Luke 9
9
1ရာပ်အာလည် ကိုယ်တော်ကော သာဝကဆယ့်နှစ်ယောက်သယ် ကော်ကဲ့အယ် စုလောစီးရန်စန်နော် စိတ်ဆလားဖူမ် အားလုံးနယ် ငါပ်ပူရင်ကွန်းနယ်နောက် ကနာဟာကား တီတ်ဆာဖူမ်နယ် မီမ်ဟာမ်းစီမ်းရင်ငါကာ အခွင့်အာဏာနောက် တန်ခိုးတော်ဖူမ်နယ် အီမာ့။ 2စီးရာပ်သော် ကိုယ်တော်ကော တီတ်ဆာလာပ်သယ် ဘုရားရှင်ငါ သာသနာတော်အကြောင်း ဟောလောတီမ်နောက် အနာရောဂါသည်လာပ်သယ် ကုလောကဲ့အယ်အီတီမ် တပည့်တော်လာပ်သယ် သာပ်လာမ်မာ့။ 3ကိုယ်တော်ကော ဟီမ်နာပ်သယ် “လမ်းဟာ လာမ်မားလည် နီမ်နောက်တူတူ မဟာဟာမ်း လာဝမ်ငါ။ မီမ်တူး၊ ရှီပ်ထောင်၊ ရောက်တီမ်အူတီမ်၊ ဖူး၊ ဆာမ်ဆူန်အပို အင်းမာဖူမ်နယ် လာကဲ့လာမ်ငါ့။ 4တမာကျဥ်းဟာမ်းထာဂါက်ထာ နီမ်နယ် ကြိုဆိုလောဝမ်းနော အင်းမာအရပ်လားအယ် အပူရီနိုက်ဆီ အင်းမာကျဥ်းမားဟာ တည်းလောဟီးလိတ်။ 5တကယ်လို့ မဟာအရပ်လားမာ့ တီတ်ဆာလာပ်ချာန်း ထာဂါက်ထာ နီမ်နယ် ကြိုဆိုလိုးငေါက်သော် အင်းမာအရပ်လားအယ် ပူဟေကာအချိန်နယ် ဟီမ်နာပ်သယ် သတိအီကား အနေနဲ့အယ် နီမ်ငါ သာတဖာပါအာမာ့ ဖူန်နယ် ခါလောလက်aပေးဟီးရီလိတ်” ငေါကဲ့အယ် မိန့်နောမာ့။ 6ဟီမ်နာပ်ရီး ပူဟီးကဲ့အယ် အနယ်နယ် အရပ်ရပ်လား လာမ်ကဲ့အယ် ဘုရားရှင်ငါ မင်္ဂလာသတင်းကလန်ဖူမ်နယ် ဟောလောကဲ့အယ် ရောဂါဝေဒနာ ခံစားလောထော်ကာကာ့တီတ်ဆာလာပ်သယ် ဇလားဟာမ်းစီမ်းဟီးမာ့။ 7ဂါလိလဲလည် အုပ်ချုပ်သောကားကာ ဟေရုဒ်ကော ကိုယ်တော်ယေရှု အောမ်ငါးမှန်သမျှဖူမ်နယ် သပ်မူဝမ်စန်းနော စိတ်ရှုပ်သောကဲ့အယ် လင်းမီမာ့။ မဟာအောမ်ကယ်လိုးငေါနော ကြအာကာ့ တီတ်ဆာလာပ်ကော “ဝေးငဟူပ်ကာမင်္ဂလာ ဆရာယောဟန် အသက်ဆိုင်းဟေကာ” ငေါကဲ့အယ်ဟာမ် ထာဂါက်ထာ၊ 8ကြအာကာ့ တီတ်ဆာလာပ်ကော “ပရောဖက် ဧလိယ ပြန်နောကဲ့ကြွဟေရာမ်” ငေါကဲ့အယ်ဟာမ် ထာဂါက်ထာ၊ ကြအာကော “မယားမား ငါရီကားကာ ပရောဖက်ဖူမ်ပါအာမာ့တစ်ပါး အသက်ဆိုင်းဟေရာမ်” ငေါကဲ့အယ် သပေါက်ညာပ်ချီကယ် ထာမာ့။ 9အင်းညယ်ငေါဝမ်ရီ ဟေရုဒ်ကော “ငါကော ယောဟန်ငါ ဟလာမ်းဟူပ်သယ် သက်တူစ်စီမ် စီရာပ်။ ရာ သတင်းဖူမ် နဲကြီစ်တုန်းရယ် သာပ်မူကားဟီမ်ငေါ ဟင်သယ်” ငေါကဲ့အယ် ကိုယ်တော်လည် ဟောပ်သောကာပ်တင်နီမာ့။ 10တပည့်သာဝကလာပ် ထုတ်ထေစန်နော် ကိုယ်တော်ယေရှုလည် ဟီမ်နာပ်အောမ်မီကားဖူမ်နယ် လျှောက်တင်ဟာမ်ဟီမာ့။ စီးရာပ်သော် ကိုယ်တော်ကော ဟီမ်ငါ တပည့်သာဝကလာပ်သယ်ဟာ ကော်ကဲ့အယ် ဗက်ဇဲဒမြို့ဝါး ကြွလောဟီးရာမ်မာ့။ 11နံတင်းငါးကာ့ တီတ်ဆာဖူမ်ငေါ အင်းမာအကြောင်းနယ် သပ်မူဟီးစန်းနော ကိုယ်တော်ကာ နောက်အား လီရာပ်ချီးမာ့။ ကိုယ်တော်ရီး ဟီမ်နာပ်သယ် ကြိုဆိုလောကဲ့အယ် ဘုရားရှင်ငါ သာသနာတော်အကြောင်းဖူမ်နယ် ဟောလောစီးရာပ်သော် အဇလာရယ် လင်းငါးကာ့ တီတ်ဆာလာပ်သယ် ဇလားဟာမ်းစီမ်းမာ့။ 12နာန်ကြည်ဟန် ထုတ်အီကယ်မာ့ သာဝကတစ်ဆယ့်နှစ်ယောက်ကော ကိုယ်တော်ပါအာ လီကဲ့အယ် “အင်းကာ့အရပ်ကော တီတ်ဆာလာပ် အပေါ်ကာကာ့ အရပ်သယ်မာ့ အင်းကာတီတ်ဆာဖူမ်နယ် အင်းကာနောက် ထံငါးကာ ထိန်ဖူမ်ပါအာ သာပ်လာမ်နိတ်ဆွမ်။ ဟီမ်နာပ်ခနန်း တည်းလောတီမ်နောက် ရောက်တီမ်ဖူမ် လိုလောမာ့ဆွမ်” ငေါကဲ့အယ် လျှောက်တင်နော်ဟီမာ့။ 13အင်းညယ်ငေါဝမ်ရီ ကိုယ်တော်ကော “နီမ် ဟီမ်နာပ်ခနန်း ရောက်တီမ်ဖူမ်ကြအာ အီရာမ်နိတ်” ငေါကဲ့အယ် မိန့်နာန်စန်နော်
ဟီမ်နာပ်ကော “အလေကော် ဟီမ်နာပ်အားလုံးဟနန် ရောက်တီမ်ဖူမ် မီးရာဝိုငေါက်သော် အလေဆူလာပ်အားကော ပေါင်မုန့် ဟာတူနောက် သမ်းငါ ကယ်မာဟာ ငါကယ်မာ့ ဟီမ်နာပ်ခနန်း အီနောပ်ရင်ဟပ်ကားယို” ငေါကဲ့အယ် လျှောက်တင်ဟာမ်မာ့။ 14တီမ်ဆာသာမ်းငေါ ဟော်လောဝါဦးရေ bငါးထောင်ငါမာ့။
ကိုယ်တော်ကော ဟီမ်ငါတပည့်လာပ်သယ် “တီတ်ဆာဖူမ်နယ် တီတ်ဆာအယောက် ငါးဆယ်စီခွဲလောကဲ့အယ် ထောင်းစီမ်းငါမ်နိတ်” ငေါကဲ့အယ် မိန့်နာန်မာ့။ 15တပည့်တော်လာပ်ရီး ကိုယ်တော်ကာ အမိန့်အတိုင်းညယ် တီတ်ဆာလာပ်သယ် ထောင်းစီမ်းငါမ်စန်နော် တီတ်ဆာလာပ်ရီး ထောင်းဟီးမာ့။ 16အင်းမာနောက်သယ် ကိုယ်တော်ကော ပေါင်မုန့် ဟာတူနောက် သမ်းငါ ကယ်မာလည် လာစီးရာမ်စန်နော် ရွှေမြို့တော်ဝါ ယူဟေကဲ့အယ် ဘုရားရှင်ငါ ကျေးဇူးလည် ချီးမွမ်းနောစီးရာမ်စန်နော် ဟီမ်ငါထော်နောက် ပေါင်မုန့်နောက်သမ်းငါလည် လာဆိတ်ကဲ့အယ် တပည့်လာပ်ခနန်း အီကဲ့အယ် တီတ်ဆာလာပ်ခနန်း မန်စီမ်းမာ့။ 17တီတ်ဆာဖူမ်အားလုံးရီး ကြေးကွန်းနယ် ရောက်မူကားပြာန်နယ် ဟီမ်နာပ် ရောက်ကဲ့ကျန်နောကားကာဖူမ်နယ် တပည့်လာပ် မယ်အယ်အယ် စီမ်းနောပေးဟာမ်းငါး ခြင်းတောင်းဆယ့်နှစ်တောင်း ဖိန်းကွန်းနယ် လူဟာမ်းမာ့။ 18ရာပ်အာလည် ကိုယ်တော်ယေရှုတစ်ပါးဟာ ဆုစိမ်ကဲ့အယ် လင်းငါးကာ့ချိန်နယ် ကိုယ်တော်ကာ့တပည့်တော်လာပ်ရီး ကိုယ်တော်နောက်တူတူ ငါကဲ့အယ် လင်းဟီးမာ့။ အင်းမာချိန်နယ် ကိုယ်တော်ကော ဟီမ်နာပ်သယ် “တီတ်ဆာလာပ်ကော ငါလည် ဟင်ငေါကဲ့ ငေါဟီးကားသယ်” ငေါကဲ့အယ် စီမ်ညူဝမ်မာ့။ 19ဟီမ်နာပ်ကော “ကြအာတီတ်ဆာလာပ်ကော ကိုယ်တော်လည် ဝေးငဟူပ်ကာမင်္ဂလာ ဆရာယောဟန် အသက်ဆိုင်းဟေကာ ငေါကဲ့အယ် ငေါဟီးမာ့။ ကြအာကော ပရောဖက် ဧလိယ ပြန်လောကဲ့အယ်ကြွဟေကာ ငေါကဲ့အယ်ရီ ငေါဟီးမာ့။ မယားမားကာ့ ပရောဖက်တစ်ပါး အသက်ဆိုင်းဟေကာ ငေါကဲ့အယ်ရော် ငေါဟီးမာ့” ငေါကဲ့အယ် လျှောက်တင်နော်ဟီမာ့။ 20အင်းမာချိန်နယ် ကိုယ်တော်ကော “နီမ်ငေါ ငါလည် ဟင်မသာပ်သယ်” ငေါကဲ့အယ် စီမ်ညူဝမ်ကယ်မာ့
ပေတရုကော “ကိုယ်တော်ကော ဘုရားရှင် သာပ်လီကားကာ မေရှိယ ထာမာ့” ငေါကဲ့အယ် လျှောက်တင်နာန်မာ့။ 21ကိုယ်တော်ကော အင်းကာ့အကြောင်းရာဖူမ်နယ် ဟင်နယ်ဟာမ်း အငေါတီမ် အားကြီစ်တုန်းရယ် တားလောပေးမာ့။ 22ကိုယ်တော်ကော ဟီမ်ငါတပည့်လာပ်သယ် “တီတ်ဆာကာ့ဆာကော နံတင်းငါးကာ ဒုက္ခဝေဒနာလည် ခံနောထော်ပ်ကား။ ဂျူးလူမျိုး အသက်တုန်းငါးကာ တီတ်ဆာလာပ်၊ ပုရောဟိတ်အကြီးအကဲလာပ်နောက် ကျမ်းထောကား ဆရာဖူမ်ငေါ ဟီမ်နယ် ညာမ်းပယ်လော်ကယ်အယ် ကတ်ရှီးဟိကာ။ အင်းညယ်ငေါဝမ်ရီ ဆွန်းရာပ်မြောက်သောကား မာန်းရာပ်သယ် ဟီမ်ငေါ အသက်ဆိုင်းဟေပ်ကား” ငေါကဲ့အယ် မိန့်နောမာ့။ 23အင်းမာနောက်သယ် ကိုယ်တော်ကော ပရိသတ်သာပ်သယ် “ငါကာ တပည့်တော်ထာကာပ်ကား တီတ်ဆာတိုင်းငေါ ကိုယ်ကျိုးစွန့်နောကဲ့အယ် ကိုယ်ကာ လက်ဝါးကပ်တိုင်နယ် ကိုယ်တိုင်ဖေးcကဲ့အယ် ငါကာနောက်အား မာန်းရာပ်တိုင်း ရာပ်ရင်ငါဟီမ် ထာထော်ပ်ကား။ 24မဟာအောမ်ကယ်လိုးငေါနော ကိုယ်ကာ အသက်သယ် ကယ်လောကာပ်ကာ ဟီမ်နာပ်ကော ဆုံးရှုံးနောထော်ပ်ကား။ အင်းညယ်ငေါဝမ်ရီ ငါကာအတွက်နဲ့အယ် ကိုယ်ကာ အသက်သယ် စွန့်လွှတ်သောကားကာ ဟီမ်ငေါ နိစ္စထာဝရအသက်သယ် လုကား။ 25နီမ်ငေါ ကမ္ဘာပေါ်ဝါးမာ့ အရာအားလုံးနယ် အုပ်စိုးပိုင်ခွင့်လူရီး နိစ္စထာဝရအသက်သယ် အလူဝမ်နော် မဟာအကျိုးငါကားသယ်။ 26နီမ်ငေါ ငါနောက် ငါကာ့ တရားစကားဖူမ်နယ် ညာမ်းပယ်လော်ဝမ်နော် တီတ်ဆာကာ့ဆာကော ဟီမ်ငါ ဘုန်းတန်ခိုးတော်၊ အဝါဘုရားရှင်ငါ ဘုန်းတန်ခိုးတော်နောက် မြင့်မြတ်သောကားကာ့ ဟမန်းနာပ်ကာ့ ဘုန်းတန်ခိုးတော်နောက်တူတူရယ် ကမ္ဘာမြေစုတ်အား ကြွဟာမ်းဟေကာ အချိန်နယ်ရီး နီမ်ငေါ ငါကာတပည့်တော်ဖူမ်ဟီပ်အို ငေါကဲ့အယ် ညာမ်းပယ်လော်ပ်ကာ။ 27နီမ်နယ် ငါအမှန်ငေါထော်ဝမ်နော် အင်းကာနေရား ရပ်သောကဲ့လင်းငါးကာ့ တီတ်ဆာကြအာကော ဘုရားရှင်ငါ သာသနာတော်လည် အယူပ်မူကြီစ် ရှီးဟီးထော်ပ်ကားယို” ငေါကဲ့အယ် မိန့်နောမာ့။ 28အင်းမာညယ် မိန့်နောစီးကဲ့အယ် ရှစ်ရာပ်မာပ်အာမ်မားလည် ကိုယ်တော်ကော ပေတရု၊ ယောဟန်နောက် ယာကုပ်သာပ်သယ် ကော်ကဲ့အယ် ဆုစိမ်တီမ် တောင်ပေါ် စုတ်အား ကြွလာမ်မာ့။ 29ကိုယ်တော် ဆုစိမ်ကဲ့အယ် လင်းငါးကာ့အချိန်နယ် ဟီမ်ငါမီပ်မန်းငေါ ထူးခြားလီကယ်အယ် ဟီမ်ငါ အဝတ်ရီး လူန်းကဲ့အယ် တောက်ပါးလောကဲ့အယ်လင်းမာ့။ 30အင်းမာနောက်သယ် ရုတ်တရာပ် ပရောဖက်မောရှေနောက် ပရောဖက်ဧလိယလာပ်ကော် ကိုယ်ထင်ပြလီကယ်အယ် ကိုယ်တော်နောက် သပေါက်ကဲ့ လင်းဟီးရီမာ့။ 31ဟီမ်နာပ်ကော ဘုန်းတန်ခိုးတော်ဖူမ် ထွန်းလင်းနောစီးကဲ့အယ် ထာရီကိုက်ပန်းငါ့ ဂျေရုဆလင်မြို့ဝါး ကိုယ်တော် အသေခံနောစီးရာနောက် ကိုယ်တော်နောက် ပတ်သက်သောကားကာ ဘုရားရှင်ငါ အစီအစဉ်ငေါ် ပြည့်စုံနီကိုက်ပန် ငေါကားအကြောင်းနယ် သပေါက်ချီးမာ့။ 32အင်းမာအချိန်ငါ ပေတရုနောက် အခြားတပည့်တော် ကယ်ဟောကော အက်မောမ်ကဲ့အယ် လင်းဟီးမာ့။ ဟီမ်နာပ် မင်နီကားနောက် ဘုန်းတန်ခိုးနောက် ပြည့်စုံနော်ကာကာ့ ကိုယ်တော်လည် ယူပ်မူဟီးရာမ်မာ့။ ဟီမ်နာပ်ကော ကိုယ်တော်နောက်တူတူ စာပ်ကဲ့အယ် လင်းငါးကာ့ ပရောဖက် ကယ်ပါးလည်ရာ ယူပ်မူဝမ်မာ့။ 33အင်းမာနောက်သယ် ပရောဖက်မောရှေနောက် ပရောဖက်ဧလိယလာပ် ပူဟာမ်းငါကာ့ချိန်နယ် ပေတရုကော ကိုယ်တော်ယေရှုလည် “ဆရာ၊ အင်းကာနေရား အလေငါကဲ့လင်းမူကာ အလေနန်း မီးမာ့။ ကိုယ်တော်နန်း တဲဟူပ်အာ၊ ဧလိယနန် တဲဟူပ်အာ၊ မောရှေနန်းတဲဟူပ်အာရယ် တဲ့ဆွမ်းဟူပ်စာကဲ့အီကာပ်သမ်မာ့ဆွမ်” ငေါကဲ့အယ် လျှောက်သောပေးမာ့။ အင်းညယ်ငေါဝမ်ရီ ဟီမ်နောက်ဟီမ် မဟာလည် သပေါက်အာမ်မာ့ ငေါကားကာလည်ဟာမ်း မီမ်းဟို။ 34ပေတရု အင်းမာညယ် လျှောက်သောကားကာချိန်နယ် ဟလာမ်းဟီစ်ကြအာကော ဟီမ်နာပ်ကာ့စုတ်အား အရိပ်နောက် အုပ်သောကဲ့အယ် ဟီမ်နာပ်ကော ဟလာမ်းဟီစ်ကာ အရိပ်တောမ်နား ထုတ်အာမ်ကယ်မာ့ တအားတုန်းရယ် ကစာပ်ကယ်အယ် လင်းဟီးမာ့။ 35အင်းမာချိန်နယ် ဟလာမ်းဟီစ်ပါအာအယ် “အင်းကာဟီမ်ငေါ ငါရွေးချယ်လော်ပေကာငါကာဆာ ထာမာ့။ ဟီမ်သပေါက်ကားကာလည် သာပ်ချီးလိတ်” ငေါကဲ့အယ် အသံကြအာ ပေါ်လီမာ့။ 36အင်းမာအသံ ပေါ်လီစီရာပ်သော် ပေတရု၊ ယောဟန်နောက် ယာကုပ်သာပ်ကော် ကိုယ်တော်ယေရှုလည်ဟာ ယူပ်မူဟီးမာ့။ ဟီမ်နာပ်ကော အင်းမာ မာန်းရာပ်ဖူမ်dပါအာ ဟီမ်နာပ် ယူပ်မူရီကားဖူမ်နယ် ဟင်နယ်ဟာမ်း မဟာမ်းအငေါရယ် ဆီမ်ရှင်းရှင်းရယ် လင်းဟီးမာ့။ 37နောက်သယ်ကာ မာန်းရာပ်သယ် ကိုယ်တော်ယေရှုနောက် တပည့်ဆွန်းဟောကော တောင်ပေါ်ဝါးအယ် ဆာပ်လီစန်းနော နံတင်းငါးကာ့ တီတ်ဆာဖူမ်ငေါ ကိုယ်တော်လည် ကြိုဆိုလောကဲ့အယ် လင်းဟီးမာ့။ 38အင်းမာ တီတ်ဆာဖူမ်ပါအာမာ့ ဟော်ဝါကော “ဆရာ၊ ငါဆူကာ့ ဆာလည် ကူညီလောကဲ့အယ် အီတီမ် တောင်းပန်နော်မာ့ဆွမ်။ ဟီမ်ငေါ ငါဆူကာ ဟော်ဝါဟာ ငါကားကာ့ဆာ ထာမာ့။ 39ဟီမ်ပါအာ စိတ်ဆလားကော ဆာမ်ပါတ်သော် ရုတ်တရာပ်ရယ် ရမ်းညာပ်စီရာပ်သော် ဟီမ်ငါ တစ်ကိုယ်လုံး ဆန်နောကဲ့အယ် ဆတူန်းနားအယ်ရီ ဆပေါ့ပ်ဖူမ် ပူရီဟာမာ့။ အင်းမာစိတ်ဆလားကော ဟီမ်နယ် ကနာကွန်နယ် အောမ်ကဲ့အယ် ဟီမ်ပါအာအယ်ရား ပူရီရားမာ့။ 40ငါဆူကော ဆရာကာ့ တပည့်လာပ်သယ် အင်းမာ့စိတ်ဆလားလည် ငါပ်ပူကဲ့အီတီမ် တောင်းပန်နော်ရီမာငေါရီး ဟီမ်နာပ်ကော ငါပ်ပူဟီးရင်နို” ငေါကဲ့အယ် လျှောက်တင်နော်မာ့။ 41အင်းမာချိန်နယ် ကိုယ်တော်ကော တပည့်တော်လာပ်သယ် “နီမ်ငေါ ယုံကြည်မှုရီးအပေါ်ရယ် အပြစ်ဒုစရိုက်ဖူမ်နယ်ဟာ အောမ်ကဲ့အယ် လင်းငါးဟီမ်နာပ်၊ ငါကော နီမ်နောက်တူတူ မနေမာပ်ကွန်းနယ် လင်းမောက်ကဲ့အယ် သည်းခံနော်ထော်ပ်ကားသယ်” ငေါကဲ့အယ် မိန့်နောမာ့။ စီးရာပ်သော် ကိုယ်တော်ယေရှုကော အင်းမာဟီမ်နယ် “နာန်ငါဆာလည် ငါပါအာကော်ရီလိတ်” ငေါကဲ့အယ် မိန့်နောမာ့။ 42အင်းမာ ဆဟာလီကားကာ့ချိန်နယ် စိတ်ဆလားကော အင်းမာဆဟာလည် ကာစုတ်အား လှာတလေးကဲ့အယ် ဟီမ်ငါတစ်ကိုယ်လုံးနယ်ရီ အားကြီစ်ရယ် ဆန်နောကဲ့အယ် လင်းစီမ်းမာ့။ အင်းညယ်ငေါဝမ်ရီ ကိုယ်တော်ကော စိတ်ဆလားလည် ငါပ်ပူကဲ့အယ် ဆဟာလည် ကုလောကဲ့အီစီးရာမ်စန်နော် ဟီမ်ငါအဝါပါအာ အပ်သောဟာမ်းမာ့။ 43တီတ်ဆာဖူမ်ငေါ ဘုရားရှင်ငါ တန်ခိုးတော်အနန္တလည် ဖူးလောဟီးမူကယ် အန်းနောကဲ့အဆွန်ညယ် လင်းဟီးမာ့။
ကိုယ်တော်ယေရှု အောမ်ငါးကာဖူမ်နယ် တီတ်ဆာဖူမ် အန်းနောကဲ့ လင်းငါးကာ့ ချိန်နယ် ကိုယ်တော်ကော ဟီမ်ငါတပည့်လာပ်သယ် 44“နီမ်နယ် ငါငေါကားဖူမ်နယ် ကလန်မယ် သပ်ချီးလိတ်။ တီတ်ဆာကာ့ဆာကော အကလန်ငါ တီတ်ဆာလာပ်ကာ့ထော်ဝါး သစ္စာဖောက်သောကား ခံနောထော်ကိုက်ပန်” ငေါကဲ့အယ် မိန့်နောမာ့။ 45တပည့်တော်လာပ်ကော ကိုယ်တော်ယေရှုငေါကာပ်ကာ အဓိပ္ပာယ်လည် နားလည်လော်ဟီရီယို။ မဟာအောမ်ကယ်လိုးငေါနော အင်းမာအဓိပ္ပာယ်လည် ပီးကူပ်ပေကာသယ်မာ့ တပည့်တော်လာပ်ကော နားလည်လော်ဟီရီယိုငေါရီး ကိုယ်တော်လည် စီမ်ညူတီမ် ကစာပ်ကယ်အယ် လင်းဟီးရီမာ့။ 46အင်းမာနောက်သယ် ဟီမ်ငါတပည့်လာပ်ကော် ဟီမ်နာပ်ပါအာ ဟင်ကြီးမြတ်ထာမ်ဆုံးထာမာ ငေါကားလည် စားလောကဲ့အယ် ညာမ်းနောကဲ့အယ် လင်းဟီးမာ့။ 47အင်းညယ်ငေါဝမ်ရီ ကိုယ်တော်ယေရှုကော ဟီမ်နာပ် မညယ်တွေးလောကဲ့အယ်လင်းမာ့ ငေါကားလည် မီမ်းဟော်ကယ်မာ့ ဆဟာဟော်ဝါလည် ဟီမ်ငါနဘေးရား စာပ်စီမ်းကဲ့အယ် 48တပည့်လာပ်သယ် “ငါကာအတွက်နောက် အင်းကာဆဟာလည် လက်ခံနောကား ဟီမ်နာပ်ကော ငါလည်လက်ခံနောကားဟီမ် ထာမာ့။ ငါလည် လက်ခံနောကားဟီမ်ငေါ ငါလည်သာပ်လီကားကာ့ အရှင်နယ် လက်ခံနောကားဟီမ် ထာမာ့။ နီမ်ပါအာ ကိုယ်နောက်ကိုယ် နှိမ့်ချလောဟန်ဆုံး ဟီမ်ငေါ ဘုရားရှင်ငါမန်းနား အကြီးမြတ်ထာမ်ဆုံးထာမာ့” ငေါကဲ့အယ် မိန့်နောမာ့။ 49စီးရာပ်သော် ယောဟန်ငေါ် “ကိုယ်တော်၊ ကိုယ်တော်ကာ နာမ လည် သုံးနောကဲ့အယ် တီတ်ဆာလာပ်ပါအာအယ် စိတ်ဆလားလည် ငါပ်ပူကားကာ တီတ်ဆာဟော်ဝါလည် အလေဆူလာပ် ယူပ်မူရီမာ့။ အင်းမာဟီမ်ငေါ အလေဆူလာပ်နောက်တူတူ လီရာပ်ကားဟီမ် ဟီပ်အိုသယ်မာ့ အင်းမာညယ် အအောမ်တီမ် တားလီမာ့” ငေါကဲ့အယ် လျှောက်တင်နော်မာ့။ 50ကိုယ်တော်ယေရှုကော “ဟီမ်နယ် တားလာမ်ငါ့။ နီမ်နယ် အဆန့်ကျင်နော်ရယ် လင်းငါးကာဟီမ်ငေါ နီမ်နယ် ထောက်ခံနောကားဟီမ်ထာမာ့” ငေါကဲ့အယ် မိန့်နောမာ့။ 51ကိုယ်တော်ယေရှုကော ရွှေမြို့တော်ဝါ ကော်ကားခံနောတီမ် အချိန်ငေါ် ထံပီပ်သယ်မာ့ ဟီမ်ငေါ ဂျေရုဆလင်မြို့ဝါး လာမ်တီမ် ဆုံးဖြတ်သာမ်မာ့။ 52ဟီမ်ငေါ စေတမန်ကြအာလည် ရှမာရိပြည်သားလာပ်ပါအာ အရာမ်ဆုံး သာပ်ကဲ့အယ် ဟီမ်ဟနန်း အရာမ်သင့် ပြာန်နောစီမ်းမာ့။ 53အင်းညယ်ငေါဝမ်ရီ ကိုယ်တော်ကော ဂျေရုဆလင်မြို့ဝါးဟာ ဦးတည်လောကဲ့အယ် လာမ်ငါးသယ်မာ့ ရှမာရိ ထိန်နာပ်ကော ကိုယ်တော်လည် လက်ခံနော်ဟီရီယို။ 54ယာကုပ်နောက် ယောဟန်eနာပ်ကော အင်းမာအကြောင်းနယ် သာပ်မူဝမ်စန်းနော “အရှင်၊ အလေဆူလာပ်ကောf ဟမောက်စုတ်အားကာ့ ဝမ်နယ် လက်လီစီမ်ကယ်အယ် ဟီမ်နာပ်သယ် ပျက်စီးလောကွန်းနယ် ဘုရားရှင်ပါအာ လျှောက်သာမ်ထော်ပ်ကားနာန်” ငေါကဲ့အယ် လျှောက်တင်နော်ဟီမာ့။ 55ကိုယ်တော်ကော ဟီမ်နာပ်ပါအာ မန်းကဲ့အယ် ဆုံးမားလာမ်မာ့။ 56အင်းမာနောက်သယ် ကိုယ်တော်နောက် ဟီမ်ငါတပည့်တော်ဖူမ်ငေါ အခြားထိန် ထိန်ငါပါအာ ပူပေးဟီးရာမ်မာ့။ 57ကိုယ်တော်နောက် တပည့်တော်လာပ် လာမ်ငါးကာ့ လမ်းခရီးပါအာ တီတ်ဆာဟော်ဝါကော ကိုယ်တော်လည် “ငါဆူကော ကိုယ်တော်ကြွလောကား နေရာတိုင်းငါး လီရာပ်ခနာ့ဆွမ်” ငေါကဲ့အယ် လျှောက်သောမာ့။ 58အင်းမာချိန်နယ် ကိုယ်တော်ယေရှုကော “ကြည်ဆောဒ်သာပ်ပါအာကော် လင်းတီမ် ထွာမ်ငါမာ့၊ နူစ်နူဖူမ်ပါအာကော် ရှလက်ဖူမ်ငါမာ့။ အင်းညယ်ငေါဝမ်ရီ တီတ်ဆာကာ့ဆာပါအာကော် ဟလာမ်းချလောတီမ် နေရာဟာမ်းအပို” ငေါကဲ့အယ် မိန့်နောမာ့။ 59ကိုယ်တော်ယေရှုကော အခြားတီတ်ဆာဟော်ဝါလည် ဟီမ်နောက်တူတူ ရာပ်တီမ် ကော်ဝမ်စန်းနော အင်းမာဟီမ်ငေါ “အရှင်၊ ငါဆူကာ ကျဉ်းမာ အရာမ်ဆုံး လာမ်ဟာမ်းတီမ် ခွင့်အီကဲ့အယ်ဆွမ်။ ငါဆူကာ အဝါ ရှီးစီးကဲ့အယ် ဟီမ်နယ် ဂူနားစာန်းစီးရာပ်သော် အရှင်ငါနောက်အား လီရာပ်ခနာပ်ဆွမ်” ငေါကဲ့အယ် လျှောက်တင်နော်မာ့။ 60အင်းမာချိန်နယ် ကိုယ်တော်ယေရှုကော “ကိုယ်ခန္ဓာရှီးကားကာ့ တီတ်ဆာလာပ်သယ် အင်းမာနေရားမာ့ စိတ်ဝိညာဉ်ရှီးကဲ့လင်းငါးကာ့ တီတ်ဆာလာပ် ဂူနားစာန်းဟီးစာမ်နိတ် နာန်ငေါ ဘုရားရှင်ငါ သာသနာတော်အကြောင်းနယ် တီတ်ဆာလာပ်သယ် ဟောလောလိတ်” ငေါကဲ့အယ် မိန့်နောမာ့။ 61အခြားဟော်ဝါရီး “အရှင်၊ ငါဆူကော အရှင်ငါနောက်အား လီရာပ်ကာဆွမ်။ အင်းညယ်ငေါရီး ကျဥ်းမာအရာမ် လာမ်ဟာမ်းကဲ့အယ် ငါဆူကာကျဥ်းရှိတ်သာပ်သယ် နှုတ်ဆက်ခွင့် အီကဲ့အယ်ဆွမ်” ငေါကဲ့အယ် လျှောက်တင်နော်မာ့။
62ကိုယ်တော်ကော “ထွန်တုံးနယ် အောမ်းကဲ့အယ် နောက်အာ ယူဟာမ်းဟာကာ့ ဟီမ်နာပ်ကော ဘုရားရှင်ငါ သာသနာတော်ပါအာ အမှုတော်အောမ်တီမ် ထိုက်တန်နို” ငေါကဲ့အယ် မိန့်နောမာ့။
ప్రస్తుతం ఎంపిక చేయబడింది:
Luke 9: ktpv-rv
హైలైట్
షేర్ చేయి
కాపీ
మీ పరికరాలన్నింటి వ్యాప్తంగా మీ హైలైట్స్ సేవ్ చేయబడాలనుకుంటున్నారా? సైన్ అప్ చేయండి లేదా సైన్ ఇన్ చేయండి
This translation of the Kanan Bible is © 2024 by DMS-Dhamma Mate Swe Association. It may not be reproduced in whole or in part in any form or by any means without the prior written permission of DMS-Dhamma Mate Swe Association.
