John 21
21
Iesu yaku usi dina vene 7 rofu ogau niyo
1Mina usi Iesu dudusa ini usi dina vene rofu Tiberias moka daidai tora adinari ogau niyo. Mina bi yomakai vata niyo: 2Minari bi Simon Peter, Thomas (ini roka ka bi Kakafasina#21.2 Kakafasina: Greek agori bi Didymus.), Nathanael (Cana Galilee amiye), Zebedee di mida ma ini usi dina vene remanu. 3Simon Peter yaku niyo, “Na bi kimai regida.”#Lk 5.5
Niyadi, “Una ka yasa baegifa.” Ye bosi#21.3 Bura bedakai ka evade nufa. bouti keu riyadi, idu mina urusari bi yokoi moina de reyadi. 4Uriyaku gorogoro Iesu moka daidai tora seriri are reyo, idu ini usi dina vene bi de vei mama reyadi. 5Mina dada nikaiteyo, “Nai mida mida, oyena be moiyadi ba ide?”
Nikabai resi niyadi, “Ide.”
6Ma niyo, “Reke moisi bouti di vana rama rofu younesi be moigedi.” Ye reke younegasa bi rutu rei baena anua reyadi, adina bi oyena tau gade moiyadi.#Lk 5.6
7Mina dada usi dina amiye kaere Iesu uka maro bi Peter rofu niyo, “Mina bi Varika amiye!” Ye Simon Peter bi faisara dada, Varika amiye mini neidesi ini bou varuka ini gagabari misi bi moka daidai torari sokau reyo. 8Idu usi dina vene bedakai reke oyena tau gade vata baeyo, mina moi rutu resi bouti keu riyadi, adina kono atafu maike de, 90 metre#21.8 90 metre: Greek agori bi 200 cubit. kana. 9Ye rou rigasa bi minari ita guruma oyena fafau ma beredi be veyadi. 10Ma Iesu yaku niyo, “Oyena be na mafa ruika moiyadi mini.”
11Mina dada Simon Peter bouti keu risi reke oyena tora vata baeyo mina konori moi rutu reyo; ini naba bi 153. Bi tau gade, idu reke uvesi de reyo. 12Iesu yaku niyo, “Baesi iri-iri refo.” Ini usi dina vene ka ini nikaitena “Ya bi kaere?” bi mokena de reyadi, adina diba niyadi be Varika amiye mini. 13Ye boi nesi beredi moisi maro ma oyena ka makai reyo.
14Mina bi uru regode Iesu ini usi dina vene rofu ogau niyo ini muyena gutuna rae rena fufutari.
Iesu ma Peter
15Iruku iriyadi koina niyori, Iesu yaku Simon Peter nikaiteyo, “Simon, John#21.15 John; bura bedakai Jonah nufa. di ubama, ya besa na rofu uka maisa mina vene kana ba ide?”
Ma nikabai reyo, “Yo, Varika amiye, ya ya diba ya ura reida.”
Ma Iesu niyo, “Nai mamoe mida mida vana re.” 16Dudusa uru remanu ina rofu niyo, “Simon, John di ubama, na rofu uka maisa ba ide?”
Ma niyo, “Yo, Varika amiye, ya ya diba ya ura reida.”
Ma niyo, “Nai mamoe dogo re.” 17Ma uru regode ere niyo, “Simon, John#21.17 John; bura bedakai Jonah nufa. di ubama, na ura reisa ba ide?”
Kamini Peter bi iriyeduka reyo, adina bi uru regode nikaiteyo, “Na ura reisa ba ide?” Ye nikabai reyo, “Varika amiye e, ya bi beika baika tau gade ya diba; ya ya diba ya ura reida!”
Ma niyo, “Nai mamoe mida mida vana re. 18Rama iniye ya nida, ya goduari bi ya kaya farasi resi goidu digi ura regamo bi digamo. Idu ugava nigasa vana roto rigiya, ma amiye be ya farasi resi bi goidu digi ura de regiyari, bi ya afei digedi.” 19(Mina nigamo bi Peter ini gokai muyesi Sei di roka moi odoro rigo oteimagi.) Mina nisi ka niyo, “Na usi bae!”
Iesu ma ini usi dina vene be
20Peter kero resi usi dina amiye kaere Iesu yaku uka magamo, bi usi diyo mina veyo—mina bi amiye kaere Iesu fafau kokobari etebe rigasa iruku irisi nikaiteyo, “Varika amiye, kaere yaku ya siri rego?”#Jn 13.25 21Ye Peter yaku mina vegasa bi Iesu nikaiteyo, “Varika amiye e, yomina amiye bi gokai?”
22Kamini nikabai reyo, “Vegu amebigo mamo na baegida mina ura regida vonisi, bi ya rofu bi gokai? Na usi bae!”
23Ye usika ourena vene fogori sina yokoi vai resi niyadi mina usi dina amiye bi de muyego; idu Iesu bi diya muyego ina rofu de niyo, idu, “Vegu ameibobigo bogo na baegida mamo mina ura regida vonisi, bi ya rofu bi gokai?”
24Mina bi usi dina amiye kaere mina beika baika rofu niokusi mina bura reyaka. Ma una una diba ini niokuna ago bi rama.
Ago metona
25Ye Iesu yaku ka beika baika tau reyo. Ma yokoi yokoi bura reyagaduri, bi nai mokenari kono tora noibanu bi mina bura rena buka moi gira de reyagadu.
Айни замон обунашуда:
John 21: kqc
Лаҳзаҳои махсус
Паҳн кунед
Нусха
Want to have your highlights saved across all your devices? Sign up or sign in
© 2016, Wycliffe Bible Translators, Inc. All rights reserved.