Mateo 4

Neg-nikchulidbal nia-sagla Jesús-wilub-takchad

(Marcos 1:12-13; Lucas 4:1-13)

1Tegin Juan tigin Jesús-okchagu, apka-te-cholbal Pab Purpa Nued neg-nikchulidbal Jesús-ches, nia-sagla Jesús-wilub-takegal. 2Tenal teun takalgu, Jesús iba-tulabo mas-kwen-kunchul nanajadgin Jesús kep ukul-itononi. 3Tegin nia-sagla kep Jesúszhe nonimo Jesús-wilub-takegal. Tegin nia-sagla Jesúsga chogal:

—Imi pe Pab-Machile, pe we akwamalga chogo: ‘Maduga pinno.’

4Tegin Jesús niaga chogal:

—¡Chulá! Imi Pab-kartagin nermakal maido:

Tule mas-kunnedginbi kwen tuladijul.

Tenal tulemal Pab-kakapurwa-itogedbal tula-timal.

Dt. 8:3

5Tegin nia-sagla Jerusalén-neg-kwebur-chwilidikidzhe Jesús-ches. Tegin nia-sagla Pabzhe-koled-neg-uwas-pirzhe Jesús-onakwisbal. 6Tegin nia-sagla Jesúsga chogalbal:

—Imi pe Pab-Machile, pe we-akar napche ichomado. Tenal pedin kwen akalguojul. Tenal Pab-kartagin nermakal maido:

Imi Pab Tummad aga e-angelmalga chogo pe-takegal.

Al pe arkwatel, angelmal chugnukwa pe-kanonimalo,

pe melle akwagin nag kolgal.

Sal. 91:11-12

7Tegin Jesús nia-saglaga chogalbal:

—Nabir pe chogendo, tenal Pab-kartagin chogbaldo:

Pe melle Pab-Tummad-wilub-tako.

Dt. 6:16

Al an uwas-pir-akar kwen ichomakojul.

8Teginbal, nia-sagla yal-tummad-pirzhe Jesús-chesbal. Tegin nia-sagla Jesúsbak yal-pir omosgu, nia-sagla ilgwen-oyoal pel-kwapa-nap-naid-ugakche Jesúsga neg-nugu-takleged oyogwis-kual. 9Tegin nia-sagla Jesúsga chogalbal:

—Imi pe an-abir chimtijal, tegin pe Pab Tummadyob an-otummoel, an imis neg-kwebur-an-pega-oyojad, an pel-kwapa pega ukodo.

10Tegin Jesús nia-saglaga chogal:

—Nia-Satanás, pe we-akar pe nema. Pe melle ankin pal yolego. Imi Pab-kartagin nermakal maido:

Pab Tummadbi pe Pab Tummadyob otummogenab,

tegin pe Pab Tummadgabi pe pél immal imakenabbal.

Dt. 6:13

11Tegidgin nia-sagla Jesús-akar tikajul nadzhun. Tenal angelmal Jesúszhe nonimalgu, Jesús-pentanonimalzhun.

Jesús kepe Provincia-Galileagin Pab-igalgin chunmaded

(Marcos 1:14-15; Lucas 4:14-15)

12Tegin Jesús wisgusgu, Juan Bautista oturdaleged-neggin mellejii, Jesús Provincia-Galileaje kannan nadbal. 13Tegin Jesús Nazaret-neg-kweburgin ichejal wis megwisgu, kep Capernaum-neg-kweburzhe nadzhun. Tenal Capernaum-neg-kweburdin mata-kakpal chii, Zabulón tegin Neftalí pukmaladzhik. 14Imi Jesús-Capernaumgin-megnonikid akpene Pab-kaka-palchoged-Isaías akpene chogzhadyob kunoni. Tenal Isaías Pab-kartagin chogzhado:

15Imi Zabulón-nap tegin Neftalí-nap

matazhik chii, Jordán-tiwal-opakal.

Wedin, Provincia-Galilea.

We negdin Judiojulmalad-e-neg.

16Imi we neggin tule-Pab-wichulmalad pukwamal,

tule neg-chichidgin aku immal takedyob.

Tenal tule-walgwen Pab-wisgugal we tulemal-imanoni, kallen-chegagiid neg-otalononikidyob.

Tegin tule-purpal-purkwedanimaladga noed noni,

neg-chichid-yabal neg-talgunonikidyob.

Is. 9:1-2

17Imi teun-akar Jesús tulemalga chunmadi-kual chogal: “Imi Pab-neg-takmaid-wilub omodani-choggu, al pemal aga ulubgin iskuedgin pukib-itogenabmal.”

Jesús machimal-walbake-ua-kamaladzhe kochad ebal naigugal

(Marcos 1:16-20; Lucas 5:1-11)

18Tegin te ibagwengin Jesús Galilea-mata-kakpal pipirmadiidgin, walbo tule-takal aga kwenadbak kunai. Imi we tule-walgwen nug Simón, tegin pimalbal Pedro, tegin Simón-e-urpadin nug Andrés. Tenal we tule-walbogid kusgu e-arpagedbal chakigin ua-kananimal. 19Tegin Jesús tule-walbogwadga chogal:

—An-ai, pe anpak nemalma, ankin turdagal. Imi pe chakigin ua-kadiidyob pe anka tulemal-amigal, ankin turdagal.

20Tegidgin Simón tegin Andrés chaki ebesmalzhun, ilgwen Jesúsbak nadmalzhun Jesúsgin turdagal.

21Tegin Jesús ukin-nadedgin walbo tule-taknatappal aga kalgwenadbak kunaibal. We tule-walbogid Zebedeo-machimal, Jacobo tegin e-urpa-Juan. Tenal we machimal-walbogid aga e-pabbak ulgin chaki nudananimal. Tegin Jesús we machimal-walbogidzhe kochamalmo egin turdagal. 22Tegin we machimal-walbogid ilgwen ul-ebesmal tegin e-pab-ebesmalbal. Tegin machimal-walbogid ilgwen Jesúsbak nadmalmo, Jesúsgin turdagal.

Jesús tulemal-poni-nikmalad-nudajad

(Lucas 6:17-19)

23Tegin Jesús pel-kwapa Provincia-Galileabal pipirmadi-kual. Tenal Jesús Judio-ormaked-negmalgin kakapurwa-nuegangin tulemal-oturdadi-kus. Tegin Jesús Pab-neg-takmaidgin chunmadi-kusbal. Tegin Jesús tule-akal-akal-poni-nikmalad-nudadi-kus tegin tule-yemalad-nudadi-kusbal.

24Tenal Jesús-immal-imajadbal tulemal pel-kwapa-Siria-nap-naid-ugakche Jesús-wisgunonimal. Al tulemal Jesúszhe pel-kwapa tule-akal-akal-poni-nikmalad-cheinonimal, tule-abgan-peyedzhe-nunmamalad, tule-nia-nikmalad, tule-purkwed-nikmalad, tule-abgan-purkwalmalad. Tenal Jesús pel-kwapa we tulemal-poni-nikmalad-nudas.

25Tegin tulemal Provincia-Galileaginmalad, tegin Provincia-Decápolisginmalad, tegin Jerusalénginmalad, tegin Provincia-Judeaginmalad, tegin Jordán-tiwal-opakal-pukmalad Jesúsbak pél irmadmal.

ప్రస్తుతం ఎంపిక చేయబడింది:

Mateo 4: kvn

హైలైట్

షేర్ చేయి

కాపీ