 Nuestros sitios Web:   https://awarnarebbi.net/es/   https://www.abridnarrif.net/es/  AwalnArebbi@gmail.com

Ṯamaziɣṯ n Arrif

وَامِي يكمّڒ عِيْسَى ڒُوْصِيَاث إِ ثنْعَاش ن يمحْضَارن نّس، يُوْيُوْر سّنِّي يرُوْح حمَا اَذ يسڒْمذ اَذ يحدّث ذِي ثْندَّام إِي د يُوْذْسن جِّهث نِّي.
وَامِي يَحْيَى اَقَاث ذِي ڒحْبس، ئِسْڒَا خ ڒخْذَايم ن لْمَسِيح. ئِسّكّ شَان يمحْضَارن نّس غَار عِيْسَى حمَا اَذَاس ينِين: "مَا ذ شك إِي خف نتْسْڒَا اَذ د تَاسذ نِغ أَ نْرَاجَا شَان يِجّن نّغْنِي؟"
ئِنْدق-د عِيْسَى ينَّا-ٱسن: "عقْبث غَار يَحْيَى عَاوْذم-اَس مِين تسْڒَام ذ مِين تْوَاڒَام: ئِضَرْغَاڒن تْوَاڒَان، ئِزحَّافن ݣُّوْرن، يِنِّي إِي ذِي يدْجَا جْذَام ݣنْفَان، ئِذهْشُوْرن تسْڒَان، يِنِّي يمُّوْثن تْنكَّرن-د، ڒْمُسَاكِين تْوَابشَّارن. سَّعْذ ن يِنِّي وَار ذَايِي يتْشكِّين شَا."
وَامِي روّْحن يمحْضَارن ن يَحْيَى، عِيْسَى يبْذَا يسَّاوَاڒ خ يَحْيَى يقَّار-اَسن إِ ڒْغَاشِي نِّي: "مِينْخف ثفّْغم اَذ تࢲرم ذِي ڒخْڒَا؟ مَا غَار يج وغَانِيم يتْهزَّا-ث اَرِّيح؟ لَّا! مڒَا لَّا، مِينْخف ثفّْغم اَذ تࢲرم؟ مَا ذ يجّن ن ورْيَاز يَرض اَرُّوْض ذ اَصبْحَان؟ لَّا، يِنِّي إِي غَار يدْجَا وَارُّوْض ذ اَصبْحَان تْعِيشن مْلِيح تِيڒِين ذِي ڒْقُصُوْر ن يزدْجِيذن! مڒَا لَّا، مِينْخف ثفّْغم اَذ تࢲرم؟ مَا ذ يجّن ن نَّبِي؟ قَّارغ-اَوم: وَاه، نتَّا كْتَار زݣ يِجّن ن نَّبِي. ذ يَحْيَى إِي خف يسَّاوَاڒ لْكِتَاب:
أَقَا تْسكِّيغ-د يجّن ن اَرَّسُوْل ينُو زَّاثش،
حمَا اَذَاش يسوْجذ اَبْرِيذ نّش.

أَقَا تسْڒَام ڒْحَقّ: زِي مِين د جِّينْت ثمْغَارِين، وَار يدْجِي حَدّ ذ اَمقّْرَان زِي يَحْيَى، وَلَكِن ونِّي إِي يدْجَان ذ اَمزْيَان قَاع ذِي ڒْمُلْك ن وجنَّا نتَّا ذ اَمقّْرَان زِي يَحْيَى.
زِي ڒْوقْث ن يَحْيَى اَڒ ڒخُّو يوْذَان تمْذحَّاسن اَذ اَذْفن ذِي ڒْمُلْك وجنَّا، يرْيَازن تْمنْغَان بَاش اَغَارْسن يِيڒِي. أَقَا شَّرِيعَا ن مُوْسَى ذ قَاع لْأَنْبِيَا سِّيوْڒن خ ڒْمُلْك وجنَّا حتَّا اَڒ ڒْوقْث ن يَحْيَى. أُو مڒَا ثخْسم اَذ تْفهْمم، يَحْيَى نتَّا ذ نَّبِي إِلْيَاس نِّي إِي نتْرَاجَا. صنّط مْلِيح آ ونِّي يتْسْڒَان.
خ مَانَايَا وِي ذِي غَا شَابّْهغ يوْذَان ن ڒْوقْث-أَ؟ نِثْنِي اَم شَا ن يحنْجِيرن إِي يقِّيمن ذِي سَحَا تْڒَاغَان إِ وَايَاوْيَا قَّارن: نتْصُوْض ذِي ثمْجَا، وَار ثشْضِيحم شَا. نتْعزَّا-كنِّيو، وَار ثتْرُوْم شَا. مِينْزِي يَحْيَى يُوْسَا-د يتْࢲُوْمَّا وَار يسسّ اَمَان ن وضِيڒ، نَّان اَقَا ذَايس جْنُوْن! يُوْسَا-د مِّيس ن بْنَاذم يتتّ يسسّ وَار يتْࢲُوْمِّي شَا، نَّان قَا وَانِيتَا يتتّ يسسّ اَطَّاس، عَاوذ نتَّا ذ اَمدُّوْكڒ ن يعشَّارن ذ يِنِّي يعصَّان. إِنَّمَا، ڒفْهَامث ن أَربِّـي قبّْڒن-تث مَارَّا يِنِّي يفهّْمن."

سّنِّي يبْذَا عِيْسَى يتْعيَّاب ثِندَّام نِّي إِي ذِي يݣَّا اَطَّاس ن لْمُعْجِزَاث نّس، وَار تُوْبن شَا اَيثْبَاب نْسنْت. ينَّا عِيْسَى: "يَا ڒفْضِيحث نّش يَا أَبِيلَاج ن كُوْرَزِيم! يَا ڒفْضِيحث نّش يَا أَبِيلَاج ن بَيْت صَيْدَا! مَعْلِيك لْمُعْجِزَاث-أَ إِي ذَايْوم يوقْعن، وقْعنْت ذِي ثْندَّام ثِعفَّانِين ن صُوْر ذ صَيْدَا، أَتَاف اَيثْبَاب نْسنْت تُوْبن مشْحَاڒ زݣ وَامِي، ئِڒِي ݣِّين اَرُّوْض ن لْحُزن قِّيمن خ يِيغّذ حمَا اَذ د تْبَان تُوْبَا نْسن. خ مَانَاينِّي اَذَاوم ينِيغ: أَقَا ثِندَّام ثِعفَّانِين نِّي ن صُوْر ذ صَيْدَا اَذ يڒِينْت حْسن زَّايْوم ذِي يُوْم لْحِسَاب ذ لْعِقَاب. ئِي شك آي اَبِيلَاج ن كَفرْنَاحُوْم! مَا تْغِير-اَش اَذ تݣَعّْذذ غَار وجنَّا؟ لَّا، قَا شك اَذ تهْوِيذ غَار لْجَحِيم. ڒَاحقَّاش لْمُعْجِزَاث نِّي إِي ذَايش يوقْعن، مْڒِي وقْعنْت ذِي ثنْدِينْت ثَعفَّانْت نِّي ن سَادُوْم، إِڒِي عَاذ اَقَات ذ ثَنْدِينْت اَڒ نْهَارَا. خ مَانَاينِّي اَذَاوم ينِيغ: أَقَا ثَنْدِينْت ثَعفَّانْت نِّي ن سَادُوْم اَذ تِيڒِي حْسن زَّايش ذِي يُوْم لْحِسَاب ذ لْعِقَاب!"

ڒخْدّنِّي يسِّيوڒ عِيْسَى ينَّا: "حمْذغ-شك آ بَابَا آ سِيذِي أَربِّـي ن وجنَّا ذ ثْمُوْرْث ڒَاحقَّاش ثسْنُوْفَّرذ مَانَايَا خ يمِيغِيسن ذ لْعُلَمَا، ثْسظْهَارذ-ث-يد إِ يحنْجِيرن يمزْيَانن. وَاه آ بَابَا، ڒَاحقَّاش اَمُّو إِي خَاك يَارْضَا.
ئِمُّوْش-ٱيِي كُڒْشِي زِي بَابَا. وَار يسِّين حَدّ مِين يعْنَا مِّيس منْغِير بَابَاس. وَار يسِّين حَدّ مِين يعْنَا بَابَاس منْغِير مِّيس. بَابَاس، أَث سّْنن غِير يِنِّي ؤُمِي يخس مِّيس اَذَاسن ثِيذ يسْمظْهَار.
آ يِيْن يُوْحْڒن س دْقڒ إِي ثَرْبُوْم، أَرَحم-د غَارِي مَارَّا كنِّيو نش اَكنِّيو سْريّْحغ. اَرْبُوْث خَاوم ثْزَايْڒُوْت ينُو، ڒمْذث زَّايِي ڒَاحقَّاش نش ذ اَصبَّار، وَار ذَايِي بُو تَّكبُّر. ڒخْدّنِّي اَذ تَافم أَرَّاحث إِ يِيخف نْوم. ڒَاحقَّاش مڒَا ثَرْبُوْم ثْزَايْڒُوْت ينُو نتَّاث اَقَا ثهْوَان، دْقڒ ينُو يفْسُوْس.

Listen to متى 11