Marikuxi 14

Witsimu'ɨa Ketsutsitsie kemɨtiukawiriyarie

(Mar 14:1-11 – Mat 26:2-16, Ruk 22:1-6)

1Merikɨtsɨ huta tukari kaneuyewekaitɨni maye'anikɨ Patsikwa 'ixɨarariya meta paa mɨkakuxanariyarietɨka 'ixɨarariyari. Mawari wewiwamete tewa'aitɨwamete meta 'inɨarikɨ memɨte'ɨkitametetɨkai mekatenikuwautɨwekaitɨni Ketsutsi memɨwiyakɨ me'i'itame mɨpaɨ memɨte'imienikɨ. 2'Ayumieme mɨpaɨ mekaniutiyuanekaitɨni: «Xeikɨa 'ixɨarari xuawekaku hawaikɨ, teɨteri me'uyeha'anikɨ waɨkawa me'uyukuxeɨrienikɨ».

3Hikɨ Wetaniya kiekariyaritsie, mexi mɨkɨ mexatsie 'utikatei Tsimuni kiita kemɨ'ane meripaitɨ nawi kwiniyayari mexeiyakai, hikɨ muwa 'ukaratsi kaninuani teté puteyuyari witsimɨ'ane 'ahanatɨ witsimu'ɨa 'ayemakame kwinimieme mɨraye'axe naaru hɨkɨakamekɨ wewiyakame. Puteyu kɨipieya 'anumuraka, Ketsutsi mu'uyatsie kaneitiyeurieni witsimu'ɨa.

4Hipatɨ mana memɨtanenierekai mɨpaɨ mekaniutiyuanekaitɨni meha'atɨ:

—¿Titayarikuta yakɨ xeikɨa mɨkɨ reuyewe witsimu'ɨa? 5Pɨyɨwekai mɨkɨ waɨkawamekɨ mutuiyanikekai,#14:5 RV60 mɨpaɨ paine mɨkɨ witsimu'ɨa haika tsienituyari 'inɨariyarikɨ heimana yapaɨmemekɨ. tuminiyari memɨmikienikɨ tixaɨtɨ memɨkatehexeiya.

Hikɨ 'ukaratsi mekaniutate'akaitɨni.

6Peru Ketsutsi mɨpaɨ kaniutayɨni:

—Xekeneuhayewa, titayari xete'i'uximatɨa. 'Aixɨa katiniuyurieni nehetsiemieme. 7'Uxa'atɨni warie 'amekaniu'uwakuni tixaɨtɨ memɨkatehexeiya xehetsɨa. Kepauka xemɨyuwaɨriya xekaniyɨwawekuni xemɨwaparewienikɨ, neri xehetsɨa 'anepɨka'uyeikani 'uxa'atɨni warie. 8'Ikɨ ketitakɨ mɨtiyɨwekai mɨpaɨ katiniuyurieni. Ne'ayeyurikaku 'akuxi kaneniukawirieni witsimu'ɨa nemɨkateukienikɨ. 9Yurikɨ mɨpaɨ nepɨxekɨhɨawe, tsepanetɨ hakewa 'ikɨ niuki 'aixɨa manuyɨne mekuxaxatsiwani naitsarie kwiepa, kanitaxatsiemɨkɨ kana'eriwamɨkɨ 'ikɨ 'ukaratsi kemɨtiuyuri.

10Hikɨ Kura 'Itsikariutitanaka, tamamata heimana memɨyuhuta mɨwanɨkai, kaneyani mawari wewiwamete tewa'aitɨwamete wahetsɨa Ketsutsi yetuanike. 11Mɨkɨ me'i'enieka mekaniyutemamawiekaitɨni. Mɨpaɨ mekatenitahɨawe kename tumini me'i'ɨitɨanikekai. Hikɨ mɨkɨ katinikuwaunekaitɨni kepauka 'aixɨa mɨyɨnikekai miyetuanikɨ.

Ti'aitame 'ikwaiya

(Mar 14:12-26 – Mat 26:17-30, Ruk 22:7-23, 1Kur 11:23-25)

12Merikɨtsɨ mexɨakame tukaritsie Paa mɨkakuxanariyarietɨka 'ixɨarariyaritsie, kepauka memɨwakukukuyakai muxatsi tɨrixi Patsikwa 'ixɨarariyari hetsiemieme, teyɨ'ɨkitɨwametemama mɨpaɨ mekatenitahɨawe:

—¿Hakewa matsihenake mana temuhukɨ 'aixɨa temɨtehekuyurienikɨ, Patsikwa 'ikwaiyari pemekwanikɨ?

13Hikɨ yuhutame teyɨ'ɨkitɨwamete kaniwarutanɨ'ani mɨpaɨ tiwarutahɨaweka:

—Kiekaritsie xekenehu, tewi mana pɨxe'anukunake ye'ɨ 'ahanatɨ hekuhanɨka. Mɨkɨ xekenanuweiya, 14hakewa menuani, mɨpaɨ xeketenetahɨawi kiekame: “Ti'ɨkitame mɨpaɨ paine: ¿Hakewa kii mɨkɨ muwa nemɨyɨwe nemɨtiwa'ɨkitɨa wahamatɨa Patsikwa 'ikwaiyari nemɨkwani?” 15Mɨkɨ kii taɨta pɨxeheutiwitɨni pɨxexeitsitɨani kii 'a'uyeyeukame naitɨ 'ureyepikame 'aixɨa tiha'aritɨariekame. Muwa 'aixɨa xeketeneyuri tahetsiemieme.

16Hikɨ mana mekanekɨne teyɨ'ɨkitɨwamete, kiekaritsie mekaneta'axɨani, kemɨtiwarutahɨawixɨ mekateniutaxeiya. Muwa Patsikwa 'ikwaiyari hetsiemieme 'aixɨa mekateniukuyurieni.

17Merikɨte 'ukutaikaireku, Ketsutsi, tamamata heimana yuhutame wahamatɨa yunaitɨ mekaniu'axɨani. 18'Ame'utitekaku metekwakaku, Ketsutsi mɨpaɨ kaniutayɨni:

—Yurikɨ mɨpaɨ nepɨtixekɨhɨawe, xewitɨ xeme, nehamatɨa mɨtikwa'a, pɨnetsiyetuani.

19Hikɨ mekaniyuhiwerietɨkateitɨni, yuxexuitɨ mɨpaɨ mekateniku'iwawiyakaitɨni:

—¿Ne netihɨkɨ?

20Mɨkɨ mɨpaɨ katiniwaruta'eiya:

—Xeme tamamata heimana yuhutatɨ xewitɨ kanihɨkɨtɨni, kemɨ'ane paa manati'ɨwe nehamatɨa 'ikɨ xakɨtsie. 21Yuri Tewi kenemɨtitewa, nepɨyemie nemɨmierienikɨ kemɨre'uxa nehepaɨtsita, perutsɨ xɨa'ui kemɨ'ane mɨnetsiyetuani Yuri Tewi nehɨkɨtɨme. Matsi 'aixɨa kani'anenikeyu xɨka ka'utinuiwake mɨkɨ tewi.

22Hikɨ metekwakaku, Ketsutsi paa kananuku'ɨni 'aixɨa 'utayɨka Kakaɨyari hepaɨtsita paa hepaɨtsita, 'ititaraka paa, kaniwarumini, mɨpaɨ 'utaitɨ:

—Xekenanu'ɨi, 'ikɨ kaninewaiyaritɨni.

23Tekɨxi 'anukuhanaka pamɨpariyutsi 'ipitɨaka Kakaɨyari kaniwaru'itɨani, yunaitɨ mekanenuti'iexɨani mɨkɨ.

24Mɨpaɨ katiniwarutahɨawe:

—'Ikɨ kaninexuriyatɨni, mɨkɨ tɨratu mɨhekwa kanihɨkɨtɨni yumɨireme wahetsiemieme kanitayeurimɨkɨ. 25Yurikɨ mɨpaɨ nepɨtixekɨhɨawe, tawarita kaxie hayari nepɨka'anu'ieni mexi ka'aye'awe kepauka hekwamekɨ nemenu'ieni hakewa Kakaɨyari mɨre'aita.

Ketsutsi kemutayɨ Pekuru kemɨtiyuku'imawanikekai

(Mar 14:27-31 – Mat 26:31-35)

26Hikɨ nɨawari Kakaɨyari hetsɨa mieme me'utikwikaka, mekanekɨne yemuritsie Huriwu Mati'u. 27Ketsutsi mɨpaɨ katiniwarutahɨawe:

―Xeme yunaitɨ xepɨnetsiku'eirieni, mɨpaɨ mɨre'uxakɨ:

»“Nepimieni muxatsi wahɨweme,

hikɨ muxatsi mɨwa'ɨwiyakai mekanitaxɨriexɨakuni”.

28Peru ne'anukukeme, ne meri nepɨyemie Karereyatsie paitɨ».

29Hikɨ Pekuru mɨpaɨ katinitahɨawe:

—Tsepanetɨ yunaitɨ memɨmatsi'uku'eiri, ne hawaikɨ.

30Ketsutsi mɨpaɨ katinitahɨawe:

—Yurikɨ mɨpaɨ nepɨmerahɨawe, 'ikɨ tɨkaritsie wakana 'ukiri hutakɨa katahiwawekaku 'akuxi, 'ekɨ haikakɨa pepɨ'aku'imawani, kename pekanetsimate pe'utaitɨ.

31Pekuru tawarita kwinimieme matsi mɨpaɨ katinita'eiya:

—Tsepanetɨ meuyeweka 'ahamatɨa nemɨmierieni, hatsuaku nepɨkaneku'imawani kename nekamatsimate ne'utaitɨ.

Hipatɨta yaxeikɨa mekaniutiyuani.

Ketsutsi kemɨtiyutanenewi Ketitsemanitsie

(Mar 14:32-42 – Mat 26:36-46, Ruk 22:40-46)

32Hikɨ mekanekɨne Ketitsemani reyetewakaku. Mɨpaɨ katiniwarutahɨawe teyɨ'ɨkitɨwamete: «'Ena xekenekuteni mexi ne nepɨyunenewimie». 33Pekuru, Kakuwu meta Wani kaniwarewitɨni yatewa, hikɨ kanitsutɨani mana haumatɨ meta yuhiwerietɨ. 34Hikɨ mɨpaɨ katiniwarutahɨawe: «Ne'iyaritsie kwinimieme nekaninehiwerieka, mɨkɨkɨ nekanimɨximeni. 'Ena xekeneuyuhayewa meta xekenetaneniereni».

35'Etsiwa huma 'uyaka kaniutihɨximakeni kwiepa hikɨ kanitsutɨani mɨpaɨ tiyunenewietɨ, xɨka tɨmaxɨa tiyɨwenike mɨka'aye'anikɨ kemɨtiyɨnikekai. 36Mɨpaɨ kaniutainekaitɨni: «Ne'ukiyari 'aku, naimekɨ pepɨyɨwe 'ekɨ. Yanepɨra'eriwakaku mɨka'aye'anikɨ kenemɨtikwinitɨarieni, peru kemɨnetinake ne pɨkatixaɨ, 'ekɨ pɨta kemɨmatinake».

37Hikɨ kaninuani teyɨ'ɨkitɨwamete mematitekaitsie, kaniwarutaxeiya mekutsume. Mɨpaɨ Pekuru katiniutahɨawe: «Tsimuni 'aku, ¿petikutsu? ¿Pekatiyɨwekai pemayeniereni xeihurayari? 38Xekenetaneniereni, xekeneyunenewieka kapa 'axaxete'uyurienikɨ xemɨta'inɨatsienitsie. Xe'iyari kaniyuwaɨriyani, peru xewaiyari matsi puwerani».

39Hikɨ hutarieka heyaka kaniyutanenewieni yaxeikɨa 'utaitɨ. 40Tawarita kepauka munua, kaniwarutaxeiyata mekutsume, memɨkayɨwawekaikɨ memayeneniereni kutsikɨ. Mepɨkayɨwawekai kememɨte'ita'eiya. 41Hikɨ hairieka mana nuaka mɨpaɨ katiniwarutahɨawe: «¿Xetekutsu 'akuxi, xete'uxipie? 'Ariri. Paye'ari. Neuxei, Yuri Tewi nehɨkɨtɨtɨ 'axateyuruwamete wamamatsie nepɨyetuiyani. 42Xekenanuku'uti, kɨmɨtɨkari. Kemɨ'ane mɨnetsiyetuani mana kanamieni».

Ketsutsi kemɨtiuwiyarie

(Mar 14:43-50 – Mat 26:14-56, Ruk 22:47-50, Wa 18:3-11)

43Merikɨte 'utaniukakaku 'akuxi yapauka Kura mana kaninuani, tamamata heimana memɨyuhuta mɨwanɨkai. Yuwaɨkawame teɨteri yuhamatɨa kaniwarawitɨkɨkaitɨni 'ixiparate meta kɨyexi mete'u'ɨkame, mawari wewiwamete tewa'aitɨwamete, 'inɨarikɨ memɨte'ɨkitametetɨkai meta 'ukirawetsixi. 44'Iya miyetuanikekai 'inɨari pɨwarutaxatɨakai, mɨpaɨ 'utaitɨ: «Kemɨ'ane ne nemɨtawaɨritɨani 'itsiyakɨ, mɨkɨ kanihɨkɨtɨkamɨkɨ, xekenewiya, xekenanuhani 'aixɨa rehɨakame». 45Hikɨ nuaka yapauka, Kura 'ahurawa kaniuyani Ketsutsi hetsɨa, mɨpaɨ katinitahɨawe: «Ke'aku, Ti'ɨkitame». Hikɨ kani'itseni.

46Hikɨ teɨteri Ketsutsi mekaniuwiya. 47Peru 'ahurawa memɨti'ukai, xewitɨ kaniwatihana yu'ixipara, ti'uximayatame mawari wewiwamete tiwa'aitɨwame hetsɨa mieme, nakaya kanawiteni.

48Ketsutsi mɨpaɨ katiniwarutahɨawe:

—¿Xeme kari xepeyekɨ 'ixiparate meta kɨyexite xete'u'ɨtɨ xenetsiwiyake, kemɨtiwiwiyarɨwa tinawayame? 49Mɨixa xetsata nekaniuyeikakaitɨni tukarikɨ tukita neti'ɨkitatɨ, xepɨkanetsi'uwi. Peru paye'ani 'utɨarika kemaine.

50Hikɨ yunaitɨ mekaniku'eirieni meta mekaniyuta'una.

51Xewitɨ temaikɨ kaniweiyakaitɨni rinu tsawanayarikɨ yu'eimatɨ mɨmawekaikɨ. Temaikɨ mekaniuwiya, 52peru mɨkɨ yutsawana 'uku'eirieka kaniyuta'una mawetɨ.

Ketsutsi kemɨtiutahɨawarie 'itsɨkate wahɨxie

(Mar 14:53-65 – Mat 26:57-68, Wa 18:12-13, 19-24, Ruk 22:67-71)

53Hikɨ mawari wewiwame tiwa'aitɨwame hetsɨa Ketsutsi mekanehana, mana mekaniyukuxeɨrieni mawari wewiwamete tewa'aitɨwamete, 'ukirawetsixi meta 'inɨarikɨ memɨte'ɨkitametetɨkai yunaitɨ. 54Pekuru kaniweiyakaitɨni yatewa mawari wewiwamete tiwa'aitɨwame kiita takwa paitɨ kaninuani. Muwa tehɨwemete wahamatɨa 'akanayerɨni tai 'aurie kɨxetɨ.

55Hikɨ mawari wewiwamete tewa'aitɨwamete meta 'itsɨkate yunaitɨ mekaniwawautɨwekaitɨni hipame memunenierixɨ memɨte'itani Ketsutsi hepaɨtsita, mɨpaɨ hetsiena memɨte'ahɨanikɨ memita'aitakɨ mɨmierienikɨ, peru mepɨyutexietɨwekai. 56Yumɨiretɨ mete'itawatɨ mekanihekɨatakaitɨni kewaniu memɨte'unenierixɨ peru waniuki pɨkayuxewikai. 57Hikɨ hipatɨ me'anuku'uka mekanitahekɨata mete'itawatɨ kememɨte'unenierixɨ waniu, mɨpaɨ me'utiyuatɨ:

58—Tame tekani'enieni 'ipaɨ haineme: “'Ikɨ tuki mamakɨ muwewiya nekanika'unamɨkɨ, meta haika tukari 'anukayayu xeimeta nekanitawewimɨkɨ mamakɨ kawewiyakame”.

59Nimɨpaɨ kememɨtehekɨatakai, waniuki pɨkataxewiriwekai.

60Hikɨ mawari wewiwamete tiwa'aitɨwame wahixɨapa 'utakeka, Ketsutsi kaniuta'iwawiya mɨpaɨ tikɨhɨawetɨ:

—¿'Atsipekatita'ani? ¿Ketitayari mɨya mete'utiyuane 'ikɨ 'ahepaɨtsita?

61Peru Ketsutsi 'atsipɨkahainekai, matsi kayuwatɨ mana kaniuwekaitɨni.

Mawari wewiwamete tiwa'aitɨwame hutarieka mɨpaɨ katinita'iwawiya:

—¿'Ekɨ petikɨritsitu? ¿'Ekɨ 'aixɨa mɨtikuxaxatsiwa petinu'aya?

62Ketsutsi mɨpaɨ katinita'eiya:

—Huu, ne nekanihɨkɨtɨni. Xemeta xekanixeiyakuni Yuri Tewi kenemɨtihɨkɨ, 'ane'akaime Naimekɨmɨtɨrɨkaɨye tserieta, meta haitsata ne'akamiekame taheima.

63Hikɨ mawari wewiwamete tiwa'aitɨwame yukamixa heukatsanaka mɨpaɨ kaniutayɨni:

—Tawariri tepɨkawareuyehɨwa memunenierixɨ. 64Xeme xekani'enieni Kakaɨyari hepaɨtsita ke'axamutayɨ. ¿Kexeteyɨkɨhɨawe?

Mɨkɨ yunaitɨ mɨpaɨ mekaniutiyuanekaitɨni kename mɨpaɨ reuyewekai mɨmierienikɨ. 65Hipatɨ mekanitsutɨani me'iti'aɨtsikawiyatɨ me'inanaimatɨ. Meheikɨhɨaka hɨxiena, mekanitihutsutɨkɨne mɨpaɨ mete'ikɨhɨawetɨ:

—Ketineutahekɨata kemɨ'ane pɨmatsi'uhutsu.

Meta tehɨwemete tsiere mekaneitihutsunakaitɨni.

Pekuru kemɨtiyuku'imawakai nepɨka'imate Ketsutsi 'utaitɨ

(Mar 14:66-72 – Mat 26:69-75, Ruk 22:56-62, Wa 18:16-18, 25-27)

66Hikɨ Pekuru watipaitɨ 'uwekaku kii 'aurie takwa, 'ukaratsi kaninuani mɨti'uximayatametɨkai mawari wewiwamete tiwa'aitɨwame hetsɨa mieme. 67Pekuru 'uxeiyaka kɨxekame, heutaniereka, mɨpaɨ kaniutayɨni:

—'Ekɨta Ketsutsi natsaretitanaka hamatɨa pekaniuyeikakaitɨni.

68Mɨkɨ kaniyuku'imawakaitɨni, mɨpaɨ 'utaitɨ:

—Ne hawaikɨ nepɨka'imate, matsi 'atsinepɨkatimate kepemaine.

Mɨpaɨ 'utayɨka kitenie kananuyeyani. Hikɨ 'ana wakana kaniutahiwa.

69Hikɨ 'iya 'ukaratsi hutarieka 'ixeiyaka kanitsutɨani mɨpaɨ tiwakɨhɨawetɨ mɨkɨ mana memɨti'ukai:

—'Ikɨta xewitɨ wa'iwa kanihɨkɨtɨni.

70Mɨkɨ tawarita kaniyuku'imawakaitɨni.

Yareutewikakuta mɨkɨ mana memɨti'ukai tawarita mɨpaɨ Pekuru mekateniutahɨawe:

—Yurikɨ 'ekɨ xewitɨ mɨkɨ wa'iwa pekanihɨkɨtɨni, kamɨ Karereya kiekame pekanihɨkɨtɨni.

71Hikɨ kanitsutɨani mɨpaɨ 'utaitɨ:

—Kakaɨyari 'axakenetiupitɨani xɨka netiku'itawani, yemekɨ nepaine, tixaɨ mɨkɨ tewi nepɨkamate xemexaxata.

72Kwitɨwa hutarieka wakana kanetahiwa. Pekuru Ketsutsi niukieya kanaye'erieni kemɨtitahɨawixɨ: «Wakana hutarieka katahiwawekaku 'akuxi, 'ekɨ haikakɨa pepɨ'aku'imawani kename pekanetsimate pe'utaitɨ». Hikɨ 'ikɨ naime ra'eriwatɨ kaniutatsuani.

ప్రస్తుతం ఎంపిక చేయబడింది:

Marikuxi 14: hch

హైలైట్

షేర్ చేయి

కాపీ