Luke 10
10
1စီးရာပ်သော် ကိုယ်တော်ကော အခြားတပည့်တော် ခုနစ်ဆယ်aလည် ရွေးလောစီးရာပ်သော် ကယ်ဟောတစ်တွဲစီ တွဲလောကဲ့အယ် ကိုယ်တော်ကြွလာမ်ကားကာ့ မြို့ဖူမ်၊ ထိန်ဖူမ်ပါအာ ကြိုလောကဲ့အယ် သာပ်လာမ်မာ့။ 2တပည့်တော်လာပ်သယ် အသာပ်ကြီစ် ကိုယ်တော်ကော ဟီမ်နာပ်သယ် အင်းကာညယ် မိန့်နောမာ့။ “ငါလည် လက်ခံနောကဲ့အယ် ယုံကြည်လောတီမ် အရာမ်သင့် ထာကယ်အယ် လင်းငါးကာ တီတ်ဆာဖူမ် နည်းကြီစ်ရယ် ငါမာ့ငေါရီး ဟီမ်နာပ်ပါအာ မင်္ဂလာသတင်းကလန်နယ် ဟောလောတီမ် တီတ်ဆာဖူမ်ငေါ နည်းလောမာ့။ အင်းမာဟီမ်နာပ်ရီး လှပ်တီမ် အရာမ်သင့် ထာကယ်အယ် လင်းငါးကာ မာပ်တင်းငါးကာ လက်ပါးကွင်းနောက် တူလောမာ့။ အင်းညယ်ငေါဝမ်ရီ အင်းမာလည် လှပ်တီမ် အလုပ်သမားဖူမ်ငေါ် လုံလောက်တို။ အင်းသယ် အင်းမာဖူမ်နယ် လက်ပါးကွင်းရှိတ် ဘုရားရှင်ပါအာ ဟီမ်ငါလက်ပါး အလုပ်သမားဖူမ် ပိုလောကဲ့အယ် သာပ်ကဲ့အယ် အီတီမ် ဆုစိမ်ဟီးလိတ်။ 3ရာ လာမ်ဟီးလိတ်။ ငါ နီမ်နယ် သာပ်လာမ်ငါးကော ရက်စက်သောကဲ့အယ် ကြမ်းနောကားကာ ပေါက်ခါကြည်သာမ်းပါအာ သိုးဆဟာဖူမ်နယ် သာပ်လာမ်ကယ်ညယ် အန္တရာယ်နောက် ကြုံနောထော်ပ်ကား။ 4ဖူးရှီပ်ထောင်၊ ရှီပ်ထောင်၊ ဟပ်တီမ်းအပို အင်းမာဖူမ်နယ် လာဟီရာမ်ငါ့။ လမ်းတုန်းငါးရီး တီတ်ဆာလာ့ပ်သယ် နှုတ်ဆက်သောကဲ့အယ် အချိန်ဆွန်စီမ်ငါ့။ 5နီမ် ကျဥ်းကျဥ်မာပါအာ ဆာမ်မန်းနော ‘အင်းကာကျဥ်းမားကာ့ တီတ်ဆာတိုင်း ငြီမ်းချမ်းနောစာန်ညုပ်’ ရယ် အရာမ်ဆုံး ငေါလိတ်။ 6အင်းမာကျဉ်းမား လင်းငါးဟီမ်နာပ်ကော ငြီမ်းချမ်းနောကားလည် လာကာပ်ကား ဟီမ်နာပ်ထာဝမ်နော် ဟီမ်နာပ် လူဟိကာ။ အင်းညယ်ငေါဝမ်ညီ အလာကာပ်ပန်းနော နီမ် ဆုစိမ်ကဲ့အယ် အီကားကာ့ ငြီမ်းချမ်းနောကားလည် ဟီမ်နာပ်လူဟိကာယို။ 7နီမ်ငေါ ကျဉ်း ကျဉ်မာပါအာဟာ လင်းကဲ့အယ် ကျဉ်းရှိတ်သာပ် နောပ်ကားလည် ရောက်ချီးလိတ်။ မဟာအောမ်ကယ်လိုးငေါနော အလုပ်အောမ်ငါးဟီမ်ငေါ လုပ်အားခလည် လူထိုက်သောမာ့။ ကျဉ်း ကျဉ်မာစီးကျဉ်မာ့ လည်လော်ညာပ်ချီရာ့။ 8မြို့တစ်မြို့ပါအာ ဆာမ်ပါတ်သော် အင်းမာမြို့ဝါးကာတီတ်ဆာလာပ် နီမ်နယ်ကြိုဆိုလောဟီးရန်းနော ဟီမ်နာပ် အီနောပ်ကားလည် ရောက်ချီးလိတ်။ 9အင်းမာ့မြို့ဝါးမာ့ အဇလာကာ့တီတ်ဆာဖူမ်နယ် ကုလောကဲ့အယ် အီစီးရာပ်သော် ‘ဘုရားရှင်ငါ သာသနာတော် နီမ်ပါအာ ထုတ်အီတီမ် အချိန်ထံပီပ်’ ငေါကားလည် နီမ်နယ် ငါမီမ်းဟော်စီမ်ကာပ်မာ့ ရယ် ဟီမ်နာပ်သယ် ငေါဟီးလိတ်။ 10အင်းညယ်ငေါဝမ်ရီ မြို့ပါအာကာတီတ်ဆာဖူမ်ငေါ နီမ်နယ် အကြိုဆိုလောဝမ်းနော လမ်းတုန်းငါပူကဲ့အယ် 11‘နီမ်နယ် သတိအီကား အနေနယ်အယ် အလေကာ သာပါအာမာ့ ဖူန်မှုန့်ဖူမ်နယ် နူမ်လက်ပေရီပ်ကား။ အင်းမာပြာန်နယ် ဘုရားရှင်ငါ့ သာသနာတော် ထွန်းကားလောတီမ်အချိန်ထံပီပ်’ ငေါကဲ့အယ် ငေါဟီးရီလိတ်။ 12နီမ်နယ် ငါငေါကားကော တရားစီရင်နောကား မာန်းရာပ်ထုပ်ပီပ်သော် အင်းမာမြို့ဝါးမာ့ တီတ်ဆာလာပ်ကော သောဒုံမြို့bဝါးကာ တီတ်ဆာလာပ်ကာ ထက်သယ် ပိုလောကဲ့အယ် အပြစ်ဒဏ်စီရင်နောကား ခံနောထော်ပ်ကားထာမာ့” ငေါကဲ့အယ် မိန့်နောမာ့။ 13“အို ခေါရာဇိန်မြို့သားလာပ်၊ နီမ်ငေါ ဒုက္ခရောက်သောဟီးကိုက်ပန်း။ ဗက်ဇဲဒမြို့သားလာပ်ရီ အင်းမာတိုင်းမန်း ဒုက္ခရောက်သောဟိကာ။ မဟာအောမ်ကယ်လိုးငေါနော နီမ်ပါအာ ပြလီကာကာ့ အန်းနောမီးကား နိမိတ်လက္ခဏာဖူမ်နယ် တုရုမြို့နောက် ဇိဒုန်မြို့cဖူမ်ပါအာဟာ ပြလီမာ့ငေါက်သော် အင်းမာမြို့ဝါးကာ့ တီတ်ဆာလာပ်ကော မယားမားအယ် လျှော်တေအဝတ်dဖူမ်နယ် ဖူမ်၊ သာပ်ကပေါ့ပ်ပါအာ ထောင်းကဲ့အယ် နောင်တ လူဟီးရီပ်ကား။ 14တရားစီရင်နောကား အချိန်နယ်ရီး နီမ်ငေါ တုရုမြို့နောက် ဇိဒုန်မြို့ဖူမ်ထက်သယ် ပိုလောကဲ့အယ် အပြစ်ဒဏ်စီရင်နောကား ခံနောဟီးထော်ပ်ကား။ 15ကပေရနောင်မြို့သားလာပ်၊ နီမ်ငေါ ရွှေမြို့တော်ပါအာ ချီးမြှောက်သောကား ခံနောထော်ပ်ကား ငေါကဲ့အယ် ကိုယ်ကာနောက်ကိုယ် မသပ်ကဲ့အယ် လင်းဟီးကားလေး။ ဟီပ်ယို။ အင်းမာအစား နီမ်ငေါ မရဏနိုင်ငံပါအာ သက်ဆာမ်ငါ ခံနောထော်ပ်ကား” ငေါကဲ့အယ် မိန့်နောမာ့။ 16အင်းမာနောက်သယ် ကိုယ်တော်ကော တပည့်လာပ်သယ် “နီမ်သပေါက်ကားလည် လက်ခံနောကားဟီမ်ငေါ ငါလည် လက်ခံနောကားဟီမ် ထာမာ့။ နီမ်နယ် လက်အခံနော်ကာဟီမ်ငေါ ငါလည်လက်အခံနော်ကာ ထာကယ်အယ် ငါလည်လက်အခံနော်ကာဟီမ်ငေါ ငါလည် သာပ်လီကားဟီမ်နယ်ရီး လက်အခံနော်ကာဟီမ်ထာမာ့” ငေါကဲ့အယ် မိန့်နောမာ့။ 17အချိန်နည်းနည်းဟာ မာပ်အာမ်စန်းနော တပည့်တော် ခုနစ်ဆယ်ကော ဆကောက်စာပ်ရယ် လီဟာမ်းဟီးကဲ့အယ် “ကိုယ်တော်၊ အလေဆူကော စိတ်ဆလားလာပ်သယ် ကိုယ်တော်ယေရှုကာ့ နာမတော်လည် သုံးနောကဲ့အယ် အမိန့်အီရာမ်စန်းနော ဟီမ်နာပ်ကော သပ်ချီးမာ့” ငေါကဲ့အယ် လျှောက်တင်နော်ဟီမာ့။ 18ကိုယ်တော်ကော “မာရ်နတ်ကော ဟမောက် ရှီသပ်လီကယ်ညယ် ဟမောက်စုတ်အားအယ် လက်လီကာလည် ငါယူပ်မူရီမာ့။ 19င ငါကော နီမ်နယ် အဆိပ်ငါကားကာ ကဖူးဆိုးလောဖူမ်နောက် ကတ်မြှီးကောက်ဖူမ်ညယ်ကာ စိတ်ဆလားဖူမ်နယ် ကောင်ကလည်ရင်ကဲ့အယ် အလေကာ့ ရန်သူထာကာ့ မာရ်နတ်ကာ့ တန်ခိုးအကုန်လုံးနယ် နားရင်ငါကာ အခွင့်အာဏာလည် အီပေးစီးရာပ်သယ်မာ့ မဟာဟာမ်း နီမ်နယ် ထိခိုက်သောကွန်းနယ် အောမ်ရင်ဟပ်ကားဟီပ်ယို။ 20အင်းညယ်ငေါဝမ်ရီ နီမ်နယ် စိတ်ဆလားလာပ် နာခံနောမာ့ ငေါကားဟာနောက်ကော ပျော်လောကဲ့အယ် လင်းဟီးရာ့။ အင်းညယ်ငေါဝမ်ရီ နီမ်ငါနံမယ်ဖူမ် ရွှေမြို့တော်ဝါ ရေးမှတ်သောပေးကားလည် ခံနောမူကာလည်ဟာ ပျော်လောဟီးလိတ်” ငေါကဲ့အယ် မိန့်နောမာ့။ 21အင်းမာချိန်ငါ ကိုယ်တော်ယေရှုကော ဉာဏ်အလင်းတော်နောက် ပျော်လောကယ်မာ့ “ရွှေမြို့တော်နောက် ကမ္ဘာပေါ်ဝါးမာ့ အရာအားလုံးနယ် အုပ်စိုးလောကားကာ အဝါဘုရား။ အရှင်ငေါ် ရွှေမြို့တော်ပါအာမာ့ အကြောင်းအရာဖူမ်နယ် ကိုယ်ကာနောက်ကိုယ် ပညာငါကဲ့အယ် ဉာဏ်ပညာ ထက်မြက်သောမာ့ မသပ်ချီးကား တီတ်ဆာလာပ်သယ်ကော အင်းကာအမှန်တရားလည် အမီမ်းဟော်ရင်ကွန်းနယ် ပီးကူစ်ပေကယ်အယ် အယ်ဟာဆဟာလာပ်ညယ် ကိုယ်ကာနောက်ကိုယ် နှိမ့်ချလောဟာကာ တီတ်ဆာလာပ်သယ်ကော မီမ်းဟော်စီမ်ကယ်မာ့ ဘုရားရှင်ငါ ကျေးဇူးတော်လည် ချီးမွမ်းနောမာ့ဆွမ်။ အဝါဘုရားရှင် အလိုငါကယ်မာ့ အင်းကာညယ် ထာရီထော်လားလည် ငါဆူ မီမ်းဟော်မာ့။ 22အဝါဘုရားရှင်ငေါ် ငါဆူနန်း အရာအားလုံးနယ် ပေးအပ်သောပေးမာ့။ အဝါဘုရားရှင်ငါ ဆာ ဟင်ထာမာ့ ငေါကားကာလည် အဝါဘုရားတစ်ပါးဟာနိုက် မီမ်းဟော်ကာ။ အဝါဘုရားရှင် ဟင်ထာမာ့ ငေါကားကာလည်ရီး အဝါဘုရားရှင်ငါ ဆာနောက် ဟီမ်ရွေးလောပေးကားကာ ဟီမ်နာပ်ကာပန်းနယ် ဟင်ဟာမ်းမီမ်းဟို” ငေါကဲ့အယ် သပေါက်မာ့။ 23အင်းမာနောက်သယ် ကိုယ်တော်ကော ဟီမ်ငါ တပည့်လာပ်ပါအာ မန်းကဲ့အယ် “ရာ့ နီမ်ယူပ်မူခွင့် လူကားဖူမ်နယ် ယူပ်မူခွင့်လူကား တီတ်ဆာဖူမ်အားလုံး ကံကလန်ဟီမာ့။ 24နီမ်နယ် ငါအမှန်ငေါထော်ဝမ်နော် မယားမားကာ့ ပရောဖက်သာပ်နောက် ဘုရင်နာပ်ကော နီမ်ယူပ်မူခွင့် ငါကယ်ညယ် ယူပ်မူဟီးကာပ်ရီ ယူပ်မူဟီးရီယို။ နီမ်သာပ်မူကားဖူမ်နယ် သာပ်မူဟီးကာပ်ရီ သာပ်မူဟီးရီမူဝိုး” ငေါကဲ့အယ် မိန့်နောမာ့။ 25ရာပ်အာလည် ကိုယ်တော်ကော တီတ်ဆာပရိသတ်သာပ်သယ် ဟောပြောလောကဲ့အယ်လင်းမားလည် ကျမ်းထောကား ဆရာဟော်ဝါကော ကိုယ်တော်လည် စမ်းသပ်သောကာပ်ကယ် “ဆရာ၊ နိစ္စထာဝရအသက်eသယ် လူကွန်းနယ် မဟာဖူမ်အောမ်ထော်ပ်ကားသယ်” ရယ် ယုတ်ကဲ့အယ် စီမ်ညူဝမ်မာ့။ 26အင်းမာအချိန်နယ် ကိုယ်တော်ကော “မောရှေကာ့ ပညတ်ကျမ်းပါအာ မညယ်ရေးလောပေးကားသယ်၊ အင်းမာဖူမ်နယ် နာန်မညယ်နားလည်လော်သယ်” ငေါကဲ့အယ် ပြန်နောကဲ့အယ် စီမ်ညူဝမ်စန်းနော 27အင်းမာဟီမ်ငေါ “နီမ်ငါ အရှင်ထာကာကာ့ ဘုရားရှင်နယ် ကိုယ်၊ စိတ်၊ နှလုံးသုံးပါးစလုံးနောက် မူမ်းနိတ်။ ကိုယ်လည် ကိုယ်မူမ်းကယ်ညယ် နာန်ငါကျဥ်းဖာန်ကျဥ်းဟက်သယ် မူမ်းနိတ်ရယ် ရေးလောပေးမာ့” ငေါကဲ့အယ် ပြန်နောကဲ့ လျှောက်တင်ဟာမ်မာ့။ 28ကိုယ်တော်ရီး “မှန်နောမာ့။ အင်းမာညယ်တိုင်း အောမ်မန်းနော နာန်ငေါ အနိစ္စထာဝရအသက်သယ် လူဟပ်ကား” ငေါကဲ့အယ် မိန့်နောမာ့။ 29အင်းညယ်ငေါဝမ်ရီ ကျမ်းထောကားဆရာကော် ကိုယ်နောက်ကိုယ် မှန်ကန်နောမာ့ ငေါကားလည် ပြလောကာပ်ကယ်မာ့ ကိုယ်တော်ယေရှုလည် “အင်းညယ်ငေါက်သော် အလေဆူလာပ်ကာ့ ကျဥ်းဖာန်ကျဥ်းဟက်ငေါကားကော ဟင်နာပ်သယ်” ငေါကဲ့အယ် စီမ်ညူဝမ်စမ်းနော 30ကိုယ်တော်ယေရှုကော “တစ်ခါလည် တီတ်ဆာဟော်ဝါကော ဂျေရုဆလင်မြို့ပါအာအယ် ယေရိခေါမြို့ပါအာ လာမ်ငါးကာ့လမ်းမား ဓမြလာပ်နောက် ဟော့ပ်သောမာ့။ အင်းမာဓမြလာပ်ကော် ဟီမ်ငါ အဝတ်ဖူမ်နောက် ငါကားဖူမ်အားလုံးနယ် လာဆနန်ကယ်အယ် ဟီမ်နယ်ရီး ရှီးဟတ်စာပ်အာမ်ကွန်းနယ် သမ်းကလယ်စီမာလည် ကာပ်ပူဟီးရာမ်မာ့။ 31ဂျူးပုရောဟိတ် ဟော်ဝါကော အင်းမာလမ်းတိုင်းလီကားအချိန်နယ် ဒဏ်ရာဖူမ်နောက် သလေးကဲ့အယ်လင်းငါး အင်းမာဟီမ်နယ် ယူပ်မူရီး အခြားလမ်းပါအာအယ် ရှောင်နောကဲ့အယ် လာမ်ပေးဟာမ်းမာ့။ 32အင်းမာတိုင်းညယ် လေဝိအနွယ်ဝင်f တီတ်ဆာဟော်ဝါရီး အင်းမာနေရား ထုတ်အီမားလည် ဟီမ်နယ်ယူပ်မူရီး တခြားလမ်းပါအာအယ် ရှောင်နောကဲ့အယ်လာမ်ပေးမာ့။ 33အင်းညယ်ငေါဝမ်ရီ အင်းမာနေရာပါအာ လမ်းဟာပူရီကား ရှမာရိလူမျိုး ဟော်လောဝါဟော်ဝါကော ဒဏ်ရာဖူမ်နောက် တလေးကဲ့အယ် လင်းငါးကာ့ ဟီမ်ငါကားနေရား ထုတ်အီကဲ့အယ် ဟီမ်နယ် ယူပ်မူဝါမ်စန်းနော စာန်တင်ကယ်မာ့ 34ဟီမ်ငေါ အင်းမာဟီမ်ပါအာ လာမ်ကဲ့အယ် အင်းမာဟီမ်ငါ ဒဏ်ရာလည် စပျစ်ဝိုင်ဖူမ်နောက် လောက်စာပ်ကဲ့အယ် ဖောစီးရာမ်စန်နော် သံလွင်ဆလောနောက် မောကဲ့အီစီးမားလည် ဟူမ်စနောက် ပတ်သောကဲ့အီရာမ်မာ့။ စီးရာပ်သော် ဟီမ်ငါ မြည်းစုတ်အား သာမ်ကဲ့အယ် ဟီမ်တည်းလောကားနေရား ကော်ဝမ်မာ့။ အင်းမာတည်းခိုလောကားကာ့နေရား ထုတ်အာမ်စန်းနော အင်းမာ ကနာကယ်အယ် လင်းငါးကာဟီမ်နယ် ပြုစုလောကဲ့အီမာ့။ 35နောက်သယ်ကာ့ မာန်းရာပ်သယ် ဟလာမ်းလားဝမ်စန်နော် ဟီမ်ငေါ ဟီမ်တည်းလောကားနေရာရှိတ်သယ် ဒေနာရီဒင်္ဂါးgကယ်ပြား အီကဲ့အယ် ‘အင်းကာ့ ကနာကဲ့လင်းငါးကာ့ဟီမ်နယ် စီစ်ချာ စောင့်ရှောက်သောကဲ့အီကဲ့အယ်။ ဟီမ်နယ် လေးအောမ်ကဲ့အယ် အင်းကာ့ထက်သယ် ဆွန်မာငေါက်သော် ငါလီဟာမ်းမားလည် အီဟာမ်းနာပ်’ ရယ် ငေါပေးရီမာ့” ငေါကဲ့အယ် ထာမာ့။ 36စီးရာပ်သော် ကိုယ်တော်ယေရှုကော အင်းမာ့ ကျမ်းထောကား ဆရာလာပ်သယ် “အင်းမာတီတ်ဆာ ဆွန်းဟောပါအာမာ့ ဓမြတိုက်ခံနောထော်ကာ့ဟီမ်ငါ ကျဥ်းဖာန်ကျဥ်းဟက် အစစ်ကော ဟင်ထာမာ့ မသပ်သယ်” ငေါကဲ့အယ် စီမ်ညူမာ့။ 37အင်းမာ ကျမ်းထောကား ဆရာကော် “ဟီမ်နယ် စာန်တင်ကယ်အယ် ကူညီလောကဲ့အီကားဟီမ် ထာမာ့” ငေါကဲ့အယ် ဖြေလောဟာမ်းမာ့။ ကိုယ်တော်ယေရှုကော “နာန်ရီး လာမ်ကဲ့အယ် အင်းမာတိုင်းရယ် အောမ်နိတ်” ငေါကဲ့အယ် မိန့်နောမာ့။ 38အင်းမာနောက်သယ် ကိုယ်တော်ကော တပည့်လာပ်နောက်တူတူ ဆက်သောကဲ့အယ် လမ်းဟာလာမ်ငါးအချိန်နယ် ထိန် ထိန်ငါပါအာ ထုတ်ချီးရာမာ့။ အင်းမာထိန်းငါး မာသကော်ကားကာ ယာပ်ရှီဟော်ဝါကော ကိုယ်တော်နောက် ဟီမ်ငါတပည့်လာပ်သယ် ဟီမ်ငါကျဥ်းမာ ဖိတ်သောမာ့။ 39ဟီမ်ပါအာ မာရိကော်ကားကာ နရှီဟော်ဝါ ငါမာ့။ မာရိကော ကိုယ်တော်ယေရှုကာ သာပဲရား ထောင်းကဲ့အယ် ကိုယ်တော် ဟောလောကား တရားတော်ဖူမ်နယ် သပ်ကဲ့အယ်လင်းမာ့။ 40မာသကော နှာမ်နာပ်ခနန်း ဧည့်ဝတ်အောမ်တီမ် အလုပ်ရှုပ်သောကဲ့ လင်းမာ့။ နောက်ဆုံးငါးကော မာသကော ကိုယ်တော်ပါအာ ထံကဲ့အယ် “ကိုယ်တော်၊ ငါဆူကာ့ နရှီကော် အလုပ်ဖူမ်အားလုံးနယ် ငါဆူဟော်ဝါဟာ အောမ်ထော်ကွန်းနယ် သက်ပေးကားကော မှန်နို။ အင်းသယ် ငါဆူလည် ကူညီလောကဲ့အယ် အီတီမ် ဟီမ်နယ် ငေါကဲ့အယ် အီစာမ်းဆွမ်” ငေါကဲ့အယ် လျှောက်သောမာ့။ 41အင်းမာချိန်နယ် ကိုယ်တော်ကော “မာသ၊ မာသ၊ နာန်ငေါ အမှုကိစ္စဖူမ်ဟနန်း စိုးရိမ်နော်မာ့ 42အင်းညယ်ငေါဝမ်ရီ အမှန်တကယ် အရေးကြီးလောကားကော ကြအာဟာနိက်ငါကား။ မာရိကော အင်းမာလည် အောမ်တီမ် ရွေးလောပေးစီးရာပ်သယ်မာ့ အင်းမာအရာလည် ဟီမ်ပါအာအယ် ဟင်ဟာမ်း လာပူကဲ့အယ် လူရင်စောမန်း” ငေါကဲ့အယ် မိန့်နောမာ့။
ప్రస్తుతం ఎంపిక చేయబడింది:
Luke 10: ktpv-rv
హైలైట్
షేర్ చేయి
కాపీ
మీ పరికరాలన్నింటి వ్యాప్తంగా మీ హైలైట్స్ సేవ్ చేయబడాలనుకుంటున్నారా? సైన్ అప్ చేయండి లేదా సైన్ ఇన్ చేయండి
This translation of the Kanan Bible is © 2024 by DMS-Dhamma Mate Swe Association. It may not be reproduced in whole or in part in any form or by any means without the prior written permission of DMS-Dhamma Mate Swe Association.
