Popular Bible Verses from Lukas 14

Паҳн кунед

Tuwe ekta mahi, qa atkuku, hunku, tawicu, cinca, sunkaku, tawinoḣtin kin, hena, qa iye ni kin heeś koya śicekida śni ehantanhan, waonspewicawakiye cin wanji ee kta okitpani ce.

Qa tuwe kaśta cansusbeca kin kicin, qa miyahna u śni ehantanhan, waonspewicawakiye cin wanji ce kta okitpani ce.

Tuwe kaśta ihduwankantu kinhan, hee yuhukun iyayeyapi kta ce; qa tuwe ihduhukuye cinhan, hee yuwankantuya ayapi ece e kta.

Iho, he iyecen niyepi kin tuwe taku yuhe cin owasin tpagan śni ehantanhan, waonspewicawakiye cin wanji ee kta okitpani ce.

Niyepi kin wanji conkaśke yakagapi kta kecannipi ehantanhan, ito tokaheya idotankapi, qa yahduśtanpi kte cin iyena yatonpi hecinhan, he iyahdukcanpi śni he. Hecanonpi śni kinhan, okinni oahehde kin he wanna eyahnakapi, qa yahduśtanpi kte cin oyakitpanipi kinhan, tona wanyakapi kinhan owasin iniḣapi, qa heyapi kta; Wicaśta kin de taku kage kta, tuka hduśtan kta okihi śni ce.

Tuka wotapi wan yakage cinhan, waḣpanicapi, qa huha ksawahanpi, qa huśtepi, qa iśtagongapi kin, hena wicakico wo; Kinhan niyawaśtepi kta ce; hena nicicajujupi kta okitpanipi nakaeś, owotanpidan kinipi kte cin ekta nicicajujupi kta ce, eya.

Miniskuya he waśte; tuka miniskuya woskuye kin en un śni ehantanhan, taku ecin on skuya kagapi kta he. Maga qa watuśekśeca paha kin unmana on waśte śni; tuka tankan eḣpeyapi ece. Tuwe noge winaḣon yukan hecinhan, naḣon kta ce.