi inti-yi kwanza muto wa Miswiri mpaka muto nkulu wa Eufarati, 19matalani inti ya waKeni, ya waKenizi, ya waKadmoni, 20ya waHeti, ya waPerezi, ya Refaimu, 21ya waAmori, ya waKanaa, ya waGirgashi na ya waYebusi.”
Айни замон обунашуда:
Mwanzo 15: wmwBI
Лаҳзаҳои махсус
Паҳн кунед
Нусха
Want to have your highlights saved across all your devices? Sign up or sign in
© 2013, Wycliffe Bible Translators, Inc. All rights reserved.