METIU 5
5
Zang gamto tam ralikapyii
1Meimoi tei ngou wosii, mpounii zang gam tatpi takle, sateichii mpounii hum bam sek-kii, mpou boumeinii mpouda gong takle; 2sateichii mpounii mwi n-gapatsii ahnyiigo tam ralipyii tutakle:
Kasang ka nta
(Luk 6.20-23)
3“Rangii kasuimei sadoi bile,
kadapokii sating gam sazyii tei ahnyii mahle!
4“Lung kamagesii kaleimei tei sadoi bile;
kadapokii ahnyiigo tii-nta pyii tangle!
5“Lungkamanoi meitei sadoi bile;
kadapokii sazyii pouryii ai ahnyiinii towtangle!
6“Kasang kamajyii jangpii mazyii saryiisii kaleimei sadoi bile;
kadapokii ahnyiigo tiitokryii pyiitangle!
7“Meigo lungset katimei sadoi bile,
kadapokii ahnyiinii lungset kati tei doutangle!
8“Lung kamateimei tei sadoi bile,
kadapokii ahnyiinii Saraago ngoutangle!
9“Tiikamajungmei tei sadoi bile,
kadapokii ahnyiigo Saraa nah mei lat tangle!
10“Kasang kamajyii jangpii kaset kalak dousii kaleimei tei sadoi bile,
kadapokii sating gam sazyii tei ahnyii mahle!
11“Gonyiinii gutai kaswimei katii jangpii kalet kalou katii, sateichii kaset kalak pyiisii kalei sateichii gonyii phyiiryiikii kashyii kashyiipii tamkai kapyii tinglang kak gonyii sadoi bile. 12Ntalo ninado rangalo, kadapokii gonyii jangpii alangh kadi tei sating gamkii kaibam takle, kada- pokii gonyii doito kalei Lungkakaling meihang go aitiisii tiimaset tiimalakle.
Thai ninado kava
(Mrk 9.50; Luk 14.34-35)
13“Gonyii sazyii pouryii mah thai teile; nlenii thai teinii ahmah kumkabi tei maga aitakleponii, kada takumpii kum matuloi wotangpo? Ainii rat toisii meinii pipii kapiidiit teisupii samah kado kabi tei gatakle.
14“Gonyii sazyii pouryii mah kavale. Zang gamto kalei namdi hangniniigo kabaipei wolakle. 15Sateichii meikado thaomi maseisii razyii kangkii kailei makle; nlenii thaomi kadung gamkii kaisii kilungto kalei hang go tii mvapyii leile. 16Teitakumpii gonyiimah tha kabi tei meihangnii ngou wosii sating gamto kalei gonyii pfiigo tam matoi matutang karam jangpii gonyii mah kava tei meihang doito vamatulo.
Ajaitingshang mah kaang kito rali kapyii
17“Ajaitingshang ninado Lungka- kalingmei mah rali kapyii hangtei Inii tiimagalesii gongziilesii maning sulo; Inii tiimagalesii gong makle, nlenii tiimatwi tang karam jangpii gongle. 18Kadapokii Inii gonyii dakii kasangpii tam leile, sating ninado sazyii gatu kasuta, ajaitingshang ki- teito samah kado, mak-kii tow kabam geksa kacheng hangniniido, mahlyii- hang gong matwi kasuta, galakle. 19Teipiinii mei kata kangkanii ka- khatsam aihang ki aito ahang mangto kacheng chengsang hangniniigo tii- paksii meigo teitakumpii ralikapyii ahgotei sating gam sazyii kito ahgo hang mangto kacheng chengsang lat tangle; nlenii kata kangkanii katam swisii tam ralipyii leponii ahgo sating gam sazyii kito kadi lat tangle. 20Kadapokii Inii gonyii dakii ka- sangpii tam leile, gonyiimah kasang kamajyii teinii Ajaitingshang kati ojamei ninado Farasismei hang doito kisuleponii, gonyiinii sating gam sazyiiki liitsang liitpei wolakle.
Rakarhii mah kaang kito rali kapyii
21“Nangnii ‘meigo gilakle, satei- chii mei kata hangninanii meigo gileponii, samtak tiitanglesii’ ndou kareidou tam kabam tei gonyiinii shiitakle. 22Nlenii Inii gonyii dakii tamleile, mei kata kangkanii mpou sanapiigo rarhii leponii, samtak tiitangle, sateichii kata kangkanii sanapiigo kalet kalou katiisam tam leponii, samtak katiibamki pangkhii tangle, sateichii kata kangkanii ‘ka- pang kamangpii nang sii’ tamleponii, sadoi kashyii mibamki liit tangle. 23Teijangpii nang kakhatbam kikii gomah pyiitoi tang karam pot poigong kalei kito gosanapiinii go phyiiryiikii mah kata kara mazhii kasu hangninii kaleitei maning gong woleponii, 24pyiitoi tang karam pot tei kakhatbam doiteikii kaibamsanii, maasii gosanapiigo kakubi reiwolo, sateichii teito gongsii gomah pyiitoi tang karam pot tei pyiilo.
25“N-go siiset pungsii kalei ah teinii n-go kaswisii pwidi tat kalei ki kak-kii kalangsii tiimatei ailo; teisuleponii sampatsii kalei ah teinii n-go samtak katiipii dakii pyiitoi aitangle; sateichii samtak katiipii teinii n-go dargamei dakii pyii aisii kabang kikii maliit aitangle. 26Inii n-go kasangpii tam leile, nangnii pyiitang karam kalui paisa katang tei pyii kasuta teibam kiteito nangnii patsang patlakle.
Mashung maha katu mah kaang kito ralikapyii
27“Nangnii ‘mashung maha lakle’ sii tam kabam ai gonyiinii shii takle, 28nlenii Inii gonyii dakii tamleile, sapwimei hangniniigo pumzai mah kamaning kamarei kito jukalei hang teinii ahmah lung kiteito mpoupeigo mashung maha aitakle. 29Sateichii gomah mik ajiilam pang teinii n-go kem kikii chyiikaisii leileponii, mik tei lat-mpatsii toi ailo, kadapokii go pumpot hang mibamki liit matu katu sungnii go pumpot mah njai hangninii maga kalei teinii gojangpii bibwile. 30Sateichii gobah ajiilam pang teinii n-go kem kikii chyiikaisii leileponii, tat-ndangsii rat toi ailo; gopum pot hang mibamki liit tang karam sungnii go pumpot mah njai hangninii maga kalei teinii gojangpii bibwile.
Nou-naa n-nou katu mah kaang kito ralikapyii
(Met 19.9; Mrk 10.11-12; Luk 16.18)
31“Aitiisiido tambamle, ‘Sapfiimei kata hangninanii mpou nougo n-nou aitangle leponii, mpounii n-nou katu mah larek hangninii mpoupei dakii pyii matulo’. 32Nlenii Inii gonyii dakii tam leile, matei kasu tha jang- pii supiinii sapwimeigo n-nou kalei hangteinii mpoupeigo mashung maha matu aitakle, sateichii mei kata kangkanii n-nou kalei sapwi mpei gotei manou woleponii, mashung maha aitakle.
Rashii rasat mah kaang kito ralikapyii
33“Nlailoisii ndou kareimei dakii tam kabam tei gonyiinii shiitakle, teiteinii, ‘nangnii kasang supii chui- sii rasat sulo, nlenii nangnii rasat kabam tei Bangpii dakii tiimashang pyiilo.’ 34Nlenii Inii gonyii dakii tam- leile, Rasatsang rasat sulo, sating zei latsiido rasat sulo, sating ainii Saraa mah Sagongbamle; 35mak-kii sazyii zei latsiido rasat sulo, kadapokii sazyii ainii Mpoumah pi kakunile; mak-kii Jerosalem zei latsiido rasat sulo, kadapokii Jerosalem ainii Sagong kadi mah namdile. 36Go phyii jum siido rasat sulo, Kadapokii nangnii tham pak-kado tiimaha mak-kii tiimatekpei wolakle. 37Nlenii gomah sam tei nle leponii, nle sii tamlo, makle leponii maklesii tamlo, sateichii aidoito kakihang teinii sara kashyii datole.”
Kum kafii mah kaang kito ralikapyii
(Luk 6.29-30)
38“Mik hangninii tung mik hangninii, ghii hangninii tung ghii hangninii sii tam kabam tei gonyiinii shiitakle. 39Nlenii Inii gonyii dakii tamleile, gonyiigo tiikama meigo kum-fii sulo, mei kata hangninanii gonyiigo beeng ajiilam kaphyii leponii, beeng abilam pang teido ahgo kaphyii matulo. 40Sateichii gomah peijou tei ahgo pyii matunyiisii sam- tak katiipii doi n-go pangkhii leponii, gomah kabapei teido ahgo pyii ailo. 41Sateichii mei kata hangninanii n-go ahmah pot kilomiter hangninii pungtatlo katupii dwisii rat leponii, kilometer hangna pungtatlo. 42Godato kakhangmei gotei pyiilo, sateichii godato siipok kanyiimei hang gotei mazhii kasu tiisulo.
Ngoukaroumeigo lungkasyii
(Luk 6.27-28, 32-36)
43“Goki ‘tiinaniipameigo lungsyiilo sateichii gomah ngoukarou meigo n-ranglo,’ sii tam kabam tei gonyiinii shiitakle. 44Nlenii Inii gonyii dakii tamleile, gonyiinii sating gamto kalei gonyii Pfiimah nahmei tei tiitang karam jangpii ngoukaroumeigo lung- syiilo, sateichii gonyiigo tiimaset tiimalaksii kaleimei jangpiinii riita pyiilo, 45kadapokii mpounii kashyii- mei ninado kabimei phyiiryiikii mpou mah leimik tei vamatule; sateichii kasang kamajyiimei ninado kasang kamajyii tiikasumei phyiiryiikii sating ryiikai pyiile. 46kadapokii gonyiinii gonyiigo lungkasyiimeigo roinii lungsyii leponii, gonyiimah alangh kadapei leipo? Kem katii aha-kahamei hangniido teiteinii tiilei makde? 47Sateichii gonyiinii gonyii kangsanameigo roinii karou kariit leponii, kakimei doito gonyiinii kadapei kisii tiipo? Jehudimei kasu lui kakimeiniido teitei tiilei makpo? 48Teijangpiinii gonyii mah sating gam-pfii teinii bikamatui takumpii gonyiido bimatui tang karamle.
Айни замон обунашуда:
METIU 5: NAG2
Лаҳзаҳои махсус
Паҳн кунед
Нусха
Want to have your highlights saved across all your devices? Sign up or sign in
Maram Naga, KARANU KABI SAMTAM © Bible Society of India, 2007.