Matiu 2

Tesol soliwa ti angiha

1*Jises takah leili taon Betlehem ti Judia, lokon ti *Herod masiwi. Lokon ien, tesol seilon ti sai angiha tahia hani Jerusalem. Lato aneso mumuh ti kohot. 2Ape lato kamea, “Ia tetel akaik i takahale masiwi tapein ti teka *Ju? Amite ningahi tehu kohot ti sai angiha i kola takahan ape amite nahima lotuian.”

3Ti tel masiwi Herod hongoa, namilon sihikuk hawane hetekie teka seilon ti Jerusalem. 4I tiloi teka masiwi tuah ti hukuminiai Haeu ma seilon, ma *teka hanaui nauna ti Moses ape i kamei lato, “Tel *Krais i takah tetesol ia?”

5Lato ukek, “Leili taon Betlehem ti Judia masin ti tel kuluiai kakai Haeu taiwen ukek,

6“ ‘Betlehem, taon ti Judia,

o kumahe tehu taon tap axan ti Judia

nake o tetesol tel masiwi i po sohot

ti ngahatiai teka seilon tetak ti *Israel.’ ” (Mic 5:2; 2 Sam 5:2)

7Ape Herod tiloi tesol soliwa ti angiha. I kamei hakokol lato lokon wanen ti tehu kohot sohot. 8Ape i talo lato hani Betlehem i ukek, “Amuto nahiwa ape puas nihehi upia aluini hawanewa tel akaik. Na amuto tunahi, hahongo aliakema nga lehe tin nga nahih lotui i.”

9Muhi kakai Herod ape lato nahih. Ti lato luluainiwa, tehu kohot i sohot alia ape i to neneiniwa aweisalulato hani tataen tesol tel akaik takah. 10Ti lato ningahiwa tehu kohot pate lato amuam hawane. 11Ti lato soh haniwa leili ing, lato ningahi tel akaik ma tel tinan Mary. Lato lokuha lotui tel akaik. Lato heiwa kakulato ape axi i waliko tuah: gol, sanda ma mer, paura tenen poun pate solian. 12Ti leili paxangoalato Haeu hahongo lato ukek, “Kum alia hahani kapi Herod.” Ape lato non aweisal liai alia hani xuxulato.

Josep oxake lato hani texux xux *Igip

13Muhin ti tesol soliwa aliawa, Josep i paxangong. Leili paxangoan tel *engel ti Haeu hone i ukek, “Xahatawa! Waxiwa tel akaik ma tel tinan ape ox haniwa Igip nake Herod i upiup tel akaik lehe i telei. Amuto toa ien atengi tataen na nga hahongo aliakewa amuto.” 14Josep xahat waxi tel akaik ma tel tinan ti ipong tutuen ape lato ox hani Igip. 15Lato to ien atengi tataen Herod mat. Waliko ien i sohot hapoponowi hawane waliko ti Haeu kaxiwen leili pepai tel kuluiai kakaian i ukek, “Nga tiloi ahuti tel Natuk ti Igip.” (Hos 11:1)

Laha telei teka akaik

16Ti Herod tioiwa ka tesol soliwa ti angiha pisiwen i, lon lialu hawane. I hani kakain ahian ti teleiai hatesol akaik wawan ti Betlehem ma xux ti xohixohin, akaik ti ahangun huohu hanima itan. I usima menge tesol soliwa ti angiha ka lato ningahi tehu kohot ahang huohu tamusuen. 17I sohot hapoponowi hawane waliko ti tel kuluiai kakai Haeu, *Jeremaia ukek,

18“Tangitangi lalap ma kinax ti tatahan

i sohot ti tehu taon Rama.

Rakel i tangixi tesol natun.

I watakai laha hasoli i nake tesol natun

mat hatapoen.” (Jer 31:15)

Aliaialato ti Igip

19Muhi matei Herod, tel engel ti Haeu sohot hani Josep ti leili paxangoan lokon ti i Igip. 20I ukek, “Xahatawa, waxiwa tel akaik ma tel tinan ape alia haniwa xux ti Israel pake teka lehe laha telei tel akaik ape laha matewen.”

21Josep xahat waxi tel akaik ma tel tinan ape lato alia hani Israel. 22Tuahe ti Josep hongoa Akilaus kewen totone tel taman Herod masiwi ti Judia, i mamata na i sosoa. Haeu hone ulea i leili paxangoan ka sos haniwa Galili texux xux leili Israel. 23Ape Josep aile tonalato tewau toan Nasaret. I haponowia hawane kakai tesol kuluiai kakai Haeu, lato ukek, “Laha axai i Nasarin.”

ప్రస్తుతం ఎంపిక చేయబడింది:

Matiu 2: ssg

హైలైట్

షేర్ చేయి

కాపీ