Jowulu - 2022 WBT (NT) Non Drama

Jowulu - 2022 WBT (NT) Drama

Jibi bɛɛ, Yesu wuru konaŋ ki kali-la Kirinfusinaŋ ki ra, ntiŋ i Kirinŋ wɔ Wulujii ki bi-ri kí tɛ. Kirinŋ tɛ sarakawɔrɔtɔnŋ kiri ŋununtiŋ kiri fa sariya kalimɔɔ kiri niŋ fa Yawutu cɛɛnni kiri i ta ntiŋ kila niŋ mani nu. Kí i ntiŋ nanɔri : « Miŋ i bi wɔ̀ri ma-a, nkɛnŋ niŋ ma ki faan ki wɔri miŋ tɛ? Miŋ niŋ sotinbi ki kila-a nkɛnŋ gbɛ? »
Ntiŋ tu kí tɛ : « Míŋ yɛri ki a ábɛɛ ranɔri bi tenŋ sun. Á ǹʼbi ńʼtɛ : Nkɛnŋ Wutɔnŋ Yuhana cin-ni, tu ntiŋ na wu ki tan, Kirinŋ daa, konaŋ ni? »
Niŋ na, kí i ǹʼbi arìmaŋ tɛ tu : « A yibɛɛ ǹʼbi tu Kirinŋ i, wú a yibɛɛ ranɔri tu nfɛnŋ na yibɛɛ bili ntiŋ na kì. A yi dumiŋ na ǹʼbi tu konaŋ ni, konaŋ kiri ra yibɛɛ jɛri kwɔ ra, sabu koŋ bataa ǹʼtɔ-i tu Yuhana wuru Kirinŋ wɔ cintɔnŋ i. » Niŋ ki ra, kí i ǹʼbi Yesu tɛ tu arìbɛɛ Yuhana cintɔnŋ ki tɔ kì.
Yesu tu kí tɛ niŋ na : « A ábɛɛ ji niŋ tɔ kì, míŋ yɛrima ki a ńʼwɔ sotinbi ki wɔrɔtɔnŋ ki bi ábɛɛ tɛ kì. »


Niŋ kɔɔtɛ, Yesu i wulusuntalinŋ ka bi konaŋ ki tɛ. Ntiŋ tu :
« Ka wuru koŋ bɛɛ ɛ, ntiŋ i ɛrɛnsɛnŋ ji bo, ntiŋ i baara matɔnŋ ni shi bo ji ki ru bunsanŋ na, ntiŋ i tiri kɛniŋ tɔri ru. Ntiŋ i ta cin niŋ mani nu. Ɛrɛnsɛnŋ ki na-i ji kilɛn-a waarinŋ wɔ̀ ru, jitiŋ ki i awɔ joŋ ki bɛɛ bo ta ɛrɛnsɛnŋ ji ki baara matɔnŋ kiri tɛ, tu niŋ ta awɔ lu ki mwu. Nka baara matɔnŋ kiri i niŋ pa, kí i niŋ bwɔ, kí i niŋ gbɛwɔ bo ta jitiŋ ki tɛ. Jitiŋ ki i joŋ tɔri bo ta ɛrɛnsɛnŋ ji ki baara matɔnŋ kiri tɛ sɛbɛ. Kí i niŋ yɛri ki pa, kí i wú ki, kí i wú bwɔ, kí i kila kí i wú gbɛwɔ ki bo ta a ŋununtiŋ ki tɛ. Jitiŋ ki i joŋ byantɔnŋ bo ta baara matɔnŋ kiri tɛ. Kí i niŋ pa, kí i wú bwɔ, fɔ kí i ta ri bo wú ra, kí i wú kalikali tiri a ŋununtiŋ ki tɛ.
Niŋ ma-i, jitiŋ ki i sɔɔ, ntiŋ i a miiri, ntiŋ tu : ‹ Míŋ a nfɛnŋ ma dɔɔ sa! Míŋ danshuru wɔ̀ bidi-i míŋ tɛ, míŋ a niŋ cin ta kí tɛ dɔɔ. Kí kɔniŋ na niŋ gbɛ wo! ›
Nka ɛrɛnsɛnŋ ji ki baara matɔnŋ kiri ɲaniŋ ta-i bili jitiŋ ki danshuru ki sun waarinŋ wɔ̀ ru, kí i ǹʼbi arìmaŋ tɛ : ‹ Mìŋ ka i kanishitɔnŋ ki i, á na, yi wú kilɛn, nwɔma kani ki i ji yi wɔ. › Kí i jitiŋ ki danshuru ki pa po san ɛrɛnsɛnŋ ji ki ru, kí i ta ǹʼwu kɛlinsun, kí i ǹʼkilɛn. »
Yesu tu konaŋ ki tɛ : « Ábɛɛ cirasun tu jitiŋ ki a na nfɛnŋ ma ka baara matɔnŋ kari wu sa? Ntiŋ a ta niŋ baara matɔnŋ kiri bataa kilɛn, ntiŋ i ǹʼtɔri ri bo kí ta ru awɔ ji ki ru. »
Konaŋ kiri niŋ nama-i waarinŋ wɔ̀ ru, kí tu : « Kirinŋ fa na niŋ bishi ki wu kì. »
Nka Yesu i kí shɛɛli arì ɲaanfɛ, ntiŋ i ǹʼbi kí tɛ tu : « Kirinŋ wɔ wulu ki ru, ǹʼsɛbɛ-i mani wɔ̀ ru tu :
‹ Fu tantɔnŋ kiri arì kaan-a kwɔ wɔ̀ tɛ,
ninki ji-i fu ki nɔnkɔnŋ sun kwɔ shɔɔrinŋ ki i.
Ninwɔ̀ baraka gbɛ-i kwɔ kiri bataa wu. ›
Ábɛɛ gbɛ, niŋ wulu ki kɔri ki ǹʼdanwɔ? A koŋ woo koŋ fɛɛn niŋ kwɔ ki sun, ntiŋ wɔ kiri ra yali yali. A niŋ kwɔ ki fɛɛn nwɔ̀tiŋ sun, ŋì a ntiŋ bɔrɔkɔ. »
Yesu niŋ wulu ki bi-i ninkunŋ waarinŋ wɔ̀ ru, sariya kalimɔɔ kiri fa Kirinŋ tɛ sarakawɔrɔtɔnŋ kiri ŋununtiŋ kiri wuru ǹʼtɛ arì i ntiŋ pa mìŋ manaanŋ ki ru, sabu kí ǹʼtɔ wuru tu ntiŋ wɔ wulusuntalinŋ ki wuru bili-la arìbɛɛ bi sun. Nka kí i kɛni konaŋ ki jɛŋ.


Niŋ waaci ki ru, kí wuru Yesu pɛrɛkɛ de-a mani ki bataa ru. Niŋ ki ra, kí i bonfɛtiiri cin ntiŋ tɛ, tu nini ta arì yɛri ji miŋ tu koŋ fɔɔmaan ni, kí i nanɔri kiri kwulu ntiŋ na, nwɔma kí i ntiŋ pa ŋuŋ kila a yɛri ki dariwulu wu, nwɔ̀ a so ta-i ntiŋ wu kɛnintiŋ ki ɲaanfɛ, niŋ i ntiŋ de Ɔrɔmu faan ki gbɛfɛ.
Kí i Yesu ranɔri : « Kalimɔɔ, yibɛɛ ǹʼtɔ-i tu, ábɛɛ konaŋ kiri kali-la sɛli ki ra, ábɛɛ koŋ san-a koŋ nu kì, Kirinŋ saa ki kakan-i ŋì i tiri ɲaan wɔ̀ tɛ, ábɛɛ i niŋ ɲaan ki ji-a konaŋ kiri wu a sɛli fɔ ki sun. Á yi bo saa sun. Yibɛɛ kakan yi ɲinisa ki sali wɔri Ɔrɔmu masa Sensaari tɛ daa, walima yi kakan yi i ǹʼsali kì? »
Nka Yesu i kí ciiru daalinŋ ki tɔ. Niŋ na, ntiŋ i ǹʼbi tu : « Á warifɔ peeraŋ tenŋ wɔri kaŋ, ŋí ǹʼshɛɛli. » Kí i niŋ wɔri ntiŋ tɛ. Ntiŋ tu kí tɛ : « Nkɛnŋ miniŋ fa ntiŋ gbɛ ta wari peeraŋ ka sun kaa? »
Kí tu : « Ɔrɔmu masa sinaŋ ki Sensaari yɛ. »
Niŋ na Yesu tu kí tɛ : « Á niŋ ji-i, á Sensaari wɔ ki wɔri Sensaari tɛ, á i Kirinŋ wɔ ki wɔri Kirinŋ tɛ. »
Kí so Yesu pa-i a tɔnŋ na wulu sun konaŋ ki ɲaanna kì. Ntiŋ wulu ki rupwuluka shɔ-i ɲaan wɔ̀ tɛ, niŋ i bo kí bataa tɔnŋ sun, fɔ ŋì i bɛni bo kí sun.


Sadusiyɛnŋ kiri wuru kpeeri i, nwɔ̀ri bili-li konkwuu kiri ŋmɛnibi ki ra kì. Nini bɛɛ ri i arì kpari Yesu tɛ, kí i ntiŋ nanɔri : « Kalimɔɔ, Kirinŋ wɔ cintɔnŋ Musa ǹʼsɛbɛ tu-i sariya sɛbɛ ki ru yibɛɛ tɛ tu : ‹ A shuru mari cɛn, ntiŋ i beeni daŋ kilabali awɔ mari ki ra, tu ntiŋ pwaŋ ki kakan niŋ i mari ki shi, nwɔma ciniŋ i kila a wɔrinŋ ki ra. › Niŋ ɲaan ki tɛ, danshuru jɔnpɔni wuru koŋ bɛɛ gbɛ. Kí wɔrinŋ cɛɛnni ki i mari bɛɛ cɛn. Nka niŋ i beeni niŋ fa mari ki daŋ kila kì. Nwɔ̀ gban-i wɔrinŋ ki ra, niŋ i mari ki kila, niŋ daŋ kila ǹʼgbɛ kì. Danshuru byantɔnŋ ki i mìŋ mari tenŋ ki kila, niŋ i ji mìŋ ɲaan tenŋ ki tɛ, fwurututu, danshuru jɔnpɔni kari bataa i na mari tenŋ ka shi de, kí i na beeni niŋ ɲaan ki tɛ, ǹʼtɔri tenŋ daŋ kila mari ki gbɛ kì. Niŋ bataa kɔɔtɛ, mari ki yɛrima ki i na beeni. Niŋ ɲaan ki tɛ, konkwuu kiri ra na ŋmɛni jibi wɔ̀, mari ka a ji ǹʼdanwɔ tenŋ wɔ sa? Sabu, kí fɔn bataa ǹʼkila de-i arɔɔ mari i. »
Yesu tu kí tɛ : « Ka juniɲa ka ru, mari ri i cɛn wɔri-ra shuru ri tɛ. Nka Kirinŋ koŋ wɔ̀ri ji-i koŋ telimaan-ni i, ŋì i ji-a na niŋ kiri ŋmɛni, ŋì i ɲaanfɛfili ki wɔri nini tɛ arì beenimaan ki kɔɔtɛ juniɲa na wɔ ki ru, nini arìmaŋ cɛn-a kì. Kí fani beeni-a kili kì, sabu kí i ji-a miŋ tu mɛlɛkɛn ni. Kí i ji Kirinŋ wɔ daŋ ni i, sabu Kirinŋ kí po san-i beŋ ki ru, ŋì i kí de awɔ ɲaninkulutɔnbi ki ru.
Ŋì i bi tu konkwuu kiri ra ŋmɛni, sɔsɔɔlinŋ niŋ nu kì. Jirinŋ doaŋ tuunɛninɛntiŋ ki wulu bi-i mani wɔ̀ ru, Kirinŋ wɔ cin tɔnŋ Musa yɛri ki ǹʼji-i, ntiŋ i ǹʼfɔɔ-ɔ, tu koŋ beenimaan kiri ra ŋmɛni, waarinŋ wɔ̀ ru ntiŋ Ŋuntiŋ ki dɔri-i tu : ‹  Aburahamu wɔ Kirinŋ, Ishaka wɔ Kirinŋ, niŋ fa Yakuba wɔ Kirinŋ. › Niŋ wulu ki i ǹʼbi-a tu nini bataa ɲaninkulutɔnŋ ni Kirinŋ gbɛ, sabu Kirinŋ konkwuu ri wɔ Kirinŋ i kì, ɲaninkulutɔnŋ ni wɔ yɛ. »
Sariya kalimɔɔ kiri bɛɛ ri tu Yesu tɛ : « Kalimɔɔ, ábɛɛ wulu ki rupwuluka shɔ-i. » Niŋ kɔɔtɛ, kí jɛɛn kí i Yesu ranɔri bi tɔri bi sun kili kì.


Yesu tu kí tɛ : « Nfɛnŋ na, konaŋ kiri i ǹʼbi-ri tu Kirinŋ Ɲaannakonshimaan ki Dawuda nupo o? Sabu Dawuda yɛri ki ǹʼbi-i Kirinŋ tɛ shu kiri sɛbɛ kiri ru tu :
‹ Ŋuntiŋ Kirinŋ ki ǹʼbi-i míŋ Ŋuntiŋ ki tɛ tu :
“Na sɔɔ míŋ pantɛ,
fɔ míŋ na miŋ ɲa kiri bataa
pa de nʼkanŋ fɛ waarinŋ wɔ̀ ru.” ›
Niŋ i ǹʼbi-a tu Dawuda yɛri ki Kirinŋ Ɲaannakonshimaan ki dɔri tu a Ŋuntiŋ. Niŋ ɲaan ki tɛ, ŋì a so ji-i Dawuda nupo o dɔɔkunŋ? »


Yesu i ǹʼbi awɔ kalindaŋ kiri tɛ konaŋ ki bataa ɲaanna tu : « Á á yɛri kɔrɔshi sariya kalimɔɔ kiri ra. Juulinŋ sinaŋ bo ki di-i kí tɛ. Ǹʼdi-i kí tɛ, konaŋ ki i kí tɔtinbi coolinŋ tan-ni furuba maŋ kiri ru. A kí de Yawutu kiri wɔ kalinfu kiri ru, kí i tɔtiŋ sɔɔmaŋ kiri ceeli-la jɛŋ ki ru. A kí ta nuŋ numaŋ nu, tɔtiŋ sɔɔmaŋ kiri bi i di kí tɛ niŋ mani nu sɛbɛ. Kíbɛɛ kiri i kanimari kiri gbɛfɛfinŋ kiri bataa mwu san-a kí wu. Niŋ fa, a kí bo Kirinŋ nafɛ ki ra, kí i cin-a niŋ na, nwɔma konaŋ kiri i arì ja. Kíbɔɔ kiti a na juu kusɛbɛ. »

Listen to Luki 20