If you have would like a copy of this version please contact info@davarpartners.org

Bareli Pauri New Testament, CC-BY-SA-4.0, Friends Missionary Prayer Band (Text), Bareli Pauri New Testament Audio Bible, CC-BY-SA-4.0, Davar Partners International, Bridge Connectivity Solutions, 2022 (Audio).

Bareli Pauri New Testament

Bareli Pauri New Testament (TLF)

Bareli Pauri (बारेली पावरी) Bible by The Love Fellowship is licensed under Creative Commons Attribution-ShareAlike 4.0 License.

इनी वातोन ओवतेन यहुदिन एक तीहीवार होयु, एने येसु यरुशलेममा गोयू. यरुशलेममा एक गाडरान फाटकोन साते एक कुंडो छे जो इब्री भाषामा बेथसदा कोवायतेलो; तेरा पाच भागे छे. आमु इनामा घोणा सोवटा मांदला, आंदवा, लेंगळा एने सुकला डीलवावा (पाणी हालनेन आसमा) पोड रोयता होता. काहाकि टेम-टेम पोर परमेश्वरोन दूत कुंडामा उतरीन पाणी काजे हालव्या कोरता होता पाणी हालताच जो कुदु पेहेले उतरतेलु चू वारू होय जातु होतु एने तेरी काहानली बी बिमारी काहा नि होय. चा सारीक एक माणूस होतु, जू तीस ने आठ सालोन बिमारीमा पोळलु होतु. येसु तीना काजे पोळलु देखीन एने यो जानीन कि चू घोणा दाहळान इना हालमा पोळलु होतु, तीनाक पुछु, “काय तू वारू होयने होय रोयु?” चू बिमार माणूस तीना काजे जोवाब आप्यू, “हे प्रभू, मार साते कुदू माणूस नि होय कि जेतार पाणी हालवायतोलो, ती मेसेक कुंडामा उतारे; बाकीन मारा पुगता-पुगता दीसरू मारे गोथू पेहेले उतरी जातलू छे.” येसु तीना काजे कोयू, “उठ, आपनो खाटलो चूट, एने चाल फिर.” चू माणूस तेत्यारूत वारू होय गोयू, एने आपनो खाटलो हुचलीन चालने फिरने बाज गोयू. यु शब्बाथोन दाहळू होतु. चू हाप्तान पेहलू दाहळू होतु इनान कोरता यहुदि तीनाक जू वारू होयलु होतु, कोये बाज गोया, “आज ते शब्बाथोन दाहळू छे, तुसेक खाटलो हुचलने वारू नि होय.” चू तीनु काजे जोवाब आप्यू, “यु मेसेक वारू कोरलु छे, चू मेसेक कोयू, आपनो खाटलो हुचोल, एने चाल फिर”. चे तिना काजे पुछ्या, “चू कून माणूस छे चू तुसेक कोयू, खाटलो हुचल, एने चाल फिर?” बाकीन चू वारु होय गोयू चू नि जानतू होतु कि चू कून छे, काहाकि तिना जागा पोर गोरदी रोयनेसी येसु चा गोथु छेटू होय गोयलु होतु. इनी वातोन ओवतेन चू येसु काजे मंदीरमा मेव्यू येसु तिना काजे कोयू, “देख, तू वारू होय गोयलु छे एने पाप झुन कोरतू, ओसो नी होये कि इनासी काहनली भारी तोकलीत तार पोर आव पोळे.” चू माणूस जायीन यहुदि काजे जायीन कोय देदु कि यु मेसेक वारू कोरलु छे यु येसु छे. इनान वोजेसी यहुदि येसु काजे तोकलीत देणे बाज गोया, काहाकि चू ओसला काम शब्बाथोन दाहळे कोरतू होतु. इनापोरसी येसु तीनु काजे कोयू, “मारू बास हिमी तोक काम कोरणे बाज रोयू, एने मे बी काम कोरणे बाज रोयू.” इनापोरसी यहुदि ओवी बी जादा तीनाक मार नाखनेन कोशिश कोरणे बाज गोया, काहाकि चू शब्बाथोन दाहळान नियम काजे ओतरु नि तुडतेलु, बाकीन परमेश्वर काजे आपनु बास कोयीन आपना खुदो काजे परमेश्वर बोराबोर कोयतु होतु.

इनापोरसी येसु तीना काजे कोयु, “मे तुमु काजे छाचलीन-छाचलीन कोयो, पुऱ्यु तुमु काजे काय नी कोर सोकतोलू, नीस्तु चू यो बासो काजे कोरतेलू देखतलु छे; काहाकि जीना कामो काजे चू कोरतेलु तिना काजे पुऱ्यु बी तीना रितीसी कोरतेलु छे.” काहाकि बास पुऱ्या पोर मोंग कोरतेलु छे एने जो-जो काम चू आपसुत कोरतेलु छे, चू तीनाक आखोत देखाळतलू छे; एने चू इना गोथो बी मोटो काम तीनाक देखाळसे, काहाकि तुमु नोवलायी कोरे. जोसू बास मोरला काजे उठाडतेलु एने जीवाळतलु छे, तोसुच पुऱ्यु बी जे गोवतेला तीनुक जीवाळतलु छे. बास कुदान नियाव नि कोरतेलू, बाकीन नियाव कोरनेन आखो काम पुऱ्या काजे आप देदलु छे, कि आखा माणसे जोसो बासोन मान राखतला छे तोसोच पुऱ्यान बी मान राखू. जू पुऱ्यान मान नि कोरे, चू बासोन जू तीनाक मुकललु छे, मान नि राखतलु. मे तुमु काजे छाचलीन-छाचलीन कोयो, यु मारू बुल सोमवीन मारा मुकलने वावा पोर भुरसू कोरतेलू छे, ओमोर जीवन तेरोत छे; एने तिना पोर दोंडोन आग्या नि होयतेली बाकीन चू मोरनेमा गोथू पार होयीन जीवनमा भोराय गोयलु छे. मे तुमु काजे छाचलीन-छाचलीन कोयो ची टेम आव रोयी, एने हिमी छे, जीनामा मोरला परमेश्वरोन पुऱ्यान बुल सोमोवसे, एने जे सोमोवसे चे जीवसे. काहाकि जिना रितीसी बास आपना खुदोमा जीवन राखतलू छे, तीना रितीसी चू पुऱ्या काजे बी यु होक आपलु छे कि आपना खुदोमा जीवन राखे; बाकीन तीना काजे नियाव कोरनेन बी होक आपलु छे, इनान कोरता बी चू माणसोन पुऱ्यु छे. इनामा नोवलायी मा कोरु; काहाकि ची टेम आवे कि जोतरा मोळवाट्यामा छे चे तेरो बुल सोमवीन निकवी आवसे. जे वारलो कोरला छे चे पोछा जीव उठनेन कोरता जीव उठसे एने जे बुराई कोरला छे चे दोंडो भोगणे कोरता पोछा उठसे.

मे खुद काहीन नि कोर सोकतलु जोसो सोमवतलु छे, तोसु नियाव कोरतेलु छे; एने मारू नियाव खोरलू छे, काहाकि मे मारी मोर्जी नि बाकीन मेसेक मुकलने वावान मोर्जी चाहतलु छे. ओगर मे आपसुत मारी गोवायी आपो, ती मारी गोवायी खोरली नि होय. एक ओवी छे जू मारी गोवायी आपतलु छे, एने मे उवखतलु छे मारी जी गोवायी चू आपलु छे, चीत खोरली छे. तुमु योहान काजे पुछाड्या एने चू खोरलायीन गोवायी आपलु छे. बाकीन मे आपना बारामा माणसोन गोवायी नि जुवती; ते बी मे जे वाते इनान कोरता कोयो कि तुमु छुटकारू जोळे. होयु धोपतलू एने चोमोकने वावू दिवू होतु, एने तुमुक काहीन टेमे तोक तेरा विजावामा मगन होय जानो वारू लाग्यो. बाकीन मार जुवू जी गोवायी छे ची योहानोन गोवायी गोथी मोटी छे; काहाकि जो काम बास मेसेक पुरो कोरने आपलो छे, मतलब योत काम जो मी कोरतेलु छे, चे मारा गोवाह छे कि बास मेसेक मुकललु छे, चू मारी गोवायी आपलु छे. एने बास जू मेसेक मुकललु छे, चू मारी गोवायी आपलु छे, तुमु नि कोबी तेरा वचन सोमव्या, एने नि तेरो रूप देख्या छे;. एने तेरा वचन काजे मोनोमा मजबूत नि राखतला, काहाकि जीनाक चू मूकल्यु तेरो तुमु भुरसू नि कोरतेला. तुमु पवित्र शास्त्रामा हेरतेला छे, काहाकि सोमोजतेला कि तीनामा ओमोर जीवन तुमुक जातला छे; एने यो चोत छे जो मारी गोवायी आपतलु छे;. ते बी तुमु जीवन लेनेन कोरता मारेनचा आवने नि हिंडतला. मेसेक माणसोजू गोथू मान नि जुवतू. बाकीन मी तुमुक जानतलु छे कि तुमरेमा परमेश्वरोन मोंग नि होय. मी आपना बासोन नावोसी आवलु छे, एने तुमु मेसे काजे स्वीकार नि कोरतेला; ओगर दिसरू कुदू मारा नावोसी आवे ती तीनाक स्वीकार कोर लेसू. तुमु जो एक दिसरासी मान जुवे ती एने चो आदर जो एक मात्र परमेश्वर जू गोथो छे, नि जुवतलो, कहानला रितीसी भुरसू कोर सोकतला छे? जो झुनी सोमोजता कि मे बासो सामने तुमरे पोर गुणू लागाळीस; तुमरे पोर गुणू लागाळने वावू मुसा छे, जीना पोर तुमु भुरसू मेकला छे. काहाकि कोबी तुमु मुसान भुरसू कोरता, ती मारू बी भुरसू कोरता, इनान कोरता कि चू मारा बारामा लिखलू छे. बाकीन कोदि तुमु तेरा लिखला वातो पोर भुरसू नि कोरता, ती मारी वातो पोर कोसा भुरसू कोरता?

Listen to योहान 5