URA TIN AYRA 35
35
Lona paɗ vunum ki kay Yakob hu Betel
1Lona di Yakob ana, «Col kolo tuɗ Betel, kak huwa, aŋ hin min givin ma togolla maŋ Lo ma tak tam iriŋ hu li ma aŋ pii ay ki ko wayaŋŋa Ezawna.»#Ura 28.11-17 2Yakob di suu vo varamma u suu tuɗ ay umma lay ana, «Cukugi loogi suu vi suu daŋŋana suu ay kogina kiyo. Lagi tagi ki teteɗ, cukugi baraw ma wilina tagiya. 3Yowoygiya, tuɗuygi kolo hu Betel, hu li namma an hin min givin ma togolla maŋ Lo ma humun cen manda hu wihawrana, ma njun ay un hu koy mandana.» 4Asi taa loogi suu daŋ suu ay kosina ki maŋ Yakob halaŋ u walakka ay humusira lay. Yakob pasi ki kaŋga u ŋgus ɦoy#35.4ɦoy terebinthe. ma ŋgolna tok eg Sekem. 5Ŋgoo dagan asi tuɗa, ndaa Lona ndi kay ɦoŋzi ma ŋguy kasina halaŋ, sa cuɗ u goryoŋ Yakobma kaɗi.
6Yakob u suu umma halaŋ tew ki Luz ni ana, Betel, ni hu mbassa Kanaanda. 7Nam min givin ma togolla hu li namma, tin sem li namma ana, Lo ma Betelna, kay ni li ma Lona tak tam irim hu li ma nam pii ay ki ko wayammana.
8Debora, cara wul Rebekara, miɗ miɗni. Asi paɗ u ɦoy ma ŋgolna tok eg Betel, asi tin sem gu namma ana, gu ma tiina.
9Hu li ma Yakob hoŋ ay hu Padan-Aramma ni, Lona tak tam irim olo, nam paɗ vunum ki kamu. 10Lona dam ana,
«Seŋ ana Yakob,
tuɗ fokŋi sa ka yaŋ ana Yakob oloɗi,
seŋ mbuɗ ni ana Israel.»#Ura 32.28
Nam hin tinim sem ana, Israel. 11Lona dam ana,
«Anni Lo ma Saɓakŋa,
ko aŋ vuɗa, zul njafna kay ndaŋgara,
njaf maa dew u njaf suuna ŋgolo hin vuɗ ay ki egeŋu,
mulina bolowo hin mbay ki ni egeŋu.#Ura 17.4-8
12Mbas mayra an ɦaɗ ay maŋ Abraham u Isaakka an ɦaŋga,
an hin ɦaɗ ka maŋ njafaŋ ma hin ka ŋgoroŋ daganna lay.»
13Lona tuɗ kolo hinim ka ni hu li ma nam njaɗ u nam huna.
14Yakob nja ɦinira kay taɗ hu li namma miniɗ a gi humba, vo sum veŋŋa kaɗ voni, hin vo mbulna kaɗ may.#Ura 28.18-19 15Yakob tin sem li ma Lona ɓakam huna ana, Betel.
Miɗna vi Rasel
16Yakob u suu mamsina yow hin Betel ka tani, asi hin Efrata ha fokosi na ndeni Rasel vuɗ goona, vuɗ maɗta li loɓ cocoo. 17Hu li ma ndaɗ ka vuɗ loɓma cocora na ni, cara vuɗuɗta daɗ ana, «Li ndaaɗi, hurukŋi go njufna olo.» 18Rasel hin gin tok a miɗ u vuɗta, ndaɗ tin sem go namma ana, Ben-Oni ni ana, (goo vuɗum u wihawrana). Bum hin tinim semmi ana, Benjaminni ana, (goo ma kay bikin njufna). 19Rasel miɗ miɗ ni, asi paɗ ni hu voɗta Efratara ni ana, Betlehem. 20Yakob min us Rasel ki kolo day a gi humba, gak gak karam lay ni usuɗ kaa.
Goryoŋ Yakobma
21Israel tuɗ fok min mbutluɓ mamma ha ki eg zira Migdal Eder, na day. 22Hu li ma Israel ka cuki hu mbas ndaɗtana ni, Ruben buu u caŋ bumba Bila, Israel hum boy namma.
Goryoŋ Yakob suu njufiina halaŋŋi doogo yam mba'.#Ura 49.4 23Goryoŋ Leana, Ruben goŋ Yakob ma ŋgolna, Simeon, Levi, Yuda, Issakar u Zabulon. 24Goryoŋ Raselna, Yosef u Benjamin. 25Goryoŋ Bila, goora sun Rasella, Dan u Neftali. 26Goryoŋ Zilpa, goora sun Leara, Gad u Aser. Ni goryoŋ Yakob suu nam vuɗusi hu Padan-Aramma.
Miɗna vi Isaak
27Yakob tew eg bum Isaak hu Mamre tok eg Kiriyat-Arba ta yaɗ cemi ana, Hebronda gi Abraham u Isaak cukini huwa.#Ura 13.18 28Isaak basaɗam li ni kis duk dok-kalavandi. 29Isaak mbuɗ ki maa cocoo, basa ŋgol kay ndaŋgara nam miɗa taɓ u somoyom suu zulina. Goryom gi Ezaw u Yakob pamu.
Айни замон обунашуда:
URA TIN AYRA 35: BMS
Лаҳзаҳои махсус
Паҳн кунед
Нусха
Want to have your highlights saved across all your devices? Sign up or sign in
Bible Moussey © Bible Society of Chad, 2002.