UBWANDILO 4
4
Kaini na Abeli
1Popapo Adamu alinkummanya unkasi gwake, Eva, umwene alinkwambilila ikifuba, alinkumpapa Kaini, alinkuyoba alinkuti, “Nubutuli bwa Ntwa Kyala mbapile umundu.” 2Panyuma po alinkumpapa ugwamyabo gwa Kaini uyu ali yo Abeli. Umwene Abeli yo ali ntimi gwa ng'osi, loli Kaini yo ali ndimi gwa migunda. 3Bo pagonilepo Kaini alinkuntwalila Untwa ilikemo lya ifi fyafumile mbulime bwake; 4#Hib 11.4yope Abeli alinkuntwalila ing'osi isya kwanda ukupapigwa mu ntimo gwake kangi namafuta. Umwene Untwa Kyala alinkwikyela na Abeli palikimo nikemo lyake; 5loli alinkusita nukwikyela na Kaini, nalinga lyo ikemo lyake. Po lelo Kaini alinkukalala fiyo, alinkwiluka na kumaso. 6Untwa alinkundalusya Kaini alinkuti, “Ngimba ukalele fiki? Gwilwike fiki kumaso? 7Linga ubombile inunu, kali ifyeni fyako kikabagila ukuya kisangalufu? Loli linga utikubomba inunu, ubutulanongwa bukusigile pakifigo; bukukulonda ugwe, loli fikuti ubulambikege.”
8 #
Mat 23.35; Luk 11.51; 1 Yoh 3.12 Popapo Kaini alinkuyoba kwa Abeli unnuguna gwake alinkuti, “Oko, tubuke ku lukubo.” Lelo bo bali ndukubo, Kaini alinkwenda nukungoga unnuguna gwake Abeli. 9Popapo Untwa alinkundalusya Kaini alinkuti, “Ali kugu Abeli unnugunago?” Umwene alinkumwamula alinkuti, “Ngamanya kuno aliko, ngimba une ne ndi gwakundindilila ugwamyitu?” 10#Hib 12.24Umwene Untwa alinkundalusya alinkuti, “Ubombile sya fiki? Ilopa lya gwamyinu likukolela kumyangu ukufuma pakisu. 11Popapo lilino uli ngunigwa pakisu iki kyaseme itolo ukwambilila kumyako ilopa lya nnugunago. 12Apa linga kulima umfu ikisu kitisakukupaga imboto; kwisakuyaga mundu uyu ikubeta itolo unsita buyengo pakisu.” 13Popapo Kaini alinkuyoba kuNtwa Kyala alinkuti, “Ulufundo lwangu lo lukulumba fiyo, ngamanya nukulutola. 14Keta, umusyugu ungagilemo nkisu; kangi ngabagila nukuya nkyeni mmyako nikwifisaga itolo; nisakuyaga mundu uyu ikubeta uyu linga ikunyaga une isakungoga.” 15Popapo Untwa Kyala alinkumbula alinkuti, “Nayumo atisakukugoga. Uyu linga ikungoga Kaini yo bisakumbukisyangapo kahano na kabili.” Untwa alinkubikapo ikimanyilo, ukuti nayumo angisakungogaga apa linga amwagile. 16Popapo Kaini alinkusokako ku Ntwa, alinkwakwitugala nkisu kya Nodi,#4.16 Nodi: ko kuli kwendeneleka. kubusokelo isuba bwa ngunda gwa Edeni.
Abanduyungu lwa Kaini
17Popapo Kaini alinkummanya unkasi gwake, alinkuya nikifuba, alinkupapa umwana undumyana, yo alinkumpa ingamu yo Enoki. Kaini alinkuyenga akaya akakulumba, alinkukapa ingamu ya mwanake Enoki. 18Popapo Enoki alinkumpapa Iradi; yope Iradi alinkumpapa Metushaeli, umwene Metushaeli alinkumpapa Lameki. 19Lameki alinkwega abakikulu babili; yumo ali yo Ada ingamu, unnine ali yo Zila. 20Ada alinkumpapa Yabali, uyu bafumilemo abandu aba bikwitugala mmahema, aba bali nimitimo gya ng'ombe. 21Ugwamyabo ali yo Yubali ingamu, uyu bafumilemo bosa aba bikukuba amapango na malonge. 22Umwene unkasi gwake Zila yo alinkumpapa Tubalikaini umposi gwafibombelo fyosa ifya kikuba nifya kyela. Ilumbu gwa Tubalikaini ali yo Naama ingamu.
23Popapo Lameki alinkubabula abakasi bake bo babili alinkuti,
“Ugwe Ada na Zila,
pilikisya ilisyu lyangu mwe bakasi ba Lameki,
amutegege imbulukutu bo nikuyoba.
Nungogile umundu papo umwene amfulesya une,
ena nungogile untubwa papo umwene angomile une.
24 #
Mat 18.22
Linga Kaini bikumbukisyapo kahano na kabili,
po Lameki bisakumbukisyangapo amalongo mahano na mabili pamwanya mahano na mabili (77).”
Abanduyungu lwa Seti
25Popapo Adamu alinkummanya unkasi gwake kangi; umwene alinkupapa umwana undumyana, alinkumpa ingamu iya Seti. Popapo alinkwinogona alinkuti, “Kyala anyimikile umwana uyungi mbuyo bwa Abeli, namanga Kaini alingogile.” 26Yope na Seti alinkupapa umwana undumyana, yo balinkumpa ingamu ya Enoshi. Nkabalilo kalakala po abandu balinkwanda ukwiputa ku Ntwa.
ప్రస్తుతం ఎంపిక చేయబడింది:
UBWANDILO 4: NNBII
హైలైట్
షేర్ చేయి
కాపీ
మీ పరికరాలన్నింటి వ్యాప్తంగా మీ హైలైట్స్ సేవ్ చేయబడాలనుకుంటున్నారా? సైన్ అప్ చేయండి లేదా సైన్ ఇన్ చేయండి
BAIBULO INONGWA INUNU © Bible Society of Malawi, 2017.
