Mwanduso 3
3
Wanhu woleka kumtegeleza Mndewa Mulungu
1Lelo zoka dikala vwizi kufosa wanyama wose wa kumbago wowalumbigwe na Mndewa Mulungu. Zoka dimuuza imuke, “Vino Mulungu kawalongela kuwa sekemuje tunda da mbiki wowose muna umgunda?”
2Muke ija kamwidika, “Chodaha kuja tunda da mbiki wowose muna umgunda, 3mbali Mulungu kachilongela sekechije matunda ya mbiki uli haludonho hebu kuudalisa. One chahatenda ivo chizadanganika.”
4Zoka dimwidika muke iyo, “Siyo kweli, hamwizadanganika.” 5Mana Mulungu kavimanya kuwa muhaja matunda yayo meso yenu yezagubuligwa na mwizakuwa fana yeye na mwizamanya yanogile na yehile.
6Kawona uja mbiki wounogeza ng'hani na matunda yake yodaha kudika, na kagesa unoga ng'hani uhadahile kuwa na ubala, ivo kaha tunda na kaja. Maabaho kamwing'ha mulumake, nayo iviya kaja. 7Bahobaho viwakomeleze kuja, meso yawo yagubuligwa na wavimanya kuwa waukengele, ivo wasola mayani wayawala.
8Ichigulogulo mbeho viziholile, mulume na muke wake wamuhulika Mndewa Mulungu kogenda muna umgunda, ivo waifisa hagati ya mibiki muladi sekeyawawone. 9Mbali Mndewa Mulungu kamtanga mulume na kamuuza, “Kwa kulihi?”
10Nayo kamwidika, “Nikuhulika muna umgunda, nidumba kwaviya naukengele. Ivo niifisa.”
11Mndewa Mulungu kamuuza, “Yelihi yoyakulongele weye kwa ukengele? Vino weye kuja tunda da mbiki unikulongele sekeuje?”
12Mulume kamwidika, “Mwanamke youmwikile hano na niye, youning'hile, iyo yaning'hile tunda da mbiki uwo. Na niye nidija.”
13Mndewa Mulungu kamuuza mwanamke, “Weye kutenda choni?”
Mwanamke kamwidika, “Zoka dinivwizila, na niye nija ditunda.”
Mulungu kowatagusa
14Mndewa Mulungu kadilongela dizoka,
“Kwaviya kuyatenda yano,
weye kuduwiligwa kufosa wanyama wose.
Kwizatambala na kwizakuja timbwisi siku zose za ugima wako.
15Nizatenda weye wiihile na muke ija,
ulelo wake wiihile na ulelo wako.
Yeye kezakuhonda ditwi jako,
Na weye kwizamuluma chisiginho chake.”
16Na kamulongela mwanamke,
“Nizakongezela usungu vondauwe na wimo na usungu vondawiibasule.
Kwizakuwa na hamu ya kumtawala mulumako,
nayo kezakutawala.”
17Na kamulongela imulume,
“Kumtegeleza muke wako
na kuja tunda dinikulongele sekeuje.
Kwa chiya chiutendile, isi iduwiligwa.
Kwizatenda sang'hano ndala
siku zose za ugima wako
muladi kupata ndiya ifaya.
18Isi izakwima miwa na mbigili,
na weye kwizakuja mimeya ya isi.
19Kwizatenda sang'hano ndala za kulava vuke kuitenda isi ilave ndiya,
mbaka vondaubwele muna ulongo moulawile.
Weye ni ulongo,
na kwizabwela kuwa ulongo kaidi.”
20Mulume kamtanga muke wake Hawa, kwaviya niiyo mama wa wanhu wose weli na ugima. 21Mndewa Mulungu kawatendela viwalo va mbende za wanyama Adamu na muke wake, na kawayawaza.
Adamu na Hawa wowingigwa muna umgunda
22Maabaho Mndewa Mulungu kalonga, “Lelo munhu iyo kawa fana imwe wetu, kayamanya yanogile na yehile. Mbali yolondeka kumgomesa kuja diya ditunda da mbiki wa ugima, mana yahadija kezakala siku zose.” 23Ivo Mndewa Mulungu kamuwinga Adamu muna umgunda wa Edeni na kamtendeza yalime muna ulongo uyalawile. 24Kamuwinga Adamu, na keka wasenga wakalizi wa kuulanga ubanzi wa ulawilo wa zuwa wa mgunda wa Edeni, wakala na panga da moto dodikalile dohinduka kuno na kuno muladi waukalize umbiki wa ugima.
Айни замон обунашуда:
Mwanduso 3: Ching'hwele
Лаҳзаҳои махсус
Паҳн кунед
Нусха
Want to have your highlights saved across all your devices? Sign up or sign in
NT © 2014 Pioneer Bible Translators and The Word for the World
OT © 2019 Pioneer Bible Translators