 Nuestros sitios Web:   https://awarnarebbi.net/es/   https://www.abridnarrif.net/es/  AwalnArebbi@gmail.com

Ṯamaziɣṯ n Arrif

وَامِي د يهْوَا عِيْسَى زݣ وذْرَار نِّي ذْفَارن-ث اَطَّاس ن ڒْغَاشِي. ئِقَارّب-د غَارس يِجّن ذَايس جْذَام، ئِسجّذ-اَس ينَّا-ٱس: "آ سِيذِي، شك مڒَا ثخْسذ ثْزمَّرذ اَذَايِي ثسِّيصْفِيذ."
ئِسرْس خَاس عِيْسَى فُوْس نّس يحَاذَا-ث ينَّا-ٱس: "وَاه نش خْسغ، شك قَا ثْݣنْفِيذ." صَافِي ذݣ ومْشَان يݣنْفَا ومهْڒُوْش نِّي زِي جْذَام نّس. ينَّا-ٱس عِيْسَى: "خْزَر، وَار تْخبَّر حَدّ." ينَّا-ٱس: "رُوْح غَار ڒفْقي سظْهَار-اَس يخف نّش. اݣّ صّذْقث نِّي إِي زِي يوصَّا مُوْسَى حمَا اَغَارْسن ثِيڒِي شْهَاذث خ مِين يوقْعن."

وَامِي يُوْذف عِيْسَى غَار وبِيلَاج ن كَفرْنَاحُوْم، يُوْسَا-د غَارس يجّن ن وعَسْكَارِي ذ اَمقّْرَان ن اَرُّوْمَانُوْس. ئِطَالب-يث ينَّا-ٱس: "آ سِيذِي، أَقَا غَارِي اَخدَّام ينُو ذ اَنشْرُوْف ذِي ثدَّارْث يتْنزْبَر اَطَّاس ذِي ثَاسُّوْث."
ينَّا-ٱس عِيْسَى: "أَذ رَاحغ اَث سْݣنْفِيغ."
ئِنْدق-د وعَسْكَارِي نِّي اَمقّْرَان ينَّا-ٱس: "لَّا آ سِيذِي، نش وَار سْذِيهِيدْجغ شَا اَذ تَاذْفذ غَار ثدَّارْث ينُو. إِنِي غِير يجّن ن وَاوَاڒ أُو صَافِي اَتَاف اَذ يݣنْفَا وخدَّام ينُو. ؤُڒَا ذ نش س يِيخف ينُو غَارِي يِنِّي خَافِي يحكّْمن. غَارِي ڒْعَسْكَار خ وفُوْس ينُو حكّْمغ خَاسن. أَذ ينِيغ إِ يِجّن: رُوْح، أَذ يرَاح. أَذ ينِيغ إِ يِجّن: أَرَاح-د، أَذ د يَاس. أَذ ينِيغ إِ وخدَّام ينُو: اݣّ ثَا، أَت يݣّ."
وَامِي يسْڒَا عِيْسَى إِ مَانَاينِّي يتْعجّب اَطَّاس. ينَّا-ٱسن إِ يِنِّي ث يذْفَارن: "أَقَا تسْڒَام ڒْحَقّ: يِنِّي يدْجَان زِي أَيث-إِسْرَائِيل وَار ذَايْسن ؤُفِيغ بُو لْإِيمَان يمْغَر اَطَّاس اَم وَانِيتَا! أَقَا قَّارغ-اَوم: أَذ د اَسن اَطَّاس ن يِوْذَان زِي شَّرْق ذ ڒْغَرْب اَذ قِّيمن اَك بْرَاهِيم ذ إِسْحَاق ذ يَعْقُوْب غَار مِيسَّا ذِي ڒْمُلْك وجنَّا. وَلَكِن يِنِّي تُوْغَا يتْخصَّا اَذ وَرْثن ڒْمُلْك ن أَربِّـي، أَتَاف اَذ منْضَارن غَار بَارَّا ذِي ثَادْجسْت مَانِي غَا يڒِين يمطَّاون ذ وغࢲَّاࢲ ن ثغْمَاس."
ينَّا-ٱس عِيْسَى إِ وعَسْكَارِي نِّي: "رُوْح! أَغَارش يِيڒِي اَنشْت مِين ثُوْمْنذ." ڒخْدّنِّي يݣنْفَا وخدَّام نِّي.

وَامِي يُوْذف عِيْسَى غَار ثدَّارْث ن بُطْرُس، يُوْفَا ثَذݣّْوَاڒْث ن بُطْرُس ذِي ثَاسُّوْث ذَايس ثِمسِّي. غِير يحَاذَا-ت س وفُوْس ثْرُوْح خَاس ثْمسِّي، ثكَّر ثبْذَا تْسخَّار خَاس.
وَامِي ثغْڒِي ثْفُوْشْت غَار ثْمدِّيث، ؤُوِين-د غَار عِيْسَى اَطَّاس ن يِنِّي ذِي دْجَان جْنُوْن. س لْأَمَر نّس يسُوْفُوْغ زَّايْسن جْنُوْن يسْݣنْفَا مَارَّا يِنِّي يهڒْشن. مَانَاينِّي حمَا اَذ يكمّڒ وَاوَاڒ إِي ينَّا سِيذِي أَربِّـي إِ نَّبي إِشَعْيَا ذݣ يِجّن ن زْمَان: "ئِيْسِي خَانغ ڒحْرِيقَاث نّغ، يَرْبُو ڒهْڒَاشَاث نّغ."

وَامِي يࢲْرَا عِيْسَى اَطَّاس ن يِوْذَان إِي ذَاس د ينّْضن، يكَّر يُوْمَر يمحْضَارن نّس ينَّا-ٱسن: يَالَّاه أَ نࢲْوَام غَار وجمَّاض-ين.
ئِقَارّب-د غَارس يجّن ن ومْسڒْمَاذ ن شَّرِيعَا ينَّا-ٱس: "آ لْمُعَلِّيم، نش اَش ذْفَارغ مَانِي مَا ثْرُوْحذ."
ينَّا-ٱس عِيْسَى: "ؤُشَّانن غَارْسن يفْرَان نْسن، ئِجْضَاض غَارْسن ڒَعْوَاش نْسن، وَلَكِن مِّيس ن بْنَاذم وَار غَارس ؤُڒَا ذ مَانِي غَا يسُوْمّث اَزدْجِيف نّس."
عَاوذ ينَّا-ٱس يج ومحْضَار نّس: "آ سِيذِي، سَمح-اَيِي ذ اَمزْوَارُو اَذ رَاحغ اَذ نضْڒغ بَابَا."
ينَّا-ٱس عِيْسَى: "ذْفَار-اَيِي-د." ينَّا-ٱس: "يِنِّي يمُّوْثن اجّ-يثن اَذ نضْڒن يمْتِّينن نْسن."

ئِنْيَا عِيْسَى ذِي ثْغَرَّابُوْت، ذْفَارن-ث يمحْضَارن نّس. بْڒَا ڒخْبَر، ثكَّر-د يجّن ن لْعَاصِفَا ثجْهذ اَطَّاس ذِي ڒبْحَر ثبْذَا ثْغَرَّابُوْت تْعمَّر س وَامَان. عِيْسَى نتَّا تُوْغَاث يطّص. قَارّْبن غَارس يمحْضَارن، سْفَاقن-ث نَّان-اَس: "آ سِيذِي، نْجَّا-يَانغ اَقَا نشِّين نتْمتَّا!"
ينَّا-ٱسن عِيْسَى: "مَايمِّي تݣّْوْذم قَاع اَمُّو؟ لْإِيمَان نْوم ذ ؤُقْلِيل." ڒخْدّنِّي يكَّر يسْبدّ اَرِّيح ذ ڒمْوَاج، يَرْسَا ڒْحَاڒ. قِّيمن يرْيَازن نِّي تْعجّْبن ذَايس نَّان: "مِين يعْنَا وَانِيتَان؟ ؤُڒَا ذ اَرِّيح ذ ڒبْحَر تْطَاعَان-اَس؟"

وَامِي يُوْوض عِيْسَى غَار وجمَّاض-ين ن ڒبْحَر غَار ثْمُوْرْث ن يجَرِيثِيْين، ڒْقَان-ث-يذ ثْنَاين ن يِوْذَان ذَايْسن جْنُوْن فّْغن-د زݣ يمضْڒَان مَانِي زدّْغن. قسْحن، شَّاثن، وَار يزمَّر حَدّ اَخَاسن يكّ خ وبْرِيذ نِّي. عيّضن نَّان-اَس: "مِين ثخْسذ زَّايْنغ آ مِّيس ن أَربِّـي؟ مَا ثُوْسِيذ-د اَذَانغ ثْعدّْبذ قْبڒ إِ ڒْوقْث؟"
غَار ڒݣّْوَاج شْوَايْت، ذِنِّي يجّن ن ثْحِيمرْث ذ ثَمقّْرَانْت ن يِڒْفَان ثَرْوس. جْنُوْن نِّي تَّارن زِي عِيْسَى نَّان-اَس: "مڒَا ثْسُوْفْغذ-اَنغ، سكّ-اَنغ غَار ثْحِيمرْث-ين ن يِڒْفَان حمَا اَذَايْسن نَاذف." ينَّا-ٱسن عِيْسَى إِ جْنُوْن نِّي: "رُوْحم!" ڒخْدّنِّي فّْغن زِي ثْنَاين نِّي ن يِوْذَان ؤُذْفن ذݣ يِيڒْفَان. ثهْوَا ثْحِيمرْث نِّي مَارَّا ذِي ثيْسَارْث غَار ڒبْحَر مُّوْثن ذݣ وَامَان. يِنِّي يَروّْسن اَروْڒن رُوْحن غَار وبِيلَاج، سُوْفْغن ڒخْبَار ذِنِّي خ مَارَّا مِين يوقْعن ذ مِين يوقْعن إِ يِوْذَان نِّي ذِي دْجَان جْنُوْن. ڒخْدّنِّي فّْغن-د مَارَّا يوْذَان ن وبِيلَاج بَاش اَذ رَاحن اَذ ڒْقَان عِيْسَى. وَامِي ث ࢲْرِين، حشّْمن-ث حمَا اَخَاسن يبعّذ زِي جِّهث نْسن.

Listen to متى 8