1ႎါည်းဒီး အန်းစံဝ်စီႎီးဒါ်ႈဘိုး “အံဝ်းနံင်ဒါ်ႈ အီးမိုႈအီးမှာန်အန်း၊ တူအီးကလံက် ကဲအီးဂေါ်ည်းပါ့်နီး ဂါကဲညျံမ်ယေဲဝ်း ကီုင်းစံဝ်ဖြား ဒါးဖုင်းတာန်ခိုးအန်း ပေန်ဒေဲႈ၊ ကဲနံင်အာဝ်ယာ်မ်းမ။”

ဘည်ဘာည်း စံဝ်ယေဆုခလာည်း အရာင်တိုးအန်း

မတဲ ၁၇း၁-၁၃၊ လုကာ ၉း၂၈-၃၆

2ႎါည်းဘိူန်တာ် တောဆငည်း စံဝ်ယေဆု စီတေဲႇလိူည် ပေတရု၊ ရာကိုပ်၊ ယောဟာန်ကဲအိုည်းချှေႈ၊ ကဲစီဟိုက်ဟာဝ်းလာ် ပါ့်နောဇား။ ဇိုယာမ်းဇေဲန်း အရာင်တိုးအန်းစံဝ်မာ် ဟည်ခလာည်းဒေဲႈ လအာည်ႇကဲ။ 3အီးမိုႈတဆီးချှေဲပ်အန်းစံဝ်မာ် ဟည်ဟိူဝ်လီုည်းဆငါးပေါႇခည်း၊ တေဲင်းကီုင်းကတာည်းနီး တူအီးကဲအီးရေဲန်းလေဲႈ ချှေႈမှေဲ့မာ် အာဝ်ဘယ်မလေဲႈ ရေဲန်းနှာင်းကံပ်လီုည်းဘာည်းဇေဲန်း။ 4အေးလိယကာည်းမောဆေ စီယာ်ည်ႇကဘ္လူႈဒေဲႈ ပါ့်လအာည်ႇကဲ စီဂီကအုပ်ကမိုန်လာ် တောႇစံဝ်ယေဆု။ 5ဘိူန်ဇေဲန်း ပေတရုစီဒါ်ႈ တာ့်စံဝ်ယေဆု “အိူည် ဆြာ၊ ပါ့်နီး အန်းမှေဲမ်ဂေါ်ည်းပေါႇ အခည်းကော်။ ယေးနံင်ရေဲန်းဒဲႈ ဆိုမ်း အိုည်းကဒူႇနာ်ႏ၊ စာမည်းစံဝ် အူကဒူႇ၊ စာမောဆေ အူကဒူႇ၊ စာအေးလိယဘိုး အူကဒူႇ။” 6ဂေါႇမိုႈ ကဲဟည်ကစာႈကဒိုန်းယာဝ်း ပေတရု စီအူနာ်ႇဘည်ဘာည်းနံင်ကလာင်း စီဟည်ပ္လေါ်တ်လေႈ ကျောႈအန်းဘာည်းဇေဲန်း။

7ႎါည်းဒီး အုင်အု စီလေႈဒေဲႈဖာ်ႈ လှီုက်အုင်အုဒီး စီဘ္လီုက်ဒါ်ႇတေဲင်းကဲ၊ စံဝ်ဖြား စီကျောႈလေႈ တီင်အုင်အုဒီး ဒါ်ႈ “ချှေႈနီး မိုႈပေါႇ ကော်န်းကမေဲႈအံဝ်းဟာ့်။ တညာဝ်းလာည်းဒို့ ကျောႈအန်းနာ်ႏ။”

8ဘိူဝ်တိူဝ်ႈကပါ်ႇကပါ်န် တပဲအန်းစံဝ်ကဲ၊ ယာမ်းဇေဲန်းပေါႇ ဘိူန်ဒစံဝ်ယေဆုအူချှေႈ ကဲဘူယေဲဝ်းမဆိ။

9ဇိုယာမ်း အန်းစံဝ်ကာည်းတပဲအန်းကဲ လည်လေႈဒေဲႈ ပါ့်နောဒီး၊ အန်းစံဝ်စီတာ်မ်းအူန်း ဒါ်ႈ “ပံင်ယေဲဝ်းပဲကဲနီး ဂါကော်န်းတူအီးနီး ညျံမ်ယာ်ည်ႇအီမ်းဒေဲႈ ဒယာ်မ်း၊ ပဲခူကလာင်းနှဲ တာ့်ဆိနာ်ႏ။”

10ကဲဘည်တညာဝ်းလာည်းအူန်း ကျောႈတာ်မ်းအူန်း အန်းစံဝ်မာ်၊ ကဲဂီလည်ကအုပ်ကမိုန်လာ် ပံင်ဆီင်ဒါ်ႈ လော်င်ႎီးယာ်ည်ႇအီမ်းဒေဲႈဒယာ်မ်းဒီး။ 11ဘိူန်ဇေဲန်း ကဲစီမှောႇအန်းစံဝ် ဒါ်ႈ “ဆီမ်ဘာည်း ဆြာကံတ်ကျာမ်းကဲ ဆံမ်ဒါ်ႈ အေးလိယ နံင်လိုႎီးဒေဲႈ လအာည်ႇမေဆိယ#၉:၁၁ စံဝ်ခရီတ်။”

12အန်းစံဝ် စီႎီးဒါ်ႈ “မိုႈအိူဝ်၊ အေးလိယ နံင်လိုႎီးဒေဲႈလအာည်ႇ အခည်း၊ မိုႈ စာနံင်အီုမ်ဘျာည်းရဲန်း တော်န်းမျိုးတော်န်းလှေ နှာင်းဘာည်းအီးပျီမ်းဟာ့်။ မိုႈလိူည် ဆီမ်ဘာည်း တီင်ဘေဲႇကျာမ်း ဆံမ်ကိက်ဒါ်ႈအူန်းလာ် ကော်န်းတူအီးနီး အန်းနံင်ကညားကီန်းဒည်းဂီုန်းခည်း အာဝ်ႎါ်န်း နံင်ကညားဘိုး အီးဆဲ့ပႎဲႈႎီုန်အန်း။ 13ဘည်ဘာည်းမာ် ပံင်ဆီင်ဒါ်ႈအံဝ်းမိုႈ အေးလိယဒီး#၉:၁၃စံဝ်ယေဆု ဆီင်ဒါ်ႈမိုႈ ဆြာဘပ်တိစမ်ယောဟာန်ဟာ့်။ ဟည်ဒေဲႈဟော်ည်ႇ။ ဘည်ဘာည်းကိက်ဒါ်ႈအူန်း လော်င်အန်း တီင်ခေဲင်းဘေဲႇကျာမ်း၊ တူအီးကဲမာ် ဟည်လီလာဘာည်းဒို့ တာ့်အန်း။”

စံဝ်ယေဆု ချူႈႎီုန်ကနာ်မ်းဇာဝ်း အီးဂေါ်ည်းခေဲင်းတိုးကော်န်းဒဲ့

မတဲ ၁၇း၁၄-၂၁၊ လုကာ ၉း၃၇-၄၃

14ႎါည်းဒီး ဘိူဝ်လေႈဒေဲႈစာ်မ်း စံဝ်ယေဆုကာည်း တပဲအန်းအိုည်းချှေႈ ပါ့်ဒီဂေါ်ည်း တပဲအန်းချှေႈဟည်းကဲဒီး၊ ကဲစီဒေဲႈယေဲဝ်းလာ် တူအီးကဲ အီးဂေါ်ည်းကပါ်ႇကပါ်န် ရီမ်းတပဲအန်းချှေႈဟည်းကဲဒီး ဂီုန်းခည်း၊ အီးမိုႈတပဲအန်းချှေႈဟည်းကဲ စီဂီလည်ကထဲင်းဒါ်ႈ တာ့်ဆြာကံတ်ကျာမ်းကဲ။ 15တူအီးကဲဒီးမာ် စံန်ကဲယေဲဝ်းစံဝ်ယေဆု ကဲစီအာမ်းပေါႇခည်း၊ စီတဘုဟာဝ်းဇူး ရံပ်အီုင်ရိုႈအန်းစံဝ်။ 16အန်းစံဝ်စီမှောႇလာ် တာ့်ကဲ “ပဲဂီလည်ကအုပ်ကမိုန် လည်ကထဲင်းလော်င်ဆီ။”

17ယာမ်းဇေဲန်း ခေဲင်းတူအီးကဲဒီးအူချှေႈ စီဒေဲႈဒါ်ႈ “အိူဝ် ဆြာ၊ အံဝ်းဟည်ယိုင်းဒေဲႈ ကော်န်းအံဝ်း ပါ့်မည်းစံဝ်၊ ချှေႈအီးဘူဆမားကျောႈ၊ ဂေါႇမိုႈကနာ်မ်းဇာဝ်းလေဲပ်တီင်အန်း။ 18ဆာ်ကနာ်မ်းဇာဝ်းဒီး လေဲပ်ဂေါ်ည်းတီင်အန်း ဘော်က်မှေဲ့မာ်၊ ကနာ်မ်းဇာဝ်းဒီး စီရေဲန်းဒဲႈ အန်းဂေႈအိ ပေါႇတေဲင်းကတာည်း။ ယာမ်းဇေဲန်း တီင်မိုည်ႇအန်းမာ် လေႈဒို့ဘူႈ အာဝ်ႎါ်န်း အန်းကဂီႇဘိုးဟြာင်းအန်း၊ ႎါည်းဒီး တိုးပိုင်းအန်းမာ် ဟည်ကဲန်က္လဲင်ဒဲင်ဟာဝ်းပေါႇ။ အံဝ်းဟည်မှာန်း တပဲမည်းစံဝ်ကဲ နှာင်းကဲချူႈလေႈႎီုန်ကနာ်မ်းဒီး၊ ဘည်ဘာည်းမာ် ကဲဒါ်ႈ အာဝ်ဘယ်မ ချူႈႎီုန်။”

19အန်းစံဝ် စီႎီးဒါ်ႈ “တူအီးစားပဲ အီးအာဝ်မေဲႈနောႈညျှေဲမ်ကဲနီး၊ ထန်မှေဲ အံဝ်းနံင်လိုဂေါ်ည်းလှာ်န်းဘိုး တောႇပဲ၊ ထန်မှေဲ အံဝ်းနံင်လိုအူန်း နောႈဒူးနောႈဒိုင်းဘိုး တာ့်ပဲ။ တေဲႇဒေဲႈဟံင်း ကော်န်းဒဲ့ဒီး ပါ့်အံဝ်း။” 20ကဲမာ် စီယိုင်းဒေဲႈလာ် ကော်န်းဒဲ့ဒီး ဒေဲႈဇူး ပါ့်အန်းစံဝ်။

ဘိူဝ်ယေဲဝ်း ကနာ်မ်းဒီး တာ့်အန်းစံဝ်၊ ကနာ်မ်းဒီး ဒဲႈ ကော်န်းဒဲ့ဒီး ကဘည်းယယူႈဒါင်းဒါင်း ပေါႇအူစာ်န်း၊ ကော်န်းဒဲ့ဒီးမာ် စီဂေႈအိဟာဝ်းပေါႇ တေဲင်းကတာည်း အိဂုင်ဂ္လီင်ဟိုက်ဂုင်ဂ္လီင်လေႈ၊ တီင်မိုည်ႇအန်းမာ် လေႈဒို့ဘူႈဟာ့်။ 21ဘိူန်ဇေဲန်း စံဝ်ယေဆုစီမှောႇ တာ့်ကူန်ကော်န်းဒဲ့ဒီး “အန်းဘာည်းညျေဲန်း ထံန်မှေဲဟည်လှော်န်း၊”

ကူန်ကော်န်းဒဲ့ဒီးမာ်ဒါ်ႈ “အန်းဘာည်းဒေဲႈ ဆီုင်ခည်ဒဲ့အန်း။ 22ကနာ်မ်းဇာဝ်းဒီး အန်းကည်ကည်ရေဲန်းဒဲႈ ကော်န်းဒဲ့နီးဇောႈ တီင်ငည်း၊ ဇောႈတီင်အေဲမ်း ဒဲႈနှာင်းအန်းယာ်မ်း။ ဘည်ဘာည်းမာ် ဆာ်မည်းစံဝ် အာ်ဘယ်ရေဲန်း၊ ကႎါ်ည်းယေး စီကဇော်ည်ဒဲႈဟံင်းနာ်ႏ။”

23စံဝ်ယေဆုစီႎီးဒါ်ႈ တာ့်ကူန်ကော်န်းဒဲ့ဒီး “ဆီမ်ဘာည်းမည်းဆံမ်ဒါ်ႈလာ် ‘ဆာ်မည်းစံဝ်အာ်ဘယ်ရေဲန်း။’ ချှေႈမှေဲ့မာ် ဆာ်မေဲႈနောႈညျှေဲမ် အာဝ်မေဲႈမ ပံင်ဘူဘယ်တာ့်ရေဲန်းဒဲႈ စာအန်း။”

24ကူန်ကော်န်းဒဲ့ဒီးမာ် စီအော်င်းရိုင်းဒါ်ႈ ပေါႇအူစာ်န်း “အံဝ်းညျှေဲမ်အိူဝ်။ ဘည်ဘာည်းမာ် လော်င်တင်းညျှေဲမ်အံဝ်းဆီုင်ဘျာ်ည်ႇအူန်း၊ မည်းစံဝ်စီကဇော်ည် ဒဲႈဟံင်းအံဝ်းနာ်ႏ။”

25ဘိူဝ်ယေဲဝ်း အန်းစံဝ် တာ့်တူအီးကဲတဘုဒေဲႈဇူး ပါ့်အန်း၊ အန်းစံဝ် စီဒဲႈကျောႈဆူည်ႇ တာ့်ကနာ်မ်းဇာဝ်းဒီး “ကနာ်မ်းအီးရေဲန်း ဒဲႈအီးချှိုက်ႏကအာဝ်းဘူဆမားကျောႈ၊ အံဝ်းဒဲႈကျောႈဆူည်ႇ တာ့်မည်း၊ မည်းလည်လေႈဒဲဝ်းပေါႇ ဒကော်န်းဒဲ့ဒီး၊ မည်ခူလေဲပ် ခူကံဝ်းဘိုးအန်း ခံဝ်ဘော်က်။” 26ဘိူန်ဇေဲန်း ကနာ်မ်းဇာဝ်းဒီးမာ် စီအောင်းဖာ်ႈ ဒဲႈလာ်ကော်န်းဒဲ့ဒီး ကဘည်းယယူႈဒါင်းဒါင်း၊ အန်းစီလည်လေႈဟာဝ်း။ ကော်န်းဒဲ့ဒီးမာ် ဟည်ဘာည်းပေါႇ တူအီးယာ်မ်းအူချှေႈ၊ ယာမ်းဇေဲန်း တူအီးကဲ စီဒါ်ႈ “ကော်န်းဒဲ့နီး ဟည်ယာ်မ်းဟော်ည်ႇ။” 27ဘည်ဘာည်းမာ် စံဝ်ယေဆု စီကမ်းတည်းကော်န်းဒဲ့ဒီး စီတီုတ်ႏယာ်ည်ႇလာ်အန်း။ ဘိူန်ဇေဲန်း ကော်န်းဒဲ့ဒီးမာ် ဟည်ယာ်ည်ႇဇံင်းပေါႇ။

28ဘိူဝ်လေဲပ်ဟာဝ်းဂေါ်ည်း စံဝ်ယေဆု ပါ့်ခလေဲပ်၊ တပဲအန်းကဲ စီဘျားမှောႇ တာ့်အန်း “ဂေါႇမိုႈဆီ ယေးအာဝ်ဘယ်ဟံင်း ချူႈႎီုန်ကနာ်မ်းဇာဝ်းဒီး။”

29အန်းစံဝ် စီႎီးဒါ်ႈ “ဘိူန်ဒတာ့်မှာန်းဆူး အူမျိုး အာဝ်မေဲႈမ အီုန်ဒါ်န်းမျိုးဟည်း နှာင်းကံပ်ဘယ် ချူႈလိူည်းႎီုန် ကနာ်မ်းစားဒီး။”

စံဝ်ယေဆု ႎီးကလာင်းဘိုး ဘည်ဘာည်းနံင်ယာ်မ်းအန်း

မတဲ ၁၇း၂၂-၂၃၊ လုကာ ၉း၄၃-၄၅

30ႎါည်းဒီး စံဝ်ယေဆုကာည်း တပဲအန်းကဲ စီလည်လေႈဟာဝ်း ဒအရာပ်ဒီး၊ စီခလောႈဟာဝ်းဘိုး အရာပ်ဂါလိလဲ။ အန်းစံဝ် စီအာဝ်ဆီင်ဒဲႈမ ဆိနာ်ႇ ပါ့်စာ်မ်းကဲ၊ 31ဘာည်းမှေဲဆံမ်ဒါ်ႈလာ်ဘာည်းဇေဲန်း ဂေါႇမိုႈအန်းစံဝ် ဂီပနံဝ်းဒဲႈ တာ့်တပဲအန်းကဲ၊ စီဒါ်ႈ “ကော်န်းတူအီးနီး နံင်ကတူႈကညားအီးအာပ်ဒဲႈ တံင်တည်းတူအီး။ ကဲနံင်ပယာ်မ်းႎီုန်အန်း၊ ဘည်ဘာည်းမာ် ဆာ်ဘိူန်းဒေဲႈအိုည်းဆငည်း အန်းနံင်ႎီးယာ်ည်ႇအီမ်းဒေဲႈဘိုး ဒယာ်မ်းဒီးဟာ့်။”

32တပဲအန်းကဲမာ် စီအာဝ်နာ်ႇ အာဝ်ကဘ္လူႈမ ပံင်ဆီင်ဒါ်ႈ ပံင်ပနံဝ်းအန်းစံဝ်။ ဘည်ဘာည်းမာ် ကဲစီ ဘူယမ ႎီးမှောႇဘိုး အန်းစံဝ်။

ချှေႈမှေဲ မိုႈ အီးဒါင်းဇားမှယ်ဒို့ ခူအီး

မတဲ ၁၈း၁-၅၊ လုကာ ၉း၄၆-၄၈

33ႎါည်းဒီး စံဝ်ယေဆုကာည်း တပဲအန်းကဲ စီဟာဝ်းစာ်မ်းဘိုး ပါ့်လှံင်းကပေရနော်င်။ ဇိုကဲဂီလေဲပ်ဂေါ်ည်းခေဲင်းခလေဲပ်၊ အန်းစံဝ် စီမှောႇ တာ့်တပဲအန်းကဲ ဒါ်ႈ “ဆီပဲဂီလည်ကအုပ်ကမိုန်ဒေဲႈ ပါ့်တောႇအီုန်ဒါ်န်း။” 34ဘိူန်ဇေဲန်း ကဲမာ် ဟည်ဂေါ်ည်းဘူကျောႈဘူကျဲန့်။ ဆီမ်ဘာည်းဆံမ်ဒါ်ႈလာ်ဘာည်းဇေဲန်း ဂေါႇမိုႈလီုင် ကဲဂီလည်ကအုပ်ကမိုန်ဒေဲႈ ပါ့်တောႇအီုန်ဒါ်န်း လော်င်ဒါ်ႈတာ် ချှေႈမှေဲ နံင်မိုႈအီးဒါင်းဇားမှယ်ဒို့ခူအီး။

35ဘိူန်ဇေဲန်း အန်းစံဝ် စီအံက်လာ်ဒါး တေဲႇလာ် တပဲအန်းအူကိူဝ်းလေႈအယ်ချှေႈဒီး စီဒါ်ႈလာ်တာ့်ကဲ “ချှေႈအီးဆီင်ဂေါ်ည်းဒီဇား အန်းလိုဂေါ်ည်းဆဲ ဒီဇေဲမ်း၊ စီလိုမိုႈ ချှေႈပံင်ဆူည်ႇအီး ပါ်ပည်မေဲႈဟာ့်။” 36ႎါည်းဒီး အန်းစံဝ်စီတေဲႇလာ် ကော်န်းဒဲ့အူချှေႈ ဒဲႈအန်းဂေါ်ည်းကဒည်ကဲ။ အန်းစံဝ် စီဇိုက်ဂျာ်ႇလာ် ကော်န်းဒဲ့ဒီး စီဒါ်ႈ 37“ချှေႈမှေဲ့ ဒါးဇီုဝ်အံဝ်း ဆာ်ရံပ်လာည်း ကော်န်းဒဲ့အူချှေႈ ဘာည်းခေဲင်းကော်န်းဒဲ့ကဲနီး၊ ချှေႈဒီး ဟည်ဘာည်း အန်းရံပ်လာည်း အီးမိုႈအံဝ်းဟာ့်။ ချှေႈအီးရံပ်လာည်းအံဝ်းဒီး အာဝ်ႎါ်န်းလိူည် အန်းရံပ်လာည်းအံဝ်း၊ အီးမိုႈစံဝ်ဖြား အီးဆူည်ႇအံဝ်းဒေဲႈမာ် အန်းဟည်ရံပ်လာည်းဟာ့်။”

တူအီး အန်းအီးဘူကခံတ် တာ့်အဲ မိုႈတူအီးအဲ

လုကာ ၉း၄၉-၅၀

38ဘိူန်ဇေဲန်း ယောဟာန်စီဒါ်ႈ တာ့်စံဝ်ယေဆု “အိူဝ် ဆြာ၊ ယေးယေဲဝ်းဒေဲႈ တူအီးအူချှေႈ ဂီဒါးဇီုဝ်မည်းစံဝ် ချူႈလေႈႎီုန် ကနာ်မ်းဇေဝ်ကဲ၊ မိုႈလိူည် အန်းအာဝ်မိုႈမ ချှေႈအီးတောႇခေဲင်းအဲ။ ဂေါႇမိုႈဘာည်းဇေဲန်း ယေးစီချဲအူန်းအန်း နှာင်းအန်းဘူရေဲန်း ဘာည်းဇေဲန်း။” 39စံဝ်ယေဆု စီႎီးဒါ်ႈလာ် “ခူချဲအန်း၊ ဆီမ်ဘာည်းဆံမ်ဒါ်ႈလာ်ဘာည်းဇေဲန်း ချှေႈအီးရေဲန်းတာန်ခိုးအီးမှေဲမ်အာမ်း ဒါးဇီုဝ်အံဝ်း လဒီးအူတည် အန်းနံင်ဘူဆဲ့ဘူနမအံဝ်း။ 40ချှေႈအီးဘူကခံတ်တာ့်အဲအခည်း အန်းဟည်မိုႈပေါႇ တူအီးညျှာအဲဟာ့်။ 41အံဝ်းနံင်ဒါ်ႈတာ့်ပဲ အီးမိုႈအီးမှာန်အန်း၊ ချှေႈမှေဲ့ ဆာ်ဒါ်ႈပဲမိုႈတပဲအံဝ်း စီဒေဲႈဒဲႈ ပဲစိုင်းအေဲမ်း အူကလော်က်ႏလိူည်းမာ် ချှေႈဒီး အန်းနံင်ဘိူန်းပေါႇ စာမ်အကျိုးဒီး အခည်းဟာ့်။”

စံဝ်ယေဆု ဒဲႈကျောႈချဲတ် တာ့်တပဲအန်း တော်န်းမျိုး

မတဲ ၁၈း၆-၉၊ လုကာ ၁၇း၁-၂

42အန်းစံဝ်စီဒါ်ႈဘိုး “တာ့်ချှေႈအီးညျှေဲမ်အံဝ်း ဘာည်းကော်န်းဒဲ့ကဲနီး ချှေႈမှေဲ့ဘူဒါ်ႈ ဆာ်ရေဲန်း ဒဲႈအန်း ကလူည်ႇကလေဲပ်ဟာဝ်းဒီး၊ တဆာ်တေဲႈမာဝ်းနှူည်းဒါင်း#၉:၄၂ပံင်ဒါးတာ် မက်၊ ကျတီုတ်ႏ မာဝ်းနှူည်းဒါင်း ဂီႇညှံဝ်း။ တီုက်တီင်ခမေဲင်းအန်း စေတ်ဟပ် ခေဲင်းအေဲမ်းပါင်လာည် စီနံင်ချဲမ်းအူန်း တာ့်အန်း။ 43ဆာ်တည်းမည်း ဒဲႈမည်းအာ်ကလူည်ႇကလေဲပ်၊ က္လံက်ႎီုန်တည်းဒီး။ ဒါးတည်းအယ်ကဒ ဇောႈလေဲပ်တီင်ငည်းရာည်းဒီး၊ တမည်း ဆာ်ဒါးလိူည်တည်းအူကဒ ဂေါ်ည်းအဆာက်အီမ်း စီနံင်ချဲမ်းအူန်း။ 44[ပါ့်ငည်းရာည်းဒီး ႎအီုင်ဘျဲတ်မာ် အာဝ်ယာ်မ်း၊ ငည်းမာ် အာဝ်ဆမားမယာ်ႇခံဝ်ဘော်က်။]#၉:၄၄ တီင်ဘေဲႇကျာမ်းအီးပျီမ်းမာင်ကလံက် အာဝ်တောႇမ ဘေဲႇထဲဝ်လှေနီး။ 45ဆာ်ဇာ်န်းမည်း ဒဲႈမည်းကလူည်ႇကလေဲပ်၊ က္လံက်ႎီုန်ဇာ်န်းဒီး။ ဒါးဇာ်န်းအယ်ကဒ ဇောႈလေဲပ်တီင်ငည်းရာည်းဒီး၊ တမည်း ဆာ်ဒါးလိူည်ဇာ်န်းအူကဒ ဂေါ်ည်းအဆာက်အီမ်း စီနံင်ချဲမ်းအူန်း။ 46[ပါ့်ငည်းရာည်းဒီး ႎအီုင်ဘျဲတ်မာ် အာဝ်ယာ်မ်း၊ ငည်းမာ် အာဝ်ဆမားမယာ်ႇခံဝ်ဘော်က်။]#၉:၄၆တီင်ဘေဲႇကျာမ်းအီးပျီမ်းမာင်ကလံက် အာဝ်တောႇမ ဘေဲႇထဲဝ်လှေနီး။ 47ဆာ်ပိုင်းငါည်းမည်း ဒဲႈမည်းကလူည်ႇကလေဲပ်၊ ခဲက်ႎီုန်ပိုင်းငါည်းမည်းဒီး။ ဒါးပိုင်းငါည်းအယ်ကဒ ဇောႈလေဲပ်ႈတီင်ငည်းရာည်းဒီး၊ တမည်း ဆာ်ဒါးလိူည်ပိုင်းငါည်းအူကဒ ဟိုက်ပါ့်ကီုင်းစံဝ်ဖြား စီနံင်ချဲမ်းအူန်း။ 48ပါ့်ငည်းရာည်းဒီး ႎအီုင်ဘျဲတ်မာ် အာဝ်ယာ်မ်း၊ ငည်းမာ် အာဝ်ဆမားမယာ်ႇခံဝ်ဘော်က်။

49ဂါဆီင်မိုႈတူအီးကဲ စီနံင်ဘာည်း တိုဆံတ်ပံင်လှူ ပံင်ဒါးတာ် ဆေဲႇကျည်း အီးတိုက်ဒါးငည်း နှာင်းဆငါးချှီႇ။#၉:၄၉တီင်ဘေဲႇကျာမ်းဂရိအခည်း ဒါ်ႈဘာည်းညျေဲန်း “ဂါဆီင်မိုႈတူအီးကဲ စီနံင်ကတူႈကညားဟပ်ဆေဲႇ ဒါးငည်း။” 50ဆေဲႇဒါ်ႈအီး အန်းပေန်ခည်းဒါး။ ဘည်ဘာည်းမာ် ဆာ်စဲမ်းအန်းအာ်ကမာ်ႈဟာဝ်း၊ ဘာည်းမှေဲ နံင်ႎီးဘိူန်းဘိုး စဲမ်းအန်း။

တီင်ပဲကဲဒီးမာ် နှာင်းပဲလည်မေဲႈ အီးစဲမ်းဘာည်းဆေဲႇဒီးနာ်၊ ပဲစီဂေါ်ည်း နှာင်းပဲလည်ကလံက် လည်ကရော်မ်းနောႈနာ်ႏ။”

Listen to မာကု 9