URA TIN AYRA 34
34
Cora kal taraŋ vi Yakob
1Fali taa dew Dina goŋ Yakobpa vuɗuɗ ko Leara kal ki a gol gorɓii suu hu zina. 2Sekem ma goŋ Hamor ma Hivna, mul ma hu mbas ndaɗtana waɗ na ni ndaɗ irim jiviya, nam vaɗ buu u ndaɗu, ɓalakaɗ kiyo. 3Hurum min Dina goŋ Yakobpa cocoo. Nam ɓakaɗ u della jivira a heɓeɗ huruɗta. 4Sekem di bum Hamor ana, «Ɗumun goo ndaɗta.»
5Yakob hum ana asi ɓalakam goromba Dina ha ki wa, ni hu li ma goryom suu njufiina ha ki bagi a taa yoorina tura, Yakob seŋ tam di va kaɗi ta ta juɓ hoŋ masira ay vora. 6Hamor bu Sekem mbay eg Yakob a njaɗam dla ndaɗta. 7Hu li ma goryoŋ Yakobma mba vona, hum boy namma na ni hurusi ɓeŋ ki cocoo, kay Sekem li ni dla cora duk suu Israelna, u buu ma nam buu u goŋ Yakobpa, ni ka dlara li ginɗira. 8Hamor dasi ana, «Goonna, Sekem, hurum min gorogira cocoo, agi ɦamba a cara na tage. 9Taɓagi u amiya, agi hin ɦami goryogi may, ami ɦagi mamisina may. 10Agi lakagi tani egemiya, ndaŋgara hin mbuɗ ni magira, agi hin laki paa magira kaɗu, hin fagi tlena hu lay.»
11Sekem di bu Dina u gorseɗna ana, «Langi jivi na lige? Tlesuu agi joɓonsinana halaŋ an hin ɦagisina. 12Joɓongi begena ŋgol coco u tlesuu gorina lay an hin ɦagisina, va ma ŋgolna ni ɦangi goora a cara doy hol.» 13Goryoŋ Yakobma hoŋ dira maŋ Sekem u bum Hamor ni u mbeleŋŋa, kay Sekem ɓalakasi wayasira Dina kiyo. 14Asi dasi ana, «Ami ka ndak a ɦal wayamira maŋ sa ma ɗiwim bay cawraɗi, ni co kamiya. 15Ami a tok hurumi ki dew a taɓ u agira ni agi mbuɗ ki ko ami na tuwa, suu magi suu njufiina halaŋ caw ɗiwisi kiyo. 16Ni ami hin ɦagi goryomiya, ami hin ɗumugi magisina may. Ami lak u agiya, aygi mbuɗ ni suu dewna. 17Lini agi ka humumi vunumi a caw ɗiwigi kiɗi ni, ami hin vi goromira jok umiya.» 18Boy masina jivi ii Hamor u goromma Sekem cocoo. 19Goozoŋŋa Sekem vi yam ka a li dla ndaɗtaɗi kay nam min goŋ Yakobpa cocoo, suu vo vi bumma ŋgaam cocoo.
20Hamor u goromma, Sekem, tuɗ hu vun grekŋa vi ɦoŋzina hu li ma paɗ bolla, di suu hu ɦoŋzinana ana, 21«Suu asina hurusi ka egeygi coɗi lini asi lak hu mbas maygira li paa masira, ndaŋgara ŋgol coco a ndakasi lay. Ay hin ɗumusi goryosiya, asi hin ɗumuygi maygisina may. 22Suu asina a taɓ ki u aygi a suu dewna ni ana aygi caw ɗiwigi ki ko asi na may. 23Yoori masina u bege masira halaŋŋi hin mbuɗ ni maygiɗi su? Laygi u dlara asi daɗta kay a asi lak u aygiya.» 24Suu mbay vun grek ma ɦoŋzinna halaŋ hum boy ma Hamor u goromma, Sekem, damma hummi, suu njufiina halaŋ caw ɗiwisi kiyo.
25Hu buu ma hindi ma ɗiwisi tasi cocona, ni goryoŋ Yakobma mba', Simeon u Levi, gorseŋ Dinana, yow ŋgewi masisina kosi tuɗ ci suu njufii suu hu ɦoŋzinana ki halaŋ. 26Asi ci Hamor u goromma, Sekem, ki lay. Asi gi Dina ay ki hu ziŋ Sekemma tuɗ ki vo u ndaɗu. 27Goryoŋ Yakob suu hiŋŋa calaɗ kay suu miɗina ɦurum tlesuu hu ɦoŋzinana ki halaŋ halaŋ, kay asi ɓalakasi wayasira kiyo. 28Asi yowosi yoori masisina, mbutlina u korra, u yoori suu hu ɦoŋzinana, u suu ay ki ŋgoona halaŋ. 29Asi yowosi bege masira halaŋ, gorkemba u boyogina halaŋ u tlesuu hu zinana halaŋ.
30Yakob digi Simeon u Levi ana, «Agi mbaaran ay kanni dla cora fok suu hu mbassa tanna, suu Kanaanna u suu Perizna. An u suu manna ka bolowɗi may ni asi hin tok tasi ay kan can ki u suu mansina halaŋ.» 31Simeon u Levi hoŋom dira ana, «Ami hin sana mbuɗumi wayamira ki ko gawlaŋga na su?»
Айни замон обунашуда:
URA TIN AYRA 34: BMS
Лаҳзаҳои махсус
Паҳн кунед
Нусха
Want to have your highlights saved across all your devices? Sign up or sign in
Bible Moussey © Bible Society of Chad, 2002.