Gn 10
10
A eb' yin̈tl eb' yunnal Noé
(1 Cr 1.5-23)
1A jun tic yab'xil eb' yunnal Noé, atn sb'i eb' tic: Sem, Cam yet' Jafet. Yic 'ix lajw 'ec' niwquil owl yaxn̈ab', 'ix laj 'alj yunnal eb'.
2Atn sb'i eb' yunnal Jafet tic: Gomer, Magog, Madai, Javán, Tubal, Mesec, yet' Tiras. 3Atn sb'i eb' yunnal Gomer tic: Askenaz, Rifat, yet' Togarma. 4Atn sb'i eb' yunnal Javán tic: Elisa, Tarsis, Quitim, yet' Dodanim. 5A eb' tic, yin̈tl Jafet eb' smasnil. Ata x'aj cajn eb' 'a stitc a mar, junjn c'aj eb' yet' slu'um, junjn c'aj eb' yet' sti'.
6Atn sb'i eb' yunnal Cam tic: Cus, Mizraim, Fut yet' Canaán. 7Ax eb' yunnal win Cus, atn Seba, Havila, Sabta, Raama yet' Sabteca. Eb' yunnal Raama, atn Seba, yet' Dedán. 8A Cus, smam Nimrod, a Nimrod, a b'ab'l yajl x'aj 'a scal eb' chon̈ab'. 9A Nimrod cha, jeln sma'w noc' 'a sat Jehová, yuj cha, 'ay jun paxti tzyal eb' 'anma 'ixtic: Lajn win 'icha Nimrod, win jeln sma'w noc' 'a sat Jehová, xchi eb'. 10A eb' chon̈b' 'aj yajl yaj Nimrod, 'ix 'el yich yuj 'a Babilonia, 'a Erec, 'a Acad yet' 'a Calne. A 'a yol yic Sinar ata 'ay jun tzo'n̈ chon̈b' cha. 11Xlajw cha 'ix 'at 'a Asiria; ata 'ix sb'o chan̈e xo niwc chon̈ab': atn chon̈b' Nínive, Rehobot-ir, Cala, 12yet' chon̈b' Resén, jun 'aycn 'a snan̈l Nínive yet' Cala. A chan̈e chon̈b' tic, junxn̈ej chon̈b'al x'aji.
13-14A eb' yin̈tl Mizraim atn eb' ludeo, eb' anameo, eb' lehabita, eb' naftuhita, eb' patruseo, eb' casluhita yet' eb' caftorita. A 'a eb' tic, cotnc yin̈tl eb' filisteo.
15-19A win sb'ab'l 'unnal Canaán, atn Sidón. An̈jtona jun tzo'n̈xo eb' tic yin̈tl win Canaán chi eb': eb' hitita, eb' jebuseo, eb' amorreo, eb' gergeseo, eb' heveo, eb' araceo, eb' sineo, eb' arvadeo, eb' zemareo, yet' eb' hamateo. Jab'jnal 'ix pucb't eb'. Xlaj smacnc 'ec' eb' yico'oc jun tzo'n̈ lum lum tic, tzcot lum 'a smon̈jon Sidón, x'emch lum 'a stojlal Gerar, masnto tzc'och 'a Gaza. Tz'atx lum ta', masnto 'a yol yic Sodoma, Gomorra, Adma, yet' Zeboim, tzmeltzj pax lum ta', masnto tzc'och lum 'a chon̈b' Lasa. 20A eb' tic yin̈tl win Cam eb', junjn c'aj eb' yet' yin̈til, junjn c'aj eb' yet' slu'um, junjn c'aj eb' yet' sti'.
21A Sem atn sb'ab'l 'u'tac Jafet, 'ay pax yunnal x'alji, smasnil eb' yin̈tl Heber, ata cotnc yin̈tl eb' 'a Sem. 22Eb' yunnal Sem, atn Elam, Asur, Arfaxad, Lud yet' Aram. 23Eb' yunnal Aram, atn Uz, Hul, Geter, yet' Mas. 24A Arfaxad, atn smam Sala, ax Sala atn smam Heber. 25A Heber 'ay chawn̈ yunnal, Peleg#Gn 10.25 A 'a hebreo, a jun b'i tzcuch Peleg, lajn yab'x yet' jun paxti "pojjb'ail". sb'i jun winac. A 'a yol stiempoal win tic, ata 'ix pucx can 'at eb' 'anma 'a sat lum lum tic. Ax junx yu'tac cha, tzcuch Joctán. 26A Joctán cha, smam Almodad, Selef, Hazar-mavet, Jera, 27Adoram, Uzal, Dicla, 28Obal, Abimael, Seba, 29Ofir, Havila, yet' Jobab. Smasnil eb' tic yunnal win Joctán eb'. 30'Ix can cajn eb' 'a lum lum tzcot 'a Mesa, masnto tzc'och lum 'a Sefar, atn 'a eb' lum jolmctac witz 'a stojlal 'aj tzq'uel c'u. 31Atn eb' tic yunnal Sem, junjn c'aj eb' yet' yin̈til, junjn c'aj eb' yet' slu'um, junjn c'aj eb' yet' sti'.
32Smasnil jun tzo'n̈ 'anma tic, yin̈tl eb' yunnal win Noé, junjn c'aj eb' yet' yin̈til. A yic xlajw can 'ec' jun owl yaxn̈ab' cha, 'ix sactzic can eb', 'ix 'och eb' chon̈b'al 'a yolyib'n̈q'uinl tic.
ప్రస్తుతం ఎంపిక చేయబడింది:
Gn 10: CSS
హైలైట్
షేర్ చేయి
కాపీ
మీ పరికరాలన్నింటి వ్యాప్తంగా మీ హైలైట్స్ సేవ్ చేయబడాలనుకుంటున్నారా? సైన్ అప్ చేయండి లేదా సైన్ ఇన్ చేయండి
Biblia Chuj San Sebastian © Sociedades Bíblicas Unidas, 1999.
