Gn 2
2
1-2A 'a yol waque c'u xmunlj Dios, 'ix b'o 'el'ch satcha'an̈, lum lu'um, yet' smasnil tas 'ay 'a yolyib'n̈q'uinl tic. Ax 'a yucl c'ual, man̈x 'ic munlji yujto b'oncxo smasnil yu'uj. 3'Ix si'n can 'el Dios jun yucl c'u chi yico'oc sec tz'ilj pax eb' 'anma 'a jun c'u cha, yuj yoch swach'loc eb', yujto a 'a jun c'u chi 'aj xb'o 'el'ch smasnil tas yuj Dios.
Adán yet' Eva 'a scal te 'awb'ente 'a Edén
4Atn wal yab'xil tas x'aj sb'o satcha'an̈, yet' lum lum tic. Xb'o 'el'ch satcha'an̈ yet' lum lu'um yuj Jehová Dios. 5Ata', mant 'a junc te te', mant 'a pax c'ultc tzpaq'ui, yujto mant 'a n̈ab' tz'ejm 'a yib'n̈ lum yuj Jehová Dios. Mant 'a pax mach tzmunlj 'a sat lu'um. 6Cojn b'i'an, to 'ay a a tzq'uel 'a yol lu'um, a a tz'a'n yaxb'oc sat lu'um. 7'Ix sb'on Dios jun 'anma'.#Gn 2.7 A jun paxti Adam 'a hebreo, tzyal 'el'chi " 'anma'." 'Ixta yalx 'a jun b'ab'l 'anma', yuj cha, 'ay 'ajtil tzalx Adán, 'ay pax 'aj tzalx 'anma'. A yet' spoccal lum lum 'ix b'o'i. 'Ix yutz'n 'och Dios yic' 'a sn̈i', 'ixta wal x'aj yel yich spitzw 'el 'anma'.
8'Ix yawj pax Jehová Dios jun tzo'n̈ 'awb'ente 'a jun lugar Edén sb'i, 'a stojlal 'aj tzq'uel c'u. Ata 'ix ya'cn 'och Dios win winc sb'o cha. 9'Ix ya'n Jehová q'uib' smasnil te te caw wach' yilx tzyac' sat, te wach' slox sat. Ax 'a scal jun tzo'n̈ xo te 'awb'ente cha, ata 'ay jun te te tz'a'n q'uinal, yet' jun te tz'a'n nachjoc 'el 'aj 'ay tas wach' yet' tas tu'.
10A 'a Edén cha, ata tzpac' jun a a tz'a'n 'och yalil smasnil 'awb'ente'. Ax yic tz'el a 'a Edén cha, chan̈e tz'ajl sc'ab' a'. 11A jun a b'ab'el, Pisón sb'i a', atn a tz'ec' oyyoc 'a stitc lum Havila sb'i, 'a 'aj 'ay q'uen oro. 12A q'uen oro 'ay 'a jun lugar cha, caw chan̈ stojl q'ue'en. Ata 'ay pax jun tzo'n̈ te te 'ay stzatjil, caw su'q'ui sjab' te'. Ata 'ay pax jun tzo'n̈ q'uen q'uen ónice sb'i, caw chan̈ stojol. 13Ax a schab'il, Gihón sb'i a', atn a tic tz'ec' oyyoc 'a lum Cus sb'i. 14Ax a yoxil, Tigris sb'i a', atn a tz'ec' 'a lum lum 'ay 'a stojlal 'aj tzq'uel c'u, atn lum Asiria sb'i. Ax a schan̈il, atn a Éufrates sb'i.
15Xlajw cha, xya'n 'och Jehová Dios win winc 'a scal te 'awb'ente 'a Edén cha, yuj smunlj win 'a 'a, yuj stan̈wni paxi. 16'Ix yaln Dios 'ixtc 'a winac: Tztac' a lon sat te te tic smasnil; 17ax pax te tz'a'n nachjoc 'el tas wach' yet' tas tu', man̈ a lo sat te'. Toto 'oj a lo sat te', wal yel 'oj a chami, xchi Dios 'a winac.
18Xyaln pax Jehová Dios 'ixtic: Man̈ wach'oc 'ayc' win winc sch'ocoj, to 'oj in b'o junc yitb'eym win to smoj tztac' scolwj yet'oc, xchi. 19Smasnil no noc' sb'o Dios 'a sat lum lum tic, no calte'al noc', yet' smasnil no ch'ic, xyij 'at Dios 'a win Adán yic tzya'n 'och win sb'i junjn c'aj no'. A sb'i junjn no xya'ch winac, an̈ja chi 'aych can sb'ic no'. 20'Ix ya'ch win sb'i smasnil no', no calte'al noc', no ch'ic, yet' no cajb'en noc'; palta may junc no x'ilchj to smoj scolwj yet' winac. 21Xlajw cha, xya'n cot Jehová Dios jun niwquil wayn̈ 'a yib'n̈ winac yic chamnc win swayi. 'Ix yi'n 'elt Dios jun sb'acl scostl winac, xlajw cha, 'ix smacn can pax 'aj xyij 'elt cha. 22Atn yet' jun sb'acl scostl win chi sb'o Dios 'ix 'ix. Xlajw cha, xya'n can 'a winac. 23Ax yic xyiln 'och win 'ix, xyaln win 'ixtic:
A jun tic in chib'jal, in b'aquil, yujto a 'ayn x'elt yuj Dios, yuj cha, 'ix#Gn 2.23 A jun paxti winac, " 'ix" tz'aj yalx 'a hebreo, ax jun paxti 'ix, " 'ixaj" 'ixta tz'aj yalxi. 'oj sb'ioc, xchi winac.
24Yuj cha, a eb' winac, yowlal tzyactj can eb' smam snun, sec junxn̈ej tz'ajcn eb' yet' yistzil, 'icha wal to junxn̈ej niwnal tz'ajcn eb' schawn̈il.
25A Adán yet' 'ix yistzil cha, may spichl eb' 'aychi, palta matz q'uixw junjn eb' 'a 'a.
ప్రస్తుతం ఎంపిక చేయబడింది:
Gn 2: CSS
హైలైట్
షేర్ చేయి
కాపీ
మీ పరికరాలన్నింటి వ్యాప్తంగా మీ హైలైట్స్ సేవ్ చేయబడాలనుకుంటున్నారా? సైన్ అప్ చేయండి లేదా సైన్ ఇన్ చేయండి
Biblia Chuj San Sebastian © Sociedades Bíblicas Unidas, 1999.
