John 15
15
Iesu bi waini meko di yabo rama
1“Na bi waini meko di yabo rama ma nai Baba bi muro amiye. 2Ina yaku nai teteka neinei meko de moina bi moi tae rido; ma teteka neinei meko moina bi koroto redo, besa meko varego dada. 3Ya bi sena moi ruaka riyo, ago ya rofu niyaka dada. 4Nai ideri amefa, yi ideri ameida kana. Ye kai rena teteka waini meko di yabo ideri de amedo vonisi, bi inaike meko varegi anua rego, ma ya makai nai ideri de amededi vonisi, ya bi vegu buni de regedi.
5“Na bi waini meko di yabo ma ya bi ini teteka. Kaere nai ideri amego ma ini ideri ameida, bi meko tau varego, na gaima rofu beika yokoi regi anua regedi. 6Yokoi yaku nai ideri de amego vonisi, bi teteka you makugo ma abiye nigo kana; ye teteka moi egogo resi itari you negedi ma vaigedi. 7Na ideri amegedi ma nai ago yi ideri amego vonisi, ya ura rededi kana usa usa nifa,#15.7 nifa; bura bedakai nigedi nufa. ye ya rofu rego. 8Ya vene meko tau moiyadi, ye nai usi dina vene niyadi vo niyo; mina makai nai Baba di roka moi odoro rigo. 9Nai Baba uka na maro kana, ye uka ya maraka. Nai uka manari amefa. 10Nai ago gira neidegedi vonisi, nai uka manari amegedi, nai Baba di ago gira neideyaka ma ini uka manari ameida kana.
11“Na mina ya rofu niyaka ye nai ada yasa feregida ma ya ada ya muyegedi. 12Nai ago gira bi mini: ya kaya ya kaya uka mafa, ya uka maraka kana.#Jn 13.34; 15.17; 1 Jn 3.23; 2 Jn 5 13Amiye yokoi di uka mana tora iniye bi mini: ini asiyaka rofu ini vegu eyaredo. 14Ya beika ago gira nida mina neidegedi vonisi, bi nai asiyaka. 15Na dudusa moimai rei tavoi rededi vene ya roka de nigida, adina moimai rei tavoi redo amiye bi beika ini varika amiye redo toto. Idu nai asiyaka bi ya roka niyaka, adina beika tau gade nai Baba rofu neideyaka, mina ya rofu nioteimaraka. 16Ya na auba de reyadi, idu na yaku ya auba resi abidi reyaka, ye disi meko varegedi, ma yi meko bi toga amebigo. Makai beika baika nai roka dudu nai Baba rofu usa nigedi, bi ya mago. 17Mina ago gira ya maida bi mini: ye ya kaya ya kaya uka magedi.
Kono tora noibanu di vene di gubuyo rena
18“Kono tora noibanu di vene ya gubuyo rededi vonisi, ye vei mama refa, bi na rofu siko gubuyo resi mina usi ya ka gubuyo reyadi. 19Ya bi kono tora noibanu di vene vonisi, ini vene ya uka magedi iniye di kana; idu ya bi mina kono tora noibanu di vene de dada, ya kono tora noibanu gutuna ya raka niyaka. Mina dada kono tora noibanu di vene ya rofu gubuyo rededi. 20Mina sina ya rofu niyaka mokefa: ‘Moimai rei tavoi redo amiye ini varika amiye ebu de redo.’ Na esika esika maradi kana, ka ya esika esika magedi. Nai ago neideyadi vonisi, ka bi yi ago neidegedi.#Mt 10.24; Lk 6.40; Jn 13.16 21Idu nai roka dada mina tau vakoi ya fafau regedi, ye kaere na nifeideyo amiye toto dada. 22Na de baesi ina vene rofu niyaka vonisi, bi vegu no nufa de, idu gua ini vegu no rofu ago yokoi nigi anua regedi. 23Kaere na rofu gubuyo redo, ka nai Baba rofu gubuyo redo. 24Mina reremama amiye yokoi yaku de regamo, bi ini fogori de reyaka vonisi, bi vegu no nufa de; idu gua mina vesi na ma nai Baba una remanu rofu gubuyo reyadi. 25Idu ago gira di sina bura reyo bi kamini moi rama aeyaine: ‘Ina vene na rofu gubuyo reyadi, vegu no yokoi de dada.’#Ps 35.19; 69.4
26“Idu aedena amiye, ago rama di Vima, degori, kaere nai Baba gutuna nifeidegida, bi na niogau rego. 27Ma ya ka na niogau regedi, adina ini adinari gutuna nasa amegamadi.
Айни замон обунашуда:
John 15: kqc
Лаҳзаҳои махсус
Паҳн кунед
Нусха
Want to have your highlights saved across all your devices? Sign up or sign in
© 2016, Wycliffe Bible Translators, Inc. All rights reserved.